O Le Uluai Faaaliga: Ua Faaali le Tama ma le Alo ia Iosefa Samita

“Sa ou vaaia ni Tagata se toalua e le mafaamatalaina lo laua mamalu ma lo laua pupula, o tutu mai i ou luga ae i le ea. Sa fetalai mai le tasi o i laua ia te au, ma sa ia tau lou igoa ma fetalai mai a o tusi ane lona aao i le tasi— O Lou Atalii Pele lenei. Faalogo ia te Ia!”

Mai le Soifuaga o Iosefa Samita

Ina ua mavae le maliu ma le toetu o Iesu Keriso, na faasolo lava ina lautele le salalau o le liliuese. Na teena ma fasiotia Aposetolo a le Faaola, na faaleagaina Ana aoaoga, ma na aveesea le perisitua a le Atua mai le lalolagi. Na muai folafola mai e le perofeta anamua o Amosa se taimi o le liliuese ma le pouliuli faaleagaga: “O loo faapea mai le Alii o Ieova, Faauta, e oo mai aso ou te tuuina atu ai le oge i le nuu; e le se oge i mea e ai, po o se galala i le fia inu vai, a o le oge i le faalogologo i afioga a Ieova. Latou te feoai e pau mai i le tasi vasa e oo atu i le isi vasa, e pau mai i le itu i matu e oo atu i le itu i sasae latou te feoai ai e sailiili atu ai le afioga a Ieova, a e le maua” (Amosa 8:11–12).

O se tasi o i latou na sailia le upu a le Alii na leiloa mai le lalolagi, o Iosefa Samita, o se alii talavou e nofo i le aai maotua o Palamaira, Niu Ioka, i le 1820. O Iosefa o se alii talavou malosi ma le tiotio, e paepae lona tino, enaena vaivai lona lauulu, ma lanumoana ona mata, o le lona lima o le fanau e toasefulutasi i le aiga o Iosefa Samita Matua ma Lusi Maki Samita. Na ia galue mo ni taimi uumi e fesoasoani ai i lona tama ma uso matutua e tatuu i lalo laau ma toto meaai i le faatoaga a lo latou aiga e selau-eka ma e mafiafia ai le tele o laau. Mai le faamatalaga a lona tina, o ia “o se tamaitiiti e matuai filemu, ma agalelei,”¹ o le sa “sili atu ona manatunatu loloto ma suesue loloto” nai lo se isi lava o ona uso ma tuafafine. ² Sa galue le taulealea o Iosefa e fesoasoani e tausi lona aiga, ma o lea sa mafai ai ona maua e ia na o sina aoaoga aloaia lava na iloa ai le faavae o le faitau tusi, tusitusi, ma le numera.

I lea vaitaimi, na sosolo vave atu i itu uma o le itulagi o Niu Ioka i sisifo lea sa nonofo ai le aiga o Samita se agaga naunautai mo mataupu faalelotu. Na auai le au Samita, e pei lava o le toatele o isi, i lotu ma sauniga faaevagelia a lotu Kerisiano i le eria. A o auai atu i ai nisi o lona aiga i se tasi o lotu, e le i auai Iosefa. Mulimuli ane, sa tusia ai e ia e uiga i lenei taimi:

“Na oo ina matuai uunaiina lo’u mafaufau e uiga i popolega sili ona taua mo le manuia o lo’u agaga faavavau, lea na taitai ai a’u ou te suesue i tusitusiga paia, ma talitonu, e pei ona aoaoina a’u, o loo i ai le afioga a le Atua. O lo’u faaaogaina la o nei mau ma lo’u matua iloa lelei o na ituaiga o lotu eseese na oo mai ai ia te a’u le matua maofa tele, aua na ou iloa ai latou te le i faaalia le matagofie o la latou galuega o le faatuatua e ala i le amioatua ma talanoaga tatau e talafeagai ma mea o loo i ai i totonu o tusitusiga paia. O se faanoanoaga tiga lea i lo’u agaga. …

“Na ou mafaufau loloto i le tele o mea i lo’u loto e uiga i le tulaga o le lalolagi o tagata—o fefinauaiga ma fevaevaeaiga, o le agasala ma le amioleaga, ma le pouliuli lea na faapogisaina ai mafaufau o tagata. Na oo ina matua mafatia lo’u mafaufau, aua na oo ina ou lagonaina le maasiasi ona o a’u agasala, ma e ala i le suesue i tusitusiga paia na ou iloa ai e le i o mai tagata i le Alii, ae na latou liliuese mai le faatuatuaga moni ola, ma e le i ai se faalapotopotoga po o se ituaiga na fausia i luga o le talalelei a Iesu Keriso e pei ona faamaumauina i le Feagaiga Fou, ma na ou lagona ai lo’u matua faanoanoa mo a’u lava agasala ma agasala a le lalolagi.”³

O le suesuega a le alii talavou o Iosefa Samita na taitaia ai o ia i le vao e fesili atu ai i le Atua mo le poto na ia manaomia. O le tali i lana tatalo, na faaalia mai ai le Tama i le Lagi ma Iesu Keriso ia te ia, ma tatalaina ai le ala mo le toefuataiina mai o le talalelei i aso e gata ai. O lenei taualumaga ofoofogia o loo faamatalaina i upu faigofie ae mamana a Iosefa Samita.

Aoaoga a Iosefa Samita

O le sailiiliga a Iosefa Samita mo le upumoni na aoao mai ai o le suesue i tusitusiga paia ma le tatalo faatauanau e ala mai ai faaaliga.

Iosefa Samita—Talafaasolopito 2:5, 7–13: “Na tupu ai se fefinauaiga i mataupu tau lotu, i le mea sa matou nonofo ai. Na amata i le lotu Metotisi, ae na iu lava ina faalauteleina atu i ituaiga lotu uma sa i ai i lena itu o le atunuu. E moni lava, sa matua auai tagata uma o lea itu o le atunuu i lea fefinauaiga, ma sa faapotopotoina ai tagata e toatele i vaega eseese ua tofu ma taofi i mataupu tau lotu, ma sa faatupuina atili ai le vevesi ma le fevaevaeai o tagata, sa alalaga nisi, “Faauta, o iinei!” a o isi, “Faauta, o iila!” Sa finau nisi mo le faatuatuaga faalelotu Metotisi, ae sa finau isi mo le lotu Peresipeteriana, ma sa faapea foi ona finau isi mo le lotu Papatiso. …

“O le taimi lena ua savalia ai le sefululima o ou tausaga. Sa talai mai le lotu Peresipeteriana i le aiga o lou tama, ona liliu ai lea o le toafa o i latou i lena lotu; o lou tina o Lusi, o ou uso o Ailama ma Samuelu Haresoni, ma lou tuafafine o Sofaronia.

“Sa ou matua mafaufau loloto lava i aso o lea fefinauaiga tele, ma sa ou atuatuvale tele ai; ae ui ina sa matua loloto ou mafaufauga ma ootia soo, ae sa ou le auai i se tasi o ia lotu uma, peitai sa ou auai i nisi o a latou sauniga i le tele o taimi sa ou avanoa ai. Sa oo ina tau liliu atu ou mafaufauga i le lotu Metotisi, ma sa ou tau manao ai e au faatasi ma i latou; ae ona o le faanunununu ma le fefinauai tele o lotu eseese, sa faigata ai i se tagata laitiiti e pei o au, ma le le masani i tagata ma le tele o mea, ona maua se tonu po o ai ua sao, a o ai ua sese.

“Sa matua faaatuatuvaleina lou mafaufau i nisi o taimi, ona o le faateleina o le vevesi o fefinauaiga. Sa matua tetee lotu Peresipeteriana i le lotu Papatiso ma le lotu Metotisi, ma sa faaaoga e tagata lotu Peresipeteriana le malosi atoa o ala faalemafaufau ma le faafilosofia e faamaonia ai le sese o le lotu Metotisi ma le lotu Papatiso, pe ia manatu ai foi tagata e sese ia lotu. Ae sa maelega malosi foi le lotu Papatiso ma le lotu Metotisi e taumafai e faamautuina a latou mataupu, ma fai atu e sese mataupu ma taofi o isi lotu uma.

“O le taulotoaiga o lea tauaiupuga ma le lasi o taofi na ou faapea ifo ai ia te au lava: O le a se mea e ao ina ou faia? O ai o nei lotu uma ua sao; po o ua sese i latou uma? Afai foi ua sao se tasi o i latou, o le fea, ma pe faapefea foi ona ou iloa?

“A o ou suesue ma mafaufau e tusa ai ma ia tulaga faigata ua mafua mai fefinauaiga a tagata o ituaiga lotu eseese, sa ou faitau ai i le tasi aso i le Tusi a Iakopo, mataupu muamua, a o le fuaiupu e lima, e faapenei: Ae afai ua leai se poto i so outou, ina ole atu ia i le Atua, o le foai tele mai i tagata uma, ma le le toe tautaua; ona foaiina mai lea ia te ia.

“E leai se isi lava mau mai tusitusiga paia na matua ootia ai se loto o se tagata i le mana malosi nai lo le ootia o lou loto i lea mau i lea lava taimi. Sa foliga mai na matua ootia ma faagaeetia ai lou lava loto. Sa oo ina ou mafaufau pea lava i ai ma lou iloa, afai e i ai se tagata na te manaomia le poto mai le Atua, o au lava lea; aua sa ou le iloa le mea e tatau ona fai, ma a le mafai ona ou maua se poto e sili atu nai lo le poto na ia te au i lena lava taimi, o le a ou le iloaina lava; aua sa matua eseese malamalamaaga o faiaoga o lotu eseese i se mau e tasi mai tusitusiga paia, sa matua faafaigata ai lava ona tapa i le Tusi Paia mo se tonu.

“Sa iu ina oo ifo i lou mafaufau le tonu e faapea—e lua mea e ao ina ou filifili i ai, o lou nofo ai pea i le pouliuli ma le fenumiai, po o lou faia e pei ona faatonu mai e Iakopo, o le ole atu lea i le Atua. Sa oo ina tonu ia te au ou te “ole atu i le Atua” ma lou manatu afai na te foaiina fua mai le poto ia i latou ua leai se poto, ma le le toe tautaua, o le a ou taumafai i ai.”⁴

Sa laveaiina Iosefa Samita mai le mana o le fili o le amiotonu uma.

Iosefa Samita—Talafaasolopito 2:14–16: “O lea e tusa ma le mea ua tonu ia te au o le ole atu lea i le Atua, sa ou alu atu ai loa i le vao ou te tatalo atu ai ia te ia. Sa ou faia lea mea i le taeao lava o se aso matagofie ma le manino, i le amataga o le tautotogo ae o laau i le tausaga e afe valu selau luasefulu. O le taimi muamua lava lea na faatoa ou faia ai se taumafaiga faapea, aua e ui lava i mea uma na ou popole ai, ou te lei taumafai lava e tatalo ma le leo.

“Ina ua ou taunuu i lea mea na ou filifilia ou te alu atu i ai, ma ina ua uma ona ou vaavaai solo ma ua iloa ai ua na o au lava i lea mea, sa ou tootuli ifo loa ma amata ona sii ae manaoga o lou loto i le Atua. Sa lei umi lava ona ou tatalo, ae faafuasei loa ona osofia au e se mana ese sa matua taofia ai au, ma sa i lea mana se malosi ofoofogia sa taofia ai lou laulaufaiva ina ia le mafai ona ou tautala. Sa oo ina siomia au i le pogisa tele, ma sa peiseai o le a faaumatia faafuasei au.

“Peitai, a o ou taumafai ma lou malosi atoatoa e valaau atu i le Atua ia laveaiina au, mai le mana o lea fili ua taofia ai au, ma ua tauau lava ina ou le toe mafaia se mea ma tuulafoaiina ai au i le malaia—e le o se malaia faatupu fua i le mafaufau, ae o se malaia e ala mai le mana o se tasi mai le lalolagi e le vaaia, o le na i ai se mana malosi ou te lei faalogoina lava i se tasi—i lea lava taimi tonu o lou atuatuvale, na ou vaai ai i se malamalama faaniutu i luga ae tonu o lou ulu, e sili atu le pupula nai lo le la, ua alu ifo malie lava seia oo mai ia te au.”⁵

Na faaali mai le Tama Faalelagi ma Iesu Keriso ia Iosefa o le tali o lana tatalo faamaualalo.

Iosefa Samita—Talafaasolopito 2:17–20: “Sa lei pine ona oo mai lea malamalama ae ou faalogoina loa ua tatalaina au mai le fili na taofia au. Ina ua oo ifo le malamalama i ou luga, sa ou vaaia ni Tagata se toalua e le mafaamatalaina lo laua mamalu ma lo laua pupula, o tutu mai i ou luga ae i le ea. Sa fetalai mai le tasi o i laua ia te au, ma sa ia tau lou igoa ma fetalai mai a o tusi ane lona aao i le tasi—O Lou Atalii Pele lenei. Faalogo ia te Ia!

“O le autu o lou alu atu ou te fesili i le Alii, ia ou iloa po o le fea o lotu uma ua sao, ina ia ou iloa le lotu e ao ina ou auai. O le mea lea, ina ua ou lagona ua tatalaina au ma ua mafai ona tautala atu, sa ou fesili atu loa ia i Laua na tutu mai i ou luga i totonu o le malamalama, po o le fea o lotu uma ua sao (aua i lea taimi e le i oo mai lava i lou loto faapea e sese lotu uma)—ma tatau ona ou auai.

“O le tali na ou maua, ia aua lava ou te auai i se tasi o ia lotu, aua ua sese uma lava i latou; ma sa fetalai mai ia te au Le na ia tau mai lou igoa, o mataupu uma a ia lotu o ni mea inosia ia i ona luma; ma ua sese uma lava o latou taitai; ua: “latou faalatalata mai ia te au i o latou laugutu, a o o latou loto ua taumamao mai ia te au; ua latou fai ma mataupu poloaiga a tagata, o e ua peiseai ua amioatua, a o le mana o i lea mea ua latou teena.”

“Ona ia toe vavao mai lea ia te au e aua nei ou auai i se tasi o ia lotu; ma e tele foi isi mea na ia fetalai mai ai ia te au e le mafai ona ou tusia i le taimi nei. Ina ua ou toe malamalama lelei, na ou iloa, o loo ou taoto, a o faasaga ae ou mata i le lagi. Sa leai sou malosi ina ua alu ese atu le malamalama; sa lei pine ae ou maua sina malosi, ma sa ou alu loa i lo matou fale. Ma a o o’u tu ma faalagolago i le fata e i luga ae o le mea e tafu ai afi i le fale, sa oo ina fesili mai lou tina po o le a le mea ua tupu. Sa ou tali atu; “Aua e te popole, o loo lelei mea uma—o loo lelei lava au.” Ona ou fai atu lea i lou tina, “Ua ou iloa tino nei e le sao le lotu Peresipeteriana.” E peiseai na iloa mai lava e le fili ina o ou itiiti, o le a avea au ma tagata faalavelave ma faatiga i lona malo; a le o lea, aisea ua galue faasaga tau mai ai ia te au le mana o le fili? Aisea foi ua oo mai ai faigata ma sauaga ia te au ae ou te itiiti lava?”⁶

Pe a malolosi a tatou molimau, e le mafaia e sauaga ona faatupuina ia i tatou le faafitia o le mea ua tatou iloa e moni.

Iosefa Samita—Talafaasolopito 2:21–26: “I ni nai aso na sosoo ai talu ona oo mai ia te au lea faaaliga, sa ma faatasi ai ma se tasi o alii failotu o le lotu Metotisi, ma o se alii foi sa matua malosi lava i le fefinauaiga i mataupu tau lotu; a o ma talanoa ma lea alii i mataupu tau lotu, sa oo ina ou faamatala atu ia te ia le faaaliga na oo mai ia te au. Sa ou matua ofo lava i lana amio na aliali mai, sa le gata ina ia taufaatauvaaina lau faamatalaga, ae sa ia fai mai foi ma le ita tele o se mea e mai le tiapolo, ma ua le toe i ai ia mea o faaaliga po o mea faali’ali’a i ona po nei; ma sa ia fai mai ua gata ia mea uma i le au aposetolo, ma e le toe i ai ni mea faapena.

“Ae ui i lea, sa lei pine ae ou iloa ua avea lau tala ma mea e tauleagaina ai au e tagata failotu, ma ua mafua mai ai foi sauaga mamafa sa oo ina matua faateleina; ae ui lava foi ina o au o se tama le taulia e na o le sefulu fa i le sefulu lima tausaga, ma e leai foi se mea i lou tulaga faaleolaga nei o le a tausaafia ai e tagata se tama faatauvaa faapei o au, ae sa matua uunaiina tagata e tagata tulaga maualuluga ia tetee ia te au, ma faatupuina sauaga faigata; ma sa i ai i ituaiga uma lea tulaga—sa au faatasi uma i latou ia sauaina au.

“Sa avea ia mea ma mea sa ou mafaufau loloto ai i lea vaitaimi, ma isi aso fai soo talu mai lea vaitaimi, i le uiga ese o le avea o se tama le taulia, e sili laitiiti atu i le sefulu fa ona tausaga, ma o se tama foi e faatauvaa lava nai mea na te maua mai ana galuega i aso taitasi, ma se tagata taua ma amanaia e tagata maualuluga o lotu eseese i ia ona po, i se auala na faaosoina ai ia i latou le agaga o le taufaifai ma sauaga malolosi. Ae e ui lava ina sa uiga ese ia mea, ae sa faapea lava ona faia, ma sa avea soo lava ma mea sa ou faanoanoa tele ai.

“E ui i lea, o le mea moni lava na ou vaai i se faaaliga. Talu ai lea mea, sa ou manatu ua pei lava au o Paulo, ina ua ia tu i luma o le Tupu o Akeripa ma fai lana faamatalaga e uiga i le faaaliga na oo ane ia te ia na ia vaaia ai se malamalama ma faalogoina se leo; peitai, e toaitiiti lava i latou na talitonu ia te ia; sa fai ane nisi e pepelo o ia, ae fai ane isi ua valea o ia; sa tauemuina foi o ia ma sauaina. Peitai sa lei mafai ona aveesea e ia mea uma, le moni o le faaaliga na oo ia te ia. Na ia mautinoa lava na ia vaai i se faaaliga, ma e le mafai e sauaga uma o le lalolagi ona liua le moni o lena faaaliga; ma e tusa pe latou te sauaina ai o ia seia oo i le oti sa ia mautinoa, ma o le a ia mautinoa lava e oo i lana toe manava, sa ia vaai lava i se malamalama ma faalogoina se leo o fetalai mai ia te ia, ma e le mafai lava e le lalolagi atoa ona liliu lona manatu, po o lona talitonuga.

“Sa faapea foi ia te au. Sa ou vaai moni lava i se malamalama, ma sa ou vaaia foi i totonu o lea malamalama ni Tagata se toalua, ma e moni lava sa la fetalai mai ia te au; ma e ui ina inosia ma sauaina au i lou fai atu na ou vaai i se faaaliga, ae o se mea moni lava; ma a o latou sauaina au, ma tauemuina au, ma tauleagaina ma tuuai pepelo au i lou fai atu sa ou vaai i se faaaliga, sa oo ina ou faapea ifo i lou loto: Aisea ua sauaina ai au i lo’u ta’u atu o le mea moni? E moni lava sa ou vaai i se faaaliga; ma o ai ea au ou te tetee atu ai i le Atua, ma aisea foi ua manatu ai tagata o le lalolagi ia latou faia ia te au ina ia ou faafitia ai le mea na ou vaai tino lava i ai? Aua sa ou vaai lava i se faaaliga; sa ou mautinoa lava lena mea, ma sa ou mautinoa foi ua silafia e le Atua le moni o lena mea, ma e le mafai lava ona ou faafitia, ua ou fefe e faia lena mea; ma sa ou mautinoa a ou faafitia lea mea, o lona uiga ua ou faatausuai i le Atua, ma o le a ou nofosala ai.

“E ui i ia mea uma, ae ua ou maua nei le tali e faatatau i ituaiga lotu—e le tatau ona ou auai i se tasi o ia lotu, a ia ou tumau pea i le tulaga sa ou i ai i lena taimi, seia oo ina toe faatonuina mai au. Ua ou iloa e moni le molimau a Iakopo—e mafai e se tagata ua leai se poto ia te ia ona ole atu i le Atua, ma e tuuina mai e le Atua ia te ia lea poto, ma le le toe tautaua.”⁷

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo se fesoasoani faaopoopo, tagai i itulau vii–xii.

Toe faitau itulau 29–34. Mafaufau pe faapefea ona aumaia e Iosefa Samita se faataitaiga mo i tatou a o tatou saili mo tali ia tatou fesili. A o e suesue i lana faamatalaga o le Uluai Faaaliga, o le a se mea ua e aoao mai e uiga i le faitauina o tusitusiga paia? e uiga i le mafaufau loloto? e uiga i le tatalo?
Toe faitau le itulau e 35. Mafaufau i mea moni na aoao mai e Iosefa Samita e uiga i le Atua le Tama ma Iesu Keriso ina ua ia maua le Uluai Faaaliga. Aisea e tatau ai ia i tatou taitoatasi ona i ai se molimau o le Uluai Faaaliga?
Ina ua tau atu e Iosefa i isi le Uluai Faaaliga, e toatele tagata na itagia o ia ma sauaina o ia (itulau 36). Aisea e te manatu ai na faapena ona tali ane tagata? Mafaufau loloto i le tali a Iosefa i na sauaga (itulau 36–37). E faapefea ona tatou mulimuli i ana faataitaiga pe a tatou feagai ma sauaga po o isi faigata?
Ina ua e faatoa aoao e uiga i le Uluai Faaaliga, o le a se aafiaga na oo ia te oe ona o lea tala? O le a sona aafiaga ia te oe talu mai lena taimi? O a ni auala ua faamalosia ai oe a o e toe suesueina le tala i lenei mataupu?

Mau E Faatatau I Ai: Isaia 29:13–14; Ioelu 2:28–29; Amosa 3:7; Mamona 9:7–9