« សាំយូអែល ទី១ ២៥ ៖ ព្រះអង្គសង្គ្រោះជួយយើងឲ្យអភ័យទោស » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« សាំយូអែល ទី១ ២៥ ៖ ព្រះអង្គសង្គ្រោះជួយយើងឲ្យអភ័យទោស » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សាំយូអែល ទី១ ១៧–១៨; ២៤–២៦; សាំយូអែល ទី២ ៥–៧ ៖ មេរៀនទី ៧៥
សាំយូអែល ទី១ ២៥
ព្រះអង្គសង្គ្រោះជួយយើងឲ្យអភ័យទោស
ពេញមួយជីវិតរបស់យើង មនុស្សផ្សេងទៀតទំនងជានឹងធ្វើឲ្យយើងឈឺចាប់ ឬធ្វើឲ្យយើងអន់ចិត្ត ។ ដេវីឌត្រូវបានប្រមាថដោយបុរសម្នាក់ឈ្មោះណាបាល ។ ក្នុងនាមជានិមិត្តរូបនៃព្រះយេស៊ូវគ្រីស្ទ ភរិយារបស់ណាបាល ដែលមានឈ្មោះថា អ័ប៊ីកែល បានអង្វរនិងជួយដេវីឌឲ្យអភ័យទោស ។ យើងអាចស្វែងយល់បន្ថែមទៀតអំពីព្រះយេស៊ូវគ្រីស្ទ និងជំនួយដែលទ្រង់ប្រទានដល់យើង ដោយការប្រៀបធៀប អ័ប៊ីកែល ទៅនឹងទ្រង់ ។ មេរៀននេះអាចជួយសិស្សឲ្យយល់អំពីរបៀបដែលព្រះយេស៊ូវគ្រីស្ទអាចជួយពួកគេឲ្យអភ័យទោសដល់អ្នកដទៃ ។
ការរៀបចំសិស្ស ៖ សូមអញ្ជើញសិស្សឲ្យអាន មើល ឬស្ដាប់ « ភួងលម្អជំនួសផេះ ៖ គន្លងព្យាបាលនៃការអភ័យទោស » ដោយស៊ីស្ទើរ គ្រីស្ទីន អិម យី ( លីអាហូណា ខែវិច្ឆិកា ឆ្នាំ២០២២ ទំព័រ ៣៦–៣៨ ) ។ ពួកគេអាចសិក្សាសុន្ទរកថាទាំងមូល ឬផ្នែកដែលអ្នកបានជ្រើសរើសជាមុន ។ សូមអញ្ជើញសិស្សឲ្យមករៀនដោយរៀបចំដើម្បីចែកចាយការយល់ដឹងដែលពួកគេទទួលបានអំពីការទទួលបានជំនួយរបស់ព្រះអង្គសង្គ្រោះដើម្បីអភ័យទោសដល់អ្នកដទៃ ។
សកម្មភាពរៀនសូត្រដែលអាចមាន
ដង្វាយធួនរបស់ព្រះយេស៊ូវគ្រីស្ទ
សូមពិចារណាបង្ហាញរូបភាពរបស់ព្រះយេស៊ូវគ្រីស្ទ ដូចជារូបដែលមាននៅខាងដើមមេរៀននេះ ។ សូមសរសេរប្រយោគមិនពេញលេញខាងក្រោមនេះនៅលើក្ដារខៀន ។ សូមអញ្ជើញសិស្សឲ្យប្រើសៀវភៅកំណត់ហេតុសិក្សារបស់ពួកគេ ដើម្បីរាយបញ្ជីពីរបៀបជាច្រើនដែលពួកគេអាចបំពេញវាបាន ។ អ្នកអាចចាក់ភ្លេងដែលមានគារវភាព ខណៈពេលដែលសិស្សគិតពិចារណា និងសរសេរ ។
ដោយសារតែព្រះយេស៊ូវគ្រីស្ទ ទើបខ្ញុំអាច…
ក្រោយពីមានពេលគ្រប់គ្រាន់ហើយ សូមអញ្ជើញសិស្សដែលស្ម័គ្រចិត្តឲ្យចែកចាយរបៀបដែលពួកគេបានបំពេញសេចក្ដីថ្លែងការណ៍នេះ ។ ពួកគេក៏អាចបង្ហាញពីអារម្មណ៍ ឬជំនឿរបស់ពួកគេអំពីអ្វីដែលពួកគេចែកចាយផងដែរ ។ បង្ហាញសេចក្តីថ្លែងការណ៍ខាងក្រោមដើម្បីគាំទ្រ ឬបន្ថែមទៅក្នុងបញ្ជីដែលសិស្សបានបង្កើត ។
ប្រធាន រ័សុល អិម ណិលសុន បានពិពណ៌នាអំពីអ្វីដែលយើងទាំងអស់គ្នាអាចធ្វើបានដោយសារព្រះយេស៊ូវគ្រីស្ទ ៖
តាមរយៈដង្វាយធួនដ៏និរន្តរ [ របស់ព្រះអង្គសង្គ្រោះ ] បងប្អូនអាចអភ័យទោសដល់មនុស្សដែលបានធ្វើឲ្យបងប្អូនឈឺចាប់ និងមនុស្សដែលប្រហែលជានឹងពុំព្រមទទួលយកការទទួលខុសត្រូវលើភាពកោងកាចដែលគេធ្វើមកលើបងប្អូន ។
ជាធម្មតា វាងាយស្រួលដើម្បីអភ័យទោសដល់មនុស្សដែលស្វែងរកការអភ័យទោសពីបងប្អូនដោយស្មោះ និងដោយរាបសា ។ ប៉ុន្តែព្រះអង្គសង្គ្រោះនឹងប្រទានដល់បងប្អូននូវលទ្ធភាពដើម្បីអភ័យទោសដល់មនុស្សគ្រប់គ្នាដែលធ្វើខុសចំពោះបងប្អូនតាមគ្រប់រូបភាព ។ បន្ទាប់មក ទង្វើដ៏ឈឺចាប់របស់ពួកគេពុំអាចបំផ្លាញព្រលឹងរបស់បងប្អូនបានទៀតឡើយ ។ ( « Four Gifts That Jesus Christ Offers to You » [ First Presidency Christmas devotional ថ្ងៃទី២ ខែធ្នូ ឆ្នាំ២០១៨ ] នៅលើបណ្ណាល័យដំណឹងល្អ )
-
តើព្រះយេស៊ូវគ្រីស្ទធ្វើឲ្យមានលទ្ធភាពអ្វីខ្លះតាមរយៈដង្វាយធួនរបស់ទ្រង់ ?
សូមបំពេញសេចក្ដីថ្លែងការណ៍នៅលើក្ដារខៀនជាមួយនឹងសេចក្ដីពិតដូចតទៅ ៖ ដោយសារព្រះយេស៊ូវគ្រីស្ទ ទើបខ្ញុំអាចអភ័យទោសដល់មនុស្សដែលបានធ្វើឲ្យខ្ញុំឈឺចាប់ ។ អ្នកអាចអញ្ជើញសិស្សឲ្យ បន្ថែមសេចក្តីពិតនេះទៅក្នុងសៀវភៅកំណត់ហេតុសិក្សារបស់ពួកគេ ប្រសិនបើវាមិនមែនជាផ្នែកនៃបញ្ជីដំបូងរបស់ពួកគេទេ ។
ដេវីឌ និងណាបាល
សាំយូអែល ទី១ ២៥ មាននូវដំណើររឿងមួយដែលទង្វើរបស់ភរិយារបស់ ណាបាល គឺអ័ប៊ីកែល អាចប្រៀបធៀបនឹងព្រះយេស៊ូវគ្រីស្ទ ។ ការប្រៀបធៀបនេះជួយយើងស្វែងយល់បន្ថែមអំពីទ្រង់ ។ ជួនកាល ការប្រៀបធៀបបែបទាំងនេះត្រូវបានហៅថា និមិត្តរូបនៃព្រះយេស៊ូវគ្រីស្ទ ។ សូមលើកទឹកចិត្តសិស្សឲ្យយាងព្រះវិញ្ញាណបរិសុទ្ធឲ្យជួយពួកគេយល់អំពីនិមិត្តរូបនៃព្រះគ្រីស្ទនៅក្នុងជំពូកនេះ ។ វាអាចមានប្រយោជន៍ក្នុងការសង្ខេបដំណើររឿងទាំងមូល មុនពេលសិស្សចាប់ផ្តើមសិក្សា ដើម្បីពួកគេអាចផ្តោតលើការយកចិត្តទុកដាក់កាន់តែប្រសើរឡើងលើការស្វែងរកអ្វីដែលដំណើររឿងនេះបង្រៀនអំពីព្រះគ្រីស្ទ ។
នៅពេលដេវីឌ និងទ័ពរបស់គាត់ធ្វើដំណើរក្នុងទីរហោស្ថាន ពួកគេបានជួបអ្នកបម្រើរបស់បុរសម្នាក់ឈ្មោះ ណាបាល ។ ក្នុងពេលប្រយុទ្ធ ទាហានដែលនឿយណាយតែងតែបំពានច្បាប់ដើម្បីទទួលបានអ្វីដែលពួកគេត្រូវការ ។ ដេវីឌ និងទ័ពរបស់គាត់ត្រូវការជំនួយ និងការគាំទ្រ ។ ណាបាលជាអ្នកមានទ្រព្យស្តុកស្តម្ភ ហើយមានហ្វូងចៀម និងគោយ៉ាងសន្ធឹកសន្ធាប់ ។ ជាជាងធ្វើដាក់ពួកអ្នកបម្រើរបស់ណាបាលយ៉ាងឃោរឃៅ ហើយយកអ្វីដែលពួកគេត្រូវការនោះ ដេវីឌ និងទាហានរបស់ទ្រង់មានចិត្តសប្បុរសចំពោះពួកអ្នកបម្រើទាំងនេះ ហើយមិនបានយកអ្វីពីពួកគេឡើយ ( សូមមើល សាំយូអែល ទី១ ២៥:៧, ១៥–១៦ ) ។ ដេវីឌបានបញ្ជូនពួកអ្នកបម្រើរបស់ទ្រង់ចំនួន ១០ នាក់ទៅសុំស្បៀងអាហារ និងគ្រឿងបរិក្ខារដែលចាំបាច់ជាច្រើនពីណាបាល ( សូមមើល សាំយូអែល ទី១ ២៥:៥–៩ ) ។ ណាបាលបានប្រមាថដេវីឌ ហើយបានបដិសេធមិនជួយទ្រង់ និងកងទ័ពរបស់ទ្រង់ទេ ( សូមមើល សាំយូអែល ទី១ ២៥:១០–១១ ) ។
នៅក្រោមសេចក្តីថ្លែងការណ៍ដែលបានបំពេញនៅលើក្ដារខៀន អ្នកអាចគូររូបដែលមានមុខពីរ ។ ដាក់ស្លាកមួយថា ដេវីឌ និងម្នាក់ទៀតថា ណាបាល ។ ទុកចន្លោះទំនេរដើម្បីគូររូបមុខទីបីនៅចន្លោះមុខទាំងពីរនៅពេលក្រោយក្នុងមេរៀននេះ ។ នៅក្រោមមុខតំណាងដេវីឌ អ្នកអាចសរសេរថា ៖ សប្បុរសចំពោះពួកអ្នកបម្រើរបស់ណាបាល ស្វែងរកជំនួយពីណាបាល ។ នៅក្រោមមុខតំណាងណាបាល អ្នកអាចសរសេរថា ៖ ប្រមាថដេវីឌ បដិសេធមិនព្រមជួយ ។ អ្នកអាចអញ្ជើញសិស្សឲ្យផ្លាស់ប្តូរអារម្មណ៍នៃទឹកមុខ នៅពេលពួកគេអានខគម្ពីរខាងក្រោម ។
សូមអញ្ជើញសិស្សពាក់កណ្ដាលថ្នាក់អានអំពីណាបាល និងសិស្សពាក់កណ្តាលទៀតអានអំពីដេវីឌ ។ ប្រសិនបើចាំបាច់ សូមណែនាំសិស្សឲ្យទៅលេខយោងដើម្បីយល់កាន់តែច្បាស់ ។
-
សូមអាន សាំយូអែល ទី១ ២៥:៣, ១៤, ១៧, ២៥ ដោយរកមើលចរិកលក្ខណៈរបស់ណាបាល ។
-
សូមអាន សាំយូអែល ទី១ ២៥:១៣, ២១–២២ ដោយរកមើលប្រតិកម្មរបស់ដេវីឌចំពោះការប្រមាថ និងការបដិសេធរបស់ណាបាល ។
សុំឲ្យអ្នកស្ម័គ្រចិត្ដពីក្រុមនីមួយៗសរសេរនៅលើក្ដារខៀននូវអ្វីដែលពួកគេបានរៀនអំពីអ្នកដែលបានចាត់តាំងរបស់ពួកគេ ។ ឧទាហរណ៍ នៅពីក្រោមណាបាល ពួកគេអាចសរសេរពាក្យ ឈ្លើយ ទុច្ចរិត មិនចេះខ្វល់ខ្វាយ ។ នៅពីក្រោមដេវីឌ ពួកគេអាចសរសេរ ខឹង មានអារម្មណ៍ថាត្រូវបានគេធ្វើបាប ធ្វើការសងសឹក ។ សិស្សអាចផ្លាស់ប្តូរអារម្មណ៍នៅលើមុខនីមួយៗ ដើម្បីឆ្លុះបញ្ចាំងពីអ្វីដែលពួកគេបានរៀន ។
ផ្តល់ឱកាសឲ្យសិស្សគិតអំពីកាលៈទេសៈផ្ទាល់ខ្លួនរបស់ពួកគេ ។ ចូរអះអាងដល់ពួកគេថា ពួកគេនឹងមិនចែកចាយចម្លើយរបស់ពួកគេចំពោះស្វ័យវាយតម្លៃនេះទេ ។
សូមពិចារណាចម្លើយរបស់អ្នកចំពោះសំណួរខាងក្រោម ៖
-
តើនៅពេលណាដែលមានអ្នកផ្សេងធ្វើបាបអ្នក ?
-
តើការប្រឹងប្រែង ជោគជ័យ ឬការតស៊ូអ្វីខ្លះដែលអ្នកបានធ្វើ ឬបានអភ័យទោសឲ្យបុគ្គលនេះសម្រាប់ការដែលពួកគេធ្វើបានដល់អ្នក ?
អ័ប៊ីកែល គឺជានិមិត្តរូបនៃព្រះគ្រីស្ទ
សូមរៀបចំសិស្សឲ្យសិក្សាអំពីអ័ប៊ីកែល ដោយណែនាំជំនាញសិក្សានៃការស្វែងរកនិមិត្តរូបនៃព្រះគ្រីស្ទ ។ សូមពន្យល់ថា សិស្សអាចរកមើលអ្វីដែលអ័ប៊ីកែលនិយាយ ឬធ្វើដែលរំឭកពួកគេអំពីព្រះយេស៊ូវគ្រីស្ទ តួនាទីរបស់ទ្រង់ និងបេសកកម្មរបស់ទ្រង់នៅក្នុងផែនការរបស់ព្រះវរបិតាសួគ៌ ។
អ្នកបម្រើម្នាក់របស់ណាបាលបានឃើញជម្លោះរវាងចៅហ្វាយរបស់គាត់ និងដេវីឌ ។ អ្នកបម្រើរូបនេះបានជូនដំណឹងដល់អ័ប៊ីកែល ភរិយារបស់ណាបាល ( សូមមើល សាំយូអែល ទី១ ២៥:១៤–១៧ ) ។ ពេលអ័ប៊ីកែលបានដឹងពីជម្លោះនេះ នាងបានអង្វរជំនួសណាបាល ហើយបានសុំដេវីឌឲ្យអត់ទោសដល់គាត់ ( សូមមើល សាំយូអែល ទី១ ២៥:១៨–២០, ២៣–២៨ ) ។ អ័ប៊ីកែលអាចត្រូវបានគេចាត់ទុកថា ជានិមិត្តរូបនៃព្រះគ្រីស្ទ ។ យើងអាចស្វែងរកនិមិត្តរូបនៃព្រះគ្រីស្ទ នៅពេលយើងសិក្សាព្រះគម្ពីរ ហើយរកមើលរបៀបដែលបុគ្គល វត្ថុ ឬសូម្បីតែព្រឹត្តិការណ៍ទាំងឡាយជួយយើងឲ្យគិតអំពីព្រះគ្រីស្ទ ។
នៅលើក្ដារខៀន សូមគូររូបមុខចន្លោះដេវីឌ និងណាបាល ។ ដាក់ស្លាកមុខនេះថា អ័ប៊ីកែល ។ ផ្តល់ពេលគ្រប់គ្រាន់ដល់សិស្សក្នុងការសិក្សាដូចខាងក្រោមជាបុគ្គល ឬជាក្រុមតូចៗ ។
សូមអាន សាំយូអែល ទី១ ២៥:១៨–១៩, ២៣–២៨, ៣១ ដោយរកមើលអ្វីដែលអ័ប៊ីកែលបាននិយាយ ឬធ្វើដែលស្រដៀងនឹងអ្វីដែលព្រះយេស៊ូវគ្រីស្ទបានមានព្រះបន្ទូល ឬបានធ្វើ ។ សូមពិចារណាគូសសម្គាល់អ្វីដែលអ្នករកឃើញ ។
នៅក្រោមមុខតំណាងអ័ប៊ីកែល សូមធ្វើបញ្ជីនៃអ្វីដែលសិស្សបានរកឃើញ ។ ចម្លើយអាចជា ៖ បានផ្ដល់ការគាំទ្រក្រៃលែង ( ខទី ១៨ ) យកកំហុសរបស់ណាបាលដាក់មកលើខ្លួនរបស់នាង ( ខទី ២៤ ) បានសុំឲ្យដេវីឌអភ័យទោសឲ្យនាងចំពោះកំហុសរបស់ណាបាល ( ខទី ២៨ ) បានធ្វើការដើម្បីបំបាត់ទុក្ខសោក និងការអាក់អន់ចិត្តពីដួងចិត្តរបស់ដេវីឌ ( ខទី ៣១) ។
-
តើអ័ប៊ីកែលជានិមិត្តរូបនៃព្រះយេស៊ូវគ្រីស្ទយ៉ាងដូចម្ដេច ?
ស៊ីស្ទើរ គ្រីស្ទីន អិម យី នៃគណៈប្រធានសមាគមសង្គ្រោះបានចែកចាយការយល់ដឹងអំពីសមត្ថភាពរបស់ព្រះអង្គសង្គ្រោះក្នុងការជួយយើងឲ្យចេះអភ័យទោស ។
នៅក្នុងដំណើររឿងនេះ អ័ប៊ីកែលអាចត្រូវបានគេចាត់ទុកថាជាស្ត្រីមានអំណាច ឬជានិមិត្តសញ្ញានៃព្រះយេស៊ូវគ្រីស្ទ ។ តាមរយៈពលិកម្មដ៏ធួនរបស់ទ្រង់ ទ្រង់អាចរំដោះយើងឲ្យរួចពីអំពើបាប និងដួងចិត្តដែលមានកំហឹងជាទម្ងន់ ហើយប្រទានឲ្យយើងនូវការគាំពារថែទាំដែលយើងត្រូវការ ។
ដូចជាអ័ប៊ីកែលបានស្ម័គ្រចិត្តលើកដាក់មកលើខ្លួននាងនូវអំពើបាបរបស់ណាបាល ព្រះអង្គសង្គ្រោះក៏ដូច្នេះដែរ—ក្នុងរបៀបមួយដែលមិនអាចយល់បាន—ទ្រង់បានលើកដាក់មកលើអង្គទ្រង់នូវអំពើបាបរបស់យើង និងអំពើបាបរបស់អ្នកទំាងឡាយណាដែលបានធ្វើឲ្យយើងឈឺចាប់ ឬអាក់អន់ចិត្ត ។…
ការនាំយកស្បៀងអាហារ និងគ្រឿងបរិក្ខាររបស់អ័ប៊ីកែលអាចបង្រៀនយើងថា ព្រះអង្គសង្គ្រោះប្រទានដល់អស់អ្នកដែលមានការឈឺចាប់ និងរងរបួស នូវការគាំពារថែទាំ និងជំនួយដែលយើងត្រូវការដើម្បីទទួលបានការព្យាបាល និងបានជាសះស្បើយ ។ …
ដូចដែលអ័ប៊ីកែលបានជួយដេវីឌមិនឲ្យ « តូចចិត្តស្ដាយ » [ សាំយូអែល ទី១ ២៥:៣១ ] ហើយដើម្បីទទួលបានជំនួយដែលគាត់ត្រូវការ នោះព្រះអង្គសង្គ្រោះនឹងជួយអ្នកយ៉ាងនោះដែរ ។ ( « ភួងលម្អជំនួសផេះ ៖ គន្លងព្យាបាលនៃការអភ័យទោស » លីអាហូណា ខែវិច្ឆិកា ឆ្នាំ២០២២ ទំព័រ ៣៦–៣៧ )
សូមអញ្ជើញសិស្សឲ្យចែកចាយអ្វីដែលមានអត្ថន័យចំពោះពួកគេពីសេចក្តីថ្លែងការណ៍របស់ស៊ីស្ទើរ យី ។ នៅពេលសិស្សចែកចាយ អ្នកអាចជំនួសមុខដែលតំណាងអ័ប៊ីកែលជាមួយនឹងរូបភាពនៃព្រះយេស៊ូវគ្រីស្ទ ដែលអ្នកបានបង្ហាញមុននៅក្នុងមេរៀននេះ ដោយដាក់រូបភាពព្រះអង្គសង្គ្រោះនៅចន្លោះមុខរបស់ណាបាល និងដេវីឌ ។
-
តើព្រះអង្គសង្រ្គោះជួយយើងឲ្យអភ័យទោសដល់មនុស្សដទៃយ៉ាងដូចម្តេច ?
សូមអាន សាំយូអែល ទី១ ២៥:៣២–៣៥ ដោយរកមើលថាតើសកម្មភាពរបស់អ័ប៊ីកែលប៉ះពាល់ដល់ដេវីឌយ៉ាងដូចម្តេច ។
-
តើយើងអាចនឹងមានអារម្មណ៍ស្រដៀងគ្នានេះយ៉ាងដូចម្ដេច នៅពេលយើងទទួលបានជំនួយរបស់ព្រះអង្គសង្គ្រោះដើម្បីអភ័យទោសដល់អ្នកដទៃ ?
បង្ហាញការយល់ដឹង
សូមផ្តល់ឲ្យសិស្សនូវឱកាសមួយដើម្បីបង្ហាញពីអ្វីដែលពួកគេយល់អំពីសមត្ថភាពរបស់ព្រះអង្គសង្គ្រោះក្នុងការជួយពួកគេអភ័យទោសដល់អ្នកដទៃ ។ ខាងក្រោមនេះគឺជារបៀបមួយដែលអ្នកអាចធ្វើការណ៍នេះបាន ។
សូមបំពេញចំណុចដូចតទៅនេះនៅក្នុងសៀវភៅកំណត់ហេតុការសិក្សារបស់អ្នក ៖
-
សូមគូររូបមុខដែលតំណាងឲ្យអារម្មណ៍របស់អ្នក នៅពេលដែលនរណាម្នាក់ធ្វើឲ្យអ្នកឈឺចាប់ ឬអាក់អន់ចិត្ត ។
-
នៅជាប់នឹងរូបភាពនោះ សូមគូររូបមុខដែលតំណាងឲ្យមនុស្សដែលអាចធ្វើឲ្យអ្នកឈឺចាប់ ។
-
រវាងគំនូរទាំងពីរ សូមធ្វើបញ្ជីនៃអ្វីដែលអ្នកយល់អំពីព្រះអង្គសង្គ្រោះ ដែលអាចជួយអ្នកអភ័យទោសដល់អ្នកដទៃ ។
សូមពិចារណាអញ្ជើញសិស្សឲ្យចែកចាយអ្វីដែលពួកគេបានសរសេរអំពីព្រះអង្គសង្គ្រោះ ។ អ្នកក៏អាចលើកទឹកចិត្តពួកគេឲ្យចែកចាយអ្វីដែលពួកគេបានរៀនជាមួយអ្នកដទៃនៅខាងក្រៅថ្នាក់ផងដែរ ។ បន្ថែមសាក្សីរបស់អ្នកអំពីជំនួយដែលព្រះអង្គសង្គ្រោះផ្តល់ឲ្យយើង នៅពេលយើងព្យាយាមអភ័យទោសដល់អ្នកដទៃ ។