Kalasi ni Matawilivola ni Sigatabu

Me Baleti Ira na iLiuliu—Nodra Vukei na Qasenivuli mera Rawaka

Veimaliwai Yadudua

E vakavuqa ni sala vinaka duadua me sotavi kina na nodra gagadre duidui na qasenivuli sai koya na nodra veimaliwai yadudua. Me ivakaraitaki, ni o dua na iliuliu, e rawa ni dua na veivosaki lekaleka kei na dua na qasenivuli ni se bera se ni oti na kalasi me veivosakitaka na ivakavuvuli ni Veivakavulici ena iVakarau ni iVakabula. Sa rawa mo vakavakarau ki na veivosaki oqo ena nomu sarava na qasenivuli. Vakasaqara mo kila vinaka cake na kaukauwa ni qasenivuli ka kunea na sala eso o rawa ni veitokoni kina.

Na tarai cake ni kaukauwa ni dua na qasenivuli e bibi me vaka na kena kilai na madigi me vakavinakataki cake. Ena veivuke me tekivu na veivosaki vata kei ira na qasenivuli ena nodra kerei me ra vakasamataka na veika e lako vinaka tiko kei na vanua era nanuma ni rawa ni vakavinakataki.

Ni o sota vata kei ira na qasenivuli, vakasamataka na sala eso mo vaqaqacotaki ira kina ka vakayaloqaqataki ira ena yalovinaka kei na vakavinavinaka ena veiqaravi era solia.

Soqoni ni Matabose ni Qasenivuli

Sa dodonu me vakayacori vaka yadua ena veivulatolu na soqoni ni matabose ni qasenivuli ena tabanalevu me rawa ni ra soli vakasama vata kina na qasenivuli ena ivakavuvuli ni veivakatavulici va-Karisito. Na soqoni ni matabose ni qasenivuli e rawa talega me vakayacori vei ira na itubutubu (raica na iVoladusidusi Raraba: Veiqaravi Ena Na Lotu i Jisu Karisito ni Yalododonu Edaidai, 13.5, ChurchofJesusChrist.org).

Gauna cava sa dodonu me vakayacori kina na soqoni oqo?

Sa dau yaco vakavulatolu na soqoni ni matabose ni qasenivuli donuya na gauna ni kalasi 50 na miniti ena Sigatabu.

• Na qasenivuli ni Matabete, Soqosoqo ni Veivukei, kei na Goneyalewa era rawa ni tiko ena imatai se na ikatolu ni Sigatabu, me vaka na vakatulewa mai vei ira na iliuliu ni lotu e nomuni vanua.

• Era rawa ni tiko na qasenivuli ena Matawilivola ni Sigatabu ena ikarua se ikava ni Sigatabu, me vaka era dusimaka na iliuliu ni lotu ena nomuni vanua.

• Na qasenivuli ni Lalai era rawa ni ra tiko ena dua vei ira na Sigatabu, me vaka sa vakatulewa kina na mataveiliutaki ni Lalai kei na Matawilivola ni Sigatabu. Kevaka e gadrevi, e rawa ni ra qai soqoni vakataki ira na qasenivuli ni Lalai me ra veivosakitaka na gagadre duidui e tiko me baleta nodra vakavulici na gone. E rawa ni yaco oqo ena gauna ni lagasere ni 20 na miniti, ni se bera ni se oti na soqoni tudei ena Sigatabu, se ena dua tale na siga ena loma ni macawa. E rawa ni vakayacori e levu cake na matabose ni veivakavulici ena loma ni dua na vula tolu vei ira na qasenivuli ni Lalai me ra kakua kina ni calata kece na kalasi ena Lalai ena dua vata ga na gauna. iDusidusi: Ke gadrevi, eratou na lesia na qasenivuli veisosomitaki e so na mataveiliutaki ni Lalai, cokoti ira vata na kalasi, se cakava na imoimoi tale e so me rawa ni vakatarai ira na qasenivuli ni Lalai mera tiko ena soqoni ni matabose ni qasenivuli.)

• Na soqoni ni matabose ni qasenivuli me baleti ira na itubutubu e rawa ni vakayacori ena dua ga na Sigatabu, me vaka na lewa mai na matabose ni tabanalevu.

O cei sa dodonu me tiko kina?

Sa dodonu mera tiko kina o ira kece ka vakatavulica e dua na kuoramu se kalasi ena tabanalevu, vakakina e dua vei iratou na iliuliu ni matabete se mataisoqosoqo ka qaravi ira na qasenivuli oya. Ke ganita, sa rawa ni ra wasei vakailawalawa na vakaitavi me veisotari kei na nodra gagadre o ira era vakatavulica. Me ivakaraitaki, ena rairai yaga mera soqoni vata na qasenivuli ni itabagone se gonelalai ena so na gauna mera veivosakitaka na veika vakatabakidua e semati ki na nodra vakatavulici na itabagone se gonelalai.

Me baleta na soqoni ni matabose ni qasenivuli vei ira na itubutubu, ena lewa na matabose ni tabanalevu me ra sureti na itubutubu digitaki se me ra dau dolava na tiko rawa vei ira kece era via vakaitavi kina.

O Cei e Liutaka na Veisoqoni Oqo?

Na matabose ni tabanalevu, kei na veitokoni mai vei iratou na mataveiliutaki ni Matawilivola ni Sigatabu, ena vakatulewataka na soqoni ni matabose ni qasenivuli. Era na veivakasalataki me baleta na nodra gagadre na qasenivuli kei ira na vuli ka yavutaki mai na veika era sa raica rawa ena kalasi kei na soqoni. Era na cakacaka vata me vakadeitaki kina na ivakavuvuli kei na ivakarau cava mai na Veivakavulici ena iVakarau ni iVakabula ena sotava vakavinaka na gagadre era sa dusia.

E kena ivakarau, na peresitedi ni Matawilivola ni Sigatabu ena liutaka na soqoni ni matabose ni qasenivuli. E rawa ni lesi e dua na lewe ni tabanalevu me liutaka na soqoni ena so na gauna. Era na vaqaqacotaki na mataveiliutaki ni kuoramu kei na mataisoqosoqo vata kei ira nodra qasenivuli na ivakavuvuli kei na vakatovotovo e veivosakitaki tiko ena soqoni.

Na cava sa dodonu me yaco ena soqoni ni matabose ni qasenivuli?

Na soqoni ni matabose ni qasenivuli e dodonu me muria na ituvatuva oqo:

• Veiwasei ka veitalanoa vata. Sureti ira na qasenivuli mera wasea na nodra gauna ni veivakavulici sa oti, ka taroga na veika e baleta na veivakavulici, ka veiwasei ena vakasama me baleta na ulabaleti ni bolebole e so. Na tiki ni soqoni oqo sa rawa ni oka kina e dua na railesuvi ni ivakavuvuli ea veivosakitaki ena soqoni sa oti.

• Vuli vata. Sureti ira na qasenivuli me ra veivosakitaka e dua vei ira na ivakavuvuli oqo e vakamacalataki ena ivurevure oqo: vakanamata vei Jisu Karisito, lomani ira o vakavulica, veivakavulici ena Yalotabu, vakavulica na ivunau, ka sureta na vuli vagumatua. Sa rawa ni veivosakitaki na ivakavuvuli ena ituvatuva cava ga, ka vakavo e sa vakadreti mai na matabose ni tabanalevu, sa rawa ni ra digitaka na vakaitavi ena soqoni na ivakavuvuli e tarava me na veivosakitaki. E rawa ni ko vakayagataka me sivia e dua na soqoni ena dua na ituvatuva ke ganita.

• Cakacakataka ka veisureti. Vukei ira na qasenivuli mera tuvanaka na sala mera na bulataka kina na ivakavuvuli era sa veivosakitaka. Ke ganita, sa rawa talega mo vakatovotovotaka vata e dua na kila matau o sa veivosakitaka oti. Sureti ira mera vola ka qarava e dua ga na veivakauqeti era sa ciqoma ena iwalewale mera tutaka kina na ivakavuvuli ena nodra veivakatavulici—oka kina na nodra sasaga mera veivakatavulici ena nodra veivale. Vakayaloqaqataki ira mera sa tekivu vulica tiko na ivakavuvuli e tarava ena veivosakitaki.

Ena kena levu e rawa, na soqoni ni matabose ni qasenivuli sa dodonu me ivakaraitaki ni ivakavuvuli sa veivosakitaki tiko.

era veimokoti na goneyalewa

Na soqoni ni matabose ni qasenivuli e rawa ni vukei ira na qasenivuli me ra kila vakavinaka cake ka bulataka na ivakavuvuli ni veivakatavulici va-Karisito.

Vakamatautaki ni Qasenivuli Kacivi Vou

Ni o dua na iliuliu, sa nomu itavi mo “sota vata kei ira na qasenivuli kacivi vou” ena nomu isoqosoqo ka “vukei ira me ra vakavakarau ki na nodra veikacivi” (iVoladusidusi Raraba, 17.3, ChurchofJesusChrist.org). Na veisoqoni oqo sa dua na madigi mo vakatakilai ira kina na qasenivuli vou ki na nodra veikacivi tabu ka vakauqeti ira ena dua na raiyawa ni ka e vakaibalebaletaki mera veivakatavulici ena ivakarau ni iVakabula. Vaka iliuliu, sa rawa ni o vukei ira na qasenivuli vou mera vakarautaka na nodra veiqaravi ena caka ni veika oqo:

• Vakaraitaka na yalodei ni na vukei ira na iVakabula ena nodra veikacivi (raica na Vunau kei na Veiyalayalati 88:78).

• Solia vei ira na qasenivuli vou e dua na ilavelave ni ivurevure oqo, ka vakayaloqaqataki ira me ra vaqara na sala eso me ra vakayagataka kina na kena ivakavuvuli ena nodra veivakavulici.

• Wasea vei ira na qasenivuli vou e dua ga na ka me baleta na nomu isoqosoqo ka na veivuke me ra kila.

• Kevaka e gadrevi, tukuna vei ira na qasenivuli vou na rumu cava me veivakavulici kina kei na lesoni cava me tekivu kina. Vakarautaka e dua na itukutuku era gadreva me baleta na nodra kalasi kei na lewe ni kalasi.

• Vakamacalataka vei ira na qasenivuli vou ni rawa ni o vukei ira ena nodra veikacivi. Solia na veitokoni ena rumu ni kalasi ka raica na ivurevure ni veivakavulici ke gadrevi.

• Dau vakadikeva vagauna na kalasi ni qasenivuli, ka soli itukutuku lesu mai ena veivakauqeti ni Yalotabu.

• Sureti ira na qasenivuli me ra vakaitavi ena soqoni ni matabose ni qasenivuli ena veivulatolu.