Kapitulo 15

Pagpalambo sa Buhat sa Ginoo

Ang Dios nangulo sa Iyang buhat, ug nagtawag Siya sa matag miyembro sa Simbahan aron moapil sa pagpadayon niini.

Gikan sa Kinabuhi ni George Albert Smith

Sa dihang si George Albert Smith gitawag sa Korum sa Napulog duha ka mga Apostoles niadtong 1903, ang mga miyembro sa Simbahan mga sobra pa lang sa 300,000. Sa hinapos sa iyang pagserbisyo isip Presidente sa Simbahan, misobra na kini sa 1 ka milyon. Si Presidente Smith nalipay sa ingon nga pagtubo tungod kay kini nagpasabut nga ang mensahe sa kaluwasan miabut na ngadto sa nagkadaghan pa nga mga tawo. “Kalipay gayud nato,” miingon siya ngadto sa mga nanambong sa usa ka kinatibuk-ang komperensya niadtong 1950, “dili tungod kay misaka ang atong gidaghanon sa organisasyon nga atong giapilan, kondili tungod kay nagkadaghan na ang mga anak sa atong Amahan, nagkadaghan na sa iyang anak nga mga lalaki ug anak nga mga babaye, ang nadala ngadto sa pagkasabut sa kamatuoran, ug miapil sa iyang organisasyon nga iyang giandam aron sa pagtudlo kanato sa pamaagi sa kinabuhi ug sa paggiya kanato diha sa dalan sa mahangturong kalipay.”¹

Tali niadtong 1903 ug sa kamatayon ni Presidente Smith pagka 1951, ang Simbahan nag-atubang og daghang mga hagit sa pag-uswag niini sa tibuok kalibutan. Mga panghitabo sama sa Unang Gubat sa Kalibutan, Ikaduhang Gubat sa Kalibutan, ug ang Grabe nga Kalisud [Great Depression] (usa ka mikatap nga krisis sa ekonomiya) hilabihan gayud nga nakalimitar sa gidaghanon sa mga misyonaryo nga mapadala sa gawas sa nasud. Bisan pa man niini nga mga kalisdanan, si George Albert Smith pabilin nga masaligon nga ang Simbahan mopadayon sa pagtubo ug pagtuman sa padulngan niini sa “pagpuno sa tibuok kalibutan” (Daniel 2:35). Niadtong 1917, sa kinagubotan nga panahon sa Unang Gubat sa Kalibutan, giingnan niya ang mga Santos: “Wala ko mawad-i og paglaum tungod kay kining kamatuoran wala masangyaw sa mas paspas nga paagi. Hinoon akong nakita sa mga panghitabo karon ang direkta nga pagpanginlabut sa Amahan nga maalamon sa tanan aron sa pag-andam sa dalan alang sa pagsangyaw sa ebanghelyo nga iyang gipahiuli nganhi sa yuta sa atong panahon.”²

Samtang ang unang katunga sa ika-20 nga siglo adunay dagko nga mga hagit, nagdala usab kini og bag-o nga mga teknolohiya nga gituohan ni Presidente Smith nga mao ang makapadayon sa buhat sa Ginoo. Usa siya ka lig-on nga tigsuporta sa industriya sa mga sakyanan sa kahanginan ug nagtan-aw niini isip usa ka pamaagi nga matuman niya ang iyang mga biyaheonon nga mga buluhaton isip usa ka General Authority sa mas epektibong paagi. Gisuportahan usab niya ang paggamit sa Simbahan sa radyo ug telebisyon aron mapadala ang pulong sa Ginoo ngadto sa mas daghang tigpaminaw ug tumatan-aw. “Kinahanglan gayud nga atong isipon kining [mga imbensyon] nga mga panalangin gikan sa Ginoo,” siya miingon. “Makapalambo gayud kini sa atong mga abilidad. Kini mahimo gayud nga mga panalangin kon kini atong gamiton sa pagkamatarung alang sa pagsangyaw sa kamatuoran ug sa pagpadayon sa buhat sa Ginoo taliwala sa mga tawo. Ang dakong hagit nga giatubang sa kalibutan karon anaa sa atong paagi sa paggamit niini nga mga imbensyon. Mahimo nato kining gamiton sa pagdaut, sama sa atong gihimo sa nangagi, o mahimo nato kining gamiton aron sa paglamdag ug pagpanalangin sa katawhan, ingon nga mao ang gusto sa atong Langitnong Amahan nga atong himoon.”³

Sa usa ka pakigpulong sa kinatibuk-ang komperensya pagka 1946, si Presidente Smith nanagna mahitungod sa paggamit sa ingon nga mga teknolohiya: “Dili madugay, gikan niini nga pulpito ug sa uban nga mga dapit nga maabut, ang mga sulugoon sa Ginoo makahimo sa pagpadangat sa mga mensahe ngadto sa nalahi nga mga grupo kinsa anaa sa hilabihan ka layo nga sila dili maadto. Niana nga pamaagi ug sa laing mga pamaagi, ang ebanghelyo ni Jesukristo nga atong Ginoo, ang bugtong gahum sa Dios alang sa kaluwasan sa pagpangandam alang sa celestial nga gingharian, madungog ngadto sa tanang mga bahin sa kalibutan, ug daghan kaninyo kinsa ania dinhi makasaksi nianang adlawa.”⁴ [Tan-awa sa mga sugyot 1 ug 4 sa pahina 196.]

Si Presidente Smith nakasabut nga ang buhat sa Simbahan magmalampuson tungod kay kini buhat sa Ginoo, ug siya mitudlo sa mga Santos nga ang oportunidad sa pag-apil niana nga buhat usa ka panalangin nga gitanyag sa Ginoo sa matag miyembro sa Iyang Simbahan. Atol sa unang kinatibuk-ang komperensya human siya ma-set apart isip Presidente sa Simbahan, siya miingon: “Akong naamgohan ang dakong responsibilidad nga gipatong sa akong mga abaga. Nasayud ko nga kon wala ang tabang sa atong Langitnong Amahan, ang organisasyon diin kita nahisakop dili magmalampuson. Walay tawo o grupo sa mga tawo ang makahimo niini nga malampuson, apan kon ang mga miyembro niini nga Simbahan mopadayon sa pagsunod sa mga sugo sa Dios, magpakabuhi sumala sa ilang relihiyon, mopakita og ehemplo ngadto sa kalibutan, [ug] mohigugma sa ilang silingan sama sa ilang kaugalingon, kita makapadayon, ug ang nagkadako nga kalipay moabut kanato.”⁵

Mga Pagtulun-an ni George Albert Smith

Adunay daghang oportunidad alang sa matag miyembro sa pag-apil sa buhat sa Ginoo.

Ang responsibilidad sa pagdumala niini nga buhat dili lamang iya [sa Presidente sa Simbahan], ni sa iyang mga magtatambag, ni sa korum sa mga Apostoles; apan kini iya sa matag lalaki ug babaye kinsa nabunyagan pinaagi sa mga sulugoon sa Dios ug nahimong miyembro sa Simbahan ni Jesukristo sa mga Santos sa Ulahing mga Adlaw. … Dili nato mahimong ipasa ang responsibilidad kon gusto nato; ang atong Amahan mibutang niini ngari sa atong mga abaga, ug kinahanglan gayud nato kining pas-anon ug motabang sa pagtuman niini nga malampuson.⁶

Ako adunay pagtuo kaninyo, akong mga kaigsoonan. Ako adunay pagsalig sa inyong hugot nga pagtuo ug sa inyong kaligdong. … Matag usa usab kaninyo [mao] ang manubag ngadto [sa Ginoo] sa pagpalambo niini nga buhat, sama niadtong kinsa nangulo kaninyo. Dili ko makaingon, “Magbalantay ba ako sa akong igsoon?” Dili nako mahimong ipasa ang responsibilidad … , apan kay nagbarug diha sa kadaghanan sa mga anak sa atong Amahan kinahanglan gayud nga akong himoon ang akong bahin, kinahanglan gayud nga akong pas-anon kanang palas-anon nga gibutang sa Ginoo ngari kanako, ug kon molikay ko, nan akong maamgohan nga mawala nako ang panalangin nga moabut unta kanako pinaagi sa pagkamasulundon sa mga sugo sa atong Amahan.⁷

Unsa gayud kita ka matinguhaon nga moadto sa paghimo og mga kaayohan. Usa ka tapulan nga sulugoon ang maghulat hangtud nga siya sugoon diha sa tanan nga mga butang. [Tan-awa sa D&P 58:26–27.] Ang atong Langitnong Amahan naglaum kanato nga mopalambo sa atong calling, bisan asa man kini, bisan unsa man kaubos ang atong sitwasyon sa kinabuhi.⁸

Dili kinahanglan nga ang tawo mahimong usa ka miyembro sa Korum sa Napulog Duha, o sa Unang Kapangulohan sa Simbahan, aron maangkon ang labing mahinungdanon nga mga panalangin sa gingharian sa atong Langitnong Amahan. Kini mga katungdanan lamang nga gikinahanglan diha sa Simbahan, ug adunay daghang matinud-anon ug maunungon nga mga tawo nga takus nga molingkod niini nga mga katungdanan kansang panahon ug mga talento gikinahanglan sa tibuok Simbahan. … Hinumdumi nga diha sa mga miyembro ug sa tibuok Simbahan adunay daghang oportunidad alang sa matag lalaki ug alang sa matag babaye sa pagbuhat og butang alang sa pagpanalangin sa ilang isigkatawo ug sa pagpalambo sa buhat sa Ginoo.⁹

Adunay kalagmitan sa pipila kinsa naghupot sa priesthood ug sa pipila kinsa naghupot og mga posisyon sa Simbahan, nga mobaliwala sa mga miting sa sakrament ug sa ubang importante nga mga katungdanan, ug limitahan ang ilang mga paningkamot ngadto sa pipila ka espesyal nga calling. Sila tingali mga opisyales ug mga magtutudlo sa Sunday School, ug sa higayon nga sila mohimo sa ilang buluhaton sa Sunday School, mokonsiderar niana nga igo na; o, sila tingali mga nagtrabaho sa [Young Men o Young Women], o sa Primary, o sa genealogy, o sa welfare, o adunay laing buluhaton, ug kon sila mohimo sa ilang mga obligasyon nga may kalabutan niana mokonsiderar sila nga ang ilang tanang katungdanan nahimo na.

Bisan kon kita nahigugma ug nanalangin nianang tanan alang sa maayong serbisyo nga ilang gihatag, kita obligado nga mopahinumdom sa atong kaugalingon nga kinahanglan natong tanan ang pagsunod sa matag pulong nga nagagikan sa ba-ba sa atong Amahan sa langit [tan-awa sa D&P 84:44]. Sa laktud nga pagkasulti, ang espesyal nga mga buluhaton dili mopalingkawas kanato sa atong uban nga mga obligasyon; ug ang espesyal nga mga miting dili gayud kanunayng mopuli o molabaw sa kinatibuk-an nga mga miting sa Simbahan. Ug lapas pa sa atong espesyal nga mga obligasyon ug mga buluhaton, kita gilauman nga molihok sa atong kaugalingon matag adlaw isip mga Santos sa Ulahing mga Adlaw diha sa labing halapad nga kahulugan sa pulong, aron kon kita makakita og tawo nga anaa sa kasakit o panginahanglan, o nagkinahanglan og tambag sa bisan unsa nga panahon, diha-diha dayon kita makalihok isip mga sulugoon sa Ginoo diha sa mga butang nga atong gihimo.

Ug dayon anaa kadtong mga tawo kinsa modawat sa pagkamiyembro sa Simbahan sa ngalan lang apan wala sa buhat nga daw mibati sa ilang kaugalingon nga walay labut sa paghatag og bisan unsa nga matang sa serbisyo. Apan sa dili madugay ilang makaplagan ang ilang kaugalingon nga adunay kahigwaos diha sa ilang mga kasingkasing, ug pagduhaduha sa ilang mga hunahuna, ingon nga maoy mahitabo kanatong tanan kon kita mapakyas sa paghimo sa unsay atong nahibaloan nga mao ang atong tanang katungdanan. Ang tawo nga nagpakabuhi sumala sa ebanghelyo ni Jesukristo dili gayud magduhaduha kon magmalampuson ba kini; apan ang tawo nga nagbaliwala sa iyang katungdanan, kinsa napakyas sa pagtuman sa iyang mga pakigsaad, mawad-an sa Espiritu sa Ginoo, ug dayon mosugod siya sa paghunahuna kon unsa kaha ang mahitabo sa Zion. …

Sa higayon nga kamo naghimo sa tanan ninyong katungdanan, kamo masayud, ingon nga kamo nasayud nga kamo buhi, nga buhat kini sa atong Amahan, ug nga siya mohuman niini nga malampuson.¹⁰

Wala ba kamo makakita kon sa unsang paagi nga ang usa ka kahibulongan nga buhat ug usa ka katingalahan nagpadayon sa unahan? Wala ba kamo makakita kon sa unsang paagi nga kita isip mga indibidwal mihatag lamang sa atong diyot, apan ang tanang miyembro nagkahiusa, ug ang pulong sa Ginoo nasangyaw taliwala sa katawhan; dili sa pinugos nga paagi, apan diha sa pagkamabination ug paghigugma, uban sa tinguha sa pagpanalangin sa tanang katawhan?¹¹ [Tan-awa sa sugyot 2 sa pahina 196.]

Ang pagsupak dili makapahunong sa pag-uswag sa Simbahan, tungod kay buhat kini sa Dios, dili sa tawo.

Ang Simbahan nagsugod nga adunay unom lamang ka mga miyembro. Nagtubo kini matag adlaw bisan pa man sa mga pagsupak sa kaaway. Kon wala pa ang gahum sa pagkamatarung, kon wala pa ang pag-amuma sa atong Langitnong Amahan, kini nga Simbahan dugay nang nabungkag sama sa bayanan sa itlog. Apan, ang Ginoo miingon nga siya manalipod kanato, ug misaad kanato og proteksyon kon kita motahud kaniya ug mosunod sa iyang mga sugo.¹²

Ang pagtubo niini nga Simbahan wala mahitabo tungod kay kini sikat. Nahitabo kini bisan pa man sa pagsupak sa maalamon nga mga tawo sa kalibutan; nahitabo kini bisan pa man sa pagsupak sa mga magtutudlo sa mga relihiyon, ug kini nagpadayon sa pagpundok og pinili nga mga espiritu dinhi ug didto kinsa nagpuyo sa ingon nga paagi nga sila makasabut sa kamatuoran.¹³

Nagbasa ko og journal sa akong apohang lalaki, si George A. Smith. … Nabasa nako ang iyang personal nga mga kasinatian, ang uban sakit kaayo ug ang uban puno sa milagro. Sa iyang pagkabatan-on siya gitawag sa pagsangyaw sa Ebanghelyo sa atong Ginoo. Iyang nasinati ang kasinatian sa ubang mga tawo kinsa gitawag sa pangalagad. Kadtong adunay dautan nga mga hunahuna mihimo og sayop nga mga akusasyon batok kaniya ug sa iyang mga kaubanan apan mipadayon siya nga matinud-anon ug ang Ginoo nanalipod kanila ug mipalambo kanila sa panan-aw sa mga tawo ug mihatag kanila og pagpamatuod sa kabalaan niini nga buhat nga hilabihan ka positibo nga alang kanila walay buluhaton nga hilabihan ka lisud nga buhaton alang sa pagsangyaw sa kamatuoran.

Si Lolo kauban sa grupo nga gipadala ngadto sa England aron isangyaw ang Ebanghelyo niadtong 1839. Didto ang kaaway nagtinguha sa pagwagtang sa ilang kadasig sa tanang paagi. Ang ilang mga journal nga gisulat nianang higayuna nagpadayag sa kamatuoran nga sila gibutang-butangan sa dautang mga tawo ug giataki sa dautang mga espiritu, apan gipanalipdan sila sa Ginoo ug nakahimo sila og maanindot nga trabaho. Walo sa Korum sa Napulog Duha ang anaa didto nianang higayuna. Kauban niadtong kinsa gitawag ngadto sa England mao ang mga kalalakin-an nga walay kwarta nga ilang ipamasahe apan nagsugod sila paglakaw gikan sa ilang mga panimalay. Tungod sa dugayng pagkasakit ang usa niini nga kalalakin-an hilabihan kaluya nga molakaw og tulo ka kilometro aron makasakay sa karwahe apan gitabangan sa usa ka higala aron makalakaw niana ka layo. Sila adunay hugot nga pagtuo sa Dios; sila nasayud nga kini iyang Simbahan ug busa mipadayon sila ug ang mga higala nga dili mga miyembro sa Simbahan gidasig sa Dios aron sa paghatag kanila og kwarta ug igasto sa ilang biyahe tabok sa kadagatan, diin ilang napadangat ang ilang mensahe ug daghang matinud-anon nga mga tawo ang midawat sa kamatuoran agig resulta sa ilang pangalagad.¹⁴

Buhat kini sa Dios. Dili kini buhat ni bisan kinsa nga tawo. Walay tawo o pundok sa mga tawo ang makapadayon niini ug makapahimo niini nga malampuson samtang nag-atubang og pagsupak sa kalibutan. Daghang mga higayon nga sila [kinsa misupak sa buhat] mibati nga ang katapusan sa Simbahan miabut na, ug sa matag higayon pinaagi sa kahalangdon sa iyang gahum, ang Ginoo mibayaw niini, ug kini nagpadayon sa matag siyudad, sa matag lungsod, sa matag nasud.¹⁵

Nasayud ko nga adunay daghang mga problema ug aduna pay mas dagkong mga problema samtang ang mga adlaw moabut ug molabay, apan ang sama nga Amahan sa Langit nga nangulo sa mga Anak sa Israel, nga miluwas kang Daniel ug sa tulo ka mga batan-on nga Hebreohanon gikan sa kalaglagan, ang sama nga Langitnong Amahan nga nanalipod sa atong mga katigulangan nga mianhi [sa Salt Lake Valley] ug mi-establisar kanila dinhi, ug mipanalangin kanila ug mihimo nga posible nga diha sa kakabus sa mga tawo makabaton niining maanindot nga templo sa [Salt Lake] ug uban pa nga maanindot nga mga templo, … kana gihapon nga Amahan, Amahan ninyo ug nako, andam sa pagbu-bu sa iyang mga panalangin ngari kanato karon.¹⁶

Walay rason nga mawad-an og kadasig. Ang ebanghelyo ni Jesukristo padayon nga mokaylap. Kita adunay saad gikan sa atong Langitnong Amahan nga kini magpadayon sa pagkaylap. Walay laing dispensasyon ang aduna sa kasiguroan nga anaa kanato. Sa mga dispensasyon sa nangagi ang Ebanghelyo gikuha gikan sa kalibutan. Sa dihang kini gipahiuli sa atong panahon inubanan kini sa saad nga kini dili na gayud pagakuhaon pag-usab gikan sa yuta o ihatag ngadto sa laing mga tawo. Busa ako mohangyo kaninyong nagkupot sa daro, ayaw og lingi sa likod. Moalagad sa Dios ug motuman sa Iyang mga sugo.¹⁷

Dili kita kinahanglan nga mabalaka mahitungod sa pag-uswag sa Zion, kay ang maanindot nga karaang barko mapasigarbuhon nga molawig, ug kadtong kinsa matinud-anon ug matinuoron luwas nga modunggo uban niini didto sa pantalan sa Dios, kinoronahan og himaya, pagka-imortal ug kinabuhing dayon. Wala koy kahadlok alang niining tigulang nga mga lalaki ug mga babaye nga naghupot og hugot nga pagtuo. Wala koy kahadlok alang sa batang mga lalaki ug batang mga babaye kinsa naglakaw diha sa pagkamasulundon sa mga sugo sa Ginoo. … Apan ang mga Santos sa Ulahing mga Adlaw kinsa nasayud sa kabubut-on sa Amahan nga wala mohimo niini, kadtong kinsa nakadungog sa mga pagtulun-an sa Ginoo sa matag karon ug unya ug mitalikod niini, nahadlok ko nga dili nila makab-ot ang tumong gawas kon sila mobalik ug maghinulsol sa tibuok nilang kasingkasing.¹⁸

Ang Iyang buhat padayon sa pag-uswag, kinahanglan gayud nga aktibo kita kon gusto nato nga mapadayon ang gipaspason niini. Matag tuig nga molabay, sukad sa pag-organisar sa Simbahan, nakita nga nag-anam kini og kalig-on kay sa miaging tuig. Karon ang panglantaw sa padayon nga kalampusan mas maayo gayud kay sa kaniadto. Mas daghan na nga mga tawo ang nagkat-on sa kamatuoran kalabut kanato, ug sa atong kinaiya ngadto kanila. Ang pagdaut tungod sa kawalay kahibalo nabuntog, samtang ang kahayag napadan-ag taliwala sa mga tawo. …

Kinahanglan nga makita kini sa tanan, ug kini mahitabo sa umaabut, nga ang nagsupak niini nga buhat makabuntog unta niini dugay na kon dili pa kini balaan. Ipahibalo sa tibuok kalibutan nga dili kini mahimong gun-ubon, kay “kini ang gahum sa Dios alang sa kaluwasan ngadto sa tanan kinsa motuo.” [Tan-awa sa Mga Taga-Roma 1:16.]¹⁹ [Tan-awa sa sugyot 3 sa pahina 196.]

Ang Dios mopahiangay sa mga kahimtang sa kalibutan aron ang Iyang buhat mahimong masangyaw sa tibuok yuta.

Ang [Dios] misiguro nga ang mensahe nga gisangyaw sa iyang mga sulugoon sa miaging kapanahonan, nga gibag-o ug gisangyaw sa iyang mga sulugoon sa ulahing mga adlaw, kinahanglang madungog, ug pinaagi sa gahum sa iyang kalig-on iyang ipahiangay ang mga kahimtang niini nga kalibutan ug ipaubos ang mga katawhan hangtud nga sila mahimong mahinulsulon ug andam nga maminaw. Ang mga kamatuoran nga atong gitudlo, nga mao, ang mga kamatuoran nga gikinahanglan sa Dios nga atong itudlo sa kalibutan, nasangyaw na.²⁰

Ang Ginoo mipadayag ngadto sa usa sa iyang mga propeta nga sa pag-abut sa Basahon ni Mormon iyang sugdan ang iyang buhat taliwala sa mga kanasuran alang sa pagpahiuli sa iyang katawhan. [Tan-awa sa 2 Nephi 30:3–8; 3 Nephi 21:1–14; 29:1–2.] Kon kita makaamgo kon unsa ang gipaspason sa ebanghelyo ni Jesukristo nga mahimong masangyaw karon kon ikomparar sa tuig 1830, atong makita nga ang Ginoo mipahimutang sa iyang kamot ug ang oportunidad nga masayud gitanyag ngadto sa mga tawo. Dili madugay gikan karon, hangtud nga sa tanang bahin niining kalibutan ang ebanghelyo mahimong madungog pinaagi sa mga sulugoon sa Ginoo nga nagsangyaw niini diha sa gahum. Ang atong Langitnong Amahan mopahiangay sa mga kahimtang sa kalibutan aron ang ebanghelyo mahimong masangyaw.²¹

Ang Manluluwas miingon nga kini nga ebanghelyo sa gingharian isangyaw diha sa tibuok kalibutan alang sa usa ka saksi ngadto sa tanan nga mga nasud, ug unya ang katapusan moabut! [Tan-awa sa Joseph Smith—Mateo 1:31.] Ang Ginoo dili magkinahanglan og butang nga dili posible. Gitangtang niya ang mga babag, ug ang ebanghelyo “masangyaw.”²²

Ang Zion matubos, ug ang kalibutan, nga karon sayop ang pagsabut sa buhat sa “Mormonismo,” makasaksi nga kini ang gahum sa Dios alang sa kaluwasan ngadto niadtong kinsa motuman sa mga sugo sa atong Amahan. Ang akong pagpamatuod mao nga ang buhat paspas nga motubo, ug nga ang katawhan modawat sa “Mormonismo” diha sa ilang mga kalag; nga buhat kini sa atong Amahan. Kita mahimong dili lig-on ug huyang, apan kon kita hiyasnon ug putli sa atong kinabuhi, kon kita mobuhat sa unsay atong nasayran nga matarung, ang mga lalaki ug mga babaye iandam aron sa pagpadayon sa buhat sa Ginoo, hangtud nga ang buhat sa atong Amahan mahuman sa pamaagi nga Iyang gitinguha. Kadtong kinsa sayop ang pagsabut ngari kanato karon mas makaila kanato. Kadtong kinsa nagtuo nga kita adunay hinakog nga mga tinguha dili na malingla, ug ang atong mga kaigsoonan sa kalibutan, kinsa nagtinguha ug nangandoy nga masayud kon unsa ang gusto sa Ginoo kanila, matandog ang ilang mga kasingkasing ug modawat sa Ebanghelyo. Ang Zion mobarug ug modan-ag, ug mahimong labing mahimayaon nga butang sa tibuok yuta, ang Ginoong Dios sa Israel namulong sa ingon.²³ [Tan-awa sa sugyot 4 sa sunod pahina.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Si Presidente Smith nanagna nga “ang ebanghelyo ni Jesukristo nga atong Ginoo … madungog ngadto sa tanang mga bahin sa kalibutan” (pahina 187). Unsa nga mga teknolohiya ang nakatabang aron sa paghimo niini nga posible? Unsa nga laing mga paagi nga ang bag-o nga mga teknolohiya o siyentipikanhong mga kalamboan nakatabang sa buhat sa Ginoo?
Samtang ikaw nagbasa sa unang seksyon sa mga pagtulun-an (mga pahina 188–91), hunahunaa ang kabahin sa imong calling o buluhaton karon diha sa Simbahan. Sa unsang paagi nga ang pagtuman sa imong calling nagtugot kanimo sa pag-apil “sa pagpalambo sa buhat sa Ginoo”? Sa unsang paagi nga ang imong mga paningkamot isip usa ka home teacher o visiting teacher nakatabang niini nga buhat? Sa unsang mga paagi nga kitang tanan makaapil lapas pa sa atong pormal nga mga calling ug mga buluhaton?
Sa mga pahina 191–94, si Presidente Smith mihatag sa iyang pagpamatuod nga ang Ginoo ang nangulo sa buhat sa Iyang Simbahan. Unsa nga mga kasinatian ang imong nasinati nga nagpakita kanimo nga kini tinuod? Sa unsang paagi nga ang pagtudlo ug pagsunod sa ebanghelyo diha sa atong mga panimalay nagpakita sa atong hugot nga pagtuo sa buhat sa Ginoo?
Sa mga pahina 187–88 ug 194–95, pangitaa ang mga butang nga giingon ni Presidente Smith nga buhaton sa Ginoo aron sa pag-andam sa dalan aron masangyaw ang Iyang ebanghelyo. Unsa nga ebidensya ang imong makita karon nga kini nga mga butang nahitabo na o nanghitabo sa kalibutan karon?

May Kalabutan nga mga Kasulatan: Daniel 2:44–45; Joel 2:27–28; Mosiah 27:13; Doktrina ug mga Pakigsaad 64:33–34; 65:1–6; 107:99–100; Moises 1:39

Tabang sa pagtudlo: “May panahon … nga ikaw wala makahibalo sa tubag sa usa ka pangutana. Kon mahitabo kini, sulti lang nga wala ka mahibalo. Mahimong mosulti ka nga paninguhaon nimo nga makakita sa tubag. O mahimo nimong imbitaron ang mga estudyante sa pagpangita sa tubag, maghatag kanila og panahon sa lain pa nga leksyon sa pagreport sa unsay ilang nakat-unan” (Pagtudlo, Walay Labaw ka Mahinungdanon nga Tawag, 64).

Si Presidente Smith mituo nga ang mga kalamboan sa teknolohiya “mahimo gayud nga mga panalangin kon kini atong gamiton sa pagkamatarung alang sa pagsangyaw sa kamatuoran ug sa pagpadayon sa buhat sa Ginoo taliwala sa mga tawo.”

“Sa tibuok Simbahan adunay daghang oportunidad alang sa matag lalaki ug alang sa matag babaye sa pagbuhat og butang alang sa pagpanalangin sa ilang isigkatawo ug sa pagpalambo sa buhat sa Ginoo.”