Numeros 11–14; 20–24; 27: Leksiyon 57

Numeros 21

Motan-aw sa Manluluwas diha sa Hugot nga Pagtuo

Samtang ang mga anak sa Israel nagpadayon latas sa kamingawan, sila mireklamo batok sa Ginoo. Agig tubag, Siya mipadala og malala nga mga bitin sa ilang taliwala. Dayon iyang gisugo si Moises sa pagbutang og bitin nga tumbaga sa tukon isip simbolo sa Manluluwas ug misaad nga kadtong motan-aw niini mamaayo. Kini nga leksiyon makatabang sa mga estudyante nga motan-aw kang Jesukristo diha sa hugot nga pagtuo.

Pagpangandam sa estudyante: Dapita ang mga estudyante sa pagbasa sa Numeros 21:7–9 ug Alma 33:18–21, nga mangita sa unsay atong makat-onan gikan niini nga asoy sa Daang Tugon. Awhaga sila nga andam nga mopakigbahin unsay ilang nakat-onan sa klase.

Posibleng mga Kalihokan sa Pagkat-on

Usa ka pinaakan sa bitin

Ikonsiderar ang pagsugod sa klase pinaagi sa pagpakita og hulagway sa usa ka bitin.

• Unsa sa imong hunahuna ang sitwasyon kon mapaakan sa usa ka lala nga bitin?

  Tabangi ang mga estudyante nga makasabot nga ang mapaakan sa lala nga bitin mahimong hinungdan sa paghubag, pagbutoy-butoy, grabe nga kasakit, ug sakit. Sa grabe nga mga kaso, mahimo pa gani kini nga makamatay.

• Unsa ang pipila sa lain-laing mga paagi nga mahimong reaksiyon sa mga tawo human mapaakan?

  Ang pipila ka posible nga mga tubag mao ang: kalisang, manimalos sa bitin ug patyon kini, maghulat kon unsa ang reaksyon sa ilang lawas sa pinaakan, o diha dayon mangayo og tabang.

  Tapad sa bitin, isulat ang sala. Dapita ang mga estudyante sa pagtandi kon sa unsang paagi ang sala ug ang mga sangpotanan niini mahimong sama sa pinaakan sa bitin.

• Unsa ang pipila sa lain-laing paagi nga mahimong reaksyon sa mga tawo human sa pagpakasala?

Pipila sa posible nga mga tubag mao ang pagpangatarongan sa ilang mga aksiyon, pagpaningkamot nga ibalewala ang ilang mga pagbati, pagtago sa ilang mga aksiyon tungod sa kaulaw o kaulawan, paghulat aron makita unsa pa nga mga sangpotanan ang ilang atubangon, o pagdangop ngadto sa Ginoo alang sa tabang.

Paggahin og higayon sa pagpamalandong kon unsay imong reaksiyon. Modangop ka ba sa Ginoo alang sa tabang? Ngano o nganong dili? Samtang magtuon ka niini nga leksiyon, tinguhaa ang giya sa Espiritu Santo aron sa pagtabang nimo nga mangita sa Manluluwas alang sa tabang sa imong kinabuhi. Mahimo usab kang mangita og tabang uban ang bisan unsang mga pangutana o mga kabalaka mahitungod sa pagtan-aw ngadto sa Manluluwas.

Ang nagdilaab nga mga bitin

Sama sa ilang gibuhat sa makadaghang higayon kaniadto, ang mga anak sa Israel mireklamo batok sa Ginoo samtang mipanaw sila sa kamingawan. Basaha ang mosunod nga mga bersikulo ug tubaga ang ilang giuban nga mga pangutana. Mahimong mapuslanon ang pagkahibalo nga ang nagdilaab nagpasabot nga “makahilo”.

Ikonsiderar ang pagpakita o pagsulat sa mosunod nga mga bersikulo ug mga pangutana diha sa pisara. Mahimo nimong dapiton ang mga estudyante sa pagtuon niini og dungan diha sa gagmay nga mga grupo, o dapita ang mga estudyante sa pagtuon sa mga bersikulo nga sila ra, dayon ipakigbahin ang ilang mga tubag sa usa ka kapares o sa ginagmay nga grupo aron makompirma ang ilang mga tubag. Kon makatabang, ipasabot nga tungod kay ang mga anak sa Israel wala tugoti sa pagbiyahe agi sa yuta sa Edom, apan kinahanglan nga mobiyahe libot niini (tan-awa sa Numeros 21:4), nga nagpasabot nga ang ilang panaw mas taas ug mas lisod.

Numeros 21:4–5. Nganong ang mga anak sa Israel misulti batok sa Ginoo ug ni Moises?

Numeros 21:6. Agig tubag, unsa ang gipadala sa Ginoo?

Numeros 21:7–9. Unsa ang gisugo sa Ginoo kang Moises ug sa mga anak sa Israel nga buhaton aron mamaayo?

1 Nephi 17:41; Alma 33:18–21. Nganong ang ubang mga anak sa Israel wala motan-aw?

Hunahunaa ang pagdapit sa mga estudyante sa pagsulat sa mga bersikulo sa Basahon ni Mormon nga mga cross-reference sa Numero 21:9 o i-highlight ang footnote 9a.

• Unsa ang mipatigbabaw kaninyo gikan niini nga asoy?

• Sa unsang paagi kaha nga kita usahay parehas sa mga anak sa Israel?

Usa ka simbolo alang sa Manluluwas

Atol sa Iyang mortal nga pangalagad, ang Manluluwas mitabang kanato nga makasabot unsa ang gisimbolo sa bitin nga tumbaga diha sa tukod. Basaha ang Juan 3:14–16, nga mangita sa tubag. (Pwede nimong markahan kini isip usa ka cross-reference sa Numeros 21:7–9.)

Human mopakigbahin ang mga estudyante sa ilang nakaplagan, ikonsiderar ang pagpakita sa mosunod nga mga hulagway.

• Unsa ang atong makat-onan gikan niini nga mga istorya?

Mahimong mopakigbahin ang mga estudyante og usa ka baroganan nga susama sa mosunod: Samtang motan-aw kita sa Manluluwas diha sa hugot nga pagtuo, Siya moayo kanato sa espirituhanon nga paagi. Ikonsiderar ang pagsulat niini nga baroganan diha sa pisara.

Aron mas masabtan kini nga baroganan, dapita ang mga estudyante sa pagbasa sa mosunod nga mga pamahayag.

Si Presidente Russell M. Nelson mitudlo:

Ako mohangyo kaninyo sa pagduol ngadto Kaniya aron Siya makaayo kaninyo! Siya moayo kaninyo gikan sa sala samtang kamo maghinulsol. Siya moayo kaninyo gikan sa kaguol ug kahadlok. Siya moayo kaninyo gikan sa mga pag-antos dinhi niini nga kalibotan. (“Ang Tubag sa Kanunay Mao si Jesukristo,” Liahona, Mayo 2023, 127)

• Unsa ang imong nagustohan o nakat-onan gikan niini nga pamahayag?

• Sa unsang paagi nga ang pagkaayo gikan sa lala sama sa giayo sa Manluluwas gikan sa mga sangpotanan sa sala?

Motan-aw ngadto sa Manluluwas

Dapita ang mga estudyatne sa paggahin og panahon sa pagtan-aw sa hulagway sa Manluluwas diha sa krus ug pamalandongan ang mga paagi nga kita makatan-aw Kaniya diha sa hugot nga pagtuo karon. Dayon dapita sila sa paghimo sa mosunod diha sa gagmayng mga grupo.

1. Paglista og pipila ka paagi nga kita mahimong motan-aw sa Manluluwas diha sa hugot nga pagtuo.

2. Hisgoti ang mga rason nga kita mahimong manlimbasog sa paghimo niini nga mga butang. (Mahimo nimong hisgotan ngano nga kita, sama sa mga anak ni Israel, mahimong matental sa pagtuo nga kini nga mga paagi sa pagtan-aw ngadto sa Manluluwas yano ra kaayo o dili makatabang kanato.)

3. Bisan sa bisan unsang mga panlimbasog, hisgoti kon nganong bililhon ang pagtan-aw sa Manluluwas. (Kini mahimong maglakip sa pagpakigbahin og mga ehemplo diha sa kasulatan sa mga pagpang-ayo sa Manluluwas, sa imong mga pagbati o pagpamatuod bahin sa pagtan-aw ngadto sa Manluluwas, o mga kasinatian nga imong nasinati sa dihang ikaw mitan-aw sa Manluluwas diha sa hugot nga pagtuo ug unsay nahitabo.)

Kon ang mga estudyante nagkinahanlan og pipila ka ideya sa mga paagi nga kita makatan-aw ngadto sa Manluluwas, dapita sila sa pagpangita og mga ehemplo gikan sa usa ka batan-ong lalaki diha sa “Pag-ula: Dili Usa ka Higayon nga Butang” (3:00).

Hangyoa ang mga estudyante sa pagpakigbahin og pipila sa mga importante diha sa ilang mga panaghisgotan. Kon ang mga estudyante dili natural nga mopakigbahin sa ilang mga gibati, pagpamatuod, o mga kasinatian, ikonsiderar ang paghatag kanila sa mosunod nga prompt:

Nagtuo ko nga bililhon kaayo nga motan-aw ngadto sa Manluluwas diha sa hugot nga pagtuo tungod kay .

Ang kalihokan sa ibabaw usa ka ehemplo sa pagtabang sa mga estudyante nga ikonsiderar ang ilang mga gibati mahitungod ni Jesukristo. Ang pagtabang sa mga estudyante nga himoon kini makatugot sa Espiritu Santo nga mopamatuod bahin Kaniya.

(Alang sa dugang nga pagbansay tan-awa sa: “Pagpamatuod kanunay ug dapita ang mga tigkat-on sa pagpakigbahin sa ilang mga pagbati, mga kasinatian, ug mga pagpamatuod,” sa Pagpalambo sa mga Kahanas sa Magtutudlo).

Samtang mopakigbahin ang mga estudyante, seguroa nga klaro nga ang Manluluwas motabang ug moayo kanato sa paagi ug sa panahon nga labing maayo alang kanato.

Unsa ang imong gituohan

Tinguhaa ang tabang sa Espiritu Santo samtang imong isulat ang usa ka paagi nga ikaw mituo nga ang Ginoo gusto nga ikaw motan-aw ngadto Kaniya, o mopadayon nga motan-aw ngadto Kaniya, diha sa imong kinabuhi. Mahimo usab nimong isulat kon nganong lisod kini apan bililhon gihapon.

Dugang nga mga Kapanguhaan

Unsa ang atong mabuhat aron sa pagtinguha sa pag-ayo sa Manluluwas?

Si Presidente Russell M. Nelson mitudlo:

Kon ang mapait nga pagsulay moabot kanato, mao kini ang panahon nga padak-an nato ang atong pagtuo sa Dios, maningkamot pag-ayo, ug moserbisyo sa uban. Dayon Iyang ayohon ang nasakitan natong mga kasingkasing. Iyang ihatag kanato ang personal nga kalinaw ug kahupayan. Kadtong importanting mga gasa dili maunsa, bisan sa kamatayon. (“Jesukristo—ang Gamhanang Tig-ayo,” Liahona, Nob. 2005, 87)

Si Sister Cristina B. Franco, kanhi Ikaduhang Magtatambag sa Kinatibuk-ang Kapangulohan sa Primary, mitudlo:

Dili ba kitang tanan … naguba og gamay, naliki, ug nadaot, mibati nga kita dili na gayod mabalik sa kaniadto? Hinoon, samtang kita moduol ngadto ni Jesukristo pinaagi sa paggamit sa atong hugot nga pagtuo diha Kaniya, maghinulsol, ug maghimo ug maghupot sa atong mga pakigsaad, ang atong pagkanaguba—bisan unsa ang nakaingon niini—mamaayo. Kini nga proseso, nga nagdapit sa makaayo nga gahom sa Manluluwas nganhi sa atong mga kinabuhi, dili lamang nagpahiuli kanato ngadto sa unsa kita kaniadto apan naghimo kanato nga mas maayo pa kay sa kita sukad nahimo. Nahibalo ako nga pinaagi sa atong Manluluwas, si Jesukristo, kitang tanan matarong, mahimong hingpit, ug matuman ang atong katuyoan. (“Ang Makaayo nga Gahom ni Jesukristo,” Liahona, Nob. 2020, 60–62)

Unsa ang pipila ka ehemplo sa gagmay ug yano nga mga butang nga atong mahimo aron mas mopaduol ngadto sa Manluluwas?

Si Presidente Dallin H.​Oaks sa Unang Kapangulohan namalandong sa unsay gihangyo sa mga anak sa Israel nga buhaton aron mamaayo ug miingon, “Gamay kaayo nga butang alang sa milagroso nga resulta!” Mipakigbahin usab siya og pipila ka gagmay ug yano nga mga buhat nga makapaduol nato sa atong Manluluwas:

Ikonsiderar ang pagtuon sa kasulatan nga gitudlo kanato nga iapil sa atong inadlaw-adlaw nga kinabuhi. O ikonsiderar ang personal nga mga pag-ampo ug ang pagluhod diha sa mga pag-ampo sa pamilya nga gihimo kanunay sa matinud-anong mga Santos sa Ulahing mga Adlaw. Ikonsiderar ang pagtambong sa mga klase sa seminary alang sa kabatan-onan o institute alang sa mga young adult. Bisan og ang matag usa niini nga mga buhat ingon og gagmay ug yano, paglabay sa panahon moresulta kini sa gamhanang espirituhanong pagbayaw ug pagtubo. Kini mahitabo tungod kay ang matag usa niining gagmay ug yanong mga butang nagdapit sa pagpakig-uban sa Espiritu Santo, ang Tigpamatuod nga molamdag ug mogiya nato sa kamatuoran. …

Laing tinubdan sa espirituhanong pagbayaw ug pagtubo mao ang padayon nga buhat sa paghinulsol, bisan sa daw gagmay nga mga kalapasan. Ang atong kaugalingong dinasig nga pagtimbang-timbang sa kaugalingon makatabang nato nga makakita sa atong pagkapakyas ug unsaon nga makahimo kita og mas maayo. Ang maong paghinulsol kinahanglang mag-una sa atong sinemana nga pag-ambit sa sakramento. (“Gagmay ug Yano nga mga Butang,” Liahona, Mayo 2018, 90)

Dugang nga mga Kalihokan sa Pagkat-on

Usa ka laing paagi sa pagsugod

Ikonsiderar ang pagtan-aw og bidyo bahin sa Manluluwas nga nag-ayo sa uban, sama sa “Si Jesukristo Adunay Kalooy ug Giayo ang Katawhan” gikan sa time code nga 1:43 hangtod 6:19.

• Kon ang Manluluwas ania karon, kinsa kaha ang imong dad-on ngadto Kaniya aron mamaayo? Ngano man?

• Gawas sa mga sakit, unsa ang pipila sa ubang paagi nga ang Manluluwas makaayo?

Ang mga kasulatan nag-asoy sa daghang higayon dihang ang Manluluwas miayo sa mga tawo gikan sa mga sakit, pagkabuta, sanla, ug niadtong kinsa “gitakbuyan sa tanan nga matang sa sakit” (3 Nephi 17:9). Ang Manluluwas mitudlo usab nga ang Iyang mga pagpang-ayo nagpakita kon unsay Iyang mahimo sa mga tawo sa espirituhanong paagi (tan-awa sa Marcos 2:2–11). Pamalandongi kon unsa ang imong gusto sa personal nga tabang sa Ginoo ug kon ikaw aduna bay hugot nga pagtuo nga Siya makaayo kanimo.

Mga Simbolo sa Manluluwas

Kon mapuslanon ang pagtutok sa ubang simbolo sa Manluluwas niini nga kapitulo, isulat ang mga pulong nga karnero, bato, ug tubig diha a pisara.

• Unsay komon niini nga mga butang? (Kining tanan gigamit sa pagsimbolo sa Manluluwas.)

• Sa unsang paagi kini nagsimbolo sa Manluluwas?

Atol sa 40 ka tuig sa mga Israelita didto sa kamingawan, ang Ginoo migamit og daghang lain-lain nga mga butang ug mga kasinatian sa pagtudlo kanila mahitungod sa Iyang gahom sa pag-ayo ug pagsangkap sa mga tawo nga modangop ngadto Kaniya. Sa duha ka magkalahi nga okasyon, ang mga tawo nagbagulbol batok kang Moises sa dihang sila walay tubig didto sa desyerto (tan-awa sa Exodo 17:1–4; Numeros 20:1–5).

Ikonsiderar ang pagdapit sa katunga sa klase sa pagbasa sa Exodo 17:5–6 ug sa laing katunga sa pagbasa sa Numeros 20:7–8, nga maghunahuna kon sa unsang paagi kini nga panghitabo simbolikanhong nagpahinumdom kanila mahitungod kang Jesukristo. Kon gikinahanglan, pahinumdomi sila nga ang Manluluwas gikompara sa usa ka lig-on nga sukaranan o usa ka bato sa daghang okasyon (tan-awa sa Helaman 5:12; Moises 7:53).

• Sa unsang paagi ang mga panghitabo gikan niini nga mga bersikulo nagpahinumdom kaninyo sa Manluluwas? (Kon nagkinahanglan ka og tabang, ikonsiderar ang pagtuon sa Moises 7:53 ug Juan 4:13–14.)

Sama nga ang mga Israelita nagsalig sa Dios sa paghatag ug tubig didto sa desyerto, kita usab nagsalig sa Dios sa pagtagana sa atong mga panginahanglan. Pamalandongi kon sa unsang paagi kini nga mga simbolo makatabang nimo nga mas makaila sa Ginoo.