« ការអនុវត្តចំណេះចំណានខាងគោលលទ្ធិទី ៥ ៖ ការទន្ទេញវគ្គបទគម្ពីរ និងការអនុវត្តគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការអនុវត្តចំណេះចំណានខាងគោលលទ្ធិទី ៥ ៖ ការទន្ទេញវគ្គបទគម្ពីរ និងការអនុវត្តគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សាំយូអែល ទី១ ១៧–១៨; ២៤–២៦; សាំយូអែល ទី២ ៥–៧ ៖ មេរៀនទី ៧៦
ការអនុវត្តចំណេះចំណានខាងគោលលទ្ធិទី ៥
ការទន្ទេញវគ្គបទគម្ពីរ និងការអនុវត្តគោលការណ៍នៃការទទួលបានចំណេះដឹងខាងវិញ្ញាណ
ចំណេះចំណានខាងគោលលទ្ធិជួយសិស្សឲ្យស្ថាបនាជីវិតរបស់ពួកគេនៅលើគ្រឹះនៃព្រះយេស៊ូវគ្រីស្ទ និងដំណឹងល្អរបស់ទ្រង់ ។ មេរៀននេះអាចជួយសិស្សទន្ទេញឃ្លាបទគម្ពីរគន្លឹះនៅក្នុងវគ្គបទគម្ពីរចំណេះចំណានខាងគោលលទ្ធិ ហើយអនុវត្តគោលការណ៍ដ៏ទេវភាពនៃការទទួលបានចំណេះដឹងខាងវិញ្ញាណ ។
ការរៀបចំសិស្ស ៖ សូមពិចារណាអំពីការអញ្ជើញសិស្សឲ្យជ្រើសរើស ហើយចាប់ផ្តើមទន្ទេញវគ្គបទគម្ពីរចំណេះចំណានខាងគោលលទ្ធិ ។ កម្មវិធីចំណេះចំណានខាងគោលលទ្ធិអាចជាធនធានដ៏មានប្រយោជន៍ ។ បញ្ជីនៃវគ្គបទគម្ពីរអាចរកបាននៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ២០២៣ ) ។
សកម្មភាពរៀនសូត្រដែលអាចមាន
ការរំឭកចំណេះចំណានខាងគោលលទ្ធិ ៖ ទន្ទេញ
អ្នកអាចចាប់ផ្តើមបង្រៀនដោយជួយសិស្សមើលឃើញពីតម្លៃនៃការទន្ទេញសេចក្តីយោងនៃចំណេះចំណានខាងគោលលទ្ធិ និងឃ្លាបទគម្ពីរគន្លឹះ ។ វិធីមួយក្នុងការធ្វើកិច្ចការនេះ គឺដោយការសួរសំណួរខាងក្រោម ។
-
តើអ្វីជារឿងដំបូងដែលអ្នកចងចាំដែលបានទន្ទេញ ? តើអ្នកនៅតែចាំពីវាដែរឬទេ ?
-
តើអ្នកធ្លាប់ទន្ទេញបទគម្ពីរដែរឬទេ ? តើមានប្រយោជន៍អ្វីខ្លះក្នុងការទន្ទេញបទគម្ពីរនោះ ?
-
តើអ្នកអាចគិតអំពីគ្រាដែលព្រះអង្គសង្គ្រោះបានរំឭកបទគម្ពីរពីការចងចាំដែរឬទេ ?
ប្រសិនបើចាំបាច់ សូមរំឭកសិស្សថា ព្រះយេស៊ូវគ្រីស្ទបានដកស្រង់បទគម្ពីរក្នុងកាលៈទេសៈមួយចំនួន ដូចជាពេលសាតាំងល្បួងទ្រង់ ( សូមមើល ម៉ាថាយ ៤:៤, ៧, ១២ ) នៅពេលទ្រង់ត្រូវបានសួរសំណួរពិបាក ( សូមមើល ម៉ាថាយ ៩:១៣; ១៥:៤, ៧–៩; ម៉ាកុស ១០:៧–៨ ) ហើយនៅពេលដែលទ្រង់បង្រៀនពួកនីហ្វៃ ( សូមមើលនីហ្វៃទី៣ ២២; ២៤–២៥ ) ។
ដើម្បីជួយសិស្សទន្ទេញចាំសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះ សូមពិចារណាធ្វើដូចខាងក្រោម ឬជ្រើសរើសសកម្មភាពទន្ទេញផ្សេងទៀតពី « សកម្មភាពរំឭកចំណេះចំណានខាងគោលលទ្ធិឡើងវិញ » នៅក្នុងឧបសម្ព័ន្ធ ។
បង្ហាញបញ្ជីមួយអំពីវគ្គបទគម្ពីរចំណេះចំណានខាងគោលលទ្ធិដែលសិស្សបានសិក្សាកន្លងមក ។ សូមអញ្ជើញសិស្សឲ្យជ្រើសរើសវគ្គបទគម្ពីរដែលពួកគេចង់ទន្ទេញ ។ បន្ទាប់មក សូមអញ្ជើញសិស្សឲ្យបំពេញកិច្ចការខាងក្រោម ។
សរសេរសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះនៅក្នុងសៀវភៅកំណត់ហេតុរបស់អ្នក ( ប្រហែលជាសរសេរដោយប្រើខ្មៅដៃ ) ។ បន្ទាប់មក អានវាឲ្យឮៗទៅកាន់ខ្លួនអ្នក ។ បន្ទាប់ពីអានរួច លុប ឬឆូតពាក្យ ឬលេខមួយ ឬពីរចេញ ។ អានវាឲ្យឮៗម្តងទៀត ។ សូមបន្តធ្វើដូចគ្នាបែបនេះឡើងវិញរហូតទាល់តែអ្នកបានលុបពាក្យ និងលេខទាំងអស់ចេញ ។ បន្ទាប់មក មើលថាតើអ្នកអាចសរសេរសេចក្តីយោង និងឃ្លាបទគម្ពីរគន្លឹះចេញពីការចងចាំ ។
ប្រសិនបើមានពេលគ្រប់គ្រាន់ សិស្សអាចធ្វើដូចគ្នាបែបនេះឡើងវិញជាមួយនឹងវគ្គបទគម្ពីរមួយទៀត ។
រៀន និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
វាអាចមានប្រយោជន៍សម្រាប់សិស្សក្នុងការមានឱកាសជាច្រើនដើម្បីរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ។ ការរំឭកឡើងវិញនឹងជួយសិស្សឲ្យយល់ពីគោលការណ៍កាន់តែស៊ីជម្រៅដើម្បីឲ្យពួកគេអាចប្រើវានៅពេលចាំបាច់ ។ សូមពិចារណារំឭកឡើងវិញនូវគោលការណ៍ដោយប្រើសកម្មភាពរំឭកឡើងវិញមួយដែលបានស្នើនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » នៅក្នុងឧបសម្ព័ន្ធនេះ ។ ការពិពណ៌នាអំពីគោលការណ៍ទាំងឡាយមាននៅក្នុង កថាខណ្ឌទី ៥–១២ នៃផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ២០២៣ ) ។
ផ្ដល់ឲ្យសិស្សនូវស្ថានភាពមួយដែលជួយពួកគេដោះស្រាយសំណួរអំពីគុណតម្លៃរបស់មនុស្សម្នាក់ៗក្នុងនាមជាបុត្ររបស់ព្រះ និងសារៈសំខាន់នៃការមើលឃើញ និងការប្រព្រឹត្តចំពោះអ្នកដទៃតាមរបៀបដែលព្រះអង្គសង្គ្រោះធ្វើ ។ ថ្មីៗនេះ សិស្សបានរៀនសេចក្ដីពិតអំពីអត្តសញ្ញាណដ៏ទេវភាពរបស់យើង ( សូមមើល លោកុប្បត្ដិ ១:២៦–២៧ ) របៀបដែលព្រះអម្ចាស់ទតឃើញយើង ( សូមមើល សាំយូអែល ទី១ ១៦:៧ ) និងរបៀបដែលរាស្ដ្ររបស់ព្រះអម្ចាស់គួរតែរួបរួមគ្នា ( សូមមើល ម៉ូសេ ៧:១៨ ) ។
អ្នកអាចចែកចាយសាច់រឿងខាងក្រោម ឬអ្នកអាចសម្របសាច់រឿងទាំងនោះដើម្បីបំពេញតម្រូវការសិស្សរបស់អ្នកបានកាន់តែប្រសើរ ។ ជម្រើសមួយទៀតគឺត្រូវប្រើវីដេអូ « Bullying—Stop It ( ១០:២២ ) » ដែលមាននៅលើគេហទំព័រ ChurchofJesusChrist.org ។ បង្ហាញវីដេអូចាប់ពីនាទីទី ០:០០ ដល់ ៦:៥០ ។ បន្ទាប់មកផ្អាកវីដេអូនោះ ហើយបន្តសកម្មភាពមេរៀន ។
សូមពិចារណាអំពីសាច់រឿងខាងក្រោម ៖
ចូ ជាម្នាក់នៅក្នុងក្រុមមិត្តភក្តិដែលតែងតែមិនមានចិត្តសប្បុរសចំពោះអ្នកដទៃនៅសាលា និងតាមបណ្តាញសង្គម ។ ពួកគេគិតថាអ្វីដែលពួកគេកំពុងធ្វើគឺគ្រាន់តែជាការលេងសើច និងសប្បាយប៉ុណ្ណោះ ។ ថ្ងៃមួយ ចូ បានឃើញប្អូនស្រីរបស់គាត់ត្រូវបានគេធ្វើបាប ។ គាត់អាចមើលឃើញថា ប្អូនស្រីគាត់ឈឺចាប់ប៉ុនណា ។ គាត់បារម្ភពីរបៀបដែលការសម្លុត ធ្វើបាបអាចប៉ះពាល់ដល់នាង។ ការឃើញប្អូនស្រីរបស់គាត់ត្រូវបានគេធ្វើបាបបណ្តាលឲ្យ ចូ ដឹងអ្វីមួយដែលគាត់មិនបានមើលឃើញពីមុនមក ។ គាត់ទទួលស្គាល់ពីរបៀបដែលគាត់ និងមិត្តរបស់គាត់ធ្វើឲ្យអ្នកដទៃមានអារម្មណ៍បែបនោះ ។ គាត់មានអារម្មណ៍បាក់ទឹកចិត្ត ហើយឆ្ងល់ថាគាត់គួរធ្វើអ្វីឥឡូវនេះ ។
-
តើការសម្រេចចិត្តពិបាកអ្វីខ្លះអំពីរបៀបដែលគាត់គួរប្រព្រឹត្តចំពោះអ្នកដទៃ ដែល ចូ ប្រហែលជាពិចារណាធ្វើ ? ហេតុអ្វីបានជាវាពិបាកក្នុងការធ្វើការផ្លាស់ប្តូរទាំងនេះ ?
ដើម្បីជួយសិស្សអនុវត្តគោលការណ៍នៃការទទួលបានចំណេះដឹងខាងវិញ្ញាណចំពោះសាច់រឿងនេះ អ្នកអាចអញ្ជើញពួកគេឲ្យធ្វើដូចខាងក្រោម ។
ជ្រើសរើសគោលការណ៍មួយក្នុងចំណោមគោលការណ៍ទាំងបីនៃការទទួលបានចំណេះដឹងខាងវិញ្ញាណ ដែលអ្នកគិតថាអាចមានប្រយោជន៍សម្រាប់ ចូ ។ បំពេញសកម្មភាពខាងក្រោមដែលត្រូវនឹងគោលការណ៍ដែលអ្នកបានជ្រើសរើស ។
ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ
សូមធ្វើបញ្ជីមួយអំពីអ្វីគ្រប់យ៉ាងដែលអ្នកគិតថា ព្រះវរបិតាសួគ៌ចង់ឲ្យ ចូ ដឹង ។ សូមគិតអំពីការបង្រៀននៃបទគម្ពីរដូចជា លោកុប្បត្តិ ១:២៦–២៧ និង សាំយូអែល ទី១ ១៦:៧ ដែលអាចជួយគាត់មើលឃើញខ្លួនគាត់ និងអ្នកដទៃទៀតបានកាន់តែត្រឹមត្រូវ ។
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
សូមធ្វើបញ្ជីនៃបទគម្ពីរ ឬសុន្ទរកថាសន្និសីទទូទៅដែល ចូ អាចសិក្សាបានដើម្បីជួយគាត់ជ្រើសរើសដើម្បីប្រែចិត្ត និងផ្លាស់ប្តូរ ។
អ្នកអាចចូលទៅកាន់ផ្ទាំងសន្និសីទទូទៅនៅក្នុងបណ្ណាល័យដំណឹងល្អ ។ សូមចូលទៅកាន់ « ប្រធានបទ » ហើយជ្រើសរើសប្រធានបទដែលទាក់ទងនឹងស្ថានភាពរបស់ ចូ ដូចជាសេចក្តីសប្បុរស សេចក្តីមេត្តាករុណា គំរូ ឬការប្រែចិត្ត ។ រកមើលតាមរយៈសុន្ទរកថាមួយ ហើយស្វែងរកសេចក្តីថ្លែងការណ៍ដែលអាចពង្រឹង ឬណែនាំដល់ ចូ ។
ប្រសិនបើអ្នកត្រូវការជំនួយក្នុងការស្វែងរកបទគម្ពីរមួយ អ្នកអាចពិនិត្យមើលវគ្គបទគម្ពីរចំណេះចំណានខាងគោលលទ្ធិ ។
ធ្វើសកម្មភាពដោយសេចក្ដីជំនឿ
ដើម្បីបង្ហាញពីអ្វីដែល ចូ អាចធ្វើបាន សូមបង្កើតស្លាកគំនូរដំណើររឿងមួយដែលមានរូបភាពពីបីទៅប្រាំមួយរូប ដែលបង្ហាញពីរបៀបដែលគាត់អាចធ្វើសកម្មភាពដោយសេចក្ដីជំនឿលើព្រះយេស៊ូវគ្រីស្ទ ។ ជាផ្នែកនៃស្លាកគំនូរដំណើររឿងរបស់អ្នក សូមពិចារណាពីរបៀបដែល ចូ អាចប្រើចំណេះដឹងរបស់គាត់អំពីព្រះយេស៊ូវគ្រីស្ទ ។
សូមពិចារណាអញ្ជើញសិស្សឲ្យចែកចាយអ្វីដែលពួកគេបានរៀន ។ សូមឲ្យសិស្សចែកចាយគំនិតដែលពួកគេមាន នៅពេលពួកគេស្តាប់មិត្តភក្តិរបស់ពួកគេ ។
ប្រសិនបើអ្នកបង្ហាញវីដេអូ អ្នកអាចបង្ហាញវីដេអូដែលមិនទាន់បង្ហាញពីនាទីទី ៦:៥១ ដល់ ១០:២៣ ។ អ្នកអាចសុំសិស្សឲ្យរកមើលរបៀបដែលយុវវ័យបានទទួលអត្ថប្រយោជន៍ ឬអនុវត្តគោលការណ៍នៃការទទួលបានចំណេះដឹងខាងវិញ្ញាណ ។
ប្រសិនបើអ្នកប្រើសាច់រឿងនោះ អ្នកអាចអញ្ជើញសិស្សឲ្យបង្កើតរឿងដែលនៅសេសសល់ជាក្រុមតូចៗ ។ អញ្ជើញក្រុមឲ្យមកមើលផ្នែកពីរខាងក្រោមនៃរឿងនោះ ៖
-
ការឆ្លើយតបរបស់ ចូ ទៅកាន់មនុស្សដែលគាត់មិនមានចិត្តសប្បុរសជាមួយ
-
ការឆ្លើយតបរបស់ ចូ ទៅកាន់មិត្តរបស់គាត់
សូមទុកពេលឲ្យសិស្សគ្រប់គ្រាន់ដើម្បីបំពេញសាច់រឿងនេះ ។ បន្ទាប់មក អ្នកអាចអញ្ជើញសិស្សឲ្យធ្វើអ្វីមួយនៅថ្ងៃនេះ ដើម្បីអនុវត្តគោលការណ៍មួយ ឬច្រើននៃការទទួលបានចំណេះដឹងខាងវិញ្ញាណចំពោះស្ថានភាពដែលពួកគេកំពុងប្រឈម ឬនឹងប្រឈម ។
សូមបញ្ចប់ដោយការចែកចាយទីបន្ទាល់របស់អ្នកអំពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទនឹងជួយសិស្សដែលមានបញ្ហាប្រឈមផ្ទាល់ខ្លួន នៅពេលពួកគេស្វែងរកការណែនាំ ។