Numeros 11–14; 20–24; 27: Leksiyon 56

Numeros 11–14

Pagpili sa Hugot nga Pagtuo kay sa Kahadlok

Usahay mahimong lisod ang pagpadayon uban ang hugot nga pagtuo imbes nga kahadlok. Ang mga anak sa Israel nag-atubang niana nga hagit. Human sila mipanaw sa kamingawan, ang Ginoo migiya sa mga Israelita ngadto sa utlanan sa gisaad na yuta. Gisugo sa Ginoo si Moises sa pagpadala og 12 ka lalaki ngadto sa yuta ug inig balik magdala og balita bahin sa yuta ug sa mga lumulupyo niini. Kadaghanan sa 12 nahadlok mahitungod sa posibilidad sa pagbuntog sa gisaad nga yuta, apan sila si Caleb ug Joshua adunay hugot nga pagtuo nga ang Ginoo motabang kanila. Kini nga leksiyon makatabang sa mga estudyante sa pagtan-aw sa ilang mga hagit uban sa mas dakong pagtuo kang Jesukristo.

Pagpangandam sa estudyante: Dapita ang mga estudyante sa paghunahuna sa mga babag o mga hagit nga kasamtangan nilang giatubang. Pwede silang mamalandong sa unsang paagi nila kini giatubang uban ba sa kahadlok o uban sa hugot nga pagtuo sa Ginoo.

Posibleng mga Kalihokan sa Pagkat-on

Paghunahuna sa mga hagit nga dunay hugot nga pagtuo

Ikonsiderar ang pagsulat sa duha ka ulohan sa magkaatbang nga kilid sa pisara: Hugot nga Pagtuo ug Kahadlok. Ipakita ang mosunod nga mga kasinatian, o ubang may kalabotan nga mga ehemplo, sa tagsa-tagsa. Dapita ang mga estudyante sa pagpamalandong kon gitan-aw ba nila ang matag ehemplo uban ang hugot nga pagtuo ni Jesukristo o uban ang kahadlok.

Usa ka dakong pasulit o proyekto sa eskwelahan

Paghinulsol

Ang umaabot

Pagpaambit sa ebanghelyo

• Sa unsang paagi nga atong masulti kon kita nagtan-aw sa usa ka sitwasyon uban ang hugot nga pagtuo kang Jesukristo o uban ang kaluoy?

• Unsay kalainan ang mahimo kon kita motan-aw sa sitwasyon uban ang hugot nga pagtuo o ang kahadlok?

• Nganong usahay lisod makita ang mga sitwasyon nga sama niini nga adunay hugot nga pagtuo kang Jesukristo?

Padayon sa pagpamalandong niini nga mga pangutana samtang magtuon ka karon. Dapita ang Espiritu Santo sa imong pagkat-on samtang maghunahuna ka kon unsaon paglantaw ang imong mga hagit uban ang mas dakong pagtuo kang Jesukristo.

Ang report sa mga espiya mahitungod sa Canaan

Human ang mga anak sa Israel mipanaw sa kamingawan, ang Ginoo midala kanila ngadto sa utlanan sa gisaad nga yuta. Mao kadto ang yuta sa Canaan. Ang Ginoo misulti kanila nga kinahanglan nilang buntogon ang yuta. Misugo ang Ginoo ni Moises sa pagpili og usa ka sakop gikan sa kada usa sa napulog duha ka tribo. Kini nga mga lalaki gimandoan sa pagsusi sa yuta ug mobalik dala ang taho kon unsay ilang nakaplagan. Human sa 40 ka adlaw nga pagsusi sa yuta, ang 12 ka lalaki mibalik uban sa ilang mga balita, uban ang mga bunga sa yuta (tan-awa sa Numeros 13:1–25).

Ikonsiderar ang pagbahin sa klase ngadto sa katulo. Dapita ang kada grupo sa pagbasa og usa sa mosunod nga mga asoy. Hangyoa ang mga estudyante sa paghunahuna nga sila nagrepresentar sa mga tawo nga ilang gibasa. Mahimo silang mag-andam og mga tubag sa mga pangutana nga mosunod. Ang matag grupo mahimo dayon nga mopakigbahin sa ilang mga tubag, o mahimo nimong paduolon ang usa o duha ka estudyante sa atubangan ug gamiton ang mga pangutana sa pag-interbiyo sa matag grupo.

1. Numeros 13:26–29, 31–33: Ang report sa 10 ka espiya sa yuta ug sa katawhan

• Unsaon ninyo paghulagway ang yuta sa Canaan ug sa katawhan nga inyong nakita?

• Unsay inyong gibati sa dihang nakita ninyo ang mga tawo? Ngano man?

2. Numeros 14:1–4: Ang tubag sa mga Israelita sa report sa 10 ka espiya

• Unsay inyong gibati sa dihang naminaw kamo sa gireport sa 10 ka espiya? Ngano man?

• Unsay inyong gisugyot nga buhaton sa mga tawo imbes mosunod kang Moises ngadto sa gisaad nga yuta? Ngano man?

3. Numeros 13:30; 14:6–9: Ang report ni Josue ug Caleb bahin sa yuta ug sa katawhan

• Unsaon ninyo paghulagway ang yuta sa Canaan ug sa katawhan nga inyong nakita?

• Ang ubang mga espiya kombinsido nga ang Israel dili makabuntog sa mga tawo sa Canaan. Nganong nakasiguro man kamo nga ang Israel makahimo?

Human ang kada grupo makatubag sa ilang mga pangutana, pasalamati sila sa ilang pag-apil.

Rebyoha ang Numeros 13:30; 14:8–9, nga mangita sa mga pulong ug mga hugpong sa mga pulong nga nagpakita sa hugot nga pagtuo ni Caleb ug Josue ngadto sa Ginoo.

• Unsa nga mga leksiyon ang inyong nakat-onan gikan ni Caleb ug Josue?

  Taliwala sa lain-laing mga tubag nga mahatag sa mga estudyante, tabangi sila sa pag-ila sa kamatuoran nga ang pagsalig sa Ginoo makatabang nato nga makita ang atong mga hagit uban sa hugot nga pagtuo kay sa kahadlok.

• Unsa sa imong hunahuna ang gipasabot sa paglihok uban ang hugot nga pagtuo diha sa Langitnong Amahan ug ni Jesukristo kon kita mag-atubang og mga hagit?

Hugot nga pagtuo batok sa kahadlok

Si Elder Kevin R. Duncan sa Seventy mipasabot og usa ka butang nga atong makat-onan gikan sa kasinatian sa mga anak ni Israel diha sa Numeros 13–14:

Sama sa mga anak sa Israel, kita moatubang og makahahadlok nga mga babag. … Dili sayop kon kita moila niana nga mga babag. Apan importante nga kini atong atubangon uban sa hugot nga pagtuo. …

… Ang matag hagit ug matag babag nga atong giatubang usa ka oportunidad sa pagpili, sama ni Josue ug ni Caleb, nga misalig sa Ginoo. Ang “ayaw pagsukol … , ayaw kahadlok” (Numeros 14:9) usa ka maayo nga tambag alang sa mga anak sa Israel, ug maayo gihapon kini nga tambag alang sa matag usa kanato karon. (“Ayaw Pagsukol, Ayaw Kahadlok,” Liahona, Abr. 2022, 47)

• Unsa nga mga kasinatian kaniadto ang aduna ang mga anak sa Israel ngadto sa Ginoo? Sa unsang paagi ang paghinumdom niini nga mga kasinatian makadugang sa ilang pagtuo ngadto Kaniya?

• Ngano kaha nga ang ubang mga tawo makalimot sa unsay ilang nahibaloan mahitungod sa Ginoo kon mag-atubang og hagit?

Bisan pa sa daghang milagro nga gihatag sa Ginoo ug sa pagpamatuod ni Caleb ug Josue, ang mga Israelite mipadayon sa pagbagulbol. Isip resulta, ang Ginoo mipahayag nga tungod sa ilang pagbagulbol ug pagduhaduha, ang kadaghanan sa hamtong nga mga Israelita dili tugotan nga makasulod sa gisaad nga yuta (tan-awa sa Numeros 14:26–39).

Basaha ang Numeros 14:24, 30, nga mangita kon sa unsang paagi gipanalanginan sila si Caleb ug Josue tungod sa ilang pagbutang sa ilang hugot nga pagtuo ngadto Kaniya.

Aron tabangan ang mga estudyante nga atubangon ang ilang mga hagit nga dunay hugot nga pagtuo, ikonsiderar ang pagpakita sa mosunod nga tsart diha sa pisara. Dapita ang mga estudyante nga kopyahon ang tsart diha sa ilang mga journal sa pagtuon.

Hagit:

Pamahayag nga Gibase sa Kahadlok	Pamahayag nga Gibase sa Hugot nga Pagtuo
Pamahayag nga Gibase sa Kahadlok	Pamahayag nga Gibase sa Hugot nga Pagtuo

Dapita ang mga estudyante sa pagpakigbahin og pipila ka hagit sa modernong panahon nga mahimo nilang atubangon ug mga paagi nga sila makatubag uban ang kahadlok o hugot nga pagtuo.

Mahimo kang mohatag og ehemplo nga sama sa:

Hagit: Pagsulti diha sa publiko nga kahimtang

Pamahayag nga gibase sa kahadlok: “Dili ko makasulti atubangan sa uban tungod kay kanunay kong kulbaan nga magkasagol-sagol ang akong mga pulong.”

Pamahayag nga gibase sa hugot nga pagtuo: “Ang pagsulti sa publiko lisod para nako, apan nagtuo ko nga ang Ginoo makahatag kanako og kaisog ug kusog sa pagbuhat niini.”

Mahimong gamiton sa mga estudyante ang mga sitwasyon gikan sa sinugdanan sa leksiyon.

Alang sa mosunod nga kalihokan, ikonsiderar ang paghatag og mga piraso sa papel alang sa mga estudyante.

Pamalandongi ang usa ka hagit nga imong giatubang, o mahimong atubangon, sa imong kinabuhi. Isulat ang hagit sa imong tsart uban sa usa ka pamahayag nga gibase sa kahadlok nga tingali imong hunahunaon o tuohan bahin niana nga hagit.

Pamalandongi kon unsa ang gitudlo sa Espiritu Santo kanimo mahitungod sa Langitnong Amahan ug ni Jesukristo gikan sa mga kasulatan, sa mga pulong sa mga propeta, ug sa imong kaugalingong espirituhanong mga kasinatian. Hunahunaa kon sa unsang paagi kini nga kahibalo makatabang nimo sa pag-atubang sa mga hagit nga dunay hugot nga pagtuo sa Ginoo. Dayon pagsulat og pamahayag nga gibase sa hugot nga pagtuo diha sa imong journal. Mahimo usab nimong isulat ang pamahayag nga gibase sa hugot nga pagtuo sa usa ka piraso sa papel nga mahimo nimong dad-on sa balay ug ibutang kini sa usa ka dapit nga kanunay nimong makita. O kuhai og litrato ang pamahayag gamit ang imong selpon. Mahimo pa gani nimong ibutang ang litrato isip wallpaper sa imong selpon.

Ikonsiderar ang pagdapit og pipila ka andam nga mga estudyante sa pagpakigbahin sa ilang mga hunahuna ug mga pagbati mahitungod sa Langitnong Amahan ug ni Jesukristo. Mahimo silang mopakigbahin kon sa unsang paagi ang Ginoo nagtabang nila sa pag-atubang sa mga hagit nga dunay hugot nga pagtuo. Ipamatuod nga ang Ginoo mopanalangin kanato samtang matinud-anon natong atubangon ang atong mga hagit.

Dugang nga mga Kapanguhaan

Unsaon nato nga makapili sa hugot nga pagtuo kay sa kahadlok?

Si Presidente Dieter F. Uchtdorf, kaniadto sa Unang Kapangulohan, mipasabot:

Imbes nga maghunahuna sa gidak-on sa atong mga hagit, dili ba mas maayong motutok sa walay kinutubang kahalangdon, kaayo, ug hingpit nga gahom sa atong Dios, mosalig Kaniya ug mangandam uban sa malipayong kasingkasing sa pagbalik ni Jesus nga mao ang Kristo?

Isip Iyang katawhan sa pakigsaad, dili kinahanglang maparalisar kita sa kahadlok nga basin dunay ngil-ad nga mahitabo. Hinoon, mopadayon kita uban sa hugot nga pagtuo, kaisog, determinasyon, ug pagsalig sa Dios samtang atong atubangon ang mga hagit ug mga oportunidad sa umaabot. (“Ang Hingpit nga Gugma Nagahingilin sa Kahadlok,” Liahona, Mayo 2017, 106)

Ngano kaha nga ang 10 ka espiya mitubag sa paagi nga ilang gibuhat?

Si Elder Kevin R. Duncan sa Seventy mipakigbahin:

Ang tanang napulog duha ka espiya nakasaksi sa samang mga benepisyo ug sa samang mga babag sa pagtuman sa sugo sa Ginoo sa pagpuyo sa Canaan. Bisan pa man, ang ilang mga tubag nagpakita kon sa unsang paagi nga ang napulo ka sakop sa grupo nga nakakita lamang sa mga problema, samtang ang laing duha mibutang sa ilang pagsalig diha sa Dios.

Ang napulo sa mga espiya nakakita lamang sa mga kalisdanan sa ilang atubangan. Tungod kay wala sila mosalig sa Ginoo, nahadlok sila sa pagsunod sa Iyang sugo sa pag-adto sa yuta sa Canaan. Si Caleb ug Josue, sa laing bahin, nasayod nga kon ang mga Israelita adunay hugot nga pagtuo, ang Ginoo mohatag sa yuta sa Canaan ngadto kanila. (“Ayaw Pagsukol, Ayaw Kahadlok,” Liahona, Abr. 2022, 46)

Dugang nga mga Kalihokan sa Pagkat-on

Ehemplo sa Basahon ni Mormon

Aron matabangan ang mga estudyante nga makakita og ehemplo sa Basahon ni Mormon sa pag-atubang sa mga babag uban sa hugot nga pagtuo kay sa kahadlok, mahimo nimong ipakomparar sa mga estudyante ang 1 Nephi 3:31; 4:1–3 uban sa istorya sa 12 ka espiya. Dayon pangutana sama sa:

• Sa unsang paagi si Laman ug Lemuel sama sa 10 ka espiya?

• Sa unsang paagi si Nephi sama ni Caleb ug Josue?

Numeros 11:29. “Hinaot unta nga ang tibuok katawhan sa Ginoo mga manalagna”

Mahimong mapuslanon ang pagtabang sa mga estudyante sa pagpalawom sa ilang panabot sa personal nga pagpadayag. Aron mahimo kini, mahimo nilang basahon ang Numeros 11:14, 24–25, nga mangita kon giunsa sa Ginoo paghupay ang palas-anon ni Moises sa pagpangulo.

Ipasabot nga 70 ka elder ang napanalanginan nga makadawat og pagpadayag ug mamulong ingon nga dinasig sa Espiritu Santo. Ang Numeros 11:26–28 nagrekord nga si Josue mihangyo kang Moises sa pagpahunong sa duha sa mga elder sa pagpanagna. Mahimong basahon sa mga estudyante ang Numeros 11:29, nga mangita sa tubag ni Moises sa kabalaka ni Joshua.

Ipasabot nga si Moises wala mag-ingon nga siya nanghinaot nga ang tanan mahimong propeta, naghupot sa mga yawe sa pagkapari nga gikinahanglan aron makadawat og pagpadayag sa pagpangulo sa Simbahan. Apan, mahimo unta niyang ipasabot nga nanghinaot siya nga ang tanang tawo “mga propeta,” nagpasabot nga sila adunay pagpamatuod ni Jesus, “Kay ang pagpanghimatuod ni Jesus mao man ang espiritu sa [pagpanagna]” (Pinadayag 19:10).

Dayon mahimong basahon sa mga estudyante ang mosunod nga pamahayag gikan ni Presidente Russell M. Nelson:

Wala gayod sukad nga mas importante nga makahibalo unsaon sa pagpaminaw sa Espiritu nga mamulong kaninyo kay sa karon. …

Ako mousab sa akong hangyo alang ninyo nga inyong buhaton bisan unsa ang makapadugang sa inyong espirituhanong kapasidad sa pagdawat og personal nga pagpadayag. (“Paminaw Kaniya,” Liahona, Mayo 2020, 90)

Mahimo nimong dapiton ang mga estudyante nga pamalandongan sa hilom kon unsay ilang gibuhat aron makadawat og personal nga pagpadayag.

Pagbagulbol

Ang Numbers 11–14 naglangkob og pipila ka kasinatian nga miresulta sa mga Israelita nga magbagulbol. Mahimong basahon sa matag grupo sa mga estudyante ang usa sa mosunod nga mga tudling sa kasulatan:

Numeros 11:1–6, 16–20, 31–33

Numeros 12:1–13

Numeros 14:1–5

Mahimong hisgotan sa mga estudyante ang kasinatian nga maoy hinungdan sa pagbagulbol sa mga Israelita ug sa mga resulta sa ilang pagbagulbol. Mahimo kang mangutana og sama sa:

• Sa unsang paagi nga ang pagbagulbol makapahilayo nato sa atong kaugalingon gikan sa Langitnong Amahan, ni Jesukristo, ug sa uban?

Isip kabahin sa inyong diskusyon, mahimo nimong ipakita ang “Barog ug Ayaw Paglihok” gikan sa time code nga 18:43 hangtod 21:15.

Kristohanong kaaghop

Ang mga estudyante mahimong makabenepisyo gikan sa pagkat-on og dugang mahitungod sa Kristohanong kinaiya sa kaaghop. Mahimo nilang basahon ang Numeros 12:3, nga mangita sa usa sa Kristohanong mga hiyas nga naa ni Moises. Mahimo kang magsulat og duha ka hugpong sa mga pulong diha sa pisara: Ang kaaghop mao ang … ug Ang kaaghop dili ang… .

Isip magkapares, ang mga estudyante mahimong mangita og mga kasulatan o mga pamahayag mahitungod sa kaaghop gamit ang Giya ngadto sa mga Kasulatan o ang Librarya sa Ebanghelyo nga app. Human sa pagtuon, ang usa ka kapares mahimong mogamit sa unsay ilang nakat-onan sa pagkompleto sa Ang kaaghop mao ang … samtang ang laing kapares mokompleto sa Ang kaaghop dili… .

Kon makatabang, mahimo nimong basahon ang mosunod nga pamahayag gikan ni Elder David A. Bednar sa Korum sa Napulog Duha ka Apostoles:

Ang kaaghop usa ka mahinungdanong kinaiya sa Manunubos ug mailhan pinaagi sa matarong nga pagtubag, andam sa pagkamanunuton, ug lig-on sa pagpugong sa kaugalingon. (“Maaghop ug Mapaubsanon sa Kasingkasing,” Liahona, Mayo 2018, 32)

Mahimong hisgotan dayon sa klase kon giunsa pagpakita ni Jesukristo ang kaaghop sa Iyang kinabuhi.