Kapitulo 10

Ang mga Kasulatan, ang Labing Bililhon nga Librarya dinhi sa Kalibutan

Ang Dios mihatag kanato sa balaan nga mga kasulatan aron sa pagtabang kanato ug sa atong mga pamilya nga mangandam alang sa kinabuhing dayon.

Gikan sa Kinabuhi ni George Albert Smith

Sa kaulahian sa iyang kinabuhi, si Presidente George Albert Smith nahinumdom og usa ka kasinatian sa iyang kabatan-on sa dihang ang usa ka tudling sa kasulatan adunay mahangturong epekto kaniya: “Sa hapit na ko magkatorse anyos, akong gibasa ang ika-kwarenta nga kapitulo sa Alma diha sa Basahon ni Mormon sa among klase sa Sunday School. Nakahatag kini og usa ka impresyon sa akong hunahuna nga nakatabang sa dihang ang kamatayon mikuha sa mga minahal sa kinabuhi. … Usa kini ka dapit diha sa kasulatan nga nagsulti kanato kon asa paingon ang atong mga espiritu kon kini mobiya niini nga lawas [tan-awa sa mga bersikulo 11–14], ug gusto na ko nga makaadto niana nga dapit nga gitawag og paraiso sukad niana.”¹ [Tan-awa sa sugyot 1 sa pahina 128.]

Si Presidente Smith nanghinaut nga ang uban adunay ilang kaugalingong makahuluganon nga mga kasinatian sa pagbasa sa mga kasulatan. Sa iyang publiko nga mga pagpamulong ug sa iyang personal nga pakig-istoryahanay sa uban, iyang giawhag ang tanan sa pagtuon sa mga kasulatan isip usa ka pamaagi sa pag-ugmad og kaugalingon nila nga mga pagpamatuod kabahin sa ebanghelyo. Makausa, samtang nagbiyahe sakay sa tren, iyang gisugdan ang pagpakig-istorya sa usa ka lalaki nga nagtubo sa usa ka pamilya sa mga Santos sa Ulahing mga Adlaw apan wala na magtambongan sa Simbahan. “Samtang nag-istoryahanay kami,” miingon siya pagkataud-taud, “nakig-istorya ko kaniya mahitungod sa ebanghelyo ni Jesukristo. … Ug miingon siya samtang gihisgutan namo ang mga baruganan sa ebanghelyo, ‘Kini nga mga butang nakapaikag kanako.’ Nag-istoryahanay kami og dugay-dugay, ug sa dihang nahuman na kami, kanang maayong tawo, nagtuo ko nga usa siya ka maayong tawo, miingon kanako, ‘Akong ihatag ang tanan nga anaa kanako aron maangkon ang kasiguraduhan nga anaa kanimo. …’

“Miingon ko, ‘Akong igsoon, dili kinahanglan nga imong ihatag ang tanan nga anaa kanimo aron makaangkon nianang kasiguraduhan. Ang buhaton lamang nimo mao ang mainampoong pagsiksik sa mga kasulatan. Adto kon asa kini mapasabut kanimo. Tinguhaa ang kamatuoran, ug ang katahum sa kamatuoran mopakita kanimo, ug … ikaw masayud ingon nga ako nasayud nga ang Dios buhi, nga si Jesus mao ang Kristo, nga si Joseph Smith propeta sa Buhi nga Dios.’”²

Mga Pagtulun-an ni George Albert Smith

Ang mga kamatuoran nga anaa sa mga kasulatan labaw pa ka bililhon kay sa mga pilosopiya sa mga tawo.

Ang Biblia, Basahon ni Mormon, Doktrina ug mga Pakigsaad, ug Perlas nga Labing Bililhon, wala maglangkob sa kaalam sa mga tawo lamang, apan sa Dios. Bisan kon kini dili makita diha sa mga panimalay sa daghang mga tawo, kini naglangkob sa pulong sa Ginoo. Unsa man ang kapuslanan niini, bisan kon kita nakasabut kang Homer ug Shakespeare ug Milton, ug tingali makasulti ko sa tanang bantugan nga mga magsusulat sa kalibutan; kon kita napakyas sa pagbasa sa mga kasulatan atong nataligam-an ang labing maanindot nga bahin sa literatura niining kalibutana.

Akong mga kaigsoonan, ang tanang kamatuoran nga … mahinungdanon alang sa atong kaluwasan, anaa sa sulod sa mga hapin sa mga basahon nga gisulti na nako. Tingali kita wala makaangkon og usa ka librarya nga adunay duha o tulo ka libo ka mga volume, apan mahimo kita nga makaangkon sa gamay nga kantidad og usa ka bililhon nga librarya nga nagbili sa labing mahal nga dugo nga anaa sukad niining kalibutana.³

Wala ko mabalaka kon aduna man kamo o wala sa mga basahon sa maanindot nga mga librarya sa kalibutan diha sa inyong panimalay, basta aduna lamang kamo niini nga mga basahon. Hunahunaa ang minilyon ka mga volume nga anaa diha [sa] Congressional Library sa Washington, sa British Library, ug sa mga librarya sa uban nga mga nasud, minilyon ka mga volume —ug sa gihapon ang tanan nga gipadayag sa Dios ug gimantala ngadto sa katawhan nga gikinahanglan sa pag-andam kanila alang sa usa ka luna didto sa celestial nga gingharian anaa sa sulod sa mga hapin niining sagrado nga mga basahon. Pila man kanato ang nasayud sa unsay mga sulod niini? Kanunay ko nga moadto sa mga panimalay diin makita nako ang tanang kinabag-ohan nga mga magasin. Akong makita ang mga basahon nga gi-advertise isip labing halinon diha sa mga butanganan sa mga basahon. Kon kining tanan inyong ilabay ug ibilin lamang ang sagrado nga mga kasulatan, dili mawagtang kaninyo ang unsay gituyo sa Ginoo nga isulat ug gihimong anaa aron mapahimuslan natong tanan. Busa, mga kaigsoonan, taliwala sa atong mga panalangin dili nato kalimtan nga ang Ginoo ang mihimo niini nga posible aron kita makaangkon, makatagamtam, ug makasabut sa mga kasulatan ug aron makabaton sa iyang pulong nga gihatag gikan pa sa mga kapanahonan alang sa kaluwasan sa iyang mga anak.⁴

Samtang nagbasa ko sa mga kasulatan, … mahibulong ko sa kamaayo sa Ginoo sa pagpanalangin niadtong kinsa modawat sa iyang mga pagtulun-an, kay atong makaplagan ang kahupayan dinhi niining sagrado nga mga rekord kay sa diha sa tanan nga mga pilosopiya sa mga kapanahonan, ingon sa gihatag kanato pinaagi sa kaalam sa mga tawo.⁵

Mohisgut kita kabahin sa mga pilosopiya sa mga tawo ug modayeg niini isip makapadani, apan kon kini mosukwahi na sa mga pagtulun-an sa atong Langitnong Amahan ingon sa nakasulat diha sa Balaan nga mga Kasulatan, kini walay kapuslanan. Dili gayud kini modala ni bisan kinsa ngadto sa mahangturong kalipay, ni motabang kaniya sa pagpangita og luna sa gingharian sa atong Langitnong Amahan.⁶

Usahay mobati ko nga kita wala magtagad sa Balaan nga Biblia, ug sa unsay mga sulod niini, ug niining uban nga mga kasulatan, ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon nga gipasabut … isip mga sulat gikan sa atong Langitnong Amahan. Kini mahimong gidawat, gani kini mao ang iyang tambag ngadto sa tanang katawhan nga gihatag kanila nga sila unta masayud kon unsaon sa pagpahimulos niini nga mga oportunidad, nga ang ilang mga kinabuhi dili makawang lamang.⁷ [Tan-awa sa sugyot 2 sa pahina 128.]

Ang Ginoo mihatag kanato sa mga kasulatan aron sa pagtabang kanato nga mabuntog ang atong mga pagsulay ug maandam alang sa kahimayaan.

Kini mao ang adlaw sa pagmatuod sa atong kaugalingon, usa ka panahon sa pagsulay. Kini ang adlaw nga ang mga tawo panguyawan sa kalisang. Sa higayon nga ang katawhan sa kalibutan mangutana sa ilang kaugalingon kon unsa ang mahimong katapusan. Pipila ka dinasig nga mga tawo masayud kon unsa ang katapusan. Ang Ginoo misulti na kanato kon unsa ang mahitabo, diha [sa mga kasulatan], kining talagsaon nga librarya nga akong gigunitan. Siya mihatag kanato sa kasayuran nga kita nagkinahanglan sa pag-usab sa atong kinabuhi ug sa pag-andam sa atong kaugalingon nga bisan kon unsa pa man ang mahitabo anaa kita habig sa Ginoo.⁸

Akong basahon ang unsay gisulti sa Ginoo kalabut niining ulahing mga adlaw diha sa unang seksyon sa Doktrina ug mga Pakigsaad: …

“Busa, Ako ang Ginoo, nahibalo sa katalagman nga moabut diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit, ug mihatag kaniya og mga sugo. …

“Siksika kini nga mga sugo, kay sila mga tinuod ug matinud-anon, ug ang mga panagna ug mga saad nga anaa kanila ang tanan matuman.

“Unsa nga Ako ang Ginoo namulong, Ako namulong, ug Ako dili mangayo og pasaylo alang sa akong kaugalingon; ug bisan pa ang mga langit ug ang yuta mahanaw, ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.”

“Kay tan-awa, ug sud-onga, ang Ginoo mao ang Dios, ug ang Espiritu nagpamatuod, ug ang pagpamatuod tinuod, ug ang kamatuoran magpabilin hangtud sa kahangturan. Amen.” [D&P 1:17, 37–39.]

Kining pasiuna takus [sa] inyong matinguhaon nga konsiderasyon. Kini ang pag-awhag sa Amahan kanatong tanan. Kini ang mahigugmaon nga tambag sa usa ka malumong ginikanan kinsa nasayud sa unsay gikinahanglan kanato, sama sa iyang giingon diha sa kapitulo nga bag-o pa lang nakong gibasa kay nahibalo sa katalagman nga moabut diha sa mga lumulupyo sa yuta siya mihatag niini nga mga sugo.⁹

Usahay malimot kita nga ang Ginoo namulong ug kita napakyas sa pagpahibalo sa atong kaugalingon sa Iyang mga balaod. …

Dinosena nga mga tudling sa mga kasulatan mahimong tan-awon isip ebidensya nga ang atong Langitnong Amahan diha sa kalooy ug kamabination nakig-istorya ngadto sa katawhan sa tanang kapanahonan, dili lamang sa pagsulti kanila kon unsa ang mahitabo, apan nangaliyupo kanila sa pagbiya sa sayop nila nga binuhatan aron ang kalaglagan dili moabut kanila. …

Ang atong Langitnong Amahan, pinaagi sa Iyang matinud-anon nga mga representante, misulti kanato kabahin sa importante nga mga butang nga kinahanglang mahitabo ug kita makabasa mahitungod niini diha sa Iyang balaan nga mga kasulatan. Kon kita nagtinguha gayud nga maluwas ug mahimaya sa Iyang celestial nga gingharian Siya mitudlo kanato kon unsay buhaton.¹⁰

[Ang mga kasulatan mao] ang labing maanindot nga librarya nga makita sa tibuok kalibutan. Unsay sulod niini? Kini naglangkob sa unsay gihunahuna sa atong Amahan nga adunay dakong importansya nga mapreserbar ug mahatag ngadto sa katawhan ug magamit diha sa daghang mga pinulongan sa Kalibutan. Kini nga mga kasulatan mahinungdanon tanan ug kinahanglang masabtan sa mga Santos sa Ulahing mga Adlaw. Dili ko mohangyo kaninyo sa pagpataas sa inyong mga kamot sa pagtino kon pila kaninyo nga nagtigum dinhi ang nakabasa gayud niini nga mga basahon, apan gusto nakong kuhaon ang inyong pagtagad sa katinuod nga kini bililhon nga mga kamatuoran, ug naglangkob kini sa gipadayag nga pulong sa Ginoo nga giimprinta ug gimantala ngadto sa kalibutan alang sa katuyoan sa pag-andam sa iyang mga anak og usa ka luna didto sa celestial nga gingharian. Mao kana kon ngano nga ako miingon nga kini bililhon kaayo. … Unsa gayud kita ka mapasalamaton nga kita nabuhi sa adlaw ug panahon diin kita makabasa sa iyang tambag ug mapasabut ang mga butang nga makapalibog unta ug dili klaro ngari kanato.¹¹ [Tan-awa sa sugyot 3 sa pahina 129.]

Nagdasig kita og hugot nga pagtuo diha sa atong mga pamilya pinaagi sa pagbasa sa mga kasulatan uban kanila.

Gusto ko nga kamo mangutana sa inyong kaugalingon, pila man kaninyo ang mibasa og bisan unsang butang ngadto sa inyong mga pamilya gikan niini nga mga basahon sa matag karon ug unya, mipundok kanila aron sa pagtudlo kanila sa mga butang nga kinahanglan nila nga masayran. Nahadlok ko nga kadaghanan kanato moingon nga kita busy kaayo.¹²

Kita nakadungog na kabahin sa daghang mga panalangin nga gihatag sa Ginoo kanato diha sa sagrado nga mga rekord nga gitipigan hangtud sa atong panahon, ug kana naglangkob sa tambag sa usa ka Amahan nga maalamon sa tanan. Makapaguol nga daghan kaayo sa atong katawhan, uban sa mga oportunidad nga gitanyag, nagkulang sa kahibalo sa mga sulod niining sagrado nga mga rekord.¹³

Ipakawalay sala ba kita sa atong Amahan kon kita mopauli na ngadto Kaniya, kon kita napakyas sa pagtudlo sa atong mga anak sa kaimportante niining sagrado nga mga rekord? Sa akong hunahuna dili. … Nagtuo ba kamo nga human nga ang Ginoo … mibutang nga makab-ot ra nato ang labing maanindot nga mga pagtulun-an nga anaa niining balaan nga mga rekord, nga siya moisip ba kanato nga dalaygon kon kita napakyas sa pagtudlo niini ngadto sa atong mga pamilya, ug sa pagpasabut niini niadtong atong mga kaila?

Mga kaigsoonan, gusto nakong ipasabut og maayo pag-usab ang pagtulun-an sa Manluluwas: “siksika ang mga kasulatan;” basaha kini sa mainampoon ug matinud-anon nga paagi, itudlo kini diha sa inyong mga panimalay; tawga ang inyong mga pamilya sa pagpundok uban kaninyo ug modasig diha kanila og hugot nga pagtuo sa buhi nga Dios, pinaagi sa pagbasa niadto nga mga butang nga gipadayag. Kini ang labing bililhon sa tanan nga mga librarya sa tibuok kalibutan.¹⁴

Ibutang kini nga librarya diin inyo kining makita, ug diin ang inyong mga anak makakita niini, ug dayon pagbaton og igo nga interes sa mahangturong kaluwasan niadtong batang mga lalaki ug batang mga babaye nga anaa sa inyong panimalay nga kamo mangita og pamaagi nga sila mainteresado sa unsay sulod niini nga mga basahon, nga sila mahimong masayud kon unsa kini ka bililhon sa panan-aw sa ilang Langitnong Amahan.¹⁵

Unsa ka maanindot nga butang kini alang kanako sa dihang ako usa pa ka gamay nga bata nga adunay amahan ug inahan nga manglingkod tupad sa fireplace ug magbasa sa Biblia samtang kaming mga anak manglingkod sa salog. …

Karon, gusto kong mosulti, akong mga kaigsoonan, nga ang tambag ni Jesukristo, gipatuman pa gihapon ngari kanato diin siya miingon, “Kamo nagasusi sa mga kasulatan, kay nagahunahuna man kamo nga pinaagi niini makakaplag kamo sa kinabuhing dayon, ngani kini mao ang nagapanghimatuod kanako.” [Juan 5:39.] Ayaw ibaliwala ang karaang Biblia sa pamilya; ayaw kini ibutang sa tukador ug kalimtan kini. Sutaa, kon kamo wala pa mahibalo, kon unsa ang gisulti niini, ug kon nabasa na ninyo kini kaniadto, basaha kini pag-usab sa kanunay ngadto sa inyong mga anak ug ngadto sa mga anak sa inyong mga anak. Basaha kanila dili lamang ang Biblia, apan ang uban nga mga basahon sa kasulatan nga gihatag sa Ginoo alang sa atong kahimayaan, alang sa atong kahupayan ug alang sa atong panalangin.¹⁶

Ako moawhag kaninyo, O Israel, siksika ang mga kasulatan; basaha kini diha sa inyong mga panimalay; itudlo sa inyong mga pamilya ang unsay gisulti sa Ginoo, ug dili kaayo kita mogahin sa atong panahon sa pagbasa sa dili mahinungdanon ug sa kasagaran makadaut nga literatura niining panahona, ug adto ngadto sa tinubdan sa kamatuoran ug basaha ang pulong sa Ginoo.¹⁷ [Tan-awa sa sugyot 4 sa pahina 129.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Samtang ikaw nagbasa sa unang paragraph sa pahina 121, paghunahuna og higayon nga ang usa ka bersikulo sa kasulatan nakapadasig kanimo sa susama nga paagi. Giunsa man nimo sa pagkahibalo nga ang mga kasulatan tinuod? Unsa nga mga kasinatian ang imong nasinati uban niini bag-ohay lang nga nakapalig-on niana nga pagpamatuod?
Basaha ang seksyon nga nagsugod sa pahina 121 ug hunahunaa kon unsa ka importante ang mga kasulatan diha sa imong personal nga librarya (uban sa laing mga butang nga imong gibasa, gitan-aw, o gipaminaw). Unsa ang imong mabuhat aron sa paghatag sa mga kasulatan og mas mahinungdanon nga luna diha sa imong panimalay ug sa imong kinabuhi?
Ribyuha ang seksyon nga nagsugod sa pahina 124. Sa unsang paagi nga ang mga kasulatan nakatabang kanimo sa pag-atubang sa mga kalamidad sa katapusang mga adlaw? Hunahunaa kon sa unsang paagi nga mahimo nimong magamit ang mga kasulatan sa pagtabang og usa ka tawo nga imong nailhan nga nag-atubang og malisud nga pagsulay.
Pamalandonga ang tambag ni Presidente Smith ngadto sa mga pamilya diha sa mga pahina 126–28. Unsa nga mga panalangin ang moabut ngadto sa mga pamilya kinsa manag-uban nga nagtuon sa mga kasulatan? Unsa man ang pipila ka epektibo nga mga paagi nga makapadasig sa interes sa atong mga anak (o mga apo) sa mga kasulatan? Ikonsiderar sa mainampoong paagi kon unsa ang imong mabuhat aron mahimong mas makugihon sa pagtuon sa mga kasulatan uban sa imong pamilya.

May Kalabutan nga mga Kasulatan: Deuteronomio 6:6–7; Josue 1:8; Mga Taga-Roma 15:4; 2 Timoteo 3:15–17; 2 Nephi 4:15; Helaman 3:29–30; Doktrina ug mga Pakigsaad 33:16

Tabang sa pagtudlo: “Makatabang ikaw niadtong imong gitudloan nga mobati nga mas masaligon sa ilang abilidad sa pag-apil sa panaghisgutan kon imong tubagon sa positibo nga paagi ang tanang sinsero nga komentaryo. Pananglitan, mahimo ikaw nga mosulti, ‘Salamat sa imong tubag. Maayo kaayo kadto’ … o ‘Nindot kana nga ehemplo’ o ‘Nagpasalamat ako sa imong tanang gisulti karon’” (Pagtudlo, Walay Labaw ka Mahinungdanon nga Tawag, 64).

“[Ang mga kasulatan naglangkob] sa unsay gihunahuna sa atong Amahan nga adunay dakong importansya nga mapreserbar ug mahatag ngadto sa katawhan ug magamit diha sa daghang mga pinulongan sa Kalibutan.”

“Tawga ang inyong mga pamilya sa pagpundok uban kaninyo ug modasig diha kanila og hugot nga pagtuo sa buhi nga Dios, pinaagi sa pagbasa niadto nga mga butang nga gipadayag.”