Pagtimbang-timbang sa Pagkamasaligan nga mga Tinubdan

Ipatin-aw

Ipakita ang mosunod nga pamahayag ni Presidente Dallin H. Oaks:

Nagpuyo kita sa panahon sa gipalapad ug gisabwag og maayo nga impormasyon. Apan dili tanan niini nga impormasyon tinuod. Kinahanglang magmatngon kita samtang mangita kita sa kamatuoran ug magpili og mga tinubdan niana nga pagsiksik. (Dallin H. Oaks, “Kamatuoran ug ang Plano,” Liahona, Nob. 2018, 25)

Makapili, makapasalida ka sa bidyo “In Search of Truth” (3:03) o usa ka bahin sa mensahe ni Presidente Oaks “Kamatuoran ug ang Plano” (Liahona, Nob. 2018, 25–28) gikan sa time code 0:18 ngadto sa 2:18. Ang mga estudyante makapangita alang sa mga baroganan nga makagiya kanila samtang sila nagsiksik sa kamatuoran gikan sa nagkalain-laing mga tinubdan.

Hatagi ang mga estudyante sa mosunod nga handout sa mga pangutana sa pagtabang kanila sa pagtimbang-timbang sa pagkamasaligan nga mga tinubdan.

Mga Pangutana alang sa Pagtimbang-timbang sa mga Tinubdan

• Unsa ang mga kwalipikasyon sa tagsulat ug posible nga mga tuyo ug mga pagdaot?

• Ang mga pagtulon-an ug mga hitabo ba niini nga tinubdan gipresentar sa tukma nga kinatibuk-ang kahulogan sa ilang panahon, dapit, ug kahimtang?

• Unsa ka konektado kaayo ang tagsulat ngadto sa mga hitabo nga gihulagway?

• Ang mga ideya ug mga pagtulon-an niini nga tinubdan gisuportahan ba pinaagi sa dugang nga kasaligan nga mga tinubdan?

• Sa unsang paagi ang mga ideya ug mga pagtulon-an niini nga tinubdan matandi ngadto sa mga kamatuoran sa gipahiuli nga ebanghelyo ni Jesukristo ingon nga gitudlo diha sa mga kasulatan ug pinaagi sa mga propeta karon?

• Unsa ang gisulti sa mga impresyon ug mga pag-aghat sa Espiritu Santo kanako?

Modelo

Makagamit ka sa mosunod nga ehemplo o usa nga imong kaugalingon aron sa pagmodelo niini nga kahanas.

Ipakigbahin ang mosunod nga talan-awon uban sa mga estudyante: Samtang nagtuon sa istorya sa Unang Panan-awon ni Joseph Smith diha sa Joseph Smith––Kasaysayan 1:14–20, ikaw makakaplag og artikulo diha sa internet nga nag-angkon nga ang Langitnong Amahan sa tinuod mihikap sa mga mata ni Joseph Smith. Sumala niini nga artikulo, kini mihimo ni Joseph Smith niana nga higayon nga makakita sa Manluluwas. Ikaw wala gayod makadungog niini nga detalye kaniadto ug matingala kon kini tinuod ba. Ang artikulo naghisgot sa mosunod nga tinubdan isip ebidensiya:

“Ika-2 sa Peb[rero 1893] Mitambong og Miting sa Puasa. … Misulti si Br. John Alger samtang namulong kabahin ni Propeta Joseph, nga sa dihang siya, si John, usa ka gamay nga batang lalaki [sa Kirtland, Ohio] nadungog niya si Propeta Joseph nga nag-asoy sa iyang panan-awon kabahin sa pagkakita sa Ang Amahan ug sa Anak, Nga ang Dios mihikap sa iyang mga mata uban sa iyang tudlo ug miingon ‘Joseph kini ang akong hinigugmang Anak paminaw kaniya.’ Diha dayon nga ang Ginoo mihikap sa iyang mga mata uban sa iyang tudlo siya diha-diha dayon nakakita sa Manluluwas. … Pagkahuman [sa] miting, pipila kanamo nangutana ni [Brother Alger] mahitungod sa hitabo. … Kami nalingaw kaayo sa panag-istoryahanay, kay kini usa ka butang nga wala gayod namo makit-i diha sa kasaysayan sa simbahan o madunggi kaniadto.” (Diary of Charles Lowell Walker [1980], 2:755–56)

Ipakita kon unsaon sa pagtimbang-timbang kini nga tinubdan nga maggamit og pipila ka pangutana gikan sa handout. Sama pananglit:

Mga Pangutana	Pagtimbang-timbang
Mga Pangutana Unsa ang mga kwalipikasyon sa tagsulat ug posible nga mga tuyo ug mga pagdaot?	Pagtimbang-timbang Pinasikad sa nahibaloan nga mga istorya, si Brother Alger usa ka matinud-anon nga miyembro sa Simbahan. Ang iyang tuyo alang sa pagpakigbahin ingon og paglig-on sa hugot nga pagtuo diha sa ka tinuod sa Unang Panan-awon ni Joseph Smith.
Mga Pangutana Unsa ka konektado kaayo ang tagsulat ngadto sa mga hitabo nga gihulagway?	Pagtimbang-timbang Kini nga tinubdan usa ka daghan nang naagian nga pag-istorya ug miabot kapin sa 70 na ka tuig human sa panan-awon ni Joseph Smith, busa ang mga mambabasa kinahanglan nga magmabinantayon kon magtimbang-timbang sa pagkatinuod niini.
Mga Pangutana Ang mga ideya ug mga pagtulon-an niini nga tinubdan gisuportahan ba pinaagi sa dugang nga kasaligan nga mga tinubdan?	Pagtimbang-timbang Ang ubang mga istorya sa Unang Panan-awon wala molig-on sa paghulagway sa Dios nga naghikap sa mga mata sa Propeta (tan-awa sa Gospel Topics Essays, “First Vision Accounts,” topics.ChurchofJesuschrist.org).

Pagpraktis

Dapita ang mga estudyante sa pagpakigbahin sa mga tinubdan nga ilang gigamit sa pagsabot og mas maayo sa mga kasulatan ug mga pagtulon-an sa ebanghelyo. Ikaw makahimo usab sa pagpakigbahin sa mga tinubdan nga ikaw naggamit sa imong kaugalingon nga kasulatan ug pagtuon sa ebanghelyo. Pagpili og tinubdan sa pagtimbang-timbang gikan niadtong gihisgotan, o pagpili gikan sa mga ehemplo nga gilista sa ubos. Dapita ang mga estudyante sa paggamit sa mga pangutana diha sa handout aron sa pagpraktis sa pagtimbang-timbang sa tinubdan. Makahimo sila sa paghisgot sa ilang mga nakaplagan nga magpares, diha sa gagmay nga grupo, o isip usa ka klase.

Dugang nga mga tinubdan nga magamit sa pagpraktis niini nga kahanas:

• Donald W. Parry, “Ang Pag-ula ni Jesukristo diha sa Daang Tugon,” Liahona, Abr. 2022, 40–43

• Gaye Strathearn, “Maria, ang Inahan ni Jesus,” Liahona, Ene. 2019, 12–17

• Jeffrey G. Cannon, “Oliver Cowdery’s Gift,” sa Revelations in Context (2016), 15–19

• We Lived with God” (video), ChurchofJesusChrist.org

Ang mosunod nga mga kapanguhaan (aduna sa Iningles) mahimong mohatag usab og tinubdan nga mga ehemplo nga ikaw makagamit sa pagmodelo o pagpraktis niini nga kahanas:

• “Links to Gospel Study Resources,” ChurchofJesusChrist.org

• ScriptureCentral.org

• BibleHub.com

Mubo nga Sulat: Ang pipila sa mga website sa ibabaw gipalambo pinaagi sa mga tawo o organisasyon nga dili miyembro sa Simbahan. Ang pagkonektar ngadto niini sa sulod wala magpasabot og pagduso pinaagi sa Ang Simbahan ni Jesukristo sa mga Santos sa Ulahing mga Adlaw.

Pagdapit ug Pag-follow Up

Dapita ang mga estudyante sa pagtimbang-timbang sa pagkamasaligan sa tinubdan atol sa ilang pagtuon sa kasulatan ug sa ebanghelyo. Mahimo kang mag-follow up sa tibuok semana. Makahimo ka usab sa pagtugot og panahon kon kamo magkita og balik alang sa mga estudyante sa pagpakigbahin sa mga kapanguhaan nga ilang gigamit aron mas maayo ang pagsabot sa mga kasulatan. Mahimo silang makigbahin kon giunsa nila sa pagtimbang-timbang ang pagkamasaligan sa tinubdan ug sa pagpasabot kon giunsa niini sa pagpauswag ang ilang pagtuon sa mga kasulatan.