li Dominkil Tzoleb’aal

Choq’ reheb’ laj jolominel—Xtenq’ankileb’ laj k’utunel re naq chaab’il te’elq

Aatinak rik’in li junjunq

Re xtenq’ankileb’ laj k’utunel, us li aatinak rik’in li junjunq. Qayehaq, jo’ aj jolominel, naru nakat-aatinak rik’in junaq aj k’utunel sa’ xtiklajik malaj sa’ xraqik li k’utuk re xtz’ilb’al rix junaq xraqalil Li K’utuk jo’ li Kolonel. Naru nakakawresi aawib’ re aatinak chirix li na’leb’ a’in rik’in xk’eeb’al reetal chan ru nak’utuk laj k’utunel. K’e reetal lix chaab’ilal laj k’utunel ut sik’ k’a’ru naru taatenq’a wi’.

Roksinkil lix chaab’ilal laj k’utunel aajel ru jo’ ajwi rilb’al k’a’ru naru tixchaab’ilob’resi. Jwal chaab’il xpatz’b’al reheb’ laj k’utunel naq te’xk’e reetal chirib’ileb’ rib’ li k’a’aq re ru yookeb’ chixb’aanunkil chi us ut b’ar neke’reek’a naq naru na’ux li chaab’ilo’k.

Naq nakach’utub’ aawib’ aawochb’eeneb’ laj k’utunel, sik’ chan ru taawaklesiheb’ xch’ool ut taab’antioxi rik’in rahok li k’anjel neke’xb’aanu.

Eb’ li ch’utam reheb’ laj k’utunel

Tento naq kaahib’ sut chiru li chihab’, li junjunq chi teep tixb’aanu li ch’utam reheb’ laj k’utunel sa’ li naru te’na’leb’anq wi’ sa’ komonil laj k’utunel chirix li k’utuk jo’ kik’utuk li Kristo. Naru ajwi’ xk’uub’ankileb’ li ch’utam reheb’ laj k’utunel choq’ reheb’ li yuwa’b’ej (chi’ilmanq Jolomil K’anjenel Hu: Li k’anjelak sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 13.5, LixIgleesliJesukristo.org).

Jo’q’e te’b’aanumanq li ch’utam a’in?

Li ch’utam reheb’ laj k’utunel nab’aanuman chiru 50 k’asal sa’ li tzoleb’aal re domingo.

• Eb’ laj k’utunel re li tijonelil, li Komonil re Tenq’ank, ut li Saaj Ixq neke’ru chi tz’aqonk sa’ li xb’een malaj li rox domingo, a’ yaal jo’ b’eresinb’il xb’aaneb’ laj jolominel sa’ li teep.

• Eb’ laj k’utunel re li Dominkil Tzoleb’aal neke’ru chi tz’aqonk sa’ li xkab’ malaj li xkaa domingo, a’ yaal jo’ b’eresinb’il xb’aaneb’ laj jolominel sa’ li teep.

• Eb’ laj k’utunel re li Tzoleb’aal reheb’ li Kok’al neke’ru chi tz’aqonk sa’ yalaq domingo, a’ yaal jo’ b’eresinb’il xb’aaneb’ li awa’b’ejil re li Tzoleb’aal reheb’ li Kok’al ut li Dominkil Tzoleb’aal. Wi na’ajman, eb’ laj k’utunel re li Tzoleb’aal reheb’ li Kok’al naru naq te’wanq xch’utam xjuneseb’ re te’xkuub’ xna’leb’ sa’ komonil chirix li na’ajman ru re xtzolb’aleb’ li kok’al. A’in naru nab’aanuman sa’ li 20 k’asal re xhoonalil li b’ichank, naq maji’ neke’tikla li ch’utam re domingo, malaj sa’ junaq chik kutan re li xamaan. Naru nawan naab’al sut li ch’utam reheb’ laj k’utunel re li Tzoleb’aal reheb’ li Kok’al re naq toj wankeb’ lix k’ihaleb’ laj k’utunel sa’ li Tzoleb’aal reheb’ li Kok’al rajlal xamaan. (Jun na’leb’: A’ yaal jo’ na’ajman, li awa’b’ejil reheb’ li Tzoleb’aal reheb’ li Kok’al neke’ru chixtawb’al jalan chik laj k’utunel, chixmolk’ankil junjunqeb’ li tzoleb’aal, malaj chixb’aanunkil k’a’ruhaq chik re naq eb’ laj k’utunel sa’ li Tzoleb’aal reheb’ li Kok’al neke’ru chi xik sa’eb’ li ch’utam reheb’ laj k’utunel.)

• Eb’ li ch’utam reheb’ laj k’utunel choq’ reheb’ li yuwa’b’ej naru nab’aanuman yalaq k’a’ru domingo a’ yaal jo’ k’uub’anb’il xb’aan li ch’uut re li teep.

Ani tento taatz’aqonq?

Chixjunileb’ li neke’k’utuk sa’ jun molam malaj sa’ jun tzoleb’aal re li teep, rochb’een ajwi’ jun malaj xkomoneb’ chik aj jolominel re li tijonelil malaj li k’anjenel ch’uut li wankeb’ xwankil sa’ xb’eeneb’ li molam malaj tzoleb’aal a’in. Wi na’ajman, eb’ li ani neke’oken te’ruuq chi k’ehe’k sa’ kok’ ch’uut a’ yaal jo’ chanru rajomeb’ li ani tzolb’ileb’ xb’aaneb’. Qayehaq, maare us choq’ reheb’ laj k’utunel reheb’ li saaj malaj li kok’al naq wan hoonal jachb’ilaq ru lix ch’utameb’ re naq te’aatinaq chirix li na’leb’ li nak’anjelak tz’aqal choq’ re xtzolb’aleb’ li saaj malaj li kok’al.

Sa’ li ch’utam reheb’ laj k’utunel choq’ reheb’ li yuwa’b’ej naru neke’b’oqman junjunq malaj yalaq ani naru neke’tz’aqon a’ yaal jo’ k’uub’anb’il xb’aan li ch’uut re li teep.

Ani najolomin reheb’ li ch’utam a’in?

Li jolomil ch’utam re li teep, chi tenq’anb’il xb’aan li awa’b’ejil re li Dominkil Tzoleb’aal, najolomin reheb’ li ch’utam reheb’ laj k’utunel. A’aneb’ neke’aatinak sa’ komonil chirix li rajomeb’ ru laj k’utunel ut laj tzolonel rik’in li neke’ril sa’eb’ lix ch’utam ut tzoleb’aal. Sa’ komonil neke’xtz’il rix k’a’ru li na’leb’ ut k’anjel re Li K’utuk jo’ li Kolonel taatenq’anq reheb’ re xchaab’ilob’resinkil li ajom a’an.

Laj awa’b’ej re li Dominkil Tzoleb’aal naxb’eresi li ch’utam reheb’ laj k’utunel. A’b’an, jo’q’ehaq, jalaneb’ chik li komon sa’ li teep naru te’b’oqe’q chixjolominkil li ch’utam. Eb’ li awa’b’ejil re li tijonelil ut li k’anjenel ch’uut neke’xka’jultika li na’leb’ ut li k’anjel xe’xb’aanu sa’ li ch’utam rik’ineb’ laj k’utunel.

K’a’ru tento taa’uxmanq sa’eb’ li ch’utam reheb’ laj k’utunel?

Sa’ li ch’utam reheb’ laj k’utunel taab’aanumanq a’in:

• Wotzok ut k’ehok na’leb’ sa’ komonil. B’oqeb’ laj k’utunel chixwotzb’al li k’a’ru xe’xk’ul naq yookeb’ chi k’utuk, chi patz’ok chirix li k’utuk, ut chixwotzb’al xna’leb’eb’ chirix xq’axb’al ru li ch’a’ajkilal. Sa’ li raqal a’in re li ch’utam naru ajwi’ nayeeman resil chi k’osb’il ru eb’ li na’leb’ li ke’ch’olob’aak sa’eb’ li ch’utam ak xe’b’aanuman.

• Tzolok sa’ komonil. B’oqeb’ laj k’utunel chixtz’ilb’al rix junaq reheb’ li na’leb’ a’in: xk’eeb’al laa wilob’aal rik’in li Jesukristo, xraab’aleb’ li tzolb’ileb’ aab’aan, k’utuk rik’in li Musiq’ej, xk’utb’al li tzol’leb’, ut xb’oqb’aleb’ naq te’xyal xq’e chi tzolok. Maak’a’ naxye k’a’ru xtiikaleb’ li na’leb’ te’aatinaq wi’, ut wi ink’a’ k’eeb’il jalan chik li na’leb’ xb’aan li jolomil ch’utam re li teep, eb’ li neke’oken sa’ li ch’utam te’ruuq chixsik’b’al ru li na’leb’ taak’ute’q sa’ li ch’utam chal re. Naru nakawoksi junaq chik li ch’utam re xchoyb’al xk’utb’al li raqal chi na’leb’ a’in wi na’ajman.

• K’uub’ank ut b’oqok. Tenq’aheb’ laj k’utunel chixk’uub’ankil chan ru te’roksi li na’leb’ xe’aatinak wi’. A’ yaal k’a’ru li seeb’al xe’xsik’ wi’ ru aatinak naru nekexk’anjela rix sa’ komonil. B’oqeb’ chixtz’iib’ankil ut chixb’aanunkil yalaq musiq’anb’il na’leb’ neke’xk’ul chirix roksinkil li na’leb’ sa’ li k’utuk neke’xb’aanu—ut jo’kan ajwi’ naq neke’xyal xq’e chi k’utuk sa’ rochocheb’. Waklesi xch’ooleb’ chixtikib’ankil xtzolb’al li na’leb’ li taak’utmanq sa’ li ch’utam chal re.

A’ yaal jo’ naru, us naq te’xyal xk’anjelankil sa’ li ch’utam reheb’ laj k’utunel li na’leb’ yookeb’ chi aatinak wi’.

neke’xq’alu rib’ li saaj ixq

Eb’ li ch’utam reheb’ laj k’utunel naru naxtenq’aheb’ laj k’utunel chixtawb’al ru ut chiroksinkileb’ li na’leb’ chirix li k’utuk jo’ li Kristo.

Xkawresinkileb’ laj k’utunel li toj ak’eb’

Jo’ aj jolominel, teneb’anb’il sa’ aab’een “xch’utub’ankil aawib’ rik’ineb’ li ak’ aj k’utunel” sa’ laa ch’uut re “taatenq’aheb’ chixkawresinkil rib’ rik’in li xe’boqe’ wi’” (Jolomil K’anjenel Hu, 17.3, >LixIgleesliJesukristo.org). Eb’ li ch’utam a’in, a’aneb’ jun hoonal re xk’utb’al chiruheb’ li ak’ aj k’utunel lix loq’laj b’oqb’al ut re xwaklesinkleb’ xch’ool re te’xtaw xyaalal k’a’ru naraj naxye k’utuk jo’ kik’utuk li Kolonel. Jo’ jun aj jolominel, naru taatenq’aheb’ li ak’ aj k’utunel chixkawresinkileb’ rib’ chi k’anjelak rik’in:

• Xk’eeb’aleb’ chixnaw naq a’ li Kolonel taatenq’anq reheb’ sa’ lix b’oqb’al (chi’ilmanq Tzol’leb’ ut Sumwank 88:78).

• Xk’eeb’al junaq reetalil li hu a’in reheb’ li ak’ aj k’utunel ut xwaklesinkileb’ xch’ool chixsik’b’al chan ru te’roksi li na’leb’ a’in sa’ li k’utuk.

• Xwotzb’al rik’ineb’ li ak’ aj k’utunel yalaq k’a’ chi na’leb’ chirix laa ch’uut li maare taak’anjelaq reheb’.

• A’ yaal jo’ na’ajman, xk’utb’al chiru li ak’ aj k’utunel k’a’ru tzoleb’aal te’roksi re k’utuk ut rik’in k’a’ru te’xtikib’. Xwotzb’al rik’ineb’ k’a’ru li aajel ru te’xnaw chirix li tzoleb’aal ut chirixeb’ li komon.

• Xch’olob’ankil chiru li ak’ aj k’utunel naq naru nakatenq’a rik’in li k’anjel b’oqb’il wi’. Xyeechi’inkil aatenq’ sa’ li tzoleb’aal ut xk’eeb’al xkomon chik li na’leb’ re k’utuk wi na’ajman.

• Xyeechi’inkil aawib’ chi jo’q’ehaq re rilb’al chan ru neke’k’utuk lix komon chik laj k’utunel, ut xyeeb’al reheb’ k’a’ru tento te’xchaab’ilob’resi jo’ musiq’anb’il xb’aan li Musiq’ej.

• Xb’oqb’aleb’ laj k’utunel chi tz’aqonk sa’ li ch’utam reheb’ laj k’utunel nab’aanuman rajlal oxib’ po.