Ndërtimi i Mbështetjes te Vetja: Mësimi 178

Ushtrimi i Besimit te Jezu Krishti për të Ndërtuar Mbështetjen te Vetja

Zoti Mund të na Ndihmojë në Përpjekjet Tona për t’u Bërë të Mbështetur te Vetja

Ndërsa ushtrojmë besimin te Jezu Krishti, ne e ftojmë Atë të na ndihmojë në të gjitha aspektet e jetës sonë. Përveç se na bekon me forcë shpirtërore dhe shërim nga mëkati, Shpëtimtari mund të na ndihmojë të ndërtojmë mbështetje te vetja për nevojat tona materiale. Kjo mund të përfshijë financat, arsimimin, punësimin dhe shëndetin tonë fizik dhe emocional. Ky mësim mund t’i ndihmojë nxënësit të ushtrojnë besimin e tyre se Ati Qiellor dhe Jezu Krishti do t’i bekojnë ata në përpjekjet e tyre për të ndërtuar mbështetjen te vetja.

Përgatitja e nxënësve: Merreni parasysh t’i ftoni nxënësit të shkruajnë pengesat që e bëjnë të vështirë të mbështetesh te vetja në një ose më shumë nga fushat vijuese:

Veprimtari të Mundshme të të Mësuarit

Nevojat e Paulës

Shënim: Mund të jetë e dobishme të jepni Mësimin 177: “Ndërtimi i Mbështetjes te Vetja Sipas Mënyrës së Zotit” para se të jepni këtë mësim. Mësimi 177 iu paraqet nxënësve parimet e mbështetjes te vetja dhe arsyen përse është e rëndësishme në planin e Atit Qiellor.

Merreni parasysh ta filloni orën mësimore duke i ndihmuar nxënësit të diskutojnë se si sigurimi i të ardhurave për nevojat tona kërkon edhe përpjekjet tona, edhe udhërrëfimin e Perëndisë. Skenari dhe veprimtaria vijuese është një mënyrë për ta ndihmuar këtë diskutim. Mund të jetë e dobishme të vini në dukje se të dyja qasjet që ka Paula në këtë skenar, janë problematike.

Mund të filloni duke lexuar pjesën e parë të situatës vijuese. Më pas, jepni dy përgjigjet e mundshme. Ndaloni pas çdo përgjigjeje dhe ftojini nxënësit t’i tregojnë një partneri çfarë këshille do t’i jepnin Paulës.

Paula pret me padurim të diplomohet nga shkolla e mesme pas dy vitesh. Megjithatë, ajo ndihet në ankth rreth faktit se sa para do të jetë e nevojshme të kursejë për të ardhmen.

Çfarë këshille do të jepje nëse:

1. Paula vendos të lutet çdo ditë që Perëndia të sigurojë paratë që do t’i nevojiten pas diplomimit. Ajo nuk ka plane të kërkojë punë, duke mirëbesuar se Perëndia do të sigurojë për të.

2. Paula mendon se, meqë paraja nuk është një “çështje shpirtërore”, Perëndia nuk do të kishte interes për të. Ajo vendos të kërkojë çdo ditë punë që i përshtatet orarit të saj të shkollës. Ajo bën plane për të folur me pronarë sipërmarrjesh, për të dorëzuar jetëshkrime dhe për të mësuar zotësi të reja që do ta bëjnë atë më të vyer për dyqanet në zonën e saj.

Pasi nxënësit t’i kenë treguar këshillat që mund t’i jepnin Paulës, ftojini ata të tregojnë se si thënia vijuese mund të gjejë zbatim në situatën e saj.

Peshkopi W. Kristofer Uadell, Këshilltar i Parë në Peshkopatën Kryesuese, shpjegoi:

“Çdo gjë, pra, na drejton për te Jezu Krishti si themeli mbi të cilin ne duhet të ndërtojmë, madje gatishmërinë tonë materiale.

Të jemi të përgatitur dhe të mbështetur te vetja materialisht do të thotë ‘të beso[jmë] se nëpërmjet hirit, apo fuqisë aftësuese, të Jezu Krishtit dhe vetë përpjekjes sonë, ne jemi në gjendje të plotësojmë të gjitha nevojat shpirtërore e materiale të jetës që kërkojmë për veten tonë dhe familjet tona’ [Financat Vetjake për Mbështetjen te Vetja (2017), f. 4].” (“Kishte Bukë”, Liahona, tetor 2020, f. 44)

Ndërsa nxënësit japin pikëpamjet e tyre nga thënia e Peshkopit Uadell, vini në dukje se nëpërmjet ushtrimit të besimit te Jezu Krishti dhe përpjekjeve tona, ne zhvillojmë mbështetje shpirtërore dhe materiale te vetja.

Merreni parasysh të paraqitni vetëvlerësimin vijues, duke përfshirë udhëzimet dhe kategoritë, për t’i ndihmuar nxënësit të reflektojnë për nevojën e tyre për ndihmën e Shpëtimtarit për t’u bërë më të mbështetur te vetja.

Shkruaji kategoritë vijuese në rendin nga më pak e vështira tek më e vështira për ty për të ndërtuar mbështetje te vetja. Pranë një ose dy kategorive më të vështira për ty, shkruaj çdo pengesë që të nevojitet ndihma e Shpëtimtarit për ta kapërcyer.

• Njohuria për ungjillin

• Nevojat e tanishme dhe të ardhshme financiare

• Arsimimi dhe punësimi

• Nevojat fizike

• Nevojat emocionale dhe shoqërore

Ndërsa vazhdon të studiosh sot, ki parasysh fushat në të cilat të nevojitet më shumë ndihmë. Ftoje Frymën e Shenjtë të forcojë besimin tënd se Ati Qiellor dhe Jezu Krishti do të të ndihmojnë në përpjekjet e tua për të ndërtuar mbështetje te vetja.

Ushtrimi i besimit te Zoti për të ndërtuar mbështetje te vetja

Në këtë mësim, nxënësit do të lexojnë nga rrëfimi i Jozefit në Egjipt te Zanafilla. Para se ta studioni rrëfimin, mund të shfaqni materialin filmik “I Will Provide for My Saints” [“Unë do të Siguroj për Shenjtorët e Mi”] (3:08) nga kodi kohor 0:00 deri në 1:52 dhe t’i vini nxënësit të kërkojnë prova të fuqisë dhe dëshirës së Zotit për të na ndihmuar ndërsa ushtrojmë besimin tek Ai për të ndërtuar mbështetje te vetja. Bërja e kësaj mund t’i ndihmojë nxënësit të mendojnë rreth dëshirës së Zotit për ta ndihmuar Jozefin dhe fuqisë për ta bekuar atë në rrethanat e tij të vështira.

Për t’i ndihmuar nxënësit të studiojnë rrëfimin e Jozefit, mund të jepni fletushkën shoqëruese. Nëse doni, mund t’i caktoni secilit grup një pjesë të ndryshme dhe t’i vini ata të përgatiten për t’iu përgjigjur dy pyetjeve në fletushkë.

Ftojini nxënësit ta tregojnë atë që gjetën. Ju gjithashtu mund të eksploroni pyetjet vijuese si pjesë e këtij diskutimi.

• Si mendon se mund të kishte përfunduar ky tregim nëse Jozefi nuk do të kishte besim te Perëndia? Nëse Jozefi nuk do të ishte i gatshëm të përpiqej?

• Si mendon se mund të zbatohet ky rrëfim në jetën e një adoleshenti?

Ju gjithashtu mund t’i ftoni nxënësit t’i tregojnë klasës përvojat kur familja e tyre mori atë që i nevojitej nëpërmjet ndihmës së Perëndisë dhe përpjekjeve të familjes së tyre. Mund të tregoni edhe një përvojë vetjake.

Zbatimi në planin vetjak

Merreni parasysh t’i paraqitni sërish kategoritë e mbështetjes te vetja mbi të cilat nxënësit reflektuan në pjesën e parë të mësimit dhe t’i ftoni nxënësit të bëjnë sa vijon.

Shpenzo ca kohë për të shënuar plot lutje sa vijon ndërsa mendon rreth kategorive të mbështetjes te vetja që i përcaktove si më të vështira për ty më herët në mësim:

1. Ajo që mësove që e forcon besimin tënd se Ati Qiellor dhe Jezu Krishti do të të ndihmojnë për pengesat ndaj mbështetjes te vetja në jetën tënde.

2. Mënyra se si mund ta ushtrosh besimin tënd tek Ati Qiellor dhe Jezu Krishti nëpërmjet përpjekjeve të tua për të ndërtuar mbështetje te vetja.

Merreni parasysh të ftoni vullnetarë të tregojnë pjesë të asaj që shkruan në ditarët e tyre.

Burime Shtesë

A do të na ndihmojë Zoti të bëhemi të mbështetur te vetja?

Presidenca e Parë deklaroi:

“Zoti ka shpallur: ‘Është qëllimi im për të siguruar për shenjtorët e mi’ (DeB 104:15). Kjo zbulesë është një premtim nga Zoti se Ai do të sigurojë bekime materiale dhe do ta hapë derën e mbështetjes te vetja, e cila është aftësia jonë që t’i sigurojmë nevojat e jetës për veten dhe pjesëtarët e familjes sonë. …

Ne ju ftojmë që t’i studioni me zell dhe t’i zbatoni [parimet e besimit, arsimimit, punës së palodhur dhe mirëbesimit te Zoti] dhe t’ua jepni mësim pjesëtarëve të familjes suaj. Ndërsa bëni kështu, jeta juaj do të bekohet. Ju do të mësoni se si të veproni në shtegun tuaj drejt mbështetjes më të madhe te vetja. Ju do të bekoheni me shpresë, paqe dhe përparim më të madh.

Ju lutemi, jini i sigurt se ju jeni një fëmijë i Atit tonë në Qiell. Ai ju do dhe nuk do t’ju braktisë asnjëherë. Ai ju njeh dhe është gati t’ju zgjatë bekimet shpirtërore dhe materiale të mbështetjes te vetja.” (“Mesazh nga Presidenca e Parë”, Financat Vetjake për Mbështetjen te Vetja [2017])

Peshkopi H. Dejvid Barton, ish‑Peshkop Kryesues, dha mësim:

“Pasi të kemi bërë gjithçka për të qenë të mbështetur te vetja, për të siguruar për nevojat tona dhe ato të familjes sonë, ne mund të drejtohemi te Zoti me besim në vetvete për të kërkuar atë që ende mund të na mungojë”. (“The Blessing of Work”, Liahona, dhjetor 2009, f. 43)

Po nëse përpiqemi dhe dështojmë në përpjekjet tona për t’u bërë të mbështetur te vetja?

Presidenti Xhefri R. Holland, i Kuorumit të Dymbëdhjetë Apostujve, shpjegoi sa vijon rreth karakterit të Krishtit:

“Ju lutem, mbajeni mend se nesër, dhe të gjitha ditët pas saj, Zoti i bekon ata që dëshirojnë të përmirësohen, që e pranojnë nevojën për urdhërime dhe përpiqen t’i zbatojnë ato, që i vlerësojnë virtytet e ngjashme me ato të Krishtit dhe përpiqen fort me gjithçka munden, që t’i fitojnë ato. Nëse ju pengoheni në atë përpjekje, po ashtu pengohet gjithkush; Shpëtimtari është atje që t’ju ndihmojë të vazhdoni. Nëse bini, bëjini thirrje forcës së Tij. … Shumë shpejt do ta keni suksesin që kërkoni.” (“Nesër Zoti Ka për të Bërë Mrekulli midis Jush”, Liahona, maj 2016, f. 126)

Çfarë mund të mësojmë nga shembulli i Jozefit të Egjiptit për ndërtimin e mbështetjes te vetja?

Peshkopi W. Kristofer Uadell, i Peshkopatës Kryesuese, tha:

“Kur marrim parasysh parimin e gatishmërisë, ne mund ta hedhim vështrimin prapa te Jozefi në Egjipt për frymëzim. Dijenia se çfarë do të ndodhte nuk do të kishte qenë e mjaftueshme për të duruar gjatë viteve të ‘dobëta’ [të thatësirës] pa njëfarë shkalle sakrifice gjatë viteve të bollëkut. Në vend që të konsumonin gjithçka që mund të prodhonin nënshtetasit e Faraonit, u vendosën dhe u zbatuan kufizime, duke siguruar mjaftueshëm për nevojat e tyre të menjëhershme, si edhe për nevojat e tyre të ardhshme. Nuk mjaftonte vetëm të dinin se kohë sfiduese do të vinin. Ata duhej të vepronin dhe për shkak të përpjekjes së tyre, ‘kishte bukë’.” (“Kishte Bukë”, Liahona, nëntor 2020, f. 44)

Veprimtari Plotësuese të të Mësuarit

Studimi i shkrimeve të shenjta

Mund t’i ftoni nxënësit të shohin nëpër listën e fragmenteve të zotërimit doktrinor nga të katra vitet duke kërkuar për shkrime të shenjta që:

1. Mund të rritin besimin e dikujt se Perëndia është i gatshëm të na ndihmojë.

2. Mund të na ndihmojnë të kuptojmë se Perëndia pret nga ne të bëjmë pjesën tonë për të gjetur përgjigje dhe zgjidhje.

Disa shembuj të fragmenteve të zotërimit doktrinor që nxënësit mund të japin, përfshijnë:

Fjalët e Urta 3:5–6

Mateu 11:28–30

Jakob [Bibël] 2:17–18

Mosia 2:41

Ethëri 12:27

Doktrina e Besëlidhje 88:118

Jepuni nxënësve një mundësi për ta treguar atë që gjetën. Ndërsa shprehen, mund t’i ndiqni duke i kërkuar klasës të mendojë për situata reale në të cilat kuptueshmëria për atë fragment të shkrimit të shenjtë mund ta ndihmojë dikë të punojë për të arritur mbështetje më të madhe te vetja.

Rritja e besimit tuaj

Drejt fundit të pjesës së parë të mësimit, pasi t’i ftoni nxënësit të reflektojnë mbi fushat ku ata kanë nevojë për ndihmë nga Perëndia për t’u bërë më të mbështetur te vetja, mund të jepni thënien vijuese nga Presidenti Rasëll M. Nelson. Ftojini nxënësit të kërkojnë një zgjidhje të përbashkët për çfarëdo problemesh me të cilat mund të përballen.

“Vëllezërit dhe motrat e mia të dashura, kërkesa ime për ju … është të filloni sot që ta rritni besimin tuaj. Nëpërmjet besimit tuaj, Jezu Krishti do ta rritë aftësinë tuaj për të zhvendosur male në jetën tuaj ndonëse sfidat tuaja vetjake mund të përvijohen po aq të larta sa mali i Everestit. …

… Malet tuaja do të ndryshojnë dhe prapëseprapë përgjigjja për secilën prej sfidave tuaja është të shtoni besimin tuaj.” (“Krishti u Ringjall; Besimi tek Ai do të Zhvendosë Malet”, Liahona, maj 2021, f. 102)

Mund t’i ndani nxënësit në pesë grupe, ku çdo grup të përqendrohet te një nga fushat vijuese të mbështetjes te vetja:

• Ndërtimi i forcës shpirtërore dhe i një dëshmie për Krishtin

• Marrja e një arsimimi

• Fitimi i parave

• Të qenit të shëndetshëm fizikisht

• Të qenit të ripërtërirë emocionalisht

Kërkojuni grupeve të mbledhin ide dhe t’i raportojnë klasës se si rritja e besimit te Krishti mund ta ndihmojë dikë që ka vështirësi në atë fushë.

Shembujt nga shkrimet e shenjta mund ta forcojnë besimin tonë te Krishti

Ndonjëherë një situatë sfiduese mund të duket më e kontrollueshme kur kujtojmë atë që Perëndia ka bërë për të tjerët. Nëse mendoni se do t’i ndihmojë nxënësit të studiojnë shembuj krahas rrëfimit të Jozefit, disa shembuj të tjerë mund të përfshijnë tregimin e Davidit (1 Samuelit 17:40–50) dhe jareditëve (Ethëri 2:16–17, 22–23; 3:1–6).

Një mënyrë ndryshe për ta përfunduar mësimin është t’i ftoni nxënësit të plotësojnë nxitjet vijuese:

Duke e ditur që Perëndia e ndihmoi (dikë nga shkrimet e shenjta) për (çfarë bëri Perëndia për të) më jep vetëbesim se Perëndia mund të më ndihmojë edhe mua të gjej një mënyrë për të kapërcyer (një pengesë ndaj mbështetjes te vetja që nuk mund ta kapërcej vetë).

(Për shembull: Duke e ditur që Perëndia e ndihmoi Davidin për betejën e tij kundër Goliathit më jep vetëbesim se Perëndia mund të më ndihmojë edhe mua të gjej një mënyrë për të kapërcyer vështirësitë e mia për të kuptuar atë që jepet mësim në shkollë.)