Magmalamposon sa Pag-eskwela: Leksiyon 193

Pagkahimong Responsable sa Imong Pagkat-on

Paglikay sa mga Pasumangil ug Paghimog Aksiyon sa Edukasyon

Dihang maglisod na kita sa pag-eskwela, usahay mangita tag mga pasumangil ug molikay sa paghimog aksiyon. Samtang atong sundon ang ehemplo sa Manluluwas ug mahimong responsable sa atong pagkat-on, modako ang atong kaalam sama Niya (tan-awa ang Lucas 2:52). Kini nga leksiyon makatabang sa mga estudyante nga mailhan ang mga aksiyon nga makatabang nila nga mahimong responsable para sa ilang pagkat-on.

Pagpangandam sa estudyante: Dapita ang mga estudyante nga hunahunaon ang ilang mga paningkamot sa pag-eskwela uban ang mosunod nga mga pangutana:

Posibleng mga Kalihokan sa Pagkat-on

Responsibilidad sa atong pagkat-on

Dapita ang mga estudyante sa paghimog senaryo bahin sa usa ka tin-edyer ug sa dili maayo nga desisyon nga ilang gihimo bahin sa ilang pag-eskwela. Pananglitan, ang tin-edyer wala magtuon para sa eksamin, ulahi nga miabot sa klase, wala niya himoa ang importanteng asaynment, o wala magpasa og essay. Pwede nimong hangyoon ang usa ka estudyante nga magdrowing diha sa pisara og istik nga porma og tawo, hatagag ngalan ang tin-edyer, ug isulat ang iyang dili maayo nga desisyon ilawom sa istik nga porma og tawo.

Dayon pwede nimong isulat ang Mga Pasumangil ibabaw sa istik nga porma og tawo. Ikonsiderar ang pagdapit sa mga estudyante nga isulat diha sa pisara ang ilang mga tubag palibot sa stick nga porma og tawo sa mosunod nga pangutana.

• Unsa ang pipila ka pasumangil nga mahimo sa usa ka tin-edyer tungod sa paghimo niini nga dili maayong desisyon?

• Sa imong hunahuna, nganong mangita tag pasumangil para sa ingon niini nga mga pagpili?

Si Presidente Russell M. Nelson ug Elder D. Todd Christofferson sa Korum sa Napulog Duha ka Apostoles mitudlo sa importanteng mga kamatuoran nga makatabang nga hinumdoman dihang matental tang mangitag pasumangil para sa dili maayong mga desisyon diha sa eskwelahan.

Makaangkon mo og edukasyon sa inyong paninguha. Walay laing makaangkon niini alang kaninyo. Bisan asa man kamo, palamboa ang dakong tinguha sa pagkat-on. Para kanato isip mga Santos sa Ulahing mga Adlaw, ang pag-angkon og edukasyon dili lang usa ka pribilehiyo, relihiyoso kini nga responsibilidad. (“Will You Choose to Increase in Learning?,” New Era, Sep. 2014, 2)

Sa temporal ug espiritwal nga mga butang, ang oportunidad nga mahimong responsable sa kaugalingon usa ka gasa sa Dios nga kon wala kini dili kita makaamgo sa atong hingpit nga potensyal isip mga anak sa Dios. (“Gawasnon sa Kahangturan, nga Molihok alang sa Ilang Kaugalingon,” Liahona, Nob. 2014, 19)

• Unsay mipatigbabaw ninyo niini nga mga pahayag?

• Nganong importante nga personal tang mahimong responsable para sa atong pagkat-on?

  Ikonsiderar ang pagtabang sa mga estudyante nga ilhon ang mosunod nga kamatuoran pinaagi sa pagsulat niini tupad sa drowing diha sa pisara: Ang personal nga pagkahimong responsable para sa atong pagkat-on motabang nato nga mailhan ang atong bug-os nga potensyal ingon nga mga anak sa Dios.

• Unsang pihong mga butang ang mahimo sa usa ka tin-edyer aron mahimong responsable para sa ilang pagkat-on?

• Sa unsang paagi ang personal nga pagkahimong responsable para sa atong pagkat-on motabang nato nga mahimong mas nahisama sa Manluluwas?

Samtang tubagon sa mga estudyante ang mga pangutana sa ibabaw, pwede nimo silang dapiton nga ipakigbahin ang mga hiyas nga gipakita ni Jesukristo samtang nahimo Siyang responsable sa Iyang pagpangalagad ug misyon (sama sa kakugi, pagpaubos, ug gugma).

Paggahin og panahon sa paghunahuna kon sa unsang paagi ang pag-ugmad og Kristohanon nga mga hiyas nga makatabang nimo aron mabuntog ang mga pasumangil ug mahimong responsable para sa imong pagkat-on. Paminawa ang mga pag-aghat gikan sa Espiritu Santo nga makatabang ninyong mailhan ang mga hiyas nga pwede ninyong ugmaron o mga aksiyon nga inyong himoon aron mahimong responsable sa inyong pag-eskwela.

Mga ehemplo sa kasulatan sa pagkahimong responsable

Aron tabangan ang mga estudyante nga makaplagan ang mga kamatuoran bahin sa pagkahimong responsable para sa ilang pagkat-on, pwede nimo silang dapiton nga kompletohon ang handout nga “Pagkahimong Responsable.” Dapita ang mga estudyante nga ikonsiderar kon sa unsang paagi nga ang mga istorya diha sa handout magamit ngadto kanila. Pwede ninyong bahinon sa gagmayng grupo ang mga estudyante ug dapiton ang pipila ka estudyante sa kada grupo nga basahon ug tubagon ang mga pangutana para sa istorya ni David samtang tun-an sa uban ang sambingay sa mga talanton.

Timan-i: Gamiton ang kataposang seksiyon sa handout sa hinapos nga bahin sa leksiyon.

Human sa igong panahon, dapita ang mga estudyante sa pagpakigbahin diha sa klase kon unsa ang ilang nakat-onan.

Pagbuntog sa mga pasumangil aron mahimong responsable para sa pagkat-on

Aron tabangan ang mga estudyante nga maandam sa pagtan-aw sa ilang kaugalingong mga kinabuhi ug buntogon ang mga pasumangil nga ilang mahimo, makatabang tingali ang paghimo sa mosunod nga kalihokan diha sa klase.

Hunahunaa ang bahin sa tin-edyer sa sinugdanan sa klase. Pamalandongi kon unsa ang inyong nakat-onan gikan sa mga kasulatan ug personal nga kasinatian bahin sa pagkahimong responsable para sa imong pagkat-on. Tabangi kini nga tin-edyer pinaagi sa pagsugyot og Kristohanon nga mga hiyas ug mga aksyon nga nagpakita sa kaandam nga mahimong responsable para sa pagkat-on nga magtubag sa mga pasumangil nga anaa sa pisara.

Sa dili pa magsugod, makatabang tingali ang paghatag og ehemplo ngadto sa mga estudyante. Ang posibleng pasumangil para sa pag-abut nga ulahi mao ang “wala ko pukawa og sayo sa akong mama.” Isugyot tingali sa mga estudyante nga, “Mahimo kong responsable sama sa Manluluwas ug mag-set ko og alarm aron maseguro nga makaabot ko sa eskwelahan sa saktong oras.” Pwede nimong isulat ang mga sugyot sa mga estuydante duol sa matag pasumangil.

• Sa unsang paagi kita tabangan sa Manluluwas aron mahimo kitang responsable para sa atong pagkat-on?

Ikonsiderar ang pagdapit sa mga estudyante nga andam sa pagpakigbahin kon unsay ilang gihimo sa ilang kinabuhi aron personal nga mahimong responsable para sa ilang pagkat-on. Samtang ipakigbahin kini sa mga estudyante, pahalipayi sila sa ilang mga paningkamot.

Responsibilidad para sa akong pagkat-on

Dapita ang mga estudyante nga kompletohon ang kataposang seksiyon sa handout. Pwede nimong ipakigbahin ang mosunod ngadto nila samtang ilang tinguhaon ang tabang sa Ginoo aron mahimong responsable sa ilang pagkat-on.

Samtang imong tinguhaon ang pagpadayag gikan sa Langitnong Amahan kon unsaon aron mouswag, pwede kang aghaton sa Espiritu Santo kon unsa ang kinahanglang bag-ohon. Pwede usab natong hinumdoman nga dili nato kinahanglang himoon ang tanan nga kitakita ra; pwede tang mangayog tabang sa Manluluwas (tan-awa ang Isaias 41:10).

Ikonsiderar ang pagdapit sa mga estudyante nga andam ipakigbahion sa ilang gibati nga giaghat sila sa paghimo. Pwede kang mopakigbahin og ehemplo gikan sa imong kinabuhi sa pagkahimong responsable para sa imong pagkat-on. Awhaga ang mga estudyante nga dad-on sa balay ang handout aron matabangan sila nga mahinumdoman kon unsay nadasig silang himoon karon.

Dugang nga mga Kapanguhaan

Nganong imporntante nga personal nga mahimong responsable?

Si Elder David A. Bednar sa Korum sa Napulog Duha ka Apostoles mitudlo:

Ang atong personal nga responsibilidad mao ang pagkat-on sa angay natong makat-onan, pagpuyo sa tukmang paagi nga atong nahibaloan, ug mamahimo kitang matang sa tawo kinsa gusto sa atong Agalon. (“Andam nga Makaangkon sa Matag Gikinahanglan nga Butang,” Liahona, Mayo 2019, 102)

Si Presidente James E. Faust (1920–2007) sa Unang Kapangulohan mitudlo:

Sa atong panahon karon, daghan kong makita nga mga tawo nga basolon ang uban sa ilang kapakyasan. Nabantayan nako nga mas malamposon kadtong mobating responsable sa ilang mga gibuhat kay niadtong magsigeg basol sa uban tungod sa ilang kakulangan ug kawalay kalamposan. (“Your Light—a Standard to All Nations,” Liahona, Mayo 2006, 112–113)

Si Elder Lynn G. Robbins sa Seventy mitudlo:

Ang pagkahimong 100 porsyento nga responsable nagpasabot nga pagdawat sa imong kaugalingon nga mao ang nagkontrol sa imong kinabuhi. Kon ang uban ang saypan ug kinahanglang magbag-o sa dili pa mohimog mga pag-uswag, sila nay bahala kon maluoy sila nimo ug kontrolado nila ang positibong mga resulta sa imong kinabuhi. Magkauban gayod ang kabubut-on ug responsibilidad. Dili nimo malikayan ang responsibilidad nga dili makuhaan ang imong kabubut-on. (“Be 100 Percent Responsible” [debosyonal sa Brigham Young University, Ago. 22, 2017], 11, speeches.byu.edu)

Dugang nga mga Kalihokan sa Pagkat-on

Saul ug Nehemias

Usa ka paagi nga matabangan ang mga estudyante nga makakat-on gikan sa mga kasulatan mao ang pagtandi sa duha ka istorya sa kasulatan. Ang mosunod nga kalihokan magamit diha sa leksiyon sa dili pa tun-an sa mga estudyante ang mga kasulatan diha sa handout. Pwede nimong parespareson ang mga estudyante ug iasayn sa kada usa ka pares sa mosunod nga mga pakisayran sa kasulatan:

1 Samuel 15:1–3, 9, 13–14, 20–21

Nehemias 6:1–4, 15–16

Dapita ang mga estudyante nga tun-an ang ilang mga bersikulo nga pangitaon kon sa unsang paagi ang indibidwal mahimong personal nga responsable (Nehemias) o naghimo og pasumangil para sa iyang mga gibuhat (Saul). Usa ka paagi nga maorganisar sa mga estudyante ang ilang hunahuna mao ang paggamit sa mosunod nga handout:

Pwede butangan og label sa mga estudyante sa wala nga lingin Saul ug ang sa tuo nga lingin Nehemias. Pwede nilang ilista ang kalainan diha sa indibidwal nga mga lingin ug ilista ang parehas diin nag-abot ang lingin.

Responsibilidad para sa akong pagkat-on

Aron tabangan ang mga estudyante nga makapamalandong sa mga aksiyon ug kinaiya nga makatabaang nila nga mahimong responsable para sa ilang kaugalingong pagkat-on, pwede nimong ihatag ang pipila o tanan sa mosunod nga tsart:

Pasumangil	Pagkahimong Responsable
Wala ko nagpasa og asaynment kay wala nako kini masabti kong unsaon.	Gihimo nako ang kutob sa akong mahimo. Mangayo ko og tabang sa mga butang nga wala nako masabti.
Wala ko nagtuon sa akong eksamin kay nakig-uban ko sa akong mga higala.	Ako mopili nga magtuon una sa dili pa makig-uban sa akong mga higala.
Wala ko pukawa sa akong mama, ug naulahi ko sa klase.	Mag-set kog alarm aron makamata ko aron makaabot sa eskwelahan sa saktong oras.

Pwede nimong dapiton ang mga estudyante nga magdugang og dugang senaryo diha sa tsart ug hisgotan kon unsaon pagtul-id niini nga mga pasumangil pinaagi sa pagkahimong responsable. Sa ilang journal sa pagtuon, pwedeng kompletohon sa mga estudyante ang mosunod nga mga pag-aghat [prompts] aron tabangan silang maghimo og plano aron mahimong mas responsable.

Ang pasumangil nga akong gigamit aron makalikay sa responsibilidad sa akong pag-eskwela mao ang .

Ang mas responsableng butang nga akong sulayan mao ang .

100 porsyento nga responsable

Sa dili pa maghunahuna og haom nga mga senaryo sa edukasyon ang mga estudyante ug posibleng mga pasumangil o aksiyon nga himoon tingali sa mga tin-edyer, pwede nimong ipasalida ang “Inspiring Short: 100 Percent Responsible” (3:22). Niini nga bidyo, gipakigbahin ni Elder Lynn G. Robbins sa Seventy ang istorya sa duha ka trabahante sa warehouse nga mibuntog sa ilang mga pasumangil ug nahimong responsable sa ilang trabaho. Human matan-aw ang bidyo, mahimong mailhan sa mga estudyante ang mga sitwasyon sa edukasyon diin mas sayon tingaling mangitag pasumangil. Dayon, pwede nilang ilhon ang mga aksiyon nga makabuntog sa maong mga pasumangil.