Me Baleti Ira na iLiuliu—Vakamatautaki kei na Tokoni na Qasenivuli

Vaka iliuliu, sa nomu itavi mo “sotavi ira na qasenivuli kacivi vou” ena nomu isoqosoqo ka “vukei ira ni vakavakarau tu ki na nodra veikacivi” (iVoladusidusi Raraba, 17.3, Gospel Library). Na soqoni eso oqo sa madigi tu ni nodra vakatakilai na qasenivuli vou kina nodra veikacivi tabu ka vakauqeti ira ni kila vakaoti na ibalebale ni veivakavulici ena ivakarau ni iVakabula. Vaka iliuliu, o rawa ni vukei ira na qasenivuli vou mera vakarau veiqaravi tu ena caka ni veika oqo:

• Yalodei tu ni na vukei ira na iVakabula ena nodra veikacivi (raica na Vunau kei na Veiyalayalati 88:78).

• Solia vei ira na qasenivuli vou e dua na ilavelave ni vurevure oqo, ka vakauqeta mera vakaraica na sala eso me tutaki kina na kena ivakavuvuli ena nodra veivakatavulici.

• Wasea vei ira na qasenivuli vou e dua na ka me baleta na nomu isoqosoqo ena rawa ni veivuke tu mera kila.

• Ke gadrevi tu, tukuna vei ira na qasenivuli vou na rumu cava me veivakatavulici kina kei na lesoni cava me tekivu kina. Vakarautaka e dua na itukutuku era gadreva me baleta na nodra kalasi kei na lewe ni kalasi.

• Vakamacalataka vei ira na qasenivuli vou ni rawa nio vukei ira ena nodra veikacivi. Dolea na veitokoni ena rumu ni kalasi ka vakayagataka na ivurevure ni veivakatavulici ke gadrevi.

• Vakadikeva tu vagauna na kalasi ni qasenivuli, ka soli tukutuku lesu ena veivakauqeti ni Yalotabu.

• Sureti ira na qasenivuli mera vakaitavi ena soqoni ni matabose ni qasenivuli ena veivulatolu.

Ena nodra veiqaravi taucoko na qasenivuli, tomana tikoga mo sotavi ira vagauna ka veitokoni tu. Me ivakaraitaki, o rawa ni veivosaki vakalekaleka kei na qasenivuli ni se bera ni oti na kalasi me baleta tikoga na ivakavuvuli ni Veivakatavulici ena iVakarau ni iVakabula. Taroga na qasenivuli na ka era nanuma era sa caka vinaka tiko kina kei na sala eso era na via vakavinakata. Vakayaloqaqataki ira ena yalovinaka kei na vakavinavinaka ena vuku ni tavi era qarava.

E dodonu mo vakarau tu kina veivosaki vakaoqo ena nomu wanonova na qasenivuli. Saga mo kila vakavinaka sara na kaukauwa ni qasenivuli ka raica na sala eso o rawa ni veitokoni kina. Na taracake ni kaukauwa ni dua na qasenivuli sa ka bibi sara ki na vakatakilai ni madigi me vakavinakataki.