Exodo 35–40; Levitico 1; 4; 16; 19: Leksiyon 55

Pagsukod sa Imong Nakat-onan 3

Exodo ug Levitico

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Manluluwas. Kini nga leksiyon makatabang sa mga estudyante nga mamalandong sa ilang mga tumong nga gitakda ug sa paglambo nga ilang nasinati atol sa ilang bag-ohay nga pagtuon sa Daang Tugon.

Pagpangandam sa estudyante: Dapita ang mga estudyante sa pag-andam sa pagpakigbahin sa unsay ilang nakat-onan o mga paagi nga sila mitubo sa espirituhanong paagi samtang sila nagtuon sa Daang Tugon niini nga tuig. Pwede nimong isugyot nga ilang irebyo ang ilang mga journal sa pagtuon o mubo nga mga sulat sa ilang mga kasulatan aron matabangan silang mabantayan ang ilang pagtubo ug pagkat-on.

Posibleng mga Kalihokan sa Pagkat-on

Ang pagtuon sa imong mga estudyante sa Exodo ug Levitico mahimong nakatutok sa lain-laing mga resulta kay sa usa nga pagsukod niini nga leksiyon. Kon mao, ipahiangay ang mga kalihokan sa pagsukod sa paglambo sa kasinatian sa mga estudyante gikan sa mga resulta nga gitutokan diha sa inyong klase.

Niini nga leksyon, ang mga estudyante masukod sa mosunod nga mga resulta:

1. Ipasabot ang tahas sa mga propeta sa Ginoo. (Pahinumdom: Kini nga kalihokan nagtugot sa mga estudyante sa paggamit sa unsay ilang nakat-onan mahitungod sa tahas sa mga propeta gikan ni bisan kinsa nga mga propeta sa Daang Tugon hangtod karon, sama nila ni Adan, Enoch, Noah, ug Moises.)

2. Mobati og dugang tinguha sa pagsalig sa Ginoo alang sa kalig-on ug katubsanan. (Pahinumdom: Kini nga kalihokan piho nga nakonektar balik ngadto sa Leksiyon 47: “Exodo 16”, apan ang ubang mga leksiyon mahimong makatabang usab, sama sa Leksiyon 42: “Exodo 12–13, Bahin 1” ug Leksiyon 45: “Exodo 14.”)

3. Sunda ang mga propeta sa Ginoo. (Hinumdomi: Kini nga kalihokan piho nga nagkonektar balik ngadto sa Leksiyon 39: “Exodo 2–4.”)

Pagsusi sa atong espirituhanong pagtubo

Ikonsiderar ang pagsugod sa klase pinaagi sa pagdrowing og tulo ka hulagway o mga stick figure diha sa linya. Ang mga pigura nagrepresentar sa tulo ka managlahi nga bersiyon sa mga estudyante, ug ang linya nagrepresentar sa ilang gidugayon sa kinabuhi. Ubos sa matag katugbang nga stick figure, sulati og label: kaniadto, karon, ug umaabot. Unya, dapita ang usa ka estudyante sa pagbasa sa mosunod nga pamahayag.

Si Elder J. Devn Cornish sa Seventy mihulagway og pagkompara nga atong mahimo aron sa pagtabang kanato nga makaila sa atong espirituwal nga paglambo:

Kon kinahanglan kitang motandi, atong itandi kon unsa kita kaniadto ngadto sa unsa kita karon—ug gani kon unsay gusto natong mamahimo sa umaabot. (“Igo Ba Ang Akong Kamaayo? Makasulod Ba Ko Didto?,” Liahona, Nob. 2016, 33)

Dapita ang mga estudyante sa paghunahuna og mga paagi nga lahi sila karon kaysa kaniadto o mga paagi nga ilang gilaoman nga mahimong lahi sa umaabot. Mahimo nimong pangutan-on sila kon nganong makatabang ang pagpamalandong o pagtinguha og paglambo. Dayon, dapita ang mga estudyante sa pagtinguha sa tabang sa Espiritu Santo samtang ilang tubagon ang mosunod nga mga pangutana diha sa ilang mga study journal.

• Unsa ang imong nakat-onan mahitungod sa Langitnong Amahan ug ni Jesukristo pinaagi sa imong pagtuon sa Daang Tugon nga nakapalig-on sa imong relasyon uban Kanila?

• Unsa ang imong mahimo aron mapalig-on ang imong relasyon sa Langitnong Amahan ug ni Jesukristo samtang ikaw magpadayon sa pagtuon sa Daang Tugon?

Human ang mga estudyante adunay igong panahon sa pagpamalandong ug pagsulat, ikonsiderar ang pagdapit sa andam nga mga estudyante sa pagpakigbahin. Ipasabot nga ang nahibilin sa leksiyon maghatag nila og mga oportunidad sa pagpamalandong sa pipila ka piho nga mga butang nga ilang nakat-onan ug gigamit gikan sa ilang bag-ohay nga pagtuon sa Daang Tugon.

Ipasabot ang tahas sa mga propeta sa Ginoo

Aron matabangan ang mga estudyante nga maandam sa pagpasabot sa tahas sa mga propeta sa Ginoo, ikonsiderar ang pagdapit nila sa paghinumdom sa pipila ka propeta nga ilang natun-an na sa Daang Tugon. Kon nagkinahanglan sila og tabang sa paghinumdom sa mga propeta, mahimo nimong ipakita ang pipila ka hulagway sa mga propeta nga inyong gitun-an.

Dayon, ikonsiderar ang pagbahin sa mga estudyante ngadto sa mga grupo aron makompleto ang kalihokan sa ubos. Mahimo nimong tahasan ang usa ka tawo sa matag grupo sa pagsulat sa mga tubag sa grupo.

Sa pagrebyo sa lain-laing mga tahas sa mga propeta sa Ginoo, tun-i ang pipila o tanan sa mosunod nga mga tudling. Paghimo og lista sa bisan unsang mga tahas o mga responsibilidad nga imong nakita nga gihatag sa Ginoo ngadto sa Iyang mga propeta. Samtang magtuon ka, hunahunaa kon nganong importante nga masabtan kini nga mga tahas.

• Moises 6:35–36

• Moises 7:47

• Moises 8:19–20

• Hubad ni Joseph Smith, Genesis 50:27–28 (diha sa Giya ngadto sa mga Kasulatan)

• Exodo 3:12

• Exodo 4:12

Human sa ilang pagtuon, hatagi ang mga estudyante og oportunidad sa pagpasabot sa lain-laing mga tahas sa mga propeta ug sa mga paagi nga ang mga propeta nagkonektar nato ngadto sa Langitnong Amahan ug ni Jesukristo pinaagi niini nga mga tahas. Sa pagbuhat niini, mahimo nimong tutokan ang usa sa mosunod nga mga kalihokan isip usa ka klase, o mahimo kang magpakita og duha o daghan pang mga opsiyon ug tugotan ang mga estudyante sa pagpili og usa.

• Ipasabot ang tahas sa mga propeta sa Ginoo ngadto sa klase sa Primary nga siyete anyos.

• Ipasabot ang tahas sa mga propeta sa Ginoo ngadto sa usa ka tawo nga imong kaedad kinsa wala makahibalo unsa ang propeta.

• Isulat ang “Mga Propeta” diha sa Giya ngadto sa mga Kasulatan.

• Pagsulat og deskripsyon sa trabaho alang sa usa ka propeta.

• Paghimo og concept map. Pagdrowing og lingin sa tunga sa usa ka pahina, ug isulat ang Mga Propeta sulod niini. Palibot niana nga lingin, pagdrowing og laing mga lingin, ug pagsulat sa matag lingin og usa ka tahas sa mga propeta o usa ka rason nganong importante ang mga propeta. Pagdrowing og mga linya gikan sa nag-unang lingin ngadto sa matag usa niini nga mga lingin.

Mobati og dugang nga tinguha nga mosalig sa Ginoo alang sa kalig-on ug kaluwasan

Aron matabangan ang mga estudyante nga mahinumdom unsa ang ilang nakat-onan kaniadto mahitungod sa pagsalig sa Ginoo alang sa kalig-on ug kaluwasan, ipakita ang hulagway sa pan. Dapita ang mga estudyante sa pagpakigbahin sa unsay ilang nahinumdoman mahitungod sa gasa sa Ginoo nga manna ngadto sa mga Israelita. (Aron matabangan ang mga estudyante sa pagrebyo, mahimo nimong gamiton ang tinuod o sayop nga pasulit gikan sa Leksiyon 47: “Exodo 16.” Hangyoa sila sa paghinumdom sa mga kamatuoran nga ilang nakat-onan mahitungod sa Ginoo pinaagi sa pagtuon sa mga detalye mahitungod sa manna.)

• Unsaon nimo pagtandi ang imong mga tinguha karon nga mosalig sa Ginoo kada adlaw sa imong gibati pipila ka semana ang milabay? Kon nakamatikod ka og kalamboan, unsa sa imong hunahuna ang nakatampo niana nga kausaban? Kon wala kay namatikdan nga kalamboan, unsa kaha ang imong lahi nga buhaton?

Ang ubang mga pangutana nga mahimo nimong ipangutana naglakip sa “Unsa ang imong nakat-onan kon unsay sama o bation nga mosalig sa Ginoo kada adlaw?” ug “Samtang naningkamot ka nga mosalig sa Ginoo kada adlaw, unsay imong nakat-onan mahitungod Kaniya?”

Pagsunod sa mga propeta sa Ginoo

Ikonsiderar ang pagpakita og hulagway sa propeta karon. Pahinumdomi ang mga estudyante nga sa miaging leksiyon (Leksiyon 39: “Exodo 2–4”), naghimo sila og tumong nga sundon ang mga pagtulun-an sa mga propeta sa ulahing adlaw. Dapita ang mga estudyante sa hilom nga pagpamalandong sa mosunod nga mga pangutana.

• Unsa ang imong nakat-onan mahitungod sa Ginoo ug sa Iyang mga propeta samtang imong gibuhat ang mga pagtulun-an sa mga propeta sa modernong panahon?

• Unsa ang maayo sa imong mga paningkamot sa pagsunod sa mga propeta sa Ginoo?

• Unsang mga babag ang imong nasugatan? Unsa ang imong mahimo sa pagbuntog niadto nga mga babag?

  Human sa igong panahon, hatagi ang mga estudyante og kahigayonan sa pagpakigbahin. Mahimo nila kining buhaton kauban ang usa ka kapares, o mahimo nimong dapiton ang andam nga mga estudyante sa pagpakigbahin sa klase.

  Ang mga estudyante anaa sa lain-laing mga dapit diha sa ilang mga panaw sa hugot nga pagtuo. Ang ubang mga estudyante sa klase mahimong mobati nga dili segurado mahitungod sa pagsunod sa propeta. Ang mosunod nga pangutana makatabang sa mga estudyante sa pagpahayag sa unsay ilang nakat-onan ug sa pagpakigbahin og mga pagpamatuod nga makadasig sa mga klasmeyt nga tingali mobati nga dili segurado.

• Unsa ang gusto nimong mahibaloan sa usa ka higala kinsa dili segurado mahitungod sa pagsunod sa propeta sa Ginoo?

Dapita ang mga estudyante sa pagtinguha og tabang sa Espiritu Santo samtang sila maningkamot sa pagpadayon nga molambo sa espirituhanong paagi, mosalig sa Ginoo, ug mosunod sa propeta sa Ginoo.

Dugang nga Kalihokan sa Pagkat-on

Laing kalihokan mahitungod sa pagsalig sa Ginoo

Imbes motutok sa usa ka kasinatian sa leksiyon mahitungod sa manna, mahimo nimong hangyoon ang mga estudyante sa pagpamalandong sa unsay ilang nakat-onan mahitungod sa pagsalig sa Ginoo alang sa kalig-on ug kaluwasan sa tibuok Basahon sa Exodo.

Ikonsiderar ang pagpangutana sa mga estudyante sa mga mosunod. Samtang sila motubag, mahimo nimong ipakita ang mga hulagway sa mahinungdanong mga gutlo gikan sa Exodo.

• Kanus-a diha sa Basahon sa Exodo nakita ninyo nga ang Ginoo nagpakita sa Iyang gahom sa pagluwas?

• Sa unsang paagi nga ang inyong nakat-onan mahitungod sa Ginoo nakaapekto sa inyong tinguha nga mosalig Kaniya?

• Ngano nga gipili ninyo nga mosalig sa Ginoo alang sa kalig-on ug kaluwasan?