« លោកុប្បត្តិ ២៨ ៖ សេចក្តីសញ្ញាជាមួយព្រះអម្ចាស់ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« លោកុប្បត្តិ ២៨ ៖ សេចក្តីសញ្ញាជាមួយព្រះអម្ចាស់ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ២៤–៣៣ ៖ មេរៀនទី ៣១
លោកុប្បត្តិ ២៨
សេចក្តីសញ្ញាជាមួយព្រះអម្ចាស់
ក្រោយពីជីវិតរបស់លោកទទួលរងការគំរាមកំហែងពីសំណាក់បងប្រុសរបស់លោក អេសាវ នោះយ៉ាកុបត្រូវបានឪពុកម្ដាយរបស់លោកបានណែនាំឲ្យធ្វើដំណើរទៅស្រុកកំណើតរបស់ម្ដាយលោក ដើម្បីរកភរិយា ។ ពេលកំពុងធ្វើដំណើរ លោកមានការនិមិត្តមួយដែលបាននាំលោកឲ្យចូលទៅក្នុងសេចក្ដីសញ្ញាអ័ប្រាហាំជាមួយព្រះ ។ មេរៀននេះអាចជួយសិស្សឲ្យមានការបង្កើនបំណងប្រាថ្នាដើម្បីធ្វើសេចក្តីសញ្ញាជាមួយព្រះនៅក្នុងព្រះវិហារបរិសុទ្ធ ។
ការរៀបចំសិស្ស ៖ សូមពិចារណាអញ្ជើញសិស្សឲ្យមើលឡើងវិញនូវការសន្យានៃសេចក្ដីសញ្ញាអ័ប្រាហាំ ( អ័ប្រាហាំ ២:៨–១១ ) ។ អាចលើកទឹកចិត្តសិស្សឲ្យព្យាយាម និងពន្យល់ដល់សមាជិកគ្រួសារម្នាក់របស់ពួកគេអំពីសេចក្ដីសញ្ញាអ័ប្រាហាំ និងមូលហេតុដែលសេចក្តីសញ្ញានេះសំខាន់ចំពោះពួកគេ ។
សកម្មភាពរៀនសូត្រដែលអាចមាន
ហេតុអ្វីមនុស្សម្នាក់គួរតែធ្វើសេចក្ដីសញ្ញាជាមួយនឹងព្រះ ?
អ្នកអាចចាប់ផ្ដើមថ្នាក់ដោយដាក់បង្ហាញរូបភាពព្រះវិហារបរិសុទ្ធមួយ និងច្រៀងចម្រៀងកុមារបទ « ខ្ញុំចូលចិត្តមើលព្រះវិហារបរិសុទ្ធ » ( សៀវភៅចម្រៀងកុមារ ទំព័រ ៩៩ ) ។
បន្ទាប់មកសូមបង្ហាញការបំផុសគំនិតខាងក្រោមនេះ ។ សូមអញ្ជើញសិស្សឲ្យជ្រើសរើសសេចក្ដីថ្លែងការណ៍ដែលជាការពិតបំផុតអំពីពួកគេ ។ ជាជម្រើស អ្នកអាចចែកចាយតែផ្នែកដំបូងនៃការបំផុសគំនិតប៉ុណ្ណោះ ហើយសិស្សអាចបញ្ចប់សេចក្តីថ្លែងការណ៍នេះក្នុងប្រយោគមួយ ឬពីរដែលឆ្លុះបញ្ចាំងពីអារម្មណ៍ និងគំនិតរបស់ពួកគេយ៉ាងត្រឹមត្រូវ ។
ពេលខ្ញុំគិតអំពីការទៅព្រះវិហារបរិសុទ្ធនាពេលអនាគតដើម្បីធ្វើសេចក្ដីសញ្ញាជាមួយព្រះ ខ្ញុំ ៖
-
ខ្ញុំមិនដឹងត្រូវគិតអ្វីនោះទេ ។ ខ្ញុំមិនគិតច្រើនអំពីរឿងនេះទេ ។
-
រំភើបចិត្ត ។ ខ្ញុំពិតជាទន្ទឹងរង់ចាំដល់ថ្ងៃនោះ ។
-
ខ្ញុំភ័យខ្លាចបន្តិចបន្តួច ។ ខ្ញុំមិនដឹងថាត្រូវធ្វើរំពឹងអ្វីឡើយ ។
-
ពុំយល់ច្រើនពីចំណុចនោះទេ ។
សូមផ្តល់ពេលវេលាឲ្យសិស្សសរសេរចម្លើយរបស់ពួកគេ ។ សូមអញ្ជើញពួកគេឲ្យស្វែងរកការបំផុសគំនិតពីព្រះវិញ្ញាណបរិសុទ្ធអំឡុងពេលមេរៀននេះ ។ ព្រះវិញ្ញាណបរិសុទ្ធអាចជួយពួកគេឲ្យតម្លៃចំពោះសារៈសំខាន់នៃការធ្វើសេចក្តីសញ្ញាជាមួយព្រះ ។
សុបិនរបស់យ៉ាកុប
សូមអញ្ជើញសិស្សឲ្យសរសេរសេចក្តីពិតមិនពេញលេញដូចតទៅនេះនៅក្នុងសៀវភៅកំណត់ហេតុការសិក្សារបស់ពួកគេ ។ អ្នកក៏អាចសរសេរសេចក្តីពិតមិនពេញលេញនេះនៅលើក្ដារខៀន ហើយបន្ថែមវានៅពេញមួយមេរៀន ។
នៅក្នុងមេរៀននេះ អ្នកនឹងសិក្សាអំពីយ៉ាកុបនៅក្នុង លោកុប្បត្ដិ ២៨ ។ នៅក្នុង លោកុប្បត្ដិ ២៨:៣–៤, ១២–២០ ព្រះបានបង្កើតសេចក្ដីសញ្ញាមួយជាមួយយ៉ាកុប ដែលយ៉ាកុបបានទទួលយក ។ ចេញពីដំណើររឿងនេះ យើងអាចរៀនពីសារៈសំខាន់នៃមេរៀនអំពីតម្លៃនៃការធ្វើសេចក្តីសញ្ញាជាមួយព្រះ ។ នៅពេលអ្នកសិក្សាមេរៀននេះ សូមរកមើលវិធីដើម្បីបំពេញសេចក្ដីពិតនេះ ៖ នៅពេលយើងធ្វើ ហើយរក្សាសេចក្ដីសញ្ញាជាមួយព្រះ ទ្រង់នឹង…
សូមឲ្យសិស្សចែកចាយនូវអ្វីដែលពួកគេចងចាំអំពីសេចក្ដីសញ្ញាដែលព្រះអម្ចាស់បានធ្វើជាមួយអ័ប្រាហាំ ។ សម្រាប់សេចក្ដីលម្អិតជាក់លាក់អំពីសេចក្ដីសញ្ញានេះ សូមមើល មេរៀនទី ២៣ ៖ « លោកុប្បត្ដិ ១២, ១៧ » ។ បន្ទាប់ពីសិស្សចែកចាយ សូមសង្ខេបកថាខណ្ឌខាងក្រោមតាមពាក្យសម្ដីរបស់អ្នកផ្ទាល់ ។
ទោះបីជា យ៉ាកុបគឺជាចៅប្រុសរបស់អ័ប្រាហាំក្ដី ក៏លោកប្រហែលជាមានអារម្មណ៍ហាក់ដូចជាលោកមិនអាចឈោងចាប់ពរជ័យនៃសេចក្តីសញ្ញារបស់អ័ប្រាហាំបានឡើយ ។ យ៉ាកុបមិនទាន់បានរៀបការនៅក្នុងសេចក្តីសញ្ញានៅឡើយទេ ។ ដោយឡែក ការឈ្លោះប្រកែកគ្នាអំពីអំណាចមរតកនៃបងច្បង និងពរជ័យដែលនាំឲ្យអេសាវចង់សម្លាប់យ៉ាកុបទៀតផង ( លោកុប្បត្ដិ ២៧:៤១ ) ។ ដើម្បីការពារយ៉ាកុប ហើយធានាថាលោកមានឱកាសរៀបការក្នុងសេចក្ដីសញ្ញានេះ ឪពុកម្ដាយរបស់យ៉ាកុបបានណែនាំឲ្យលោកចាកចេញពីផ្ទះ និងធ្វើដំណើររាប់រយគីឡូម៉ែត្រទៅកាន់ស្រុកកំណើតរបស់ម្តាយលោក ( សូមមើល លោកុប្បត្តិ ២៧:៤២–៤៦; ២៨:១–២ ) ។ ការធ្វើដំណើរនេះបាននាំយ៉ាកុបចេញឆ្ងាយពីទីក្រុងកាណាន ជាដែនដីដែលអំណាចមរតកនៃបងច្បងបានសន្យាដល់លោក ។
សូមអាន លោកុប្បត្តិ ២៨:១០–១៥ ដោយរកមើលអ្វីដែលយ៉ាកុបបានដកពិសោធន៍នៅយប់មួយក្នុងអំឡុងពេលធ្វើដំណើររបស់លោក ។
សូមពិចារណាអញ្ជើញសិស្សឲ្យគូររូបភាពមួយអំពីអ្វីដែលយ៉ាកុបបានឃើញក្នុងសុបិនរបស់លោក ។ សិស្សអាចចែកចាយគំនូររបស់ពួកគេជាមួយដៃគូ ហើយពន្យល់ពីអ្វីដែលពួកគេចាប់អារម្មណ៍នៅក្នុងខគម្ពីរទាំងនោះ ។
បន្ទាប់មក អ្នកអាចដាក់បង្ហាញរូបភាពខាងក្រោម ជាការពិពណ៌នាមួយអំពីការនិមិត្តនោះ ។
-
តើនៅក្នុងខគម្ពីរទាំងនេះ ព្រះអម្ចាស់បានផ្ដល់សេចក្ដីសន្យាអ្វីខ្លះនៅក្នុងសេចក្ដីសញ្ញាអ័ប្រាហាំ ?
-
តើសេចក្ដីសន្យាអ្វីខ្លះទៀតដែលព្រះអម្ចាស់បានប្រទានដល់យ៉ាកុបនៅក្នុង ខទី ១៥ ?
អ្នកអាចអញ្ជើញសិស្សឲ្យបន្ថែមការសន្យាទាំងនេះទៅលើសេចក្ដីពិតរបស់ពួកគេ ។ អ្នកអាចសរសេរចម្លើយដែលអាចមាននៅលើក្ដារខៀន ។ ចម្លើយអាចរួមមាន គង់ជាមួយយើង ការពារ និងថែរក្សាយើង មិនទុកយើងចោល ។
-
ហេតុអ្វីអ្នកគិតថា សេចក្ដីសន្យាទាំងនេះប្រហែលជាមានអត្ថន័យជាពិសេសចំពោះយ៉ាកុបនៅពេលនោះ ?
ដើម្បីជួយសិស្សឲ្យយល់កាន់តែច្បាស់ពីសេចក្ដីសន្យាទាំងនេះ សូមអញ្ជើញពួកគេឲ្យបញ្ចប់សកម្មភាពដូចខាងក្រោមនេះជាគូ ឬជាក្រុមតូចៗ ។ អ្នកគួរលើកទឹកចិត្តសិស្សឲ្យរកមើលបទគម្ពីរ ឬសេចក្ដីថ្លែងការណ៍បន្ថែមដែលបញ្ជាក់ពីសេចក្ដីសន្យាទាំងនេះ ។
សូមសិក្សាបទគម្ពីរ និងសេចក្ដីថ្លែងការណ៍ខាងក្រោមនេះ ដោយរកមើលរបៀបដែលវាធ្វើឲ្យការយល់ដឹងរបស់អ្នកអំពីសេចក្ដីសន្យាដែលព្រះអម្ចាស់បានធ្វើចំពោះយ៉ាកុបកាន់តែស៊ីជម្រៅ ។
យ៉ូហាន ១៤:១៨
កិច្ចការ ១៧:២៧ ( កំណត់ចំណាំការបកប្រែដោយ យ៉ូសែប ស្ម៊ីធ )
អែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ ៖
ពេលបងប្អូនដើរតាមផ្លូវនៃសេចក្ដីសញ្ញា ចាប់តាំងពីពិធីបុណ្យជ្រមុជទឹកទៅកាន់ព្រះវិហារបរិសុទ្ធ និងពេញមួយជីវិត ខ្ញុំសុំសន្យាថា បងប្អូនមានអំណាចដើម្បីហូរបញ្ច្រាស់នឹងលំហូរធម្មជាតិនៃលោកិយនេះ—ពោលគឺអំណាចដើម្បីរៀន អំណាចដើម្បីប្រែចិត្ត និងអំណាចដើម្បីញែកចេញជាបរិសុទ្ធ និងអំណាចដើម្បីរកឃើញសេចក្តីសង្ឃឹម ការលួងលោម និងសូម្បីតែអំណរ ពេលបងប្អូនប្រឈមនឹងឧបសគ្គក្នុងជីវិតនេះ ។ ខ្ញុំសុំសន្យាដល់បងប្អូន និងគ្រួសាររបស់បងប្អូននូវការការពារប្រឆាំងនឹងឥទ្ធិពលនៃមារសត្រូវ ជាពិសេសនៅពេលបងប្អូនផ្តោតយកចិត្តទុកដាក់ជាខ្លាំងលើព្រះវិហារបរិសុទ្ធនៅក្នុងជីវិតរបស់បងប្អូន ។ ( « ការទទួលបានព្រះចេស្តារបស់ព្រះតាមរយៈសេចក្ដីសញ្ញា » លីអាហូណា ខែ ឧសភា ឆ្នាំ ២០២៣ ទំព័រ ៣៧ )
វាប្រហែលជាមានប្រយោជន៍សម្រាប់សិស្សដើម្បីយល់ថា ការធ្វើសេចក្តីសញ្ញាមិនបានជួយយើងឲ្យរួចផុតពីឧបសគ្គក្នុងជីវិតឡើយ ។ ទោះជាយ៉ាងណាក៏ដោយអែលឌើរ ឌី ថត គ្រីស្តូហ្វឺសិនបានបង្រៀនថា សេចក្តីសញ្ញាទាំងនេះផ្តល់នូវ « ក្តីសង្ឃឹមដ៏ធំបំផុតដើម្បីជៀសផុតពីទុក្ខវេទនា ដែលមិនអាចចៀសបាន ព្រមទាំងដោះស្រាយបញ្ហាដែល ចៀសមិនរួច នៅក្នុងជីវិតដោយជោគជ័យ » ( « ហេតុអ្វីជាផ្លូវនៃសេចក្តីសញ្ញា » លីអាហូណា ខែ ឧសភា ឆ្នាំ ២០២១ ទំព័រ ១១៧ ) ។
-
តើសេចក្ដីសន្យាទាំងនេះមួយណាដែលមានអត្ថន័យខ្លាំងបំផុតចំពោះអ្នក ?
អារម្មណ៍របស់យ៉ាកុបអំពីបទពិសោធន៍របស់លោក
វាអាចមានប្រយោជន៍ក្នុងការដាក់បង្ហាញវគ្គបទគម្ពីរ និងសំណួរខាងក្រោម ។ សូមអញ្ជើញសិស្សឲ្យអាន និងពិភាក្សាជាគូ ឬជាក្រុមតូចៗ ។ ( សូមពិចារណាចែកចាយជាមួយសិស្សថា ពាក្យ « ខ្លាច » និង « គួរឲ្យខ្លាច » បង្ហាញថា យ៉ាកុបមានការស្ញប់ស្ញែង ។ « គួរឲ្យខ្លាច » គួរតែបកប្រែបែបនេះ « ការបំផុសគំនិតដ៏ស្ញប់ស្ញែង » ) ។
សូមអាន លោកុប្បត្តិ ២៨:១៦–២១ ដោយរកមើលប្រតិកម្មរបស់យ៉ាកុប ចំពោះបទពិសោធន៍របស់លោក ។
-
តើអ្នកឃើញយ៉ាកុបបង្ហាញអារម្មណ៍យ៉ាងណាអំពីព្រះអម្ចាស់ ?
-
តើអារម្មណ៍ទាំងនេះអាចជំរុញលោកឲ្យធ្វើសេចក្ដីសញ្ញាជាមួយព្រះអម្ចាស់យ៉ាងដូចម្ដេច ?
បន្ទាប់ពីសិស្សមានពេលគ្រប់គ្រាន់ក្នុងការពិភាក្សាហើយ សូមអញ្ជើញពួកគេឲ្យចែកចាយជាមួយសិស្សក្នុងថ្នាក់នូវអ្វីដែលពួកគេបានរៀន ។
ការផ្ដល់ឱកាសឲ្យសិស្សចែកចាយជាមួយគ្នានូវអ្វីដែលពួកគេកំពុងរៀនអាចបង្កើនទំនុកចិត្តរបស់ពួកគេដើម្បីចូលរួមការសន្ទនាអំពីដំណឹងល្អ ។ សម្រាប់ការបំពាក់បំប៉នបន្ថែមអំពីរបៀបលើកទឹកចិត្តសិស្សឲ្យចែកចាយជាមួយមនុស្សដទៃ សូមមើល « លើកទឹកចិត្តសិស្សឲ្យចែកចាយសេចក្តីពិតដែលពួកគេកំពុងរៀន » នៅក្នុង ជំនាញការអភិវឌ្ឍគ្រូបង្រៀន ។ ( ការបង្រៀនតាមរបៀបរបស់ព្រះអង្គសង្រ្គោះ [ ឆ្នាំ ២០២២ ] ទំព័រ ៣៥ )
-
តើពាក្យ ឬឃ្លាអ្វីខ្លះក្នុង ខទី ១៦–២១ ដែលអាចទាក់ទងនឹងព្រះវិហារបរិសុទ្ធសម័យទំនើប ?
សិស្សអាចចង្អុលបង្ហាញពាក្យ ឬឃ្លាដូចជា« ពិតប្រាកដជាព្រះយេហូវ៉ាទ្រង់គង់នៅទីនេះ » ( ខទី ១៦ ), « ដំណាក់នៃព្រះ » និង « ទ្វារស្ថានសួគ៌ »( ខទី ១៧ ),« បេត–អែល » ( ខទី ១៩ ) ដែលមានន័យថា « ដំណាក់នៃព្រះ » ( សូមមើល footnote 19a ) និង « បន់ » ( ខទី ២០ ) ។ អ្នកគួរអញ្ជើញសិស្សឲ្យគូសចំណាំឃ្លាទាំងនេះនៅក្នុងព្រះគម្ពីររបស់ពួកគេ ។
សិស្សអាចបន្ថែមនៅក្នុងគំនូររបស់ពួកគេអំពីការនិមិត្តនោះ ដោយសេរសេរពាក្យ « ដំណាក់នៃព្រះ » « ទ្វារនៃស្ថានសួគ៌ » ឬ « ព្រះវិហារបរិសុទ្ធ » នៅកន្លែងដែលជិតបាតជណ្តើរ ។
ការធ្វើសេចក្ដីសញ្ញាជាមួយព្រះអម្ចាស់
សូមអញ្ជើញសិស្សឲ្យធ្វើសកម្មភាពខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។ វាប្រហែលជាមានប្រយោជន៍ក្នុងការប្រាប់សិស្សថា ពួកគេនឹងជញ្ជឹងគិតពីចម្លើយទាំងនេះនៅក្នុងមេរៀនខាងមុខ ។ សិស្សនឹងប្រើអ្វីដែលពួកគេសរសេរនៅទីនេះដើម្បីបញ្ចប់សកម្មភាពវាយតម្លៃនៅក្នុងមេរៀនទី ៣៧ ៖ « វាយតម្លៃការរៀនសូត្ររបស់អ្នកទី ២ » ។
ដើម្បីរៀបចំខ្លួនសិស្សឲ្យសរសេរចម្លើយរបស់ពួកគេ អ្នកគួរចែកចាយកថាខណ្ឌខាងក្រោមនេះជាពាក្យសម្តីរបស់អ្នកផ្ទាល់ ។
នៅពេលយ៉ាកុបបានចាកចេញពីផ្ទះរបស់ឪពុកម្ដាយលោក ហើយបានចេញទៅដោយខ្លួនឯង លោកបានធ្វើសេចក្តីសញ្ញាជាមួយព្រះ ។ ព្រះបានសន្យាថានឹងគង់នៅជាមួយ ថែរក្សា និងការពារយ៉ាកុប ។ ក្នុងរយៈពេលប៉ុន្មានឆ្នាំដ៏ខ្លី អ្នកនឹងប្រឈមមុខនឹងជម្រើសជាច្រើនអំពីរឿងដែលត្រូវធ្វើបន្ទាប់ក្នុងជីវិតរបស់អ្នក ។ ក្នុងចំណោមការសម្រេចចិត្តទាំងនេះនឹងក្លាយជាឱកាសដើម្បីធ្វើសេចក្តីសញ្ញាជាមួយព្រះនៅក្នុងព្រះវិហារបរិសុទ្ធ ។ សូមគិតអំពីពេលនេះក្នុងអនាគតរបស់អ្នក ពេលអ្នកឆ្លើយតបទៅនឹងសំណួរខាងក្រោមនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកបានដកពិសោធន៍ពរជ័យដែលបានសន្យាអ្វីខ្លះ ដែលកើតចេញពីការខិតខំរក្សាសេចក្ដីសញ្ញារបស់អ្នកជាមួយនឹងព្រះ ឬដោយការបម្រើនៅក្នុងព្រះវិហារបរិសុទ្ធ ?
-
តើអ្នកអាចប្រឈមមុខនឹងស្ថានភាពអ្វីខ្លះនៅពេលអនាគត ដែលអ្នកនឹងទទួលបានប្រយោជន៍ពីការថែទាំ និងការការពារដែលព្រះសន្យាដល់មនុស្សដែលធ្វើសេចក្តីសញ្ញាជាមួយទ្រង់ ?
សូមពិចារណាចែកចាយទីបន្ទាល់របស់អ្នកអំពីរបៀបដែលអ្នកបានដកពិសោធន៍នូវសេចក្ដីសន្យាដែលទាក់ទងនឹងការធ្វើ និងការរក្សាសេចក្ដីសញ្ញាជាមួយនឹងព្រះអម្ចាស់ ។