Pagpalambo og Doktrina nga Balanse ang Pagsabot

Ipatin-aw

Ipasabot nga ang pagbalanse sa doktrina nangahulogan sa paghatag og angay nga importansya o gibug-aton ngadto sa usa ka punto sa doktrina sulod sa kinatibuk-ang kahulogan sa ubang kalabot nga mga kamatuoran nga napadayag sa Dios. Sa pagtabang sa mga estudyante pagsabot niini nga kahanas mahimo kang makigbahin sa mosunod nga mga pamahayag:

Kini hilabihan sa pagkadili maalamon sa pagkuha lamang og tipik sa kamatuoran ug tagdon kini ingon og mao ang tibuok butang. (Joseph F. Smith, Gospel Doctrine,, 5th ed. [1939], 122)

Adunay ighihingpit ug pagpugong nga pagtudlo diha sa mga kasulatan diin magdala og usa ka balanse nga kahibalo sa kamatuoran. (Boyd K. Packer, “The Pattern of Our Parentage,” Ensign, Nov. 1984, 66)

Dapita ang mga estudyante sa pagpangutana sa ilang mga kaugalingon sa mosunod nga mga pangutana samtang sila nagtuon sa mga kasulatan ug nag-ila sa mga pagtulon-an sa ebanghelyo:

• Unsa nga dili pagkabalanse ang moresulta kon ako maninguha sa pagsabot o paggamit niini nga pagtulon-an nga nahibulag sa ubang mga kamatuoran sa ebanghelyo?

• Unsa ang ubang mga kamatuoran nga nagpugong o nagdala og balanse ngadto niining pagtulun-an sa ebanghelyo?

Modelo

Makagamit ka sa mosunod nga ehemplo o usa nga imong kaugalingon aron sa pagmodelo niini nga kahanas.

Basaha ang Mateo 22:39, ug ilha ang sugo sa Ginoo nga kinahanglan atong higugmaon ang uban sama sa atong mga kaugalingon.

Unsa nga dili pagkabalanse ang moresulta kon kini nga sugo ibulag gikan sa ubang mga kamatuoran sa ebanghelyo?

Ang dili pagkabalanse mahitabo kon usa ka tawo mituo nga ang pagtabang sa uban diha sa gugma ug kalooy naglakip sa pagtugot sa mga pagpili nga mga kontra ngadto sa mga balaod sa Dios. Usab adunay dili pagkabalanse kon ang gugma alang sa uban naggiya ngadto sa pagpagamay o pagpangayo og pasaylo alang sa mga balaod sa Dios.

Unsa ang ubang mga kamatuoran nga nagpugong o nagdala og balanse ngadto niining pagtulun-an sa ebanghelyo?

Kita makahinumdom nga ang una ug dakong sugo mao ang paghigugma sa Dios, diin nag-apil sa pagsunod sa Iyang mga balaod ug dili maulaw niini (tan-awa sa Mateo 22:37–38; Mga Taga-Roma 1:16). Ang Dios nagsugo usab kanato sa pagdapit sa uban sa pagduol ngadto ni Jesukristo ug paghinulsol (tan-awa sa Doktrina ug mga Pakigsaad 18:14–16). Ang pagdapit sa uban sa pagpuyo sa mga balaod sa Dios usa ka pagpakita sa atong gugma alang Kaniya ug sa Iyang mga anak.

Ikaw makapasalida usab sa bidyo “Go and Sin No More” (3:21) o makarebyo sa istorya sa Juan 8:1–11. Dapita ang mga estudyante sa pagpangita alang sa giunsa sa Manluluwas sa pagmodelo ang pagbalanse tali sa sugo sa paghigugma sa uban ug sa Iyang pasalig ngadto sa balaod sa Dios.

Pagpraktis

Pagpili og usa ka tudling gikan sa pagbasa sa kasulatan niini nga semana nga nagtudlo og usa ka kamatuoran nga nagkinahanglan sa pagbalanse ngadto sa ubang mga kamatuoran aron mahimong tarong ang pagsabot o paggamit. O ikaw makapili gikan sa mga tudling nga gilista sa ubos. Dapita ang mga estudyante sa pagtuon sa tudling ug pag-ila sa mosunod:

• Usa ka kamatuoran sa ebanghelyo nga gitudlo sa tudling sa kasulatan

• Usa ka posible nga walay pagkabalanse kon kini nga kamatuoran nabulag gikan sa ubang mga pagtulon-an sa ebanghelyo

• Mga pagtulon-an sa ebanghelyo nga nagdala og pagkahiusa ngadto niini nga kamatuoran

Dapita ang mga estudyante sa pagpakigbahin ngadto sa klase o diha sa gagmay nga mga grupo kon unsay ilang nadiskobrehan.

Dugang nga mga tudling alang sa pagpraktis:

• Isaias 63:1–6. Nagtudlo si Isaias nga ang Ikaduhang Pag-anhi mahimong usa ka adlaw sa pagpanimalos ug paglaglag.

• Marcos 11:24. Nagtudlo ang Manluluwas nga bisan unsa ang i-ampo sa Iyang mga disipulo diha sa hugot nga pagtuo ihatag ngadto kanila.

• Mga Taga-Efeso 2:8–9. Nagtudlo si Pablo nga kita naluwas tungod sa grasya pinaagi sa hugot nga pagtuo ug dili sa atong mga buhat.

• Alma 34:32–33. Nagtudlo si Amulek nga kini nga kinabuhi mao ang panahon sa pagpangandam sa pagsugat sa Dios.

• Doktrina ug mga Pakigsaad 64:2, 4. Ang Ginoo nagtudlo nga Siya mapuanguron ug maloloy-on.

Pagdapit ug Pag-follow Up

Awhaga ang mga estudyante sa pagpraktis sa pagpalambo og doktrina nga balanse ang pagsabot samtang sila nagtuon sa mga kasulatan ug sa ebanghelyo. Hinumdomi ang pag-follow up ug tugoti og panahon alang sa mga estudyante sa pagpakigbahin kon unsa ang ilang nadiskobrehan diha sa ilang personal nga pagtuon pinaagi sa paggamit niini nga kahanas. Makadapit ka usab og mga estudyante sa pagpakigbahin kon sa unsa nga paagi kini nga kahanas makatabang kanila og mas maayo nga pagsabot sa mga kamatuoran sa ebanghelyo nga gitudlo sa kasulatan. Pangita og mga oportunidad sa pagpadayon sa pagpraktis niini nga kahanas diha sa klase.