Kapitulo 5

Ang Balaan nga Priesthood—aron sa Pagpanalangin sa mga Anak sa Dios

Ang priesthood mao ang awtoridad sa Dios. Kadtong kinsa naghupot sa priesthood kinahanglan gayud nga takus ug gamiton kini aron sa pagpanalangin sa uban.

Gikan sa Kinabuhi ni George Albert Smith

Atol sa sesyon sa priesthood sa kinatibuk-ang komperensya niadtong Oktubre 2, 1948, si Presidente George Albert Smith miingon:

“Naghunahuna ko usahay kon kita isip mga amahan naningkamot ba og maayo sa pagpasabut ngadto sa atong batang mga lalaki sa kamahinungdanon sa obligasyon nga gihatag kon ang usa ka batang lalaki mahimo nang usa ka deacon. Naghunahuna ko kon ang batang lalaki gi-ordinahan na nga deacon ang amahan mopabati nga karon siya nakaangkon na og usa ka butang nga adunay mahangturong importansya. …

“Nakahinumdom ko, nga ingon og kagahapon lang, sa dihang si John Tingey mipatong sa iyang mga kamot sa akong ulo ug mi-orden kanako isip usa ka deacon. Ang maong butang maayo kaayong pagkapresentar ngari kanako ug ang kaimportante niini, nga ako mibati nga kadto usa ka dakong dungog. Ang resulta mao, kadto usa ka dakong panalangin ngari kanako, ug dayon wala madugay ang uban nga mga ordinasyon miabut kanako. Apan sa matag sitwasyon ang pundasyon napahimutang sa akong hunahuna nga ania ang usa ka oportunidad alang sa laing panalangin.”¹

Sa samang pakigpulong, si Presidente Smith mitudlo nga ang usa sa mga panalangin nga nagagikan sa ordinasyon ngadto sa priesthood mao ang oportunidad sa pagpanalangin sa kinabuhi sa uban. Isip usa ka ehemplo, misulti siya mahitungod sa usa ka impluwensyal nga naghupot sa priesthood—usa ka home teacher—sa iyang pagkabatan-on:

“Si Rodney Badger usa ka magtutudlo sa panimalay sa akong amahan sulod sa mga katuigan, ug usa ka buotan nga tawo. Sa matag higayon nga siya moabut ang pamilya magtigum ug siya molingkod ug mangutana kanamo ug mosulti kanamo sa mga butang nga sa iyang hunahuna angay namong masabtan. Ug gusto ko nga mosulti kaninyo nga sa higayon nga moabut siya sa among panimalay iyang gidala uban kaniya ang espiritu sa Ginoo. Ug kon siya mopauli na among mabati nga gibisitahan kami og usa ka sulugoon sa Ginoo.”²

Si Presidente Smith mitapos pinaagi sa pagpahayag sa iyang tinguha nga ang mga naghupot sa priesthood nagserbisyo sa mga miyembro sa ilang mga ward ug mga stake ug “dili mawad-an og oportunidad sa pagtabang sa pagbayaw ug pagpalambo ug pagdala kanila nga mamahimo sa unsay gusto sa atong Amahan nga sila mamahimo.”³ [Tan-awa sa sugyot 1 sa pahina 63.]

Mga Pagtulun-an ni George Albert Smith

Si Jesukristo mipahiuli sa balaan nga awtoridad dinhi sa yuta atol sa Iyang mortal nga pangalagad.

Sa dihang ang Manluluwas mianhi sa tunga-tunga nga kapanahonan, Iyang nakita kanang bantugan nga siyudad sa Jerusalem nga napuno sa kadautan. Ang mga lumulupyo nagpuyo sa paagi nga sa ingon nawala kanila ang balaan nga awtoridad, busa [ang Dios] mipadala sa Iyang Anak nganhi sa kalibutan ug misugod pag-usab og usa ka Simbahan nga adunay balaan nga awtoridad. … Adunay buotan nga mga tawo niadtong iyang kaliwatan, … ug adunay uban kinsa sa gihapon nagdumala diha sa Priesthood, apan kinahanglan nga ang Manluluwas moanhi aron sa pagpahiuli sa balaan nga awtoridad. …

… Sa dihang misugod na Siya sa Iyang pangalagad, wala Siya mitawag sa mga hari ug mga magmamando ug mga pari ug niadtong kinsa adunay taas nga awtoridad aron sa pagtabang Kaniya, apan Siya mitawag og mapaubsanon nga mga mangingisda, ug ang resulta mao nga Iyang gitapok diha Kaniya ang mga lalaki kinsa matudloan, ug dili mga lalaki kinsa wala motuo Kaniya. Gi-organisar Niya ang usa ka Simbahan ubos sa mando sa atong Langitnong Amahan. Siya mihatag sa balaan nga awtoridad ngadto sa Iyang mga kaubanan ug mimando kanila sa unsay angay nilang buhaton. … Siya adunay balaan nga awtoridad, ug ang mga matarung nakaila Kaniya nga mao ang Anak sa Dios. Ang uban naghunahuna Kaniya nga usa lamang ka buotan nga tawo. Nagtuo kita nga Siya mianhi sa yuta dili lamang sa pagtudlo sa mga tawo kon unsa ang angayang buhaton, apan sa paghatag sa Iyang mga kaubanan sa balaan nga awtoridad aron sa pagpahigayon sa mga ordinansa sa Iyang Simbahan. …

Sa panahon sa Manluluwas, Siya mao ang tigdumalang awtoridad. Sunod Kaniya mao ang korum sa napulog duha ka mga lalaki, Iyang pinili. Sa dihang Siya namatay, ang Korum sa Napulog Duha, dili gidaghanon sa ordinaryo nga mga lalaki kinsa mitawag sa ilang kaugalingon nga mga disipulo, apan usa ka korum sa napulog duha ka mga lalaki kinsa adunay balaan nga awtoridad ug nakadawat niini gikan ni Jesukristo, ang nahimong mga lider sa Simbahan.⁴ [Tan-awa sa sugyot 2 sa pahina 63.]

Ang priesthood gipahiuli sa atong panahon pinaagi sa mga lalaki nga naghupot niini sa karaang panahon.

Kini girekord ug giila didto sa langit ug dinhi sa yuta nga ang mga pamahayag sa pagtuo ug mga relihiyon nga midaghan human [si Jesukristo] mibiya sa yuta, ug ang mga simbahan nagkadaghan dinhi sa yuta, hangtud sa kapanahonan ni Joseph Smith, ang atong minahal nga propeta, adunay daghan nga mga relihiyon. Adunay daghan nga mga tawo kinsa nagpakaaron-ingnon nga adunay balaan nga awtoridad, ug sa akong hunahuna ang pipila kanila naghunahuna nga sila nakadawat niini. …

Sa dihang ang panahon miabut ug nawala sa kalibutan ang awtoridad o Priesthood, ang Ginoo mitawag og usa ka mapaubsanon nga batang lalaki ug mihatag kaniya og langitnon nga pagpakita ug nakigsulti kaniya, misulti kaniya sa unsay angay niya nga buhaton, ug mipadala sa uban nga mga mensahero ug langitnon nga mga binuhat sa matag karon ug unya, ang resulta niini mao ang pagka-organisar sa Ang Simbahan ni Jesukristo sa mga Santos sa Ulahing mga Adlaw, ug niana nga Simbahan gihatag ang balaan nga awtoridad. …

Sa dihang si Joseph Smith usa pa ka batan-on ang Ginoo mimando kaniya sa paghubad sa Basahon ni Mormon. Sa usa ka higayon sa dihang si Joseph ug si Oliver Cowdery naghubad, ang Ginoo mipadala sa usa ka balaan nga binuhat aron sa pagtubag sa ilang mga pangutana mahitungod sa bunyag. Kinsa man ang mianhi? Si Juan Bautista, kinsa naghupot sa Aaronic Priesthood. Diin siya gikan? Gikan siya sa langit. … Mipakita siya ngadto nila ni Joseph Smith ug Oliver Cowdery isip usa ka mahimayaong nabanhaw nga binuhat. Siya mianhi sa mando sa atong Langitnong Amahan aron ihatag ang Aaronic Priesthood ngadto nila ni Joseph ug Oliver, kay kini dili makaplagan bisan asa nga dapit sa tibuok kalibutan. Mahinungdanon kini nga ang kalangitan ablihan ug ang usa ka tawo kinsa naghupot sa Priesthood, ug sa gihapon naghupot niini, kinahanglan nga moanhi ug ihatag kini.

Human niana, sila si Pedro, Santiago ug Juan, kinsa naghupot sa Melchizedek Priesthood, mihatag niana nga Priesthood ngadto nila ni Joseph ug Oliver, ug ang Ginoo mimando sa pag-organisar sa Simbahan, nga may Kapangulohan, nga naglangkob og usa ka presidente ug duha ka mga magtatambag; usab usa ka Korum sa Napulog Duha ka mga Apostoles, usa ka Patriarch, mga High Priest, mga Seventy, mga Elder, mga Priest, mga Teacher ug mga Deacon; sa sama nga organisasyon nga diha sa karaan nga simbahan, kon awtoridad ang hisgutan.⁵

Ang sama nga awtoridad nga [si Joseph Smith] aduna gihatag nganha sa inyong anak nga mga lalaki, ug sila gikinahanglan sa atong Amahan sa pagpangalagad sa mga ordinansa sa Ebanghelyo. Ang responsibilidad nga miabut kang Joseph Smith wala mawala sa iyang pagbiya, gihatag kini ngadto sa laing mga abaga. Ang atong Amahan sa langit nagtawag sa matag karon ug unya niadtong kinsa adunay awtoridad sa pagpamulong pinaagi sa Iyang pangalan, sa pagpahigayon sa mga ordinansa sa Ebanghelyo, ug sa pagpanalangin sa katawhan. Sila mipakigbahin niana nga dungog nganha kaninyo ug sa inyong mga anak.⁶

Ako mapasalamaton nga niini nga adlaw ug panahon ang Ginoo mipadayag pag-usab sa Ebanghelyo. Ang Amahan ug ang Anak mipakita; ang mga lalaki kinsa naghupot sa Priesthood kaniadto miabut ug mitugyan niana nga Priesthood ngadto sa mapaubsanon nga mga lalaki ug sila usab gisugo sa pagtugyan niini ngadto sa uban. Busa ang Ebanghelyo ug ang Priesthood anaa alang sa tanan kinsa mahimong sarang sa pagdawat sa ingon, ug mao kana ang paagi sa Ginoo.⁷

Ang inyong misyon talagsaon kaayo, kamong mga lalaki nga naghupot sa Priesthood. Nganha kaninyo gihatag ang balaan nga awtoridad. Wala ninyo maangkon ang inyong katungod sa pagsangyaw ug pagtudlo sa ebanghelyo ug pagdumala sa mga ordinansa niini agig resulta sa pagbansay sa kolehiyo o sa unibersidad. Nadawat ninyo ang inyong awtoridad gikan sa mga lalaki nga balaang gisugo sa paglihok isip mga sulugoon sa Ginoo, ug kini gihatag nganha kaninyo pinaagi niadtong kinsa direkta nga nakadawat niini gikan ni Jesukristo nga atong Ginoo.⁸ [Tan-awa sa sugyot 3 sa pahina 63.]

Ang gahum ug awtoridad sa Dios makaplagan lamang diha sa Iyang tinuod nga Simbahan.

Adunay mga tawo nga nangutana kanako: “Unsa ang kaayohan sa inyong simbahan nga mas labaw pa sa ubang simbahan?” Naningkamot ko, sa mahunahunaong paagi, sa pagpasabut kanila sa kalainan. Bisan unsa nga organisasyon mahimong maghiusa alang sa pag-ampo, apan dili kana makahatag kanila og balaan nga awtoridad. Bisan unsa nga grupo sa mga simbahan mahimong maghiusa sa pagtigum ug mag-organisar og mga simbahan sa komunidad. Dili kana makahatag og balaan nga awtoridad. Ang mga lalaki mahimong magkahiusa alang sa maayo nga mga katuyoan, apan ang awtoridad gikan sa atong Langitnong Amahan maangkon lamang sa iyang pamaagi, ug ang iyang pamaagi sa karaang mga panahon mao ang pagtawag ug pag-orden og mga lalaki ug pag-set apart nila alang sa buhat. Ingon usab niana sa atong panahon karon. …

Ang mga tawo kinahanglan nga makasabut nga ang pagyukbo lamang sa atubangan sa Ginoo aron mag-ampo dili makahatag kanila og awtoridad. Ang pagpuyo sa mga gikinahanglan nga gilangkuban og kamatinuoron, hiyas, kamatuoran, ubp., dili makahatag kanila og awtoridad. … Dili igo nga kita mag-ampo, nga kita motambong sa simbahan. Kinahanglan nga kita adunay balaan nga awtoridad, ug ang pag-angkon nga kita aduna niana nga awtoridad ang nakahatag niini nga Simbahan og grabe nga pagpanglutos nga nagsunod niini gikan sa sinugdanan. Apan mao kini ang kamatuoran ug daghan sa mga anak sa atong Amahan ang nagsugod na sa pagkakita sa epekto sa balaan nga awtoridad dinhi niini nga Simbahan. Ilang nakita ang kalamboan nga nahimo diha sa kinabuhi sa mga lalaki ug sa mga babaye.⁹ [Tan-awa sa sugyot 4 sa pahina 63.]

Dili ko gusto nga ang mga tawo maghunahuna nga ako nangita og sayop ug nanaway sa mga tawo kinsa nahisakop sa lainlaing mga relihiyon sa kalibutan. Mapasalamaton ko nga adunay daghan kaayo kanila nga maayo nga mga lalaki ug maayo nga mga babaye kinsa mituo kaniya ug uban sa kahayag nga sila nakaalagad sa Dios; apan ang kamatuoran magpabilin nga ang atong Amahan mi-establisar niini nga kalibutan, sa iyang Simbahan. Iyang gihatag nganha sa mga kalalakin-an niining panahona ang iyang awtoridad, ug walay laing awtoridad dinhi sa kalibutan nga iyang pagailhon apan kana nga iyang gipasiugdahan mismo.¹⁰ [Tan-awa sa sugyot 5 sa pahina 64.]

Ang mga ordinansa sa Priesthood mahinungdanon alang kanato aron makasulod sa celestial nga gingharian.

Kon kita sama pa sa uban nga mga relihiyon, kita mahimong mangita sa Ginoo ug makadawat sa iyang mga panalangin, tungod kay ang matag tawo nga naghimo og maayo niining kalibutana makadawat og mga panalangin; kita mahimong aduna sa tanan nga mahinungdanong mga hiyas ug angkunon kini nga ato, apan kon wala ang gahum sa Dios ug ang awtoridad sa balaan nga Priesthood dili posible nga makaadto ang mga tawo sa celestial nga gingharian.¹¹

Ang bugtong plano nga moandam sa mga tawo alang sa Celestial nga gingharian mao ang plano nga gihatag ni Jesukristo, ang atong Ginoo; ug ang bugtong awtoridad nga mopasarang sa mga tawo sa pagtudlo ug sa pagdumala sa mga ordinansa sa Ebanghelyo sa tukmang paagi mao ang awtoridad ni Jesukristo, ang atong Ginoo.¹²

Si Joseph Smith, Jr. gitawag sa Dios aron mamahimong Iyang propeta ug pinaagi kaniya gipahiuli dinhi sa yuta ang Balaan nga Melchizedek Priesthood nga mao ang gahum sa Dios nga gidelegar ngadto sa tawo aron sa paglihok pinaagi sa Iyang pangalan. Pinaagi niini nga Priesthood ang matag ordinansa sa Ebanghelyo sa atong Ginoo, si Jesukristo, nga gikinahanglan alang sa kaluwasan sa katawhan, gipahigayon nga may awtoridad.¹³

Sa unsang paagi nga kini makaapekto kanato kon kita dili mohatag og bili sa awtoridad nga gihatag sa Dios ngari kanato? Kini mangahulugan nga kita sirad-an sa mga pultahan sa celestial nga gingharian. Kini mangahulugan nga ang labing mahinungdanon nga panalangin sa unahan diin ako gitudloan nga pagalantawon sukad niadtong bata pa ko dili matuman. … Ang pagpakig-uban sa akong mga minahal, … kinsa mahal kaayo nako hapit sama sa kinabuhi mismo, dili matagamtaman didto sa celestial nga gingharian.¹⁴

Ang priesthood … usa ka panalangin nga, kon kita magmatinud-anon, moabli sa mga pultahan sa celestial nga gingharian ug mohatag kanato og usa ka luna didto aron sa pagpuyo sa tibuok kapanahonan sa kahangturan. Ayaw og tiaw-tiawi kining bililhon nga panalangin.¹⁵ [Tan-awa sa sugyot 6 sa pahina 64.]

Ang mga tighupot sa Priesthood adunay responsibilidad sa pagpuyo og sulundon nga kinabuhi ug sa paggamit sa priesthood aron sa pagpanalangin sa uban.

Pagkaanindot gayud nga makahibalo nga ang kalalakin-an kinsa takus mahimong makadawat [sa] priesthood, ug sa awtoridad nga gihatag kanila, makahimo og daghan kaayo nga mga butang nga usa ka panalangin ngadto sa uban nga mga anak sa Amahan.¹⁶

Dili kamo makaadto sa kalibutan sa bisan unsa nga laing Simbahan o sa tanang mga Simbahan ug makakaplag og … mga lalaki nga naghupot og balaan nga awtoridad. Ayaw og kalimot niana. Nahisakop kamo sa pinili nga pundok sa kalalakin-an, … nga ang mga kamot gipandong diha kanila, ug nakadawat sa balaang awtoridad, nakapahimo kaninyo nga katambayayong sa Tiglalang sa Langit ug Yuta. Wala ko magpasabut nga dili na kamo mahimong mokatawa, mopahiyum, ug maglipay sa kinabuhi, apan akong gipasabut nga kinahanglang adunay lawom nga pagkasayud diha sa matag kalag nga “magbalantay ako sa akong igsoon. Naghupot ko sa awtoridad gikan ni Ginoong Jesukristo—nagdala ko sa Balaang Priesthood.” Kon ato kining buhaton dili kita makaplagan nga nagbaliwala sa sagradong mga butang sama sa gibuhat sa uban sa nangagi.¹⁷

Ang kamatuoran nga sila naghupot sa Priesthood ngadto sa daghang kalalakin-an usa ka panghimaraut, tungod sa pamaagi sa ilang pagtratar niini, nga miisip niini ingon og butang nga ordinaryo ra kaayo.¹⁸

Ang ubang kalalakin-an naghunahuna nga tungod kay naghupot sila sa Priesthood kana naghatag kanila og espesyal nga paagi sa ilang pagpahigayon sa ilang mga kaugalingon diha sa ilang mga panimalay. Gusto kong mosulti kaninyo nga kamong kalalakin-an nga naghupot sa Priesthood dili gayud makasulod sa Celestial nga Gingharian, gawas kon inyong tahuron ang inyong mga asawa ug inyong mga pamilya ug mobansay kanila ug mohatag kanila og mga panalangin nga gusto ninyo alang sa inyong mga kaugalingon.¹⁹

Ang awtoridad sa atong Langitnong Amahan anaa sa yuta alang sa pagpanalangin sa katawhan, dili sa paghimo niadtong modawat niana nga awtoridad nga arogante, apan sa paghimo kanila nga mapaubsanon; dili sa paghimo niadtong nakadawat og espesyal nga mga pribilehiyo nga mobati nga mas maayo pa sila kay sa uban, apan sa paghimo kanato nga mapaubsanon diha sa atong mga kalag, mainampoon diha sa atong mga kasingkasing, ug masinabtunon sa tanang mga tawo sa tanan natong gibuhat, ug sa ingon magpakita og panig-ingnan pinaagi sa matarung nga mga kinabuhi nianang gitinguha sa atong Langitnong Amahan nga itudlo kanato.²⁰

Ang pagkamiyembro sa Simbahan ug ang paghupot sa Priesthood dili makatabang kanato gawas kon kita takus. Ang Ginoo miingon nga ang matag panalangin nga atong gitinguha magsunod sa pagkamasulundon sa Iyang mga sugo. Mahimo natong malingla ang atong mga silingan, ug mahimo natong malingla ang atong mga kaugalingon sa ideya nga maayo ra ang dagan sa atong kinabuhi, apan gawas kon atong sundon ang mga sugo sa atong Langitnong Amahan, gawas kon atong dad-on sa takus nga paagi kining balaang Priesthood nga hilabihan ka bililhon, dili nato makaplagan ang atong lugar sa celestial nga gingharian.²¹

Kamo mga kaigsoonan … gitugyanan og sagrado nga oportunidad, usa ka sagrado nga pagsalig. Nakadawat kamo sa mga panalangin sa balaang Priesthood. Ang balaan nga awtoridad gitugyan diha kaninyo, ug pinaagi niana nga awtoridad adunay miabut nga responsibilidad sa pagpalanog sa inyong tingog ug sa pagpakabuhi aron nga ang mga tawo sa kalibutan mahimong masayud sa kalainan tali sa Ebanghelyo ni Jesukristo ug sa ubang mga organisasyon sa kalibutan.²²

Bisan asa pa kamo moadto, hunahunaa ang kamatuoran nga kamo nagrepresentar kaniya kinsa mao ang tiglalang sa atong pagkatawo. Ang priesthood nga inyong gihuptan dili mao ang priesthood ni Joseph Smith, o Brigham Young, o bisan kinsa nga kalalakin-an kinsa gitawag sa pagpangulo sa Simbahan dinhi sulod sa nasud o sa gawas sa nasud. Ang priesthood nga inyong gihuptan mao ang gahum sa Dios, nga gitugyan diha kaninyo gikan sa kahitas-an. Ang balaan nga mga nilalang kinahanglang ipadala sa yuta … aron sa pagpahiuli nianang mahimayaong panalangin nga nawala sa yuta sulod sa gatusan ka katuigan. Sa pagkatinuod kinahanglan kitang magmapasalamaton alang sa atong mga panalangin.²³

Ako nag-ampo nga ang Ginoo mopanalangin kanatong tanan, nga kita mahimong takus sa pagdala sa priesthood nga Iyang gitanyag kanato ug gitugyan ngari kanato, nga bisan asa kita moadto ang mga tawo makaingon, “Kanang tawhana usa ka sulugoon sa Ginoo.”²⁴ [Tan-awa sa sugyot 7 sa pahina 64.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Hunahunaa ang mga kasinatian nga gihulagway ni Presidente Smith diha sa mga pahina 53–55. Unsa ang atong mahimo aron matabangan ang batan-ong mga lalaki nga maandam aron ordinahan ngadto sa mga katungdanan sa priesthood? Unsa ang atong mahimo aron matabangan ang batan-ong mga babaye nga makasabut sa kaimportante sa gahum sa priesthood diha sa ilang mga kinabuhi? Nganong importante alang sa mga lalaki ug mga babaye nga makakat-on kalabut sa priesthood?
Nganong kini “kinahanglan nga ang Manluluwas … mopahiuli sa balaang awtoridad” (pahina 55) atol sa Iyang yutan-ong pangalagad, agi og dugang sa pagtudlo sa ebanghelyo?
Basaha ang pahina 58. Ngano sa imong hunahuna nga ang Ginoo mihimo sa Iyang awtoridad nga magamit sa tanang takus nga mga lalaki imbis nga limitahan kini sa pipila lang ka mga lalaki nga adunay pormal nga pagbansay?
Si Presidente Smith namulong mahitungod sa “kalamboan nga nahimo diha sa kinabuhi sa mga lalaki ug sa mga babaye” tungod sa priesthood (pahina 59). Unsa ang gipasabut niini nga pamahayag nganha kanimo? Unsa ang imong mahimo aron sa pag-amuma sa gahum ug impluwensya sa priesthood diha sa imong kinabuhi?
Samtang ikaw nagribyu sa seksyon nga nagsugod sa pahina 59, paghunahuna kalabut kon unsaon nimo pagtubag kon ang usa ka tawo mangutana kanimo sa pangutana nga gipadangat ngadto ni Presidente Smith: “Unsa ang kaayohan sa inyong simbahan nga mas labaw pa sa ubang simbahan?”
Tun-i ang seksyon nga nagsugod sa pahina 60. Unsa ang pipila sa “bililhon nga mga panalangin” nga imong nadawat tungod sa priesthood?
Samtang ikaw nagtuon sa katapusang seksyon sa mga pagtulun-an (mga pahina 61–63), pangitaa ang mga responsibilidad nga giingon ni Presidente Smith nga moabut kauban sa priesthood. Unsa ang mahimo sa mga sakop sa korum sa priesthood aron sa pagsuporta sa usag usa diha sa ilang mga responsibilidad? Sa unsang paagi nga ang mga babaye makatabang sa mga naghupot sa priesthood nga magpabiling matinuoron ngadto niini nga mga responsibilidad? Unsa ang mahimo sa mga naghupot sa priesthood aron sa pagsuporta sa mga babaye diha sa ilang balaang mga tahas?

May Kalabutan nga mga Kasulatan: Juan 15:16; Alma 13:1–3, 6–10; Doktrina ug mga Pakigsaad 84:19–22; Joseph Smith—Kasaysayan 1:68–72; Mga Artikulo sa Hugot nga Pagtuo 1:5

Tabang sa pagtudlo: “Pagpamatuod kon ang Espiritu moaghat kanimo sa pagbuhat sa ingon, dili lamang sa katapusan sa matag leksyon. Hatagi og kahigayunan ang imong gitudloan nga mohatag sa ilang pagpamatuod” (Pagtudlo, Walay Labaw ka Mahinungdanon nga Tawag, 45).

“Naghunahuna ko kon ang [usa ka] batang lalaki gi-ordinahan na nga deacon ang amahan mopabati nga karon siya nakaangkon na sa usa ka butang nga adunay mahangturong importansya.”

“Ang mga lalaki kinsa naghupot sa Priesthood kaniadto miabut ug mitugyan niana nga Priesthood ngadto sa mapaubsanon nga mga lalaki.”