Choq’ reheb’ laj jolominel—Xtzolb’aleb’ ut xtenq’ankileb’ laj k’utunel

Jo’ aj jolominel, teneb’anb’il sa’ aab’een “xch’utub’ankil aawib’ rik’ineb’ li ak’ aj k’utunel” sa’ laa ch’uut re “taatenq’aheb’ chixkawresinkil rib’ rik’in li xe’boqe’ wi’” (Jolomil K’anjenel Hu, 17.3, Biblioteca del Evangelio). Eb’ li ch’utam a’in, a’aneb’ jun hoonal re xk’utb’al chiruheb’ li ak’ aj k’utunel lix loq’laj b’oqb’al ut re xwaklesinkleb’ xch’ool re te’xtaw xyaalal k’a’ru naraj naxye k’utuk jo’ kik’utuk li Kolonel. Jo’ jun aj jolominel, naru taatenq’aheb’ li ak’ aj k’utunel chixkawresinkileb’ rib’ chi k’anjelak rik’in:

• Xk’eeb’aleb’ chixnaw naq a’ li Kolonel taatenq’anq reheb’ sa’ lix b’oqb’al (chi’ilmanq Tzol’leb’ ut Sumwank 88:78).

• Xk’eeb’al junaq reetalil li hu a’in reheb’ li ak’ aj k’utunel ut xwaklesinkileb’ xch’ool chixsik’b’al chan ru te’roksi li na’leb’ a’in sa’ li k’utuk.

• Xwotzb’al rik’ineb’ li ak’ aj k’utunel yalaq k’a’ chi na’leb’ chirix laa ch’uut li maare taak’anjelaq reheb’.

• A’ yaal jo’ na’ajman, xk’utb’al chiru li ak’ aj k’utunel k’a’ru tzoleb’aal te’roksi re k’utuk ut rik’in k’a’ru te’xtikib’. Xwotzb’al rik’ineb’ k’a’ru li aajel ru te’xnaw chirix li tzoleb’aal ut chirixeb’ li komon.

• Xch’olob’ankil chiru li ak’ aj k’utunel naq naru nakatenq’a rik’in li k’anjel b’oqb’il wi’. Xyeechi’inkil aatenq’ sa’ li tzoleb’aal ut xk’eeb’al xkomon chik li na’leb’ re k’utuk wi na’ajman.

• Xyeechi’inkil aawib’ chi jo’q’ehaq re rilb’al chan ru neke’k’utuk lix komon chik laj k’utunel, ut xyeeb’al reheb’ k’a’ru tento te’xchaab’ilob’resi jo’ musiq’anb’il xb’aan li Musiq’ej.

• Xb’oqb’aleb’ laj k’utunel chi tz’aqonk sa’ li ch’utam reheb’ laj k’utunel nab’aanuman rajlal oxib’ po.

Chi kok aj xsa’ tat-aatinaq rik’ineb’ laj k’utunel re xtenq’ankileb’. Maare rub’elaj xhoonal li k’utuk naru taawaatina jun laj k’utunel yal chi junpaat chirix li na’leb’ sa’ li hu Li K’utuk jo’ li Kolonel. Patz’ re k’a’ru naxb’aanu chi us sa’ xk’anjel, ut k’a’ru taaraj xyiib’ankil. Q’unaq aach’ool rik’in, ut b’antioxi lix k’anjel.

Naru nakakawresi aawib’ re aatinak chirix li na’leb’ a’in rik’in xk’eeb’al reetal chan ru nak’utuk laj k’utunel. K’e reetal lix chaab’ilal laj k’utunel ut sik’ k’a’ru naru taatenq’a wi’. Roksinkil lix chaab’ilal laj k’utunel aajel ru jo’ ajwi’ rilb’al k’a’ru naru tixchaab’ilob’resi.