Doktrinal nga Kahanas: Pagpangitag mga Tubag sa Akong mga Pangutana: Leksiyon 165

Pagdangop sa Balaanong Gitudlo nga mga Tinubdan nga Motabang sa Pagpangita og mga Tubag

Ang mga Balaanong Gitudlo nga mga Tinubdan sa Ginoo

Kay nagpuyo kita sa panahon diin daghan ang “nagtawag sa daotan nga maayo ug sa maayo nga daotan” (Isaias 5:20), posibleng lisod ang mailhan ang kamatuoran. Pero, gitagana sa Langitnong Amahan ug ni Jesukristo ang gikinahanglang tabang. Kini nga leksiyon makatabang sa mga estudyante nga tinguhaon ang kamatuoran gikan sa mga tinubdan nga mahigugmaong gitagana sa Langitnong Amahan ug ni Jesukristo.

Pagpangandam sa estudyante: Dapita ang mga estudyante nga ikonsiderar kon asa nga mga tinubdan sila makadangop dihang aduna silay pangutana bahin sa mosunod: asaynment, gikainteresan o gikalingawan, makasaysayanong mga hitabo, ang ebanghelyo ug Simbahan sa Manluluwas. Dapita sila nga pamalandongan kon nganong midangop sila sa mga tinubdan nga ilang nailhan.

Posibleng mga Kalihokan sa Pagkat-on

Unsay tinuod?

Ikonsiderar ang pagsugod sa klase pinaagi sa pagpakitay og usa ka butang o hulagway nga peke. Pananglitan, pwede nimong ipakita ang hulagway sa siklista ug sa oso nga naa sa leksiyon. Hangyoa ang mga estudyante sa pagpakigbahin kon motuo ba sila nga tinuod ang hulagway. Dayon ipakita ang husto nga hulagway nga nagpakita lamang sa siklista.

• Kanus-a ka nakakita o nakabasa og usa ka butang nga imong gidudahan kon tinuod ba?

• Unsa ang nakalisod sa pag-ila sa kamatuoran sa atong panahon?

Pinaagi ni propetang Isaias, mipasidaan ang Ginoo sa usa ka problema nga atong atubangon sa atong adlaw nga makapalisod sa pag-ila sa kamatuoran. Basaha ang Isaias 5:20, nga pangitaon kon unsay gitudlo sa Ginoo.

• Kanus-a ka nakakita og daotang butang nga gitawag og “maayo” o maayong butang nga gitawag og “daotan”?

Aron idugang sa panaghisgot, ikonsiderar ang pagpasalida sa “Pagpangita sa Kamatuoran“ (3:03), nga anaa sa ChurchofJesusChrist.org, gikan sa time code 0:00 hangtod 1:27. O pwede nimong dapiton ang mga estudyante nga basahon ang pahayag sa ubos, nga adunay susamang mga pagtulun-an. Dapita ang mga estudyante sa pagpangita og dugang mga rason kon nganong lisod mailhan ang kamatuoran.

Aron matabangan kita nga masabtan kon nganong kinahanglang magbantay sa pag-ila sa kamatuoran ug sayop, si Presidente Dallin H. Oaks sa Unang Kapangulohan mipasabot:

Nagpuyo kita sa panahon sa gipalapad ug gisabwag og maayo nga impormasyon. Apan dili tanan niini nga impormasyon tinuod. Kinahanglang magmatngon kita samtang mangita kita sa kamatuoran ug magpili og mga tinubdan niana nga pagsiksik. Dili gayod nato hunahunaon ang sekyular nga kabantog o awtoridad isip haom nga mga tinubdan sa kamatuoran. Kinahanglang magmatngon kita mahitungod sa pagsalig sa impormasyon o tambag nga gitanyag sa mga tigpasiugdang mga artista, iladong mga atleta, o wala hiilhing mga tinubdan gikan sa internet. Ang kabatid sa usa ka butang dili gayod isipon nga kabatid sa kamatuoran sa ubang mga aspeto. (“Kamatuoran ug ang Plano,” Liahona, Nob. 2018, 25)

Pangutan-a ang inyong kaugalingon sa mosunod:

• Unsa ka kamasaligon sa imong katakos sa pag-ila sa kamatuoran?

• Kinsay imong masaligan nga mohatag nimog tukmang mga tubag sa mga pangutana bahin sa ebanghelyo ug sa Simbahan?

Gimahal kita sa Langitnong Amahan ug ni Jesukristo ug gusto nga motabang kanato nga mailhan kon unsay tinuod ug kon unsay dili. Sa tibuok leksiyon karong adlawa, bantayi ang mga hunghong sa Espiritu aron tabangan kang mailhan kon unsay Ilang gitagana para nato.

Balaanong gitudlo nga mga tinubdan

Basaha ang parapo 11 ug 12 sa seksiyon nga “Pag-angkon og Espirituhanong Kahibalo“ diha sa Mahinungdanon nga Dokumento sa Doktrinal nga Kahanas (2023) ug markahi ang mga pagtulun-an nga para nimo importanteng mahibaloan dihang mangitag mga tubag sa imong mga pangutana.

Pwede nimong dapiton ang mga estudyante nga ipakigbahin sa usa ka kapares ang ilang nakaplagan ug kon nganong para nila importante kini.

Dapita ang mga estudyante nga i-summarize ang ilang nakat-onan ngadto sa klase. Ipakigbahin tingali nila ang mga kamatuoran nga sama sa:

• Gihatagan kita sa Ginoo og balaanong gitudlo nga mga tinubdan aron tabangan kitang makaplagan ang mga tubag ug direksiyon.

• Tabangan kita sa Ginoo nga mailhan ang kamatuoran gikan sa sayop samtang modangop kita sa Iyang balaanong gitudlo nga mga tinubdan, lakip ang pagpangita og giya gikan sa Espiritu Santo.

• Sa imong hunahuna, nganong importanteng mosalig sa balaanong gitudlo nga mga tinubdan sa Ginoo samtang tinguhaon ang mga tubag sa atong mga pangutana?

Ilha ang kamatuoran ug ang sayop

Aron hatagan og ehemplo ang mga estudyante kon sa unsang paagi kita tabangan sa Ginoo sa pag-ila sa kamatuoran gikan sa sayop, pwede nimong tun-an ang asoy sa kasulatan diin gikompronta ni Satanas si Moises diha sa Moises 1. Ikonsiderar ang pagpakita sa hulagway nga gikompronta ni Satanas si Moises diha sa leksiyon. Pangutan-a ang mga estudyante kon unsay ilang nahibaloan o nahinumdoman bahin niini nga asoy.

Human sa personal nga panag-istorya ni Moises sa Dios, miabot si Satanas ug misulay sa pag-ilad ni Moises nga simbahon siya (tan-awa ang Moises 1:12).

Ikonsiderar ang pagparespares sa mga estudyante. Pwede nga indibidwal nga tun-an sa mga estudyante ang mga bersikulo sa ubos ug dayon ipakigbahin sa usag usa ang ilang mga tubag sa mosunod nga mga pangutana:

Basaha ang Moises 1:13–16, nga pangitaon kon giunsa pag-ila ni Moises si Satanas ug ang Dios.

• Unsay imong nakaplagan?

• Sa unsang paagi nato magamit ang kasinatian ni Moises ngadto sa atong kinabuhi samtang atong pilion ang mga tinubdan aron makaplagan ang kamatuoran ug mga tubag sa atong mga pangutana?

  Motubag tingali ang mga estudyante og sama sa: mailhan nato ang kamatuoran pinaagi sa pagpamalandong sa atong mga kasinatian uban sa Dios; makasalig kita sa Dios ingon nga labing labaw nga tinubdan sa kamatuoran; o tabangan kita sa Dios nga mailhan ang kahayag ug kangitngit.

  Pwede nimong ipasalida ang nahibiling bahin sa bidyo nga “Pagpangita sa Kamatuoran,” gikan sa time code 1:27 hangtod 3:03. Pwedeng pangitaon ug ipakigbahin sa mga estudyante kon unsang tinubdan ang gigamit sa mga tawo diha sa bidyo aron makaplagan ang kamatuoran.

  Kon makatabang, ikonsiderar ang pagpakita sa mosunod nga pangutana ug pagdapit sa mga estudyante nga isulat ang ilang mga tubag diha sa gagmayng piraso sa papel. Pwedeng pil-on sa mga estudyante ang ilang mga papel ug ibutang kini sa sudlanan. Dayon, pwedeng kuhaon ug basahon sa mga estudyante ang pipila ka tubag nga gisulat sa ubang estudyante.

• Unsay imong gipasalamatan nga nahibaloan nga dili unta nimo mahibaloan kon wala pa ang balaanong gitudlo nga mga tinubdan nga gitagana sa Langitnong Amahan sa atong panahon? Ngano man?

Pagpraktis

Ang mosunod nga kalihokan gidisenyo aron tabangan ang mga estudyante nga makapraktis sa pagdangop sa balaanong gitudlo nga mga tinubdan aron pangitaon ang tubag sa ilang mga pangutana.

Paresparesa ang mga estudyante o bahina sila sa gagmayng grupo ug ipakita ang mosunod nga pahayag. Pwede nimong ipahiangay kini nga mga pahayag sa mga panginahanglan sa imong mga estudyante.

Pagpili og usa sa mga sayop nga pahayag, o pagpili og kaugalingon nimong sayop nga pahayag:

• Sayop: Walay labot ang Dios sa atong paagi sa pagkinabuhi basta dili lang nato pasakitan ang uban.

• Sayop: Mao ra gyod kini ang kinabuhi. Wala kita mabuhi sa wala pa matawo, ug dili na kita mabuhi human kita mamatay.

• Sayop: Wala gyod nato kinahanglana ang Basahon ni Mormon kay naa na man nato ang Biblia.

Gamit ang balaanong gitudlo nga mga tinubdan, pangitaa ang tinuod nga mga pahayag nga motul-id sa sayop nga mga pahayag nga imong gipili. Isulat ang imong nakaplagan diha sa imong journal sa pagtuon.

Ang mosunod maoy mga ehemplo sa balaanong gitudlo nga mga tinubdan nga ikonsiderar tingali nimo nga gamiton:

• Mga tudling sa doktrinal nga kahanas, Giya ngadto sa mga Kasulatan, o indeks sa kasulatan

• Mga Hilisgotan ug mga Pangutana sa ChurchofJesusChrist.org

• Mga pakigpulong sa kinatibuk-ang komperensiya

• Librarya sa Ebangheyo

• Imong mga ginikanan o usa ka lider sa Simbahan

  Kon nagkinahanglag tabang ang mga estudyante, ikonsiderar ang pagpakigbahin sa mosunod nga mga tinubdan ingon nga mga ehemplo:

  • Walay labot ang Dios sa atong paagi sa pagkinabuhi basta dili lang nato pasakitan ang uban. (Exodo 20:3–17; “Mga Sugo” diha sa Mga Hilisgotan ug mga Pangutana)

  • Mao ra gyod ni ang kinabuhi. Wala kita mabuhi sa wala pa matawo, ug dili na kita mabuhi human kita mamatay. (Abraham 3:22–23; Jeremias 1:4–5; Job 19:25–26; “Plano sa Kaluwasan” sa Mga Hilisgotan ug mga Pangutana)

  • Wala gyod nato kinahanglana ang Basahon ni Mormon kay naa na man nato ang Biblia. (Ezequiel 37:15–17; 2 Nephi 29:6–10; “Basahon ni Mormon” diha sa Mga Hilisgotan ug mga Pangutana)

  Human ang igong panahon, dapita ang mga estudyante nga isulat diha sa pisara ang tinuod nga mga pahayag para sa matag usa niining sayop nga mga pamahayag.

  Dapita ang mga estudyante nga ipakigbahin kon sa unsa nga tinubdan sila midangop ug kon unsay ilang nakaplagan gikan sa maong mga tinubdan. Pwede usab nga ipakigbahin sa mga estudyante kon unsay ilang gihimo aron makaplagan ang ilang mga tubag.

  Sa pagtapos sa klase, ikonsiderar ang pagpangutana sa mosunod. Pwede usab nimong ipakigbahin ang imong kasinatian o pamatuod sa balaanong gitudlo nga mga tinubdan sa Langitnong Amahan ug ni Jesukristo.

• Unsay imong nakat-onan karon bahin sa balaanong gitudlo nga mga tinubdan nga mahigugmaong gihatag kanato sa Langitnong Amahan ug ni Jesukristo?

Dugang nga mga Kapanguhaan

Asa nako makaplagan ang kamatuoran?

Si Presidente Russell M. Nelson mipamatuod:

Ang Dios mao ang tinubdan sa tanang kamatuoran. Ang Simbahan ni Jesukristo sa mga Santos sa Ulahing mga Adlaw mihangop sa tanang kamatuoran nga gipasabot sa Dios ngadto sa Iyang mga anak, nakat-onan man sa siyantipiko nga laboratoryo o nadawat pinaagi sa direkta nga pagpadayag gikan Kaniya. (“Unsa ang Tinuod?“ Liahona, Nob. 2022, 30)

Unsay makatabang nako nga mailhan ang tinuod nga mga tinubdan?

Si Presidente Dieter F. Uchtdorf, kanhi sakop sa Unang Kapangulohan, mipasabot:

Sa pagkatinuod, naa kay gamhanang kauban ug kasaligang giya sa padayong pagpangita sa kamatuoran. Kinsa man ni? Kini mao ang Espiritu Santo. Nahibalo ang atong Langitnong Amahan kon unsa ka lisod ang pagsala sa tanang kabanha ug pag-ila sa kamatuoran panahon sa atong mortalidad. Nahibalo Siya nga usa ka bahin lang sa kamatuoran ang atong makita, ug nahibalo Siya nga sulayan kita og limbong ni Satanas. Busa gihatag Niya ang langitnong gasa sa Espiritu Santo nga modan-ag sa atong hunahuna, motudlo nato, ug mopamatuod nato sa kamatuoran. (“What Is Truth?“ [worldwide devotional for young adults, Ene. 13, 2013], Librarya sa Ebanghelyo)

Ang Kinatibuk-ang Tamdanan nga Basahon sa Ang Simbahan ni Jesukristo sa mga Santos sa Ulahing mga Adlaw miingon sa mosunod:

Sa kalibotan karon, ang impormasyon sayon makuha ug mapaambit. Mahimo kining dako nga panalangin alang niadtong nagtinguha nga maedukar ug mahibalo. Hinoon, daghang mga tinubdan sa impormasyon dili kasaligan ug dili makaayo. Ang ubang mga tinubdan nagtinguha sa pagpasiugda og kasuko, panagbingkil, kahadlok,o dili tinuod nga mga teyoriya sa pagkunsabo (tan-awa sa 3 Nephi 11:30; Mosiah 2:32). Busa, importante nga ang mga miyembro sa Simbahan magmaalamon samtang sila mangita sa kamatuoran.

Ang mga miyembro sa Simbahan kinahanglang mangita ug mopaambit lamang sa katuohan, kasaligan, ug tinuod nga mga tinubdan sa impormasyon. Kinahanglang maglikay sila sa mga tinubdan nga pangagpas o gikan sa huhungihong. Ang giya sa Espiritu Santo, uban sa mabinantayong pagtuon, makatabang sa mga miyembro sa pag-ila tali sa kamatuoran ug sayop (tan-awa sa Doktrina ug mga Pakigsaad 11:12; 45:57). Sa mga butang kalabot sa doktrina ug palisiya sa Simbahan, ang mga tinubdan nga adunay awtoridad mao ang mga kasulatan, ang mga pagtulun-an sa buhi nga mga propeta, ug ang Kinatibuk-ang Tamdanan nga Basahon. (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.8.41, Librarya sa Ebangheyo)

Asa nako makita ang hustong doktrina ni Jesukristo?

Si Elder Neil L. Andersen sa Korum sa Napulog Duha ka Apostoles mitudlo:

Pipila ang magduhaduha sa ilang pagtuo kon makakaplag sila og pamahayag sa usa ka lider sa Simbahan mga dekadang milabay nga daw sukwahi sa atong doktrina. Adunay importanteng baroganan nga nagdumala sa doktrina sa Simbahan. Ang doktrina gitudlo sa tanang 15 ka mga sakop sa Unang Kapangulohan ug Korum sa Napulog Duha. Wala kini gitago sa usa ka walay klaro nga [parapo] sa usa ka pakigpulong. Ang tinuod nga mga baroganan kanunay nga gitudlo ug sa kadaghanan. Ang atong doktrina dili lisud pangitaon. (“Pagsulay sa Inyong Hugot nga Pagtuo,” Liahona, Nob. 2012, 41)

Dugang nga mga Kalihokan sa Pagkat-on

Ang kaimportante sa paningkamot

IKonsiderar ang pagpakigbahin sa mosunod nga pamahayag ni Presidente Russell M. Nelson:

Ang tapulan nga mga tigkat-on ug tigpasagad nga mga disipulo sa kanunay maglisod sa pagtigom og igong tipik sa hugot nga pagtuo.

Ang paghimo og bisan unsang mas maayo nagkinahanglan og paningkamot. Ang pagkahimong tinuod nga disipulo ni Jesukristo dili eksepsyon. Ang pagpalambo sa inyong hugot nga pagtuo ug pagsalig Kaniya nagkinahanglan og paningkamot. (“Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103)

Dapita ang mga estudyante nga ipakigbahin kon sa unsang paagi kini nga pamahayag may kalabotan sa pagdangop sa balaanong gitudlo nga mga tinubdan aron motabang sa pagpangitag tubag sa atong mga pangutana.

Pananglitan ang makugihong pagpangita batok sa tinapolan nga pagkat-on, ipasabot nga giasoy ni propeta Lehi sa Basahon ni Mormon ang iyang damgo ngadto sa iyang pamilya. Wala masabti sa iyang pamilya ang damgo. Dapita ang mga estudyante nga basahon ang 1 Nephi 10:17–19; 11:1 ug 1 Nephi 15:1–3, 6–9, nga ipakita ang kalainan sa tubag ni Nephi sa tubag ni Laman ug Lemuel. Dayon, pwede kang mosukna og mga pangutana nga sama sa mosunod:

• Unsay imong makat-onan gikan sa mga ehemplo ni Nephi ug sa iyang mga igsoon?

• Sa imong hunahuna, sa unsang paagi panalangin ang pagdahom sa Dios kanato nga maningkamo imbes basta na lang kita hatagan og mga tubag?

Pagkonsulta sa kasaligang mga tinubdan

Aron tabangan ang mga estudyante nga mahibalo kon unsaon pagsusi ang kalidad sa ilang mga tinubdan sa impormasyon, ikonsiderar ang pagpakigbahin sa mga sugyot nga anaa sa artikulo nga “Pagkonsulta sa Kasaligang mga Tinubdan.” Pwede nimong bahinon ang mga sugyot ngadto sa mga estudyante ug dapiton sila nga i-summarize ang ilang nabasa ug kon nganong importante para nila ang sugyot.

Pag-ila sa kamatuoran gikan sa sayop

Kon para nimo makabenepisyo ang mga estudyante sa dugang panaghisgot bahin sa pag-ila sa kasaligang mga tinubdan, ikonsiderar ang pagsulat sa mosunod nga mga pakisayran diha sa pisara. Pwede nimong parespareson ang mga estudyante, diin tun-an sa matag estudyante ang usa o duha ka tudling. Dayon pwedeng ipasabot sa mga estudyante ngadto sa usag usa ang ilang nakat-onan bahin sa pag-ila sa kasaligan ug dili kasaligan nga mga tinubdan.

• Santiago 1:5–6

• Moroni 7:15–17

• Moroni 10:5–6

• Doktrina ug mga Pakigsaad 1:37–38

Pagpapangita sa kamatuoran diha sa balaang mga tinubdan

Ikonsiderar ang pagpasalida sa pipila ka bahin o katibuk-an sa video nga “Balaanong Gitudlo nga mga Tinubdan“ (9:16) aron madungog sa mga estudyante ang mga kasinatian sa ubang batan-on sa pagdangop sa balaanong gitudlo nga mga tinubdan para sa kamatuoran. Pwede nimong ipasalida kini nga bidyo sa wala pa o human sa kalihokan sa pagpraktis.