Hnub Caiv kev kawm vaj lug kub

Rau cov Thawj Coj—Kev Pab cov Xib Hwb Qhia Zoo

Ib Leeg nrog Ib Leeg Tham

Feem ntau txoj kev zoo tshaj plaws kom pab cov xib hwb yog thaum ib leeg nrog ib leeg tham. Piv txwv hais tias, vim koj yog tus thawj coj, tej zaum koj yuav xav sib tham nrog ib tug xib hwb ua ntej los sis tom qab lawv qhia kom sib tham txog tej ntsiab cai los ntawm phau Kev Qhia Raws Li tus Cawm Seej txoj Kev. Tej zaum koj yuav npaj rau txoj kev sib tham no thaum koj saib tus xib hwb qhia. Nrhiav kev kom to taub tus xib hwb tej kev muaj zog thiab kawm txog tej yam koj ua taus kom txhawb nqa nws.

Kev txhawb nqa ib tug xib hwb tej kev muaj zog yeej tseem ceeb npaum li yus nrhiav tej yam kom pab nws ua zoo dua. Yeej yuav pab thaum koj pib sib tham nrog cov xib hwb yog koj nug lawv kom lawv xav seb lawv ua dab tsi zoo thiab muaj tej yam twg uas lawv ua tau zoo dua.

Thaum koj nrog cov xib hwb sib tham, xav seb koj yuav ua li cas ua siab zoo thiab ua lawv tsaug kom txhawb nqa lawv vim lawv ua hauj lwm pab cov uas lawv qhia.

Cov Xib Hwb Pawg Sab Laj tej Kev Sib Ntsib

Txhua pawg ntseeg yuav tsum ua kev sib ntsib rau cov xib hwb pawg sab laj tej txhua peb hlis, es nyob ntawd cov xib hwb yuav sib sab laj txog cov ntsiab cai ntawm kev qhia zoo li Yexus Khetos. Kuj ua cov xib hwb pawg sab laj tej kev sib ntsib rau cov niam tsev txiv tsev los tau (saib General Handbook: Serving in The Church of Jesus Christ of Latter-day Saints, 13.5, ChurchofJesusChrist.org).

Thaum Twg Yuav Tsum Sib Ntsib Li No?

Peb ua cov xib hwb pawg sab laj tej kev sib ntsib thaum lub sij hawm kawm vaj lug kub ntev li 50 feeb nyob rau Hnub Caiv.

• Cov xib hwb hauv tej pawg pov thawj hwj, Koom Haum Niam Tsev, thiab Koom Haum Ntxhais Hluas yuav koom ua ke nyob rau Hnub Caiv thib ib los sis thib peb, raws li cov thawj coj hauv pawg ntseeg txiav txim.

• Cov xib hwb hauv Hnub Caiv Kev Kawm Vaj Lug Kub yuav koom ua ke nyob rau Hnub Caiv thib ob los sis thib plaub, raws li cov thawj coj hauv pawg ntseeg txiav txim.

• Cov xib hwb hauv lub Koom Haum Me Nyuam Yaus mus tau Hnub Caiv twg los tau, raws li pawg ntseeg lub Koom Haum Me Nyuam Yaus thiab Kev Kawm Vaj Lug Kub ob pawg thawj tswj hwm txiav txim. Yog tias xav ua, cov xib hwb hauv lub Koom Haum Me Nyuam Yaus yuav sib ntsib cais lwm cov xib hwb lawv thiaj li yuav muaj cib fim sib sab laj txog kev qhia cov me nyuam yaus. Ua tau li no thaum lub sij hawm hu nkauj uas ntev li 20 feeb, ua ntej los sis tom qab Hnub Caiv tej kev sib ntsib, los sis lwm hnub hauv lub lim tiam. Ua tau ob peb kev sib ntsib rau cov xib hwb pawg sab laj txhua peb hlis rau cov xib hwb hauv lub Koom Haum Me Nyuam Yaus thiaj li yuav tsis muaj tag nrho cov xib hwb tsis khoom qhia lawv tej chav kawm nyob rau tib lub lim tiam. Lus Cim: Raws li xav tau, lub Koom Haum Me Nyuam Yaus pawg thawj tswj hwm txib cov xib hwb sib hloov, muab tej chav kawm koom ua ke, los sis ua lwm yam kom cia cov xib hwb hauv lub Koom Haum Me Nyuam Yaus mus rau cov xib hwb pawg sab laj tej kev sib ntsib.

• Cov xib hwb pawg sab laj tej kev sib ntsib rau cov niam tsev txiv tsev los ua tau nyob rau Hnub Caiv twg, raws li pawg ntseeg pawg sab laj txiav txim.

Leej Twg Yuav Tsum Mus?

Txhua tus uas qhia ib pawg los yog ib chav kawm nyob hauv pawg ntseeg yuav tsum mus, nrog ib tug thawj coj ntawm lub pov thawj hwj los sis lub koom haum uas lav ris tej pawg los sis chav kawm ntawd. Yog tsim nyog muab faib raws li cov neeg uas lawv qhia tej kev xav tau, ces ua tau li ntawd. Piv txwv hais tias, tej zaum cov xib hwb uas qhia cov tub hluas ntxhais hluas los sis cov me nyuam yaus yuav xav faib ua ob pawg kom sib tham txog tej yam uas yog teeb meem rau ob pawg ntawd xwb.

Rau cov xib hwb pawg sab laj tej kev sib ntsib rau cov niam tsev txiv tsev, pawg ntseeg pawg sab laj yuav txiav txim seb puas caw leej twg los sis qhib kev sib ntsib ntawd rau txhua tus uas xav kawm ua ke.

Leej Twg Coj tej Kev Sib Ntsib No?

Pawg ntseeg pawg sab laj, nrog kev pab los ntawm Kev Kawm Vaj Lug Kub pawg thawj tswj hwm, saib xyuas pawg sab laj tej kev sib ntsib. Lawv sib tham ua kev txog tej yam uas cov xib hwb thiab cov neeg kawm xav tau raws li lawv pom nyob hauv lawv tej chav kawm thiab tej kev sib ntsib. Lawv ua hauj lwm ua ke kom txiav txim seb tej lub ntsiab cai thiab tej kev qhia twg los ntawm phau Kev Qhia Raws Li tus Cawm Seej txoj Kev yuav pab tej yam ntawd.

Feem ntau, Kev Kawm Vaj Lug Kub tus thawj tswj hwm yuav coj cov xib hwb pawg sab laj tej kev sib ntsib. Tiam sis, tej lub sij hawm yuav txib lwm tus mej zeej hauv pawg ntseeg kom coj tej kev sib ntsib no. Pawg pov thawj hwj thiab tej lub koom haum tej pawg thawj tswj hwm qhia cov xib hwb kom nco txog tej lub ntsiab cai thiab tej yam zoo ua raws li hais nyob hauv kev sib ntsib.

Yuav Tsum Ua Dab Tsi hauv cov Xib Hwb Pawg Sab Laj txoj Kev Sib Ntsib?

Cov xib hwb pawg sab laj kev sib ntsib yuav tsum ua li no:

• Sib qhia thiab sib sab laj ua ke. Caw cov xib hwb kom qhia tias lawv txoj kev qhia mus zoo li cas, nug tej yam txog kev qhia vaj lug kub, thiab hais tej lub tswv yim kom kov yeej tej teeb meem Tej zaum yuav xav rov qab kawm tej lub ntsiab cai uas tau sib tham txog nyob hauv tej kev sib ntsib dhau los.

• Kawm ua ke. Caw cov xib hwb sib tham txog ib lub ntsiab cai nyob hauv phau ntawv no: tsom ntsoov rau Yexus Khetos, hlub cov uas koj qhia, qhia raws li tus Ntsuj Plig, qhia cov lus qhuab qhia, thiab caw kom rau siab kawm. Qhia ib lub ntsiab cai twg ua ntej los sis tom qab, thiab yog tias pawg ntseeg pawg sab laj tsis hais dab tsi, ces cov neeg nyob hauv kev sib ntsib xaiv tau lawv xav sib tham txog lub ntsiab cai twg los tau. Tej zaum koj yuav xav siv sij hawm ntev tshaj ib txoj kev sib ntsib kom sib tham txog ib lub ntsiab cai.

• Npaj thiab caw. Pab cov xib hwb npaj siab seb lawv yuav ua li cas kom ua raws li tej lub ntsiab cai uas lawv tham txog. Raws li tsim nyog ua, tej zaum nej yuav xav xyaum ib qho txuj ci uas nej sib tham txog. Caw lawv sau ntawv thiab ua raws li tej kev tshoov siab uas lawv txais txog kev ua raws li lub ntsiab cai ntawd thaum lawv qhia—tsis hais kev qhia hauv tsev los yog. Hais kom lawv pib kawm txog lub ntsiab cai uas yuav sib tham txog thaum yav tom ntej.

Npaum li ua tau, yuav tsum ua cov xib hwb pawg sab laj tej kev sib ntsib raws li tej lub ntsiab cai uas sib tham txog.

ob tug ntxhais hluas sib khawm

Cov xib hwb pawg sab laj tej kev sib ntsib yuav pab cov xib hwb to taub zoo dua thiab paub ua raws li tej lub ntsiab cai txog kev qhia zoo li Yexus Khetos.

Kev Qhia cov Xib Hwb uas Nyuam Qhuav Tau Hu

Vim koj yog ib tug thawj coj, koj lav ris txoj kev “sib tham nrog cov xib hwb tshiab” nyob hauv koj lub koom haum thiab “pab lawv npaj ua lawv txoj kev hu” (General Handbook, 17.3, ChurchofJesusChrist.org). Tej kev sib ntsib no yog ib lub cib fim kom qhia cov xib hwb tshiab txog lawv txoj kev hu dawb huv thiab qhia lawv paub tias kev qhia raws li tus Cawm Seej txoj kev zoo li cas. Vim koj yog ib tug thawj coj, koj pab tau cov xib hwb tshiab npaj ua hauj lwm thaum koj ua li no:

• Qhia lawv tias koj ntseeg tus Cawm Seej yuav pab lawv ua qhov uas Nws hu kom lawv ua (saib Lus Qhuab Qhia thiab Kev Khi Lus 88:78).

• Muab cov xib hwb tshiab phau ntawv no, thiab hais kom lawv nrhiav tej yam kom ua raws li tej lub ntsiab cai no thaum lawv qhia.

• Qhia cov xib hwb tshiab tej yam twg txog koj lub koom haum uas yuav pab lawv.

• Raws li xav tau, qhia cov xib hwb tshiab lawv yuav qhia hauv chav kawm twg thiab yuav qhia zaj twg thaum xub thawj. Qhia tej yam uas lawv yuav tsum paub txog lawv chav kawm thiab cov mej zeej nyob haud.

• Piav rau cov xib hwb tshiab tias koj yuav pab lawv ua lawv txoj kev hu. Txhawb nqa lawv nyob hauv chav kawm thiab muab tej yam uas yuav pab lawv qhia yog lawv xav tau.

• Hais tias tej lub sij hawm koj xav saib cov xib hwb qhia, thiab muab tswv yim rau lawv raws li tus Ntsuj Plig qhia koj.

• Caw cov xib hwb koom cov xib hwb pawg sab laj tej kev sib ntsib txhua peb hlis.