Numeros 11–14; 20–24; 27

Numeros 11–14; 20–24; 27

Kinatibuk-ang Pagpasabot

Human gipadala ni Moises ang 12 ka espiya aron sa pagdala og balik sa balita kabahin sa yuta sa Canaan, duha lamang kanila, si Caleb ug Josue, ang adunay hugot nga pagtuo nga ang Ginoo motabang kanila nga magmalamposon nga mabuntog kini sama sa Iyang gisaad. Agig tubag, ang Ginoo mipahayag nga ang mga anak ni Israel maglatagaw sa kamingawan hangtod nga ang mga hamtong mamatay na, gawas lamang sa duha ka espiya. Samtang ang mga tawo padayon nga naglatagaw sa kamingawan ug nagreklamo batok sa Ginoo, Siya mipadala sa malala nga mga bitin. Kon kadtong napaakan sa mga bitin motan-aw pa unta sa tumbaga nga bitin diha sa usa ka sungkod isip usa ka simbolo sa Manluluwas, sila maayo.

Pagpamatuod kanunay, ug dapita ang mga tigkat-on sa pagpakigbahin sa ilang mga pagbati, mga kasinatian, ug mga pagpamatuod. Samtang ang mga estudyante mopakigbahin sa ilang mga pagbati, mga kasinatian, ug mga pagpamatuod, ang Espiritu Santo mosaksi sa kamatuoran sa unsay ilang gisulti, sa ilang kaugalingon nga mga hunahuna ug mga kasingkasing ingon man ngadto sa uban. Aron magkat-on pa mahitungod sa gahom sa pagpakigbahin sa pagpamatuod, tan-awa sa “Mipamatuod ang Manluluwas ngadto Niadtong Iyang Gitudloan” (Pagtudlo Sumala sa Pamaagi sa Manluluwas, p. 18). Ang usa ka ehemplo sa paghimo niini anaa sa Leksiyon 57: “Numeros 21.”

Pangandam sa Pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Numeros 11–14

Katuyoan sa leksiyon: Kini nga leksiyon makatabang sa mga estudyante nga makasabot unsaon paglantaw sa ilang mga hagit uban sa dakong hugot nga pagtuo diha ni Jesukristo.

• Pagpangandam sa estudyante: Dapita ang mga estudyante sa paghunahuna sa mga babag o mga hagit nga kasamtangan nilang giatubang. Pwede silang mamalandong sa unsang paagi nila kini giatubang uban ba sa kahadlok o uban sa hugot nga pagtuo sa Ginoo.

• Mga Materyal alang sa mga estudyante: Papel alang sa matag estudyante

Numeros 21

Katuyoan sa leksiyon: Kini nga leksiyon makatabang sa mga estudyante nga motan-aw ngadto ni Jesukristo pinaagi sa hugot nga pagtuo.

• Pagpangandam sa estudyante: Dapita ang mga estudyante sa pagbasa sa Numeros 21:7–9 ug Alma 33:18–21, nga mangita sa unsay atong makat-onan gikan niini nga asoy sa Daang Tugon. Awhaga sila nga andam nga mopakigbahin unsay ilang nakat-onan sa klase.

• Mga imahe nga ipakita: Usa ka litrato sa malala nga bitin, si Jesukristo diha sa krus, si Moises og ang tumbaga nga bitin

• Bidyo: “Atonement: Not a One-Time Thing” (3:00)