Մեծահասակների դաս. Ուսուցողական դաս ծնողների համար տեխնոլոգիաների վերաբերյալ

I. Նախաբան

Մենք՝ որպես ծնողներ, ցանկանում ենք լավագույն բաները մեր երեխաների համար, և այդ առումով կարևոր է սովորեցնել նրանց, թե ինչպես անվտանգ խուսանավել թվային աշխարհում: Այս դասի ընթացքում մենք կքննարկենք, թե ինչպես կարող ենք օգնել երեխաներին վերահսկել տեխնոլոգիաների օգտագործումը, որպեսզի դրանք չվերահսկեն նրանց: Մենք կսովորենք գործնական մեթոդներ և եղանակներ, որոնք կօգնեն ուղղորդել երեխաներին՝ նպատակային և դրականորեն օգտագործել տեխնոլոգիաները:

II. Տեխնոլոգիաների առավելություններն ու թերությունները

Առավելությունները

• Եկեղեցին օգտագործում է տեխնոլոգիաները՝ գլոբալ հաղորդակցության և ավետարանի տարածման համար:

• Տեխնոլոգիաները մեզ հնարավորություն են տալիս օգտվել աշխարհի հավաքական գիտելիքներից և տեղավորվում են մեր գրպանում:

Թերությունները

• Տեխնոլոգիաների գինը մեր ժամանակն ու ուշադրությունն է, կամ ավելի վատ՝ հնարավորությունների և օրհնությունների վատնումը:

• Եթե զգույշ չլինենք, մենք կարող ենք շեղվել որևէ բանով, որն արժանի չէ մեր ուշադրությանը, կամ որը նույնիսկ շեղում է մեզ մեր ուխտերից և արժեքներից:

Փիլիպպեցիներին 4․8

• Այսուհետև, եղբայրնե՛ր, ինչ որ ճշմարիտ է, ինչ որ պարկեշտ, ինչ որ արդար, ինչ որ անարատ, ինչ որ սիրելի, ինչ որ բարեհամբավ, առաքինի և գովելի, ա՛յն մտածեք։

III. Տեխնոլոգիաների մարտահրավերները

Հետազոտողները, գիտնականներն ու նախագծողները սովորել են մեթոդներ, որոնք օգնում են մարդկանց ուշադրությունը կենտրոնացնել ավելի երկար ժամանակով և բավարարված զգալ: Դա նման է սննդի արդյունաբերությանը։ Գիտությունն օգնել է ձեռնարկություններին սննդի մշակումը հասցնել «երանության կետին», կամ այն փուլին, երբ սնունդն առավել հաճելի համ ունի։ Արդյոք դու մեղավո՞ր ես, որ կարծես, միշտ ևս մեկն ես ուզում:

Դե, … և՛ այո, և՛ ոչ։ Տեխնոլոգիաներն ունեն իրենց «երանության կետը», և այն ուղղորդում է մեր զգացմունքներն ու մարմնի քիմիական նյութերը՝ դրանց աջակցելու համար: Դուք ընկճվա՞ծ եք, եթե դժվարանում եք դադարեցնել տեխնոլոգիաների օգտագործումը: Դուք պարզապես հոգևորապես թո՞ւյլ եք: Ո՛չ: Տեխնոլոգիաների օգտագործումից հաճույք ստանալը միանգամայն նորմալ է, բայց մեր կողմից տեխնոլոգիաների օգտագործման վերահսկումը կարող է օրինական պայքար լինել: Դուք պայքարում եք գիտության, ուղեղի քիմիական նյութերի և մրցակցային արդյունաբերության մարտահրավերների դեմ, որոնք պայքարում են մեր ուշադրության համար, և դա արդարացի պայքար չէ:

Կարևոր է գիտակցել, որ մեծահասակները ևս կարող են պայքարել տեխնոլոգիաների դեմ նույնքան, որքան երեխաները: Մենք նույնպես կարող ենք ընկղմվել տեխնոլոգիաների «երանության կետի» մեջ և կորցնել ժամանակի զգացումը, ինչպես երիտասարդներն ու երեխաները:

Տեխնոլոգիաների «երանության կետը»

• Տեխնոլոգիաները գործիք են, որոնք մեզ հնարավորություն են տալիս մուտք գործել աշխարհի հավաքական գիտելիքների շտեմարանը և կարող են օգտագործվել մեր օգտի համար:

• Որքան մեծ ուշադրություն ենք դարձնում տեխնոլոգիաներին, այնքան ավելի շատ փոխհատուցում են ստանում տեխնոլոգիաները ստեղծողները:

• Հետազոտողներն ու նախագծողները օգտագործում են մեթոդներ, որպեսզի մենք ներգրավված լինենք և գոհ մնանք տեխնոլոգիաներից, ինչը նման է սննդի արդյունաբերության «երանության կետին»:

• Երկնային Հայրը և մեր Փրկիչը հասկանում են տեխնոլոգիաների հետ կապված մեր պայքարը և կզորացնեն մեզ:

Բ Կորնթացիներին 12․9

• Իսկ նա ինձ ասաց. «Քեզ իմ շնորհը բավական է, որովհետև իմ զորությունը տկարության մեջ է կատարյալ դառնում։ Արդ ավելի հոժարությամբ իմ տկարություններով կպարծենամ, որպեսզի Քրիստոսի զորությունն իմ մեջ բնակվի»։

Հաղթահարել «երանության կետը»

• Հասկացեք, որ տեխնոլոգիաններն ունեն իրենց «երանության կետը», որն առաջնորդում է մեր զգացմունքները և մարմնի քիմիական նյութերը:

• Նորմալ է պայքարել տեխնոլոգիաների դեմ։ Դուք պայքարում եք գիտության, ուղեղի քիմիական նյութերի և մրցակցային արդյունաբերության մարտահրավերների դեմ, որոնք պայքարում են մեր ուշադրության համար:

• Մենք կարող ենք վերահսկել մեր տեխնոլոգիաները՝ ինքներս մեզ նպատակաուղղված հարցեր տալով, ծրագիր կազմելով և, անհրաժեշտության դեպքում՝ դադար տալով:

• Ուշադիր լինելով այն բովանդակության հանդեպ, որը մենք օգտագործում ենք, և մեր տներում սարքերից զերծ տարածքներ ստեղծելով, կօգնեն մեզ հաղթահարել տեխնոլոգիաների «երանության կետը»:

Մատթեոս 26․41

• Արթո՛ւն կացեք ու աղոթե՛ք, որպեսզի փորձության մեջ չընկնեք. հոգին հոժար է, բայց մարմինը՝ տկար։

Մենք՝ որպես ծնողներ, կարող ենք օրինակ ծառայել մեր երեխաների համար՝ ուշադրություն դարձնելով մեր կողմից տեխնոլոգիաների օգտագործմանը: Գիտակցելով, թե որտեղ են անհրաժեշտ տեխնոլոգիաների օգտագործման սահմանափակումները և քայլեր ձեռնարկելով՝ հաղթահարելու այն շատ օգտագործելու կամ չարաշահելու գայթակղությունը, կարող ենք առողջ հարաբերություններ ստեղծել տեխնոլոգիաների հետ` մեզ համար և մեր ընտանիքների համար: Հիշեք, որ մենք ենք վերահսկում տեխնոլոգիաները, դրանք չեն վերահսկում մեզ։

IV. Վերահսկել տեխնոլոգիաների օգտագործումը

Ա․ Նպատակ․ նպատակային օգտագործել տեխնոլոգիաները սովորելու և ստեղծագործելու համար։

Կողոսացիներին 3․23

• Ինչ էլ որ անեք, սրտա՛նց արեք, ինչպես կանեիք Տիրոջ և ոչ թե մարդկանց համար։

• Ինքներդ ձեզ նմանատիպ հարցեր տվեք՝ «Ինչո՞ւ եմ ես օգտագործում իմ սարքը հենց հիմա» և «Արդյո՞ք ես լավ եմ զգում՝ այդ անելով»:

Տեխնոլոգիաների նպատակային օգտագործման գործնական առաջարկները ներառում են՝ դրական հաղորդագրություն ուղարկելը, խաղաղ երաժշտություն լսելը և ձեր սեփական բովանդակությունը ստեղծելը: Ուրիշ ի՞նչ կիրառումներ կարող եք բացահայտել:

Բ․ Ծրագիր․ նախապես ծրագրել՝ ավելի լավ ընտրություններ կատարելու համար

Առակներ 16․3

• Քո գործերը Տիրո՛ջը հանձնիր, և քո մտադրությունները կհաստատվեն։

• Ինքներդ ձեզ նմանատիպ հարցեր տվեք՝ «Ի՞նչ ծրագիր ունեմ իմ սարքն օգտագործելու համար» և «Ի՞նչ նշան եմ ցույց տալիս Աստծուն, թե ինչպես եմ օգտագործում իմ ժամանակը»:

Ավելի լավ ընտրությունները նախապես պլանավորելու գործնական առաջարկները ներառում են՝ էկրանի ժամանակի օրական սահմանափակում, «հետևել» և կապ հաստատել միայն ընտանիքի և մտերիմ ընկերների հետ, տանը ունենալ սարքերից զերծ տարածքներ, ընտանեկան լիցքավորման կայան տեղադրել և զտիչ օգտագործել: Ուրիշ ի՞նչ ռազմավարություններ կարող են օգնել ձեզ և ձեր երեխաներին ավելի լավ ընտրություն կատարել տեխնոլոգիաների օգտագործման վերաբերյալ:

Գ․ Դադար․ անհրաժեշտության դեպքում ընդմիջում անել:

Սաղմոսներ 46․10

• Հանդա՛րտ մնացեք և ճանաչե՛ք, որ ես եմ Աստվածը:

• Ինքներդ ձեզ նմանատիպ հարցեր տվեք՝ «Արդյո՞ք ես խուսափում եմ բովանդակությունից, որը գիտեմ, որ ճիշտ կամ նպատակային չէ» և «Ես զգացի, որ Հոգին հեռանում է»:

Տեխնոլոգիաներից ընդմիջում ապահովելու գործնական առաջարկները ներառում են՝ ձեր սարքը վայր դնելը և հեռանալը, ուժի համար աղոթելը և ինչ-որ մեկի հետ խոսելը: Ինչպե՞ս կարող է ձեր ընտանիքը դադար վերցնել տեխնոլոգիաներից, երբ անհրաժեշտ է:

V. Խմբային քննարկում

Այժմ, երբ մենք խոսեցինք տեխնոլոգիաների օգտագործումը վերահսկելու որոշ գործնական մեթոդների մասին, եկեք բացենք քննարկումը խմբի համար: Ես կցանկանայի ձեզանից լսել տեխնոլոգիաների հետ կապված ձեր փորձառությունների և այն մասին, թե ինչպես եք կառավարում դրանք ձեր կյանքում:

1. Որո՞նք են տեխնոլոգիաները կառավարելու ամենամեծ մարտահրավերները ձեր տանը:

2. Ի՞նչ արժեքներ եք ցանկանում սերմանել ձեր երեխաների մեջ, երբ խոսքը վերաբերում է տեխնոլոգիաների օգտագործմանը:

3. Ինչպե՞ս են տեխնոլոգիաներն ազդում ձեր ընտանեկան հարաբերությունների և հաղորդակցության վրա:

4. Ինչպե՞ս եք օգտագործում տեխնոլոգիաները ընտանիքով։ Ինչպե՞ս է դա ավելացնում կամ վատնում ձեր՝ միասին անցկացրած որակյալ ժամանակը:

5. Ինչպե՞ս կարող եք հավասարակշռել տեխնոլոգիաների օգտագործման առավելություններն ու թերությունները ձեր ընտանիքի առօրյա կյանքում:

6. Ըստ ձեզ՝ տեխնոլոգիաներն ի՞նչ դեր են խաղում ձեր երեխայի կրթության գործում: Ինչպե՞ս եք ապահովում, որ նրանք այն արդյունավետ օգտագործեն:

7. Ինչպե՞ս են տեխնոլոգիաներն ազդում ձեր երեխայի հոգեկան առողջության վրա: Ի՞նչ քայլեր եք ձեռնարկում բացասական հետևանքները մեղմելու համար:

8. Ի՞նչ կանոններ եք հաստատում ձեր տանը՝ տեխնոլոգիաների օգտագործման համար: Ինչպե՞ս եք դրանք պարտադրում:

9. Ինչպե՞ս եք մոդելավորում տեխնոլոգիաների պատասխանատու օգտագործումը ձեր երեխաների համար:

10. Ի՞նչ ռեսուրսներ կամ աջակցություն է անհրաժեշտ՝ ձեր տանը տեխնոլոգիաները արդյունավետ կառավարելու համար:

11. Ինչպե՞ս է տեխնոլոգիաների օգտագործումն ազդել երեխաներիս հետ իմ հարաբերությունների վրա:

12. Որո՞նք են տնային պայմաններում տեխնոլոգիաների օգտագործման հնարավոր վտանգները։ Ինչպե՞ս կարող եք մեղմել այդ վտանգները։

13. Ի՞նչ արժեքներ եք ցանկանում սերմանել ձեր երեխաների մեջ տեխնոլոգիաների օգտագործման վերաբերյալ: Ինչպե՞ս կարող եք ինքներդ մոդելավորել այդ արժեքները ձեզ համար։

14. Ինչպե՞ս կարող եք ստեղծել տեխնոլոգիական ծրագիր ձեր ընտանիքի համար, որը բավականաչափ ճկուն է՝ փոփոխություններին և մարտահրավերներին դիմակայելու համար, բայց այնուամենայնիվ, ապահովում է կառուցվածք և սահմաններ:

15. Ինչպե՞ս կարող եք օգտագործել տեխնոլոգիանները որպես գործիք՝ բարելավելու ձեր երեխաների ուսումնառությունն ու զարգացումը, այլ ոչ թե պարզապես որպես զվարճանքի կամ շեղման աղբյուր:

VI. Ուսուցման առաջարկներ տնային պայմաններում տեխնոլոգիաների օգտագործման վերաբերյալ

Սկսեք՝ քննարկելով տեխնոլոգիաների դերը մեր կյանքում, և ինչպես կարող են դրանք ազդել վարքի և զգացմունքների վրա:

Ա. Բացատրեք տեխնոլոգիաների վերահսկման կարևորությունը

Բացատրեք, թե տեխնոլոգիաներն ինչպես կարող են լավ գործիք լինել, սակայն կարող են նաև խնդիր դառնալ, երբ վերահսկում են մեզ: Բացատրեք, որ կարևոր է ղեկավարել տեխնոլոգիաները, որպեսզի դրանք չվերահսկեն մեզ:

Բ. Սովորեցրեք գործնական առաջարկներ տեխնոլոգիաները վերահսկելու համար

Վերանայեք հոդվածի նշումներում թվարկված՝ տեխնոլոգիաները վերահսկելու յուրաքանչյուր առաջարկ (նպատակ, ծրագիր և դադար): Բացատրեք, թե ինչպես կարող է յուրաքանչյուր առաջարկ օգնել նրանց վերահսկել տեխնոլոգիաների օգտագործումը:

Գ. Մտածեք, թե ինչպես կարելի է կիրառել այդ սկզբունքները տանը

Քննարկեք տարբեր իրավիճակներ, որտեղ տեխնոլոգիաները կարող են խնդիր լինել, օրինակ՝ չափից շատ ժամանակ անցկացնելը սոցիալական ցանցերում կամ ժամերով վիդեոխաղեր խաղալը:

Մտածեք այս իրավիճակներում տեխնոլոգիաները վերահսկելու սկզբունքները կիրառելու ուղիների մասին, ինչպիսիք են՝ ամենօրյա սահմանափակումների սահմանումը, սարքերից զերծ գոտիների ստեղծումը կամ անհրաժեշտության դեպքում՝ ընդմիջումները:

Դ. Խրախուսեք բաց հաղորդակցությունը և հաշվետվողականությունը

Բացատրեք, որ կարևոր է բացահայտորեն խոսել ընտանիքում տեխնոլոգիաների օգտագործման մասին և միմյանց հաշվետու պահել՝ տեխնոլոգիաները պատասխանատու կերպով օգտագործելու համար:

Տնային պայմաններում տեխնոլոգիաների օգտագործման ակնկալիքներ և ուղեցույցներ դրեք և խրախուսեք բոլորին միասին աշխատել՝ դրանց հետևելու համար:

Ե․ Հետևեք և զեկուցեք ձեր առաջընթացի մասին

Պարբերաբար հետևեք ձեր երեխաներին, որպեսզի տեսնեք, թե նրանք ինչպես են վերահսկում տեխնոլոգիաների օգտագործումը։ Խրախուսեք նրանց օգնություն խնդրել, եթե դրա կարիքն ունեն, և պատրաստ եղեք առաջարկել աջակցություն և առաջնորդություն, երբ անհրաժեշտ է:

Զ. Մոդելավորեք տեխնոլոգիաների ճիշտ օգտագործումը

Բացատրեք ծնողների դերը տեխնոլոգիաների ճիշտ օգտագործման մոդելավորման գործում: Սա նշանակում է գիտակցաբար օգտագործել տեխնոլոգիաները և լավ օրինակ ծառայել: Ծնողները կարող են ցույց տալ երեխաներին, որ իրենք կարող են վայելել տեխնոլոգիաները՝ առանց թույլ տալու, որ դրանք վերահսկեն իրենց կյանքը, և տեխնոլոգիաների օգտագործումը կարող է հավասարակշռվել այլ կարևոր գործողությունների և հարաբերությունների հետ:

Է. Օգտագործեք դրական ամրապնդում

Քննարկեք, թե ինչպես կարելի է դրական ամրապնդումն օգտագործել՝ լավ սովորություններն ու վարքագիծը հաստատելու և ամրացնելու համար: Երբ երեխաները ջանքեր են գործադրում՝ վերահսկելու տեխնոլոգիաների օգտագործումը, կարևոր է գովաբանել և խրախուսել նրանց:

Ը. Դարձրեք դա ընտանեկան ջանք

Խրախուսեք ընտանիքի բոլոր անդամներին աշխատել միասին՝ տեխնոլոգիաների հետ առողջ հարաբերություններ ստեղծելու համար: Տեխնոլոգիաների օգտագործման վերահսկումը միայն անհատական ջանք չէ, այլ ընտանեկան ջանք: Այն կարող է ներառել՝ ընտանեկան կանոնների սահմանում տեխնոլոգիաների օգտագործման վերաբերյալ, գտնել այլընտրանքային միջոցառումներ՝ ընտանիքով մասնակցելու համար և բաց ու ազնիվ հաղորդակցություն ունենալ՝ տեխնոլոգիաները պատասխանատու կերպով օգտագործելու մարտահրավերների և հաջողությունների մասին:

Թ. Եղեք համբերատար և հասկացող

Ծնողների հետ ծրագրեք, թե նրանք ինչպես կարող են փոխել սովորություններն ու վարքագիծը տեխնոլոգիաների օգտագործման առումով: Օգնեք նրանց հասկանալ, որ դա ժամանակ և ջանք կպահանջի: Կարևոր է լինել համբերատար և ըմբռնող, մինչ երեխաներն աշխատում են վերահսկել տեխնոլոգիաների օգտագործումը: Նրանք կարող են աջակցություն և առաջնորդություն առաջարկել այդ ընթացքում և տոնել փոքր հաղթանակները, երբ երեխաները առաջընթաց են գրանցում տեխնոլոգիաների հետ ավելի առողջ հարաբերություններ հաստատելու ուղղությամբ:

VII. Եզրափակում

Տեխնոլոգիաները հրաշք գործիք են, բայց կարող է նաև բեռ լինել, երբ դրանք նպատակային չենք օգտագործում: Վերահսկելով տեխնոլոգիաների օգտագործումը և ուղղորդելով երեխաներին անել նույնը, մենք կարող ենք վստահ լինել, որ դրանք մեզ չեն վերահսկի: Հիշեք, որ նպատակաուղղված օգտագործեք տեխնոլոգիաները սովորելու և ստեղծագործելու համար, նախապես ծրագրեք ավելի լավ ընտրություններ և անհրաժեշտության դեպքում՝ ընդմիջեք: Եկեք նաև հիշենք սուրբ գրությունները, որոնք խրախուսում են մեզ կենտրոնանալ ճշմարիտ, ազնիվ, արդար, մաքուր, հրաշալի և բարեհամբավ բաների վրա: Այսպես վարվելով՝ մենք կարող ենք օգնել երեխաներին ապահովությամբ և դրականորեն օգտագործել տեխնոլոգիաները: