Eb’ li ch’utam reheb’ laj k’utunel—Choq’ reheb’ li na’b’ej yuwa’b’ej ut li wankeb’ xk’anjel jo’ aj k’utunel

Sa’ chixjunileb’ li teep te’wanq li ch’utam reheb’ laj k’utunel rajlal oxib’ po, choq’ reheb’ li na’b’ej yuwa’b’ej jo’ ajwi’ li wankeb’ xk’anjel jo’ aj k’utunel sa’ li barrio. Sa’eb’ li ch’utam a’in, li na’b’ej yuwa’b’ej ut laj k’utunel naru te’aatinaq chirix li k’utuk jo’ li Kristo (chi’ilmanq Jolomil K’anjenel Hu: Li K’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 13.4, 13.5, 17.4, 17.5, Biblioteca del Evangelio).

Li wiib’eb’ chi ch’utam a’in neke’b’aanuman rajlal oxib’ po chiru li 50 k’asal choq’ reheb’ li clase.

Li ch’utam choq’ reheb’ li na’b’ej yuwa’b’ej

Ani najolomin reheb’ li ch’utam a’in? Jun laj jolominel re li Dominkil Tzoleb’aal naxb’eresi li ch’utam choq’ reheb’ na’b’ej yuwa’b’ej. A’b’anan, li obiispil naru te’xk’e li k’anjel a’in re jalan chik li komon sa’ li teep.

Li jolomil ch’utam re li teep, chi tenq’anb’il xb’aan li awa’b’ejil re li Dominkil Tzoleb’aal, najolomin reheb’ li ch’utam reheb’ na’b’ej yuwa’b’ej. Neke’aatinak chirixeb’ li na’b’ej yuwa’b’ej ut li junkab’al, ut sa’ komonil neke’xtz’il rix b’ar wan li na’leb’ aajel ru choq’ reheb’ sa’ li hu Li K’utuk jo’ li Kolonel.

Ani te’tz’aqonq? Li jolomil ch’utam re li teep naxye ma te’xsik’eb’ ru ani te’tz’aqonq, malaj ma te’xb’oqeb’ chixjunil li na’b’ej yuwa’b’ej.

Jo’q’e te’b’aanumanq li ch’utam a’in? Li ch’utam reheb’ li na’b’ej yuwa’b’ej naru nab’aanuman yalaq k’a’ru domingo a’ yaal jo’ k’uub’anb’il xb’aan li ch’uut re li teep.

Li ch’utam reheb’ li wankeb’ xk’anjel jo’ aj k’utunel

Ani najolomin reheb’ li ch’utam a’in? Jun komon sa’ li awa’b’ejil re li Dominkil Tzoleb’aal naxb’eresi li ch’utam reheb’ laj k’utunel. A’b’anan, li obiispil naru te’xk’e li k’anjel a’in re jalan chik li komon sa’ li teep.

Li jolomil ch’utam re li teep, chi tenq’anb’il xb’aan li awa’b’ejil re li Dominkil Tzoleb’aal, najolomin reheb’ li ch’utam reheb’ laj k’utunel. Neke’aatinak chirixeb’ laj k’utunel ut eb’ laj tzolonel, ut sa’ komonil neke’xtz’il rix b’ar wan li na’leb’ aajel ru choq’ reheb’ sa’ li hu Li K’utuk jo’ li Kolonel.

Ani te’tz’aqonq? Chixjunileb’ li neke’k’anjelak jo’ aj k’utunel sa’ li teep te’tz’aqonq sa’ li ch’utam reheb’ laj k’utunel. B’oqb’ileb’ ajwi’ li neke’jolomin reheb’ li molam ut li ch’uut.

Jo’q’e te’b’aanumanq li ch’utam a’in? Eb’ laj k’utunel neke’wulak sa’ li ch’utam a’in jun li domingo naq ink’a’ yookeb’ chi k’utuk.

• Eb’ laj k’utunel re li tijonelil, li Komonil re Tenq’ank, ut li Saaj Ixq neke’ru chi tz’aqonk sa’ li xb’een malaj li rox domingo, a’ yaal jo’ b’eresinb’il xb’aaneb’ laj jolominel sa’ li teep.

• Eb’ laj k’utunel re li Dominkil Tzoleb’aal neke’ru chi tz’aqonk sa’ li xkab’ malaj li xkaa domingo, a’ yaal jo’ b’eresinb’il xb’aaneb’ laj jolominel sa’ li teep.

• Eb’ laj k’utunel re li Tzoleb’aal reheb’ li Kok’al neke’ru chi tz’aqonk sa’ yalaq domingo, a’ yaal jo’ b’eresinb’il xb’aaneb’ li awa’b’ejil re li Tzoleb’aal reheb’ li Kok’al ut li Dominkil Tzoleb’aal. Wi na’ajman, eb’ laj k’utunel re li Tzoleb’aal reheb’ li Kok’al naru naq te’wanq xch’utam xjuneseb’ re te’xkuub’ xna’leb’ sa’ komonil chirix li na’ajman ru re xtzolb’aleb’ li kok’al. A’in naru nab’aanuman sa’ li 20 k’asal re xhoonalil li b’ichank, naq maji’ neke’tikla li ch’utam re domingo, malaj sa’ junaq chik kutan re li xamaan. Naru nawan naab’al sut li ch’utam reheb’ laj k’utunel re li Tzoleb’aal reheb’ li Kok’al re naq toj wankeb’ lix k’ihaleb’ laj k’utunel sa’ li Tzoleb’aal reheb’ li Kok’al rajlal xamaan. (Jun na’leb’: A’ yaal jo’ na’ajman, li awa’b’ejil reheb’ li Tzoleb’aal reheb’ li Kok’al neke’ru chixtawb’al jalan chik laj k’utunel, chixmolk’ankil junjunqeb’ li tzoleb’aal, malaj chixb’aanunkil k’a’ruhaq chik re naq eb’ laj k’utunel sa’ li Tzoleb’aal reheb’ li Kok’al neke’ru chi xik sa’eb’ li ch’utam reheb’ laj k’utunel.)

K’a’ru taab’aanumanq sa’ li ch’utam

Sa’eb’ li ch’utam (reheb’ laj k’utunel jo’ ajwi’ li na’b’ej yuwa’b’ej), a’an a’in li nab’aanuman:

1. Aatinak sa’ komonil (maare 20 k’asal). Patz’ reheb’ li na’b’ej yuwa’b’ej malaj reheb’ laj k’utunel k’a’ru na’el chi chaab’il naq neke’xk’ut li evangelio sa’ ochoch malaj sa’ tzoleb’aal. Naru ajwi’ te’xye b’ar wan li k’a’ru ch’a’aj, ut li k’a’ru te’raj xyiib’ankil.

2. Tzolok sa’ komonil (maare 15 k’asal). Aatinaheb’ li na’b’ej yuwa’b’ej malaj laj k’utunel chirix jun li na’leb’ sa’ li hu Li K’utuk jo’ li Kolonel. Naru ajwi’ teetaw lee na’leb’ sa’ li hu Kim, Taaqehin.

3. Xk’uub’ankil eena’leb’ (maare 10 k’asal). Patz’ reheb’ li na’b’ej yuwa’b’ej malaj reheb’ laj k’utunel k’a’ru na’leb’ xwulak chiruheb’ sa’ li ch’utam, ut chanru te’roksi li na’leb’ a’an sa’ xk’anjel.