Paglampos sa Pag-eskwela: Leksiyon 194

Pag-organisar sa mga Buluhaton ug mga Prayoridad

Makatabang Nato ang Ehemplo sa Manluluwas aron Mahapsay ang Atong Kinabuhi

Unsa ka kamaayo sa pag-organisar ug pag-una sa mga buluhaton nga kinahanglang himoon kada adlaw? Makatabang nato ang Langitnong Amahan ug si Jesukristo aron mahapsay ang atong kinabuhi ug magamit ang atong panahon ug kapanguhaan sa mas maayong paagi. Dihang maningkamot ang mga estudyante nga unahon ang Langitnong Amahan ug si Jesukristo, mapalampos nila ang pag-eskwela sa mas maayong paagi kay sa kon kini sulayan nila nga sila ra. Kini nga leksiyon makatabang sa mga estudyante nga makakat-on og mga paagi diin makatabang ang ehemplo sa Manluluwas aron mahapsay ang ilang pag-eskwela.

Pagpangandam sa estudyante: Dapita ang mga estudyante sa paghimo og listahan sa mga buluhaton sa eskwelahan nga kinahanglang humanon karong semanaha. Mahimo kining maglakip sa homework, mga pasulit, mga proyekto, o gisangon nga mga basahon (lakip sa seminary).

Posibleng mga Kalihokan sa Pagkat-on

Paghapsay sa kagubot

Sa pagsugod sa klase, ikonsiderar ang pagpakita og usa ka butang nga nagkinahanglan og daghang mga lakang aron makompleto (sama sa usa ka recipe, jigsaw puzzle, o ikaw ra mohimo nga proyekto). Dapita ang mga estudyante nga ipakigbahin ang pipila sa lainlaing paagi nga imong mahimo aron makompleto kini nga buluhaton. Pananglitan, aron makompleto ang usa ka puzzle pwedeng kausahon og yabo ang tanang piraso, ilainlain una ang mga piraso nga para sa daplin, o iponon ang mga piraso nga parehas og kolor.

• Ngano kahang lisod ang pag-organisar ug pag-una sa usa ka proyekto nga adunay daghan kaayo og lakang una makompleto?

• Sa unsang paagi kini parehas sa pag-organisar ug pag-una sa pag-eskwela?

Mga panalangin sa pag-organisar sa mga buluhaton ug mga prayoridad

Makatabang tingali nga pasaligan ang mga estudyante nga nahibalo ang Langitnong Amahan ug si Jesukristo nga busy ang atong kinabuhi ug nagkinahanglan og daghang panahon ug atensyon. Pinaagi sa Ilang mga propeta, gitambagan kita Nila bahin sa pag-atubang sa daghang buluhaton nga atong giatubang.

Basaha ang mosunod nga mga tudling sa kasulatan, nga pangitaon ang kaimportante sa pagpanigkamot nga makabaton og kahapsay sa atong kinabuhi:

Salmo 37:23–24

1 Mga Taga-Corinto 14:40

Doktrina ug mga Pakigsaad 28:13; 132:8

• Unsay gitudlo niini nga mga tudling bahin sa kahapsay?

Human mahatagig higayon ang mga estudyante nga motubag, makatabang tingali ang pagpasabot nga si Jesukristo organisado ug han-ay sa Iyang buluhaton. Pinaagi sa mga kasulatan, gidapit kita Niya nga sa pagbuhat sa ingon (tan-awa ang 1 Mga Taga-Corinto 14:40; Mosiah 4:27).

Gikan niini nga mga bersikulo, tabangi ang mga estudyante nga mailhan nga makatabang nato ang pagbaton og kahapsay sa atong kinabuhi aron masunod nato ang ehemplo ni Jesukristo.

Pwede ka nga mohatag og pagdapit sama sa mosunod aron sa pagtabang sa imong mga estudyante sa pagtinguha og personal nga pagpadayag samtang magtuon.

Mainampoong ikonsiderar kon unsa ka kahapsay ug ka organisado kon bahin sa imong mga buluhaton sa eskwelahan ug mga asaynment. Dapita ang Espiritu Santo nga tabangan kang makita ang mga estratehiya sa pag-organisar ug pag-una nga makauswag sa kahapsay sa imong kinabuhi.

Ang Paglalang: Usa ka sumbanan sa kahapsay

Ikonsiderar ang pagpakita sa hulagway sa mga langit ug sa atong yuta. Ubos sa direksiyon sa Langitnong Amahan, ang asoy sa paglalang sa yuta sa Manluluwas magtudlo nato og mga estratehiya aron mas maorganisar ang atong mga buluhaton ug mga prayoridad.

• Nganong importante ang pagkaorganisado ug kahapsay samtang gilalang ni Jehova (Jesukristo) ang yuta?

Dayon ipakita ang mosunod nga mga instruksiyon para sa mga estudyante. Ikonsiderar ang pag-organisar sa mga estudyante ngadto sa mas gagmay nga mga grupo alang niini nga kalihokan.

Basaha ang Abraham 4:1–25; 5:2–3. Pamalandongi ang mosunod nga mga pangutana samtang magtuon kamo.

• Unsa ang pipila ka detalye nga inyong nakaplagan nga makatabang kon atong organisahon ang atong mga buluhaton ug mga prayoridad?

• Unsa ang pipila sa mga gihimo sa Langitnong Amahan ug ni Jesukristo aron mahimong han-ay ang proseso sa Paglalang? (Pananglitan: Unsay una Nilang gihimo? Giunsa Nila paghimo ang dagkong mga buluhaton?)

• Sa imong hunahuna, nganong importante nga mogahin Sila sa pagpamalandong ug sa pagbati nga “maayo” ang Ilang nahimo? (Tan-awa ang Abraham 4:21.)

Pagtandi sa Paglalang diha sa atong kinabuhi

Sa imong journal sa pagtuon, ilista ang pipila ka paagi nga makatabang sa usa ka tawo ang asoy sa Paglalang aron maorganisar ang ilang buluhaton sa eskwelahan.

Kon atong ipahisama ang mga kasulatan ngadto sa atong kaugalingon, atong tun-an ang gihatag nga asoy samtang mangitag mga detalye nga morag importante, itandi kini sa atong mga kahimtang, nga diskobrehon ang mahinungdanong mga leksiyon, ug gamiton kini sa atong kinabuhi. Makita tingali sa mga estudyante ang mosunod nga mga detalye gikan sa Abraham 4–5 nga magamit sa ilang paningkamot nga organisahon ang mga buluhaton ug mga prayoridad. Kong nagkinahanglan og dugang giya ang mga estudyante, pwede nimong ipasabot ang mosunod nga mga bersikulo ug hugpong sa mga pulong.

“Himoa nga adunay kahayag” (tan-awa ang Abraham 4:1–4). Mahimo tingaling mailhan sa mga estudyante ang kaimportante nga adunay kahayag ni Kristo sa ilang kinabuhi.

“ug kini natuman, gani ingon sa ilang pagmando” (Abraham 4:7). Sa kada lakang sa atong buluhaton, atong mailhan ang labing kaimportanteng mga asaynment ug unahon kini pagkompleto sa dili pa sugdan ang laing buluhaton.

“Atong andamon ang yuta aron mohatag og sagbut” (Abraham 4:11). Ang pag-andam sa yuta aron tamnan ikatandi ngadto sa pagbuak sa dakong buluhaton ngadto sa gagmay, nga mas madumala nga mga lakang.

Nakita sa Langitnong Amahan ug ni Jesukristo nga “ang ilang laraw maayo.” (Abraham 4:21). Sa susama, atong mabantayan nga ang mga butang “maayo” sa atong kinabuhi (mga butang nga inyong nakab-ot) ug pahalipayan ang atong mga kalamposan.

“[K]ita mamahulay” (Abraham 5:2). Mahimo natong ipahinungod ang Igpapahulay ingon nga adlaw sa pagpahulay gikan sa atong mga buluhaton.

• Sa unsang paagi ang mga detalye nga inyong nakaplagan motabang ninyo nga mas makasunod ang ehemplo sa Manluluwas dihang maningkamot kamo sa pag-organisar sa inyong buluhaton sa eskwelahan?

Aron tabangan ang mga estudyante nga susihon ang ilang mga kalig-on ug kahuyang sa pag-organisar sa ilang buluhaton sa eskwelahan, pwede nimong ipakita ang mosunod nga instruksiyon. Madismaya tingali ang pipila sa imong mga estudyante samtang kompletohon nila kini nga pagsusi sa kaugalingon. Pasaligi sila nga ingon nga mga anak sa Dios, gimahal kita Niya, nagpailob sa atong pag-uswag, ug gusto kaayog motabang nato nga mouswag.

Paggahin og panahon nga mainampoong motimbangtimbang kon unsa ka tinuod para nimo ang kada pahayag kon bahin sa pag-organisar sa mga buluhaton ug mga prayoridad (tinuod kaayo, medyo, tinuod).

• Gihimo nakong prayoridad ang Langitnong Amahan ug si Jesukristo sa akong kinabuhi pinaagi sa paghimo sa mga butang nga sama sa regular sa pagtuon sa kasulatan ug personal nga pag-ampo aron matabangan ko sa tibuok adlaw nga pag-eskwela.

• Gisubay nako ang akong mga asaynment sa eskwelahan ug ipasa kini sa hustong panahon.

• Nanagandam ko daan para sa mga test ug dagkong mga proyekto.

• Limpyo ug organisado ang akong mga mubo nga sulat sa klase, backpack, mga libro, ug mga homework.

• Gibati nako nga kalmado nakong mahimo ang dagkong mga asaynment ug dili ko maghulat nga hapit na kining ipasa.

• Komportable kong makig-istorya sa akong magtutudlo dihang naa koy mga pangutana o nagkinahanglan ko og dugang tabang.

Mopili tingali ka og usa ka bahin diin gibati nimo nga nakigbisog ka sa pagpunting para sa sunod nga kalihokan.

Pagpraktis sa pag-organisar ug mga buluhaton ug mga prayoridad

Ang pagpraktis sa pag-organisar ug pag-una sa ilang buluhaton sa eskwelahan makatabang sa mga estudyante aron mas mahapsay ang ilang kinabuhi.

Usa ka paagi aron mapraktis sa mga estudyante kini nga kahanas mao ang paghatag nilag kopya sa handout nga “Pag-organisar ug Pag-una sa Akong Buluhaton sa Eskwelahan.”

Dapita ang mga estudyante sa pagkompleto sa pipila o tanan sa kalihokan diha sa handout. Mahimong kompletohon kini uban sa gagmayng grupo o kapares. Dayon pwedeng ipakigbahin sa mga estudyante ngadto sa uban ang mga ideya nga nakatabang nila nga mahimo mas organisado.

Human ang igong panahon, pwede kang modapit og tigpamaba sa kada grupo nga mopakigbahin sa pipila sa mga butang nga gihisgotan sa grupo panahon sa kalihokan sa handout. Samtang magplano ang mga estudyante nga sundon ang ehemplo sa Manluluwas sa pag-organisar, pwede nimong ipasabot nga usa sa mga paagi nga makig-istorya ang Langitnong Amahan kanato mao ang pinaagi sa pagtabang nato nga mailhan ang mga ideya nga gusto natong sulayan.

Sa inyong journal sa pagtuon, isulat ang usa ka butang nga gusto ninyong sulayan aron mas maorganisar ug mauna ang inyong buluhaton sa eskwelahan.

• Unsaon ninyo pagdapit ang Langitnong Amahan ug si Jesukristo nga padakoon ang imong mga paningkamot?

Pasaligi ang mga estudyante nga ang pagpaningkamot nga mahimong mas organisado ug unahon ang buluhaton sa eskwelahan nagkinahanglan tingali og balikbalik nga pagsulay. Pwede ninyong ipakigbahin ang inyong pamatuod nga gimahal sila sa Langitnong Amahan ug ni Jesukristo ug padakoon ang ilang paningkamot nga mahimong mas maayo.

Dugang nga mga Kapanguhaan

Nganong importante nga unahon ang Langitnong Amahan ug si Jesukristo?

Si Presidente Russell M. Nelson miingon:

[A]dunay daghang butang nga atong madumala. Kita mohan-ay sa atong mga prayoridad ug motino unsaon nato paggamit sa atong kusog, panahon, ug mga kahimtang. …

Akong mga kaigsoonan, ako mohangyo kaninyo sa paggahin og panahon alang sa Ginoo! Himoang lig-on ang inyong kaugalingong espirituwal nga pundasyon ug makasugakod sa pagsulay sa taas nga panahon pinaagi sa pagbuhat niadtong mga butang nga magtugot sa Espiritu Santo nga magauban kaninyo kanunay …

Ang Ginoo nakaila kaninyo ug nahigugma kaninyo. Siya mao ang inyong Manluluwas ug ang inyong Manunubos. Siya nangulo ug naggiya sa Iyang Simbahan. Siya ang mangulo ug moggiya kaninyo sa inyong personal nga kinabuhi kon kamo moggahin og panahon alang Kaniya diha sa inyong kinabuhi—matag adlaw. (“Paggahin og Panahon alang sa Ginoo,” Liahona, Nob. 2021, 120-121)

Unsa ang epektibong paagi aron madugangan akong abilidad nga mouswag?

Si Presidente Dallin H. Oaks sa Unang Kapangulohan mipasabot:

Sagad kitang masayop sa pagtakda og dugay makab-ot nga tumong, sama sa usa ka estudyante kinsa miingon nako kaniadto nga nagtuon siya nga mahimong brain surgeon. Ingon ko, “Okay ra na. Apan dili ba unta ang imong unang tumong nga pasaron ang kurso sa biology?” Busa hinumdomi, nga mahimong layo ang inyong panglantaw. Apan hinumdomi nga ang labing epektibong mga tumong nga makapalihok ninyo padulong sa layo nga panglantaw mao ang dinug-ol nga mga tumong, mugbo og tagal nga mga tumong nga makadala ninyo paingon niana nga destinasyon. (“Face to Face with President and Sister Oaks [Strive to Be],” tibuok kalibutan nga sibya, Peb. 23, 2020, Librarya sa Ebanghelyo) (time code 8:46 hangtod 9:27)

Dugang nga mga Kalihokan sa Pagkat-on

Pag-una sa mga buluhaton ug mga asaynment

Human mailhan sa mga estudyante ang gipabaga nga kamatuoran diha sa leksiyon, makatabang tingali ang pagpalambo sa ilang pagsabot kon unsaon nato pagbuhat ang tanan kutob sa atong mahimo nga magpabiling hapsay ug balanse ang atong mga buluhaton kada adlaw. Aron mahimo kini, ikonsiderar ang pagpakita og usa ka hulagway sa usa ka juggler nga nagpatuyok og mga plato. Dapita ang mga estudyante sa pagpakigbahin kon giunsa pagkahibalo sa juggler kon sa unsang platoha siya magpunting. Pwede nimo silang pangutan-on kon posible bang padayong patuyukon ang mga plato sa parehas nga gipaspason sa samang higayon. (Dili posible.) Posibleng makatabang ang mosunod nga panaghisgot sa mga estudyante:

• Sa unsang paagi kini nga leksiyon nga gigamitan og butang mahisama sa inyong mga buluhaton sa eskwelahan kada adlaw?

• Sa unsang paagi kita matabangansa Espiritu Santo kon unsang platoha ang tutokan?

Pwede pod nimong ipasalida ang bidyo nga “‘Plates’ Object Lesson” (2:45). Gigamit ni Elder Bednar ang mga ehemplo sa mga plato aron tabangan kitang mailhan ang atong mga prayoridad.

Pag-una sa mga buluhaton ug mga asaynment

Samtang ilhon sa mga estudyante ang mga buluhaton og asaynment nga naa sila, maglisod tingali sila sa pag-ila kon unsaon pag-una kini nga mga buluhaton. Ikonsiderar ang pagdapit sa mga estudyante nga ilista ang mga paagi nga mailhan sa usa ka tawo kon hain nga mga buluhaton sa homework ang labing importante ug nagkinahanglan sa atong unang pagtagad. Magamit ang mosunod nga tsart mahimong magamit aron tabangan ang mga estudyante nga mailhan kon hain ang unahon sa mga buluhaton.

Mga Buluhaton sa Eskwelahan	Dinalian (naay deadline)	Dili Dinalian (walay deadline)
Mga Buluhaton sa Eskwelahan Importante	Dinalian (naay deadline) Mga asaynment nga kinahanglang sunod nga ipasa Dagkong mga proyekto nga naay mga deadline	Dili Dinalian (walay deadline) Personal nga mga proyekto
Mga Buluhaton sa Eskwelahan Dili parehas ka importante	Dinalian (naay deadline) Mga texts, email, tawag sa telepono, mga meeting Naka-iskedyul nga ekstrakurikular nga mga kalihokan	Dili Dinalian (walay deadline) Social media Mga video game

Unahon ang Ginoo

Samtang hisgotan sa mga estudyante ang mga paagi sa pag-una sa Langitnong Amahan ug ni Jesukristo sa ilang kinabuhi, pwede nimong ipasalida ang bidyo nga “The Soul’s Sincere Desire” (3:28). Pwede nimong hunongon kadiyot ang bidyo sa time code 2:03 ug pangutan-on ang mga estudyante kon gibati ba nila nga sama niining batan-ong babaye. Dayon pwedeng ipakigbahin sa mga estudyante kon unsay ilang himoon aron mauna ang Langitnong Amahan ug si Jesukristo.

Dayon pwede nimong humanon ang bidyo, nga dapiton ang mga estudyante nga pangitaon kon unsay gihimo niining batan-ong babaye aron mauna ang Langitnong Amahan ug si Jesukristo ug ang epekto niini sa iyang kinabuhi. Pwedeng pamalandongan sa mga estudyante kon unsay ilang pangitaon ingon nga resulta sa ilang paningkamot nga unahon ang Langitnong Amahan ug si Jesukristo.

Ang balay sa Ginoo maoy usa ka balay sa kahapsay

Human mahisgoti ang panginahanglan nga sundon ang sumbanan sa Paglalang sa kahapsay ug pag-organisar, pwede nimong ipasalida ang video nga “Wisdom and Order” (3:19). Pwedeng pamalandongan sa mga estudyante kon sa unsang paagi ang pagkat-on sa pag-organisar sa ilang buluhaton sa eskwelahan magpanalangin nila karon ug sa umaabot. Makabenepisyo usab tingali ang mga estudyante gikan sa mga kahanas sa pag-organisar sa eskwelahan nga gitudlo diha sa video nga “Time Management Tips for BYU Students” (3:30).