vakavulica tiko na matavuvale na turaga

Vakatutu me baleta na Veimataqali iTuvaki ni Veivakavulici kei ira na Vuli

Na ivakavuvuli ni veivakavulici ena ivakarau ni iVakabula e rawa ni vakayagataki ki na madigi cava ga ni veivakavulici—e vale, e valenilotu, kei na veivanua tale eso. Ia, na veimadigi yadua e salavata kei na kena ituvaki duatani. Na iwase oqo e solia na ikuri ni vakatutu e baleti ira vakatabakidua eso na vuli kei na ituvaki ni veivakavulici.

iTikotiko kei n Matavuvale

Na Vuvale sa Vanua Vinaka Duadua ni Veivakavulici kei na Vulici ni Kosipeli

E vakavuvulitaka o Peresitedi Russell M. Nelson ni vale sa dodonu me “vanua ni vulici ni kosipeli” (“Yaco me iVakaraitaki Yalododonu Edaidai,” Liaona, Nove. 2018, 113). Na ivakavuvuli e yaco ena lotu se ena semineri e yaga ka gadrevi, ia e kena inaki me tokona na veivakavulici e yaco e vale. Na vanua levu duadua—kei na ituvaki vinaka duadua—me baleta na vulici ni kosipeli, me baleti keda kei na noda matavuvale, sa ikoya na itikotiko.

Ia oqori e sega ni kena ibalebale ni vulici vinaka ni kosipeli e yaco ga vakataki koya mai vale; e gadrevi kina na sasaga vagumatua. E vakatura o Peresitedi Nelson ni o na gadreva mo “veisautaka” se “vakayawaka na nomu itikotiko”—sega ni gadrevi ena nomu basuraka sobu na lalaga se vakuria na qalo vou ia ena nomu dikeva na veiyalo raraba ena nomu itikotiko, oka kina na nomu cau ki na yalo oqori (“Becoming Exemplary Latter-day Saints,” 113). Me ivakaraitaki, vakasamataka na sere kei na ivakatagi, vidio, kei na itukutuku tale eso ena nomudou itikotiko; na iyaloyalo ena lalaga; kei na ivakarau era vosa kina na lewe ni nomu matavuvale ka ra dau veitalanoa vakataki ira. E dau sureta na veivakauqeti ni Yalo Tabu? O dau biuta vakatikitiki beka na gauna mo vulica kina na kosipeli, vakayadua se vakamatavuvale? Era vakila beka na lewe ni matavuvale ni ra lomani, taqomaki, ka voleka vua na Kalou ena gauna era tiko kina ena nomu vale?

O na sega beka ni vakila ni o sa lewa na veiyasana vakayalo ena nomu itikotiko. Kevaka e yaco oqori, mo veivakayarayarataki vinaka duadua o rawata ka kerea na veivuke ni Turaga. Ena rokova o Koya na nomu sasaga dodonu. Ni o tovolea mo vakavulica ka vulica na kosipeli, kevaka sara mada ga o sega ni raica na macala ni gagadre, o sa rawa-ka tiko.

Na Vuli e Vale e Yavutaki ena Veimaliwai

“Lomani ira o vakavulica” sa baleti ira kece sara na ituvaki ni veivakavulici ni kosipeli, ia ena loma ni vuvale, na loloma e dodonu me dau yaco mai vakarawarawa ka vakilai vakatitobu sara. Kevaka mada ga e lailai sobu mai na vinaka ni nomu vuvale, e kena inaki me itakele ni veivakavulici ni kosipeli baleta oqori na vanua e tarai cake kina na noda veimaliwai tudei. O ira na qasenivuli ena taudaku ni vuvale era na rairai sotava vakalevu cake se tuberi vakaqasenivuli, ia era na sega ni rawa ni tokaruataka na veika e rawa ni yaco me baleta na veilomani, kei na veimaliwai tawamudu e tiko e vale. Mo susuga cake na veimaliwai oqori. Vakayagataka na gauna kei na sasaga e ganita mo vakarorogo vei ira na lewe ni nomu matavuvale ka taracake na veivakabauti kei na veiciqomi vata kei ira. Oqo ena vukea na kena tauyavutaki e dua na yavu tudei me baleta na nomu sasaga mo vakavulica ka vulica na kosipeli e vale.

Na Vuli e Vale e Rawa ni Tuvalaki ia e Rawa Talega ni Yaco ni Sega ni Vakarautaki

E vuqa na kalasi ni Lotu e dau yaco vakadua ena dua na macawa, ka tuvai me tekivu ka cava, ia oqo e sega ni dau yaco e vale. Ena tiko beka e dua na lesoni vakarautaki ni lotu vakamatavuvale se vulici ni ivolanikalou vakamatavuvale, ia e dau yaco wasoma ena veigauna vakamatavuvale na gauna sega ni vakarautaki, —ni o kana tiko, cakacaka ni liga, qitora e dua na qito, lako ki cakacaka se koronivuli, wili ivola, se sara yaloyalo vata. Ni yaco na cagikaukauwa kei na uca e rawa ni gauna me tukuni kina ni kosipeli e vakarurugi keda mai na cava ni bula. E dua na yabaki tinivakacaca e tiko vua e dua na vakatulewa dredre me cakava sa na vakarau tu beka me vulica na ivakatakila yadua. Na gone e rere e rawa ni yaga ki na nomu ivakadinadina me baleta na Dauveivakacegui. O ira na gone era dau caka cala se veivakacacani vakai ira e rawa ni ra vakavulici me baleta na veivutuni kei na veivosoti.

Me vaka ni sega ni dau namaki na veigauna vakaoqo, ena sega ni rawa ni o vakarautaka me vaka na nomu vakarautaka e dua na lesoni. Ia, e rawa ni o vakarautaki iko ena nomu kidava tiko na Yalo Tabu ka segata mo “vakarau tu ga” (1 Pita 3:15). Na gauna cava ga e rawa ni yaco me dua na veivakavulici se gauna ni vuli.

Na vuli ena Vuvale e Lewena na Sasaga Lalai, Rawarawa, ka Sasaga ena Veigauna

Ena so na gauna era dau yalolailai na itubutubu ni ra segata me ra vakavulica na kosipeli e vale e sega ni vaka me ra qaqa. Ni tauri yadudua, na lotu vakamatavuvale, soqoni ni vuli ivolanikalou, se na veivosaki vakosipeli ena sega beka ni vaka na kena levu e rawati. Ia na kena sokumuni na sasaga lalai, rawarawa, ka tokaruataki tiko ena veigauna, e rawa ni kaukauwa cake ka veivaqaqacotaki mai na dua na lesoni vakavudua se cecere. “Raica ena yaco na ka kecega ena kena gauna,” sa kaya na Turaga. “O koya mo dou kakua kina ni oca ena cakacaka vinaka, ni dou sa tauyavu taka tiko e dua na cakacaka cecere. Ia ena tubu mai ena veika lalai na veika cecere” (Vunau kei na Veiyalayalati 64:32–33; raica talega na Alama 37:6–7). Kakua ni guce, ka kakua ni leqataka na rawati ni dua na ka cecere ena veigauna kece. Mo gugumatua tikoga ena nomu sasaga.

Ena Vuvale, Erau Sega ni Veitawasei na Vuli kei na Bula

E gadrevi me vakayagataki ena itikotiko na kosipeli. E kea o ira na tamata ko ni sa vulica vata tiko na kosipeli sa o ira ko na bulataka kina—ena veisiga. Na ka dina, ni vuqa na gauna, na bulataki ni kosipeli sa ikoya na ivakarau eda vulica kina na kosipeli. Ni o vulica ka vakavulica na kosipeli e vale, vaqara na sala eso mo semata kina na veika o sa vulica tiko ena veika o sa cakava tiko. Ena nomu vuvale, laiva na kosipeli me dua na ka o segata mo bulataka, sega walega ni dua na ka o tukuna tiko.

dua na marama vakavulici ira na gone

Na madigi ni veivakavulici ena matavuvale e dau yaco wasoma ena veigauna sega ni vakarautaki, e veisiga.

Nodra Vakavulici na Gonelalai

Era Gadreva na Gone na Veimataqali

Era duidui kece na gone, ia ni ra tubu cake tiko, ena veisau na nodra gagadre. Na duidui ni nomu iwalewale ni veivakavulici ena vukei iko mo sotava na nodra duidui ni gagadre. Me kena ivakaraitaki, vakasamataka mo vakayagataka na veika oqo:

• iTalanoa. E vukei ira na gone na italanoa me ra raica na yaga ni kosipeli ena bula e veisiga. Vakayagataka na italanoa mai na ivolanikalou, mai na nomu bula, mai na itukutuku ni nomu matavuvale, se mai na mekasini ni Lotu, vakabibi na italanoa baleta na iVakabula. Tuvanaka na sala eso me ra okati kina na gone ena italanoa—ena tauri ni iyaloyalo, tokaruataki ni malanivosa, se matanataka eso na tikina.

• Veivuke Vakaiyaloyalo. Na iyaloyalo, vidio, kei na iyaya eso e rawa ni vukei ira na gone me ra kila ka nanuma tiko na ivakavuvuli ni kosipeli. E vuqa na iyaloyalo kei na vidio e rawa ni kunei ena Media Library ena ChurchofJesusChrist.org

• Sereivakatagi. Na serenilotu kei na sere e rawa ni vukei ira na gone me ra vakila na loloma ni Kalou, vakila na Yalotabu, ka vulica na dina vakosipeli. Na memela ni vakatagi, itautau, kei na veisotari ni rorogo e rawa ni vukei ira na gone me ra nanuma tiko na dina vakosipeli ena veiyabaki e muri. Ni o lagasere vata kei ira na gone, vukei ira me ra raica ka kila na ivakavuvuli e vakavuvulitaki ena sere.

E levu na gone e vinaka duadua nodra vuli ni vakayagataki e vica na wakilakila. Vakasaqara na sala me ra vukei kina na gone me ra vakayagataka nodra wakilakila ni rai, rorogo, kei na tara se vakila ni ra vuli. Ena so na gauna, ena rawa sara ni o kunea na sala me vakayagataki kina nodra wakilakila ni vaboboi kei na ikanakana!

Era dau Bulibuli na Gonelalai

Ni o sureta na gone me droini, tara, rokarotaka, se vola e dua na ka e semati ki na dua na ivakavuvuli ni kosipeli, o sa vukei ira me ra kila vakavinaka cake na ivakavuvuli, ka solia vua e dua na ivakananumi e laurai ni ka e vulica. E rawa talega ni ra vakayagataka na ka era sa bulia me ra wasea kina kei ira tale eso na ka era sa vulica. Na mekesini yadua ni iTokani e tu kina na itaviqaravi me vakayagataki kina nodra vakasama na gone.

Era Lomatarotaro na Gone

Ni ra taro na gone, raici ira me madigi, sega ni veivagolei tani. Na nodra taro na gone sa ivakaraitaki ni ra sa vakarau tu me ra vuli, ka solia vei iko na nodra taro na veivakararamataki yaga ki na veika era vakasamataka ka vakila tiko. Vukei ira me ra raica ni isau ni nodra taro e rawa ni kunei ena ivolanikalou kei na nodra vosa na parofita bula.

Era Gadreva na Gone na Loloma ena Gauna Mada Ga era Vakasosataki Tiko Kina

Eso na gauna na nona ivakarau e dua na gone e rawa ni vakacacana nodra vuli na vo ni kalasi. E vuqa na veivakacacani vakaitovo e tubu mai na dua na gagadre bibi. Ni yaco oqori, vosota, lomana, ka ciqoma na dredre ena sotava tiko beka na gone oqori. Ena gadreva beka ga o koya me levu cake nona madigi me vakaitavi kina vakavinaka ena lesoni—taura cake e dua na iyaloyalo, droini taka e dua na ka, se wilika e dua na ivolanikalou.

Kevaka e tomana tiko e dua na gone nona vakacaca, e rawa ni veivuke me da kauti koya vakatikitiki ka vosa vua. Ena yalo ni loloma kei na vosota, vakamacalataka na veika o namaka kei na nomu yalodei ni na rawa ni sotava. Vakacaucautaka na gone ni cakava na digidigi vinaka cake.

E Levu na Ka Me Ra Wasea na Gone

Ni ra vulica na gone e dua na ka vou, e ivakarau ni nodra bula me ra via wasea vei ira na tani. Vakayaloqaqataka na gagadre oqo ena nomu solia na madigi vei ira na gone me ra vakavulica na ivakavuvuli ni kosipeli vei ira, nodra lewe ni matavuvale, kei nodra itokani. Kerea talega vei ira me ra wasea vei iko na nodra vakasama, na veika era vakila, kei na veika era sa sotava ka semati ki na ivakavuvuli o vakatavulica tiko. O na raica ni tu vei ira na vakasama rawarawa, savasava, ka mana.

E Rawa ni Ra Vakila na Gone na Yalotabu ia Ena Gadrevi Beka me Vukei Me Kilai na Nona Veivakayarayarataki

O ira mada ga na gone era se bera ni ciqoma na isolisoli ni Yalo Tabu era rawa ni vakila na Nona veivakayarayarataki, vakabibi ni ra sa vulica tiko na veika baleti Jisu Karisito kei na Nona kosipeli. Ni ra sa digidigi dodonu, sa rawa ni ra vakila na veivakadonui ni iVakabula mai vua na Yalotabu. Vakavulica vei ira na gone me baleta na sala duidui e dau veitaratara kina kei keda na Yalotabu. Vukei ira me ra kila na Domona ni vosa tiko vei ira o Koya. Oqo ena vukei ira mera tauyavutaka e dua na itovo ni vakasaqaqara kei na cakacakataki ni ivakatakila ki na tamata yadua ena nodra bula taucoko.

Nodra Vakavulici na iTabagone

Era Rawaka Cecere na iTabagone

Ia, sa tu talega vei ira na itabagone na kaukauwa me ra vakayacoka ena veiqaravi vua na Turaga. E vuqa na veika e volai ena ivolanikalou e vakamatata taka ni tu na nona veivakabauti na Kalou ena nodra kaukauwa vakayalo na tamata gone. Kevaka era kidava na itabagone ni o vakabauti ira, ena tubu na nodra yalodei me baleta na kedra ituvaki vakalou, ka ra na vakidacalataki iko ena veika era na rawata. Vukei ira ena loloma me ra raica na veika e kila na Tamada Vakalomalagi ni rawa me ra yacova. Muria na ivakaraitaki ni iVakabula ena nomu tomana tiko mo lomani ira ka vakayaloqaqataki ira, cakacaka vata ena yalovosota kei ira, ka kakua ni soro ena vukudra.

Era Sa Vulica Tiko na iTabagone na Veika Baleti Ira

O ira na gone o vakavulica era tara tiko na yavu ni nodra ivakadinadina. Era sa vakarautaki tu ena iwalewale ni kena kilai na nodra vakabauta kei na dina. Era sa cakava tiko na vakatulewa ka na tara na mua ni nodra bula. Ni gadrevi mo bula tiko vakayalo ena veigauna dredre oqo ka vakayacora na ilesilesi ni Turaga ena vukudra, era na gadreva na itabagone o vakavulica mera kila na sala mera kunea kina na kaukauwa ena nodra vakatovolei, isau ni nodra taro, kei na yaloqaqa mera “tu ka ivakadinadina ni Kalou” (Mosaia 18:9).

Era sa gadreva tiko na itabagone me ra vulica na veika eso ena nodra vakanananu kei na veika era sotava ka sega ni kena dau cavuti ga na veika eso. Sa kena ibalebale oqo ni vakavulici ira na itabagone ena gadrevi kina na kila ni vakarorogo vinaka. Ni ra sa kila na itabagone ni ra rogoci, era na yalorawarawa vakalevu cake ki na ivakasala kei na veidusimaki. Vakadeitaka vei ira ni kilai ira na Turaga ka na vukei ira ni ra vakaogai ira ena taro kei na veivakatovolei. E rawa ni ra cakacakataka na nodra vakabauti Koya ena nodra tauyavutaka e dua na itovo tudei ni masu kei na vuli ivolanikalou kei na nodra qaravi na tani. Na nodra vakayaloqaqataki na itabagone me ra vakaitavi ena kalasi ni Lotu ka vulica vakataki ira e rawa ni vukei ira me ra sotava na veika era dui sotava ka na tara cake na nodra ivakadinadina me baleta na nodra iyau vakalou.

E Vuqa na iTabagone era Logaloga vinaka ena Vakayagataki ni Tekinolaji

Kevaka e tiko na nodra dui iyaya vakalivaliva na itabagone o vakavulica, nanuma tiko ni iyaya oqori me vukei ira ena vuli. Vakavulica vei ira na sala mera vakayagataka kina na nodra ivolanikalou vakalivaliva kei na ivurevure tale eso era tiko ena Gospel Library. E rawa talega ni o vakauta na itukutuku kei na isema ni initaneti vei ira na itabagone ena loma ni macawa me vukea nodra vakarau mai ki na lesoni.

Kalasi ni Matawilivola ni Sigatabu

Era gadreva na itabagone me ra kila na veika e kila na Tamada Vakalomalagi ni rawa ni ra yacova.

Vakavulici ira na Uabula

Sa Rawa mera Vakaitavitaki na Uabula ena Nodra Vuli

Sa rawa vei ira na vuli uabula mera cakacakataka vakai ira na vulici ni kosipeli (raica na 2 Nifai 2:26). Sureti ira me ra vakavakarau ki na veivosaki vakosipeli ena nodra vulica e dua na ka ni se bera na gauna, ka vakayaloqaqataki ira me ra wasea na veika era sa vulica mai vua na Yalotabu. Sa rawa talega mo tarogi ira na ivakavuvuli ni kosipeli cava era gadreva mera vakayagataka kina na gauna ni vuli vata.

Era Wasea se Vakayagataka na Qase cake na Veika era Sotava ni ra Vuli

E kaya o Jope, “Ia ko koya sa qase sara sai koya na yalomatua; kei na balavu ni gauna me kilai” (Jope 12:12). Vakararaba, na yalomatua kei na kila ka vakayalo e dau yaco mai ni oti e vica vata na yabaki mai na veika e sotavi. Ni o vakavulici ira na qase cake, sureti ira me ra wasea na veika era sotava ka sa tara cake nodra vakabauta na Tamada Vakalomalagi kei Jisu Karisito. Oqo ena solia vei ira na madigi me ra vakadinadinataka na sala era sa mai kila kina ni ivakavuvuli ni kosipeli era sa vulica tiko e dina. Na wasei ni veika e sotavi ena tara cake talega na isema ni veiwekani vei ira o vakavulica, ka vukea “kece dou sa vakatataki cake vei kemudou kecega” (Vunau kei na Veiyalayalati 88:122).

Era Vakasaqara na Uabula na Yaga se na Vakayagataki ni Veika Era Vulica

Ena vuqa beka na nodra itavi kei na itavi na uabula o vakavulica ena nodra cakacaka, itikotiko, veikacivi ni Lotu, kei na matavuvale. Ni ra vulica na kosipeli, era sa dau vakasamataka vakawasoma na sala e rawa ni vukei ira kina na veika era vulica tiko ena itavi oqori. Sureti ira me ra raica na sala e ganita kina na nodra ituvaki duatani na vosa ni Kalou. E rawa ni o cakava oqo ena nomu tarogi ira se vakaibalebale vakacava na ivakavuvuli ni kosipeli ki na nodra bula.

E Rawa ni Ra Vakalevutaka na Vakasama na Uabula

Ena vuku ni veika era sotava kei na kilaka, era kila na qase ni sega ni dau rawarawa na isau ni taro vakosipeli. E rawa ni ra marautaka ni dua na malanivosa ni ivolanikalou e rawa ni vuqa na kena ibalebale, ka rawa ni ra vakayagataka e dua na ivakavuvuli ni kosipeli ki na veituvaki duidui ni bula. Sureti ira me ra vakasamataka vakatitobu na sala e veisemati kina vakai ira na ivakavuvuli ni kosipeli kei na veika e yaco tiko ena nodra bula. Vakauqeta na vakaitavi kei na veivosaki me rawa ni ra vuli mai na nodra dui ivakarau ni rai duidui.

vakavulica na kalasi na marama

Sa rawa vei ira na uabula mera wasea e vuqa na veika era sotava ka sa tara cake na nodra vakabauta na Tamada Vakalomalagi kei Jisu Karisito.

Vakavulici Ira na Tamata Era Vakaleqai Tu

Vukei Ira Yadua Me Ra Tubu Ka Toso Ki Liu.

E vakavulica o Josefa Simici, “E rawa ni vakalevutaki na vakasama kei na yalo kece sa talai mai vua Kalou ki vuravura” (Nodra iVakavuvuli na Peresitedi ni Lotu: Josefa Simici [2007], 210). Nanuma ni sa rawa vei ira kece na luve ni Kalou me ra tubu cake ena kilaka kei na toso ki liu. Kerea na Turaga me vukei iko mo kila na sala mo vukea kina na tamata yadua.

Vulica na Veika Bibi e Gadrevi

Vosa vei ira na vuli se nodra itubutubu se dauveikaroni. Vakasaqara na sala vinaka duadua ena vuli kina na tamata yadua kei na ituvatuva cava ena veivuke vakalevu duadua. Ni rawa talega ni kere ivakasala vei ira na iliuliu kei na qasenivuli ka tu na nodra kilamatua kei na raikiloma mera wasea. Me baleta na iwalewale ni veivakavulici veivukei, raica na disabilities.ChurchofJesusChrist.org.

Bulia e Dua na iTuvaki Vinaka

Bulia e Dua na iTuvaki Vinaka me rawa ni ra vakila kece kina na tamata ni ra taqomaki ka ra lomani. Kakua ni nanuma ni o ira kece na vuli era vakaleqai tu vakayago era tautauvata, ka dau rokova na tamata yadua ena loloma kei na veidokai. Vakayaloqaqataki ira na tani me ra dau yalovinaka ka ciqomi.

Vakadeitaka ni Sa Rawa Ni Vakaitavi Taucoko

Na veisau lalai sa rawa ni caka ena itaviqaravi me vakadeitaka na nodra vuli kece na tamata, oka kina o ira ka tu nodra yalani vakayago se dredre nodra vuli. Me ivakaraitaki, kevaka e dua na itaviqaravi e vakatura na vakaraitaki ni iyaloyalo, o rawa ni lagata e dua na sere veisemati me isosomi mo okati ira kina na tamata e vakaleqai tu na nodra rai.

Tauyavutaka na iVakarau ni Vuli kei na iTuvatuva Vakamatautaki.

E dua na sala me tauyavutaki kina e dua na ivakarau o ya me caka e dua na ivolakabi ena dua na ituvatuva. Sa rawa ni oka ena nomu ituvatuva na masu, gauna ni veivakavulici, kei na gauna ni itaviqaravi. Na vakamuri ni dua na ituvatuva ena rawa ni vakalailaitaka na yalo veilecayaki kei na lomaleqa vei ira eso na vuli.

Kila na cava e yaco kina na itovo veibolei.

Vulica me baleta na malumalumu se ituvaki ka rawa ni yavalata e dua na tamata me ivukivuki baleca. Yadrava vagumatua na ka e sa yaco tiko ni dau basika na itovo veibolei eso. Vakasamataka ena masumasu na sala mera na vakavinakataka cake na ituvaki me rawa ni tokoni cake na vuli.

Me baleta na ikuri ni ivakamacala ni nodra vakavulici na tamata era vakaleqai tu vakayago, raica na disabilities.ChurchofJesusChrist.org.

Kalasi ni Goneyalewa

Sa rawa vei ira na qasenivuli mera tauyavutaka e dua na ituvaki vinaka ni vuli era ciqomi ka lomani kina na tamata kecega.

Veivakavulici ena Monalivaliva

Vakamatautaki iko ki na Tekinolaji

Ni bera na nomu kalasi se soqoni, vakayagataka eso na gauna mo kila vinaka kina na tekinolaji o na vakayagataka tiko. Vakadikeva eso na kena ivakaraitaki, me vaka na kena wasei na vidio se iyaloyalo. “Vakatovotovotaka” vata kei ira na lewe ni matavuvale se itokani.

E vuqa na tabanalevu kei na iteki e tiko na kenadau ni tekinolaji. O na rairai kilai ira talega eso era sa sotava oti mai na soqoni ni monalivaliva. Kerea na nodra ivakasala se veidusimaki.

Tagutuva na Veika e Rawa ni Veivagolei Tani

Kevaka e rawa, digitaka na vanua vakanomodi mo dou soqoni kina. Na kosakosa e taudaku e rawa ni veivagolei tani. Vakauqeti ira na vuli mera cakava vakakina mera vagaluya na nodra gusunivosavosa kevaka era sega ni vosa tiko.

Vakayagataka na itaba

Ke rawa, dolava tiko na nomu itaba me rawa ni raica na lewenivuli na matamu. Sureti (sega ni vakaroti) ira na lewenivuli mera dolava talega na nodra itaba. Oqo ena rawa ni vukea na kena tauyavutaki e dua na yalo ni duavata kei na veitokoni ni muavata.

Vakayagataka na iVakatakilakila ni Mareqeti Veitalanoa

E vuqa na parokaramu ni soqoni ena monalivaliva e vakatarai ira mera taipataka na taro se ivakamacala ena dua na katuba ni veivosaki. E rawa ni vakatarai ira na vakaitavi me ra laveta na ligadra. Raica me ra kila na lewenivuli na veika oqo. Mo lesia e dua me yadrava toka na ivakamacala ena veivosaki se laveliga me rawa ni o vagolea na nomu vakasama ena veivosaki.

Vaqara na Sala me Ra Vakaitavi kina na Vuli

Ena so na gauna dau dredre na vuli ena monalivaliva baleta ni vakadredretaka me rogoci se raici. Sasagataka mo vakaitavitaki ira era via vakaitavi. Ena so na gauna e kena ibalebale oqo me tauyavutaki na ilawalawa lalai (me ivakaraitaki, ena nomu vakacaucautaka e dua na kalasi levu ni Matawilivola ni Sigatabu). Ena so na gauna e kena ibalebale me da kerei ira taumada na vuli me ra vakaitavi ena dua na sala vakatabakidua. Kakua ni vakatara na yalani ni tekinolaji mo guilecava se raibaleti ira na tamata era sa maqusa ka tuvakarau me ra vuli.