Genesis 6–11; Moises 8: Leksiyon 19

Moises 8

Pagsunod sa Manluluwas diha sa usa ka Daotan nga Kalibotan

Ang Ginoo mitawag ni Noe nga mahimong propeta sa panahon dihang ang mga tawo gihulagway “nga daotan kanunay” (Moises 8:22). Bisan paman sa grabe nga kadaotan, si Noe ug iyang mga anak nga lalaki mipili sa pagsunod ni Jesukristo. Kini nga leksiyon makatabang sa mga estudyante nga mas makasunod sa Manluluwas bisan paman sa pagpuyo diha sa usa ka daotan nga kalibotan.

Pagpangandam sa estudyante: Dapita ang mga estudyante sa paghunahuna mahitungod sa mga hagit o mga kalisdanan nga ilang giatubang pinaagi sa pagsunod ni Jesukristo sa kalibotan karon. Hangyoa sila nga moadto sa klase nga andam nga mopakigbahin unsa ang nakatabang nila sa pagbuntog sa kalibotan ug pagsunod ni Jesukristo.

Posibleng mga Kalihokan sa Pagkat-on

Pagpakabuhi dinhi, apan dili alang, sa kalibotan

Sugdi ang klase pinaagi sa pagpakita sa mga estudyante sa usa ka balding tubig ug usa ka uga nga gamay nga butang.

• Posible ba nga ang usa ka butang magpabilin nga uga kon kini ibutang sa usa ka balding tubig? Sa unsang paagi?

  Human ang mga estudyante adunay kahigayonan sa pagpakigbahin sa ilang mga hunahuna, ibutang ang butang og plastik bag o sa usa ka selyado nga butanganan, ug ibutang kini sa usa ka baldi nga adunay tubig.

• Sa unsang paagi kaha kini nga leksiyon nga gigamitan og butang may kalambigitan sa atong mga paningkamot nga magpabiling matarong sa usa ka daotan nga kalibotan?

Aron matabangan ang mga estudyante sa pagtimbangtimbang sa ilang kasamtangang abilidad sa pagpuyo nga matarong sa usa ka daotan nga kalibotan, ikonsiderar ang pagpakita sa mosunod nga mga pamahayag. Dapita ang mga estudyante sa pagpamalandong unsa ka tinuod ang matag pamahayag alang kanila.

Lisod alang kanako sa pagdumili sa mga pagdani sa kalibotan ug mosunod ni Jesukristo.

Ako nasayod asa ko mangayo og tabang aron magpabilin nga matinud-anon sa usa ka daotan nga kalibotan.

Ako naggahin og oras matag adlaw sa pagtinguha nga mas makat-on kabahin ug mosunod ni Jesukristo.

Pahinumdomi ang mga estudyante nga ang Espiritu Santo mopakita kanato unsa ang angay natong buhaton (tan-awa sa 2 Nephi 32:5). Dapita ang mga estudyante sa pagtinguha sa inspirasyon aron masayod unsa ang ilang buhaton aron magpabilin nga matarong sa mas nagkadaotan nga kalibotan.

Usa ka daotan nga kalibotan

Sa dihang ang Ginoo mikuha kang Enoch ug sa iyang siyudad ngadto sa langit (tan-awa sa Moises 7:69), ang matarong nga anak nga lalaki ni Enoch, si Mathusalam, nagpabilin sa yuta (tan-awa sa Moises 8:2). Ang apo ni Mathusalam, si Noe, ug ang tulo ka anak ni Noe “naglakaw uban sa Dios” (Moises 8:27), samtang ang kinabag-an sa katawhan kinsa nagpabilin sa kalibotan mipili sa daotan.

Ipakita ang mosunod nga mga instruksiyon ug tsart diha sa pisara. Dapita ang mga estudyante sa pagdrowing sa tsart diha sa ilang mga journal sa pagtuon. Mahimong kompletohon sa mga estudyante ang tsart diha sa gagmay nga mga grupo.

Basaha ang Moises 8:12–22, 28–29, nga mangita sa espirituwal nga kahimtang sa mga tawo sa mga adlaw ni Noe.

Dayon ilha ang mga pagkasusama tali sa espirituwal nga kahimtang sa mga adlaw ni Noe ug sa mga kahimtang nga makita nato sa atong mga adlaw.

Espirituwal nga Kahimtang sa Kadaghan sa Adlaw ni Noe	Mga Pagkasusama sa Adlaw ni Noe ug sa Atong Adlaw

Dapita ang mga grupo sa pagpakigbahin kon unsay ilang nakit-an ngadto sa ubang mga grupo. Dasiga ang mga estudyante sa pagdugang unsa ang gipakigbahin sa ilang mga klasmeyt sa kaugalingon nilang mga tsart.

Kon nagkinahanglan og tabang ang mga estudyante, pwede nimong ipasabot ang mga pagkasusama sa mosunod:

1. Sama sa mga apong babaye ni Noe, pipila sa tawo karon nawad-an sa mga panalangin nga gitanyag sa Dios kanila pinaagi sa walay kataposan, nga pakigsaad sa kaminyoon (tan-awa sa mga bersikulo 12–15).

2. Ang uban sa mga tawo karon nakigbatok usab sa propeta ug misalikway sa iyang tambag (tan-awa sa mga bersikulo 18–20).

Rebyoha ang Moises 8:16–17 aron makita unsa ang gisulti sa Ginoo ngadto ni Noe nga mahitabo kon ang mga tawo dili maghinulsol.

• Unsa ang gidugayon sa tagal nga gihatag sa Ginoo ngadto sa mga tawo aron maghinulsol?

• Unsa ang matudlo niini kanato mahitungod sa kinaiyahan sa Dios?

Pagsunod sa Manluluwas diha sa usa ka daotan nga kalibotan

Aron mobati ang mga estudyante og paglaom nga sila makasunod sa Manluluwas sa usa ka daotan nga kalibotan, ikonsiderar ang pagdapit sa usa ka estudyante sa pagbasa sa mosunod nga mga pamahayag.

Mipakigbahin si Presidente Russell M. Nelson unsaon nga posible ang pagbuntog niining napukan nga kalibotan:

Tungod kay si Jesukristo mibuntog niining napukan nga kalibotan, ug tungod kay Siya miula alang sa matag usa nato, kamo usab makabuntog niining puno sa sala, nakasentro sa kaugalingon, ug sa kasagaran makakapoy nga kalibotan. (“Buntoga ang Kalibotan ug Pangita og Kapahulayan,” Liahona, Nob. 2022, 96)

• Unsa ang imong gamiton gikan sa pamahayag ni Presidente Nelson aron makatabang sa usa ka tawo nga mobati nga naluya tungod sa pagkadaotan sa ilang palibot?

Ikonsiderar ang pagsulat sa mosunod nga dili kompleto nga pamahayag sa kamatuoran diha sa pisara. Dapita ang mga estudyante sa pagsugod sa paghunahuna mahitungod sa lahi nga mga pamaagi nga ilang makompleto kini.

Ako makapili sa pagsunod sa Manluluwas sa usa ka daotan nga kalibotan pinaagi sa …

Aron matabangan ang mga estudyante nga makadiskobre og mga pamaagi nga sila makasunod sa Manluluwas sa usa ka daotan nga kalibotan, hatagi sila og instruksiyon sa ubos ug mga kopya nga naglakip sa handout. Ang mga estudyante mahimong motrabaho diha sa mga grupo. Pwede silang magkauban nga magtuon sa mga kapanguhaan, o pwede nga mopili ang mga sakop sa grupo og lahi nga mga tudling sa kasulatan ug mga pamahayag nga bulag nga tun-an ug dayon magpundok aron hisgotan.

Magpili sa mosunod nga mga kapanguhaan, paghimo og lista diha sa imong journal sa pagtuon sa mga butang nga atong mabuhat aron sa pagsunod ni Jesukristo bisan paman sa pagkadaotan ug mga tentasyon sa palibot kanato.

Human sa igong panahon nga makatuon ug makahimo og mga lista ang mga grupo, ikonsiderar ang pagpasulat sa matag grupo sa pisara sa usa ka butang nga ilang nakit-an aron kompletohon ang pamahayag sa kamatuoran. Sama pananglit, gikan sa Moises 8:13, 23–24, tingali makita sa mga estudyante ang pagpaminaw sa Ginoo ug sa Iyang mga propeta, pagtuo kang Jesukristo, paghinulsol, ug paghimo og pakigsaad sa Dios.

Ang pipila ka estudyante mahimong mopakigbahin nganong ang mga butang nga ilang gisulat mahinungdanon kanila.

Ikonsiderar ang pagpasalida sa bidyo nga “Sharing Your Light” (2:56), nga anaa sa ChurchofJesusChrist.org. Niini nga bidyo, usa ka batan-ong babaye nagsunod sa Manluluwas bisan paman sa mga pagpili sa uban palibot kaniya.

Ang paghunong ug pagpamalandong sa talagsaon nga mga background sa mga estudyante makadapit sa usa ka espiritu sa Kristohanong diwa sa pag-ila, gugma, ug empatiya sa imong interaksiyon uban nila. Sama pananglit, base sa ilang mga kasinatian sa kinabuhi, pipila sa estudyante tingali lahi ang tubag sa mosunod nga mga pangutana kay sa imoha. Tinguhaa nga makasabot sa ilang panglantaw, tubaga pinaagi sa gugma ug empatiya, ug dayega ang ilang mga paningkamot nga mosunod sa Manluluwas. (Alang sa dugang nga pagbansay sa pagpalambo sa imong pagsabot sa talagsaong kahimtang sa mga estudyante, tan-awa sa “Tinguhaa nga makaila kanila—sabta ang ilang mga sirkumstansiya, mga panginahanglan, ug mga kalig-on” diha sa Pagpalambo sa Kahanas sa Magtutudlo.)

Pamalandongi unsa ang imong nahimo aron makatabang nimo nga mabuntog ang kadaotan nga naglibot kanimo. Kini nga aksiyon mahimong ang gagmay ug yano nga mga butang nga kanunay nimong gibuhat, mga tumong nga imong gihimo diha sa programa sa Kabataan ug Kabatan-onan, o uban nga mga kasinatian.

• Unsa ang imong nabuhat aron mas makasunod sa Manluluwas ug makabuntog sa kadaotan palibot kanimo?

• Aduna bay bisan unsang mga babag nga imong giatubang sa imong mga paningkamot? Kon mao, unsa ang imong gibuhat aron makabuntog niana nga mga babag? Unsa ang imong tambag alang sa uban?

Ang akong plano sa pagsunod ni Jesukristo

Tabangi ang mga estudyante nga makahunahuna og mga paagi nga makasunod sila ni Jesukristo. Mahimo nimo kini pinaagi sa pagdapit kanila nga motubag sa mosunod nga mga pangutana. Mahimo nimong dasigon ang mga estudyante nga mosulat sa ilang mga tubag sa bisan asa nga ilang makita kanunay o sa pagpakigbahin sa ilang plano sa masaligan nga mga higala, sakop sa pamilya, o mga lider sa Simbahan. Kini nga mga sugyot makapahinumdom sa mga estudyante unsa ang ilang nakat-onan ug gusto nga buhaton.

1. Unsay imong gibati nga nadasig kang buhaton karon?

2. Sa unsang paagi ang pagsunod niini nga mga impresyon makapalambo sa imong abilidad sa pagsunod sa Manluluwas ug mabuntog ang kalibotan?

Ikonsiderar ang pagtapos uban ang mga pagpamatuod sa estudyante mahitungod sa unsay ilang nakat-onan ug gibati karon ug kon sa unsang paagi ang pagsunod sa Manluluwas makatabang kanila nga mabuntog ang kalibotan. Mahimo usab kamong makigbahin sa inyong pagpamatuod.

Dugang nga mga Kapanguhaan

Moises 8:18. Unsa ang gipasabot sa “mga higante sa yuta”?

Ang Hebreo nga ngalan alang sa “mga higante” diha sa Genesis 6:4 ug Moises 8:18 mao ang Nephilim, nga naggikan sa verb nga naphal, buot ipasabot “pagkapukan.” Mao nga, kining mga tawhana posibling mga tawo nga miapostasiya o mibiya sa kamatuoran gikan sa tinuod nga relihiyon.

Moises 8:25. Unsa ang gipasabot sa “nakapasubo ni Noe, ug ang iyang kasingkasing gisakitan”?

Kini nga bersikulo usa kini ka importante ug dinasig nga pagkorehir sa Genesis 6:6, diin mabasa “Ug kini nakapabasol sa Ginoo nga gibuhat niya ang tawo sa yuta, ug nakapasubo kini kaniya sa iyang kasingkasing.” Ang Hebreohanon nga pulong nga gigamit dinhi, ug gihubad og paghinulsol diha sa Biblia, mao ang nacham (naw-kham), nga nagpasabot “pagpanghupaw,” “nagmayhay,” o “naluoy.”

Sa unsang paagi nga ang pagpahibalo sa uban unsa ang akong gituohan makatabang kanako sa pagpuyo nga matarong sa usa ka daotan nga kalibotan?

Si Elder Peter F. Meurs sa Seventy mipakigbahin:

Sa akong kasinatian, usa ka bugtong paagi aron mabuhi sa daotan nga kalibotan mao ang pagpahibalo sa akong mga higala ug kauban sa trabaho kon unsa ang atong gituohan. Ako naprotektahan ug napanalipdan sa daghang higayon sa akong mga higala kinsa nasayod nga ako usa ka Santos sa Ulahing mga Adlaw ug nasayod unsa ang akong gibarogan. (“Living Righteously in a Wicked World,” Ensign, Feb. 2018, 51)

Unsa ang panglantaw sa Dios sa akong sinsero nga paghinulsol?

Si Elder Dale G. Renlund sa Korum sa Napulog Duha ka Apostoles mipasabot:

Kon atong madiskubrihan nga mipalayo kita sa dalan, mahimo kitang magpabilin nga anaa sa layo, o tungod sa Pag-ula ni Jesukristo, makapili kita sa pagbali sa atong mga lakang ug mobalik sa dalan. …

Bisan unsa kita kadugay nga nahilayo sa dalan o unsa ka layo kita nga nahisalaag, sa higayon nga modesisyon kita sa pag-usab, ang Dios motabang kanato nga makabalik. Gikan sa panglantaw sa Dios, pinaagi sa sinsero nga paghinulsol ug sa pagpadayon sa unahan uban ang pagkamakanunayon kang Kristo, sa higayon nga mabalik na sa dalan, sama ra kini nga wala gayod kita mopalayo. Ang Manluluwas mobayad sa atong mga sala ug mopalingkawas kanato gikan sa umaabot nga pagkunhod sa kalipay ug mga panalangin. (“Magpili Kamo Niining Adlawa,” Liahona, Nob. 2018, 106)

Dugang nga mga Kalihokan sa Pagkat-on

Pagsunod sa Manluluwas

Ang mga estudyante mahimong makapangita pinaagi sa pipila ka seksiyon sa Alang sa Kalig-on sa mga Kabatan-onan: Usa ka Giya Alang sa Pagbuhat og mga Pagpili aron makaila sa mga baroganan nga makagiya kanila sa pagpili ni Jesukristo. Pwede nimong gamiton kini isip usa ka dugang nga ideya sa pagtuon uban sa handout niini nga leksiyon.

Ang Ginoo motuman sa Iyang mga saad

Aron matabangan ang mga estudyante nga makakita sa ehemplo kon giunsa sa Ginoo pagtuman ang Iyang mga pakigsaad diha sa Iyang mga anak, ang mga estudyante mahimong mobasa sa Moises 7:50–52, nga mangita unsa ang gisaad sa Ginoo (tan-awa sa bersikulo 52). Kon gikinahanglan, ipasabot nga ang Ginoo mikuha sa siyudad ni Enoch padulong sa langit tungod sa pagkamatarong sa mga tawo (tan-awa sa Moises 7:69). Dayon pwede nimong basahon ang Moises 8:1–2 aron makita giunsa sa Ginoo pagtuman ang Iyang saad. (Ang Ginoo wala modala ngadto sa langit sa usa ka matarong nga tawo nga nagngalan og Mathusalam aron matawo si Noe isip kabahin sa kaliwat ni Enoch.)

Pwede nimong dapiton ang mga estudyante sa pagpakigbahin giunsa nila pagkakita sa katumanan sa mga saad sa Ginoo ngadto kanila diha sa ilang mga kinabuhi. Pwede usab nimong dapiton ang mga estudyante nga basahon ang Doktrina ug mga Pakigsaad 1:38 ug ikonektar ngadto sa Moises 8:1–2.

Kapilian nga bidyo

Ikonsiderar ang pagpakigbahin sa bidyo nga “Dare to Stand Alone” (4:20) aron matabangan ang mga estudyante nga makakita sa mga ehemplo sa mga indibidwal nga nagsunod ni Jesukristo sa kalibotan karon.