« ម៉ូសេ ៤:១–៤ ៖ ‹ សូមឲ្យព្រះហឫទ័យរបស់ព្រះអង្គបានសម្រេច ហើយសូមឲ្យសិរីល្អរបស់ព្រះអង្គបានជារបស់ព្រះអង្គរហូត › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« ម៉ូសេ ៤:១–៤ ៖ ‹ សូមឲ្យព្រះហឫទ័យរបស់ព្រះអង្គបានសម្រេច ហើយសូមឲ្យសិរីល្អរបស់ព្រះអង្គបានជារបស់ព្រះអង្គរហូត › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ៣–៤; ម៉ូសេ ៤–៥ ៖ មេរៀនទី ១០
ម៉ូសេ ៤:១–៤
« សូមឲ្យព្រះហឫទ័យរបស់ព្រះអង្គបានសម្រេច ហើយសូមឲ្យសិរីល្អរបស់ព្រះអង្គបានជារបស់ព្រះអង្គរហូត »
នៅក្នុងជីវិតមុនផែនដី ព្រះវរបិតាសួគ៌បានជ្រើសរើសព្រះយេស៊ូវគ្រីស្ទឲ្យធ្វើជាព្រះអង្គសង្គ្រោះនៅក្នុងផែនការរបស់ទ្រង់ ។ ព្រះយេស៊ូវគ្រីស្ទគោរពប្រតិបត្តិតាមព្រះហឫទ័យរបស់ព្រះវរបិតាសួគ៌យ៉ាងខ្ជាប់ខ្ជួន ទោះបីជាវាលំបាកយ៉ាងណាក៏ដោយ ។ មេរៀននេះអាចជួយសិស្សឲ្យមានបំណងប្រាថ្នាធ្វើតាមគំរូនៃការគោរពប្រតិបត្តិព្រះវរបិតាសួគ៌របស់ព្រះយេស៊ូវគ្រីស្ទ ។
ការរៀបចំរបស់សិស្ស ៖ សូមអញ្ជើញសិស្សឲ្យគិតអំពីមនុស្សដែលពួកគេស្គាល់ ដែលគំរូរបស់ពួកគាត់បំផុសគំនិតដល់ពួកគេឲ្យកាន់តែគោរពតាមព្រះវរបិតាសួគ៌ ។ សូមស្នើពួកគេមករៀនដោយរៀបចំខ្លួនដើម្បីចែកចាយ ។
សកម្មភាពរៀនសូត្រដែលអាចមាន
ការធ្វើតាមព្រះហឫទ័យរបស់ព្រះវរបិតាសួគ៌
ដើម្បីចាប់ផ្ដើមថ្នាក់ សូមពិចារណាចែកចាយពេលវេលាមួយដែលព្រះវរបិតាសួគ៌បានបង្គាប់ឲ្យក្មេងវ័យជំទង់ម្នាក់ធ្វើអ្វីមួយដែលលំបាក ។ ការណ៍នេះអាចជាបទពិសោធន៍ផ្ទាល់ខ្លួន ឬបទពិសោធន៍មួយដែលអ្នកធ្លាប់បានឮ ។ ដំណើររឿងខាងក្រោមគឺជាឧទាហរណ៍មួយដែលអ្នកអាចប្រើប្រាស់បាន ។ សូមលើកទឹកចិត្តសិស្សឲ្យគិតអំពីគ្រាដែលពួកគេអាចមានអារម្មណ៍ស្រដៀងគ្នានេះ ។
បងប្រុស អិម យ៉ូសែប ប្រោហ្វ អតីតគណៈប្រធានយុវជនទូទៅបានចែកចាយដំណើររឿងដូចខាងក្រោមអំពីកូនស្រីរបស់គាត់ ៖
យុវវ័យអើយ ព្រះតម្រូវឲ្យអ្នកធ្វើកិច្ចការលំបាកៗ ។ យុវនារីអាយុ ១៤ ឆ្នាំម្នាក់បានចូលរួមប្រកួតកីឡាបាល់បោះមួយ ។ នាងមានក្ដីសុបិនចង់លេងបាល់បោះសម្រាប់សាលាដូចជាបងស្រីរបស់នាង ។ ក្រោយមក នាងបានដឹងថា ឪពុកម្ដាយនាងត្រូវបានហៅឲ្យធ្វើជាអធិបតីលើបេសកកម្មនៅប្រទេសក្វាតេម៉ាឡា ។
ពេលទៅដល់ នាងបានដឹងថា នាងនឹងត្រូវរៀនថ្នាក់មួយចំនួនជាភាសាអេស្ប៉ាញដែលនាងមិនទាន់ចេះនិយាយនៅឡើយ ។ គ្មានក្រុមកីឡាណាមួយសោះនៅសាលារបស់នាង ។ នាងបានរស់នៅជាន់ទី ១៤ ក្នុងអគារដែលមានការយាមកាមយ៉ាងដិតដល់ ។ បន្ថែមពីនោះទៀត នាងពុំអាចចេញទៅក្រៅតែម្នាក់ឯងទេដោយសារហេតុផលសុវត្ថិភាព ។
ឪពុកម្ដាយនាងបានស្ដាប់នាងយំដល់គេងលក់រៀងរាល់យប់ជាច្រើនខែ ។ ( « Lift Up Your Head and Rejoice » Liahona ខែ វិច្ឆិកា ឆ្នាំ ២០១៨ ទំព័រ ១៤ )
-
ប្រសិនបើអ្នកស្ថិតក្នុងស្ថានភាពរបស់យុវនារីរូបម្នាក់នេះ តើអ្វីដែលលំបាកបំផុតសម្រាប់អ្នក ?
សូមជញ្ចឹងគិតសំណួរខាងក្រោមនេះ ៖
-
តើអ្វីជាការលំបាកដែលព្រះបានតម្រូវ ឬអាចនឹងតម្រូវពីអ្នក ?
-
តើអ្នកស្ម័គ្រចិត្តធ្វើកិច្ចការលំបាកនេះប៉ុនណា ? ហេតុអ្វី ?
-
តើអ្នកចង់រៀន ឬយល់ពីអ្វីនៅក្នុងមេរៀននេះ ដែលអាចជួយអ្នកកាន់តែមានឆន្ទៈក្នុងការធ្វើអ្វីដែលព្រះបានបង្គាប់ឲ្យធ្វើ ?
ខណៈពេលសិស្សកំពុងសិក្សា ម៉ូសេ ៤:១–៤ ពួកគេនឹងរៀនអំពីព្រះយេស៊ូវគ្រីស្ទ និងព្រះហឫទ័យរបស់ទ្រង់ ក្នុងការធ្វើកិច្ចការលំបាកដែលព្រះវរបិតាសួគ៌បង្គាប់ឲ្យធ្វើ ។ សូមលើកទឹកចិត្តសិស្សឲ្យស្វែងរកជំនួយពីព្រះវិញ្ញាណបរិសុទ្ធ ដើម្បីដឹងពីរបៀបដែលគំរូរបស់ព្រះអង្គសង្គ្រោះអាចជួយពួកគេឆ្លងកាត់រឿងលំបាកដែលព្រះអាចបង្គាប់ឲ្យពួកគេធ្វើ ។
បុគ្គលិកលក្ខណៈរបស់ព្រះគ្រីស្ទ
អ្នកអាចពន្យល់ព័ត៌មាននៅក្នុងកថាខណ្ឌខាងក្រោមនេះ ដើម្បីជួយសិស្សយល់ពីបរិបទនៃវគ្គបទគម្ពីរដែលពួកគេនឹងត្រូវសិក្សានៅថ្ងៃនេះ ។
យើងបានរស់នៅក្នុងជីវិតមុនផែនដីជាមួយនឹងព្រះវរបិតាសួគ៌របស់យើង ។ ពេលនៅទីនោះ យើងបានរៀនពីផែនការរបស់ទ្រង់ ដើម្បីជួយយើងឲ្យប្រែក្លាយដូចជាទ្រង់ ។ ម៉ូសេ ៤:១–៤ មាននូវដំណើររឿងនៃក្រុមប្រឹក្សានៅស្ថានសួគ៌ នៅពេលព្រះយេស៊ូវគ្រីស្ទត្រូវបានជ្រើសរើសឲ្យធ្វើជាព្រះអង្គសង្គ្រោះរបស់យើង ។ នៅក្នុងខគម្ពីរទាំងនេះ យើងឃើញពីបុគ្គលិកលក្ខណៈរបស់ព្រះយេស៊ូវគ្រីស្ទ និងរបស់សាតាំង នៅពេលទ្រង់ និងវាឆ្លើយតបនឹងព្រះហឬទ័យរបស់ព្រះវរបិតាសួគ៌ក្នុងរបៀបផ្សេងគ្នា ។
អ្នកអាចពិចារណាបង្កើតតារាងសាមញ្ញមួយដូចខាងក្រោមនៅលើក្ដារខៀន ដើម្បីជួយសិស្សឲ្យឃើញយ៉ាងច្បាស់ពីភាពខុសគ្នារវាងព្រះយេស៊ូវគ្រីស្ទ និងសាតាំង ។
|
ព្រះយេស៊ូវគ្រីស្ទ |
សាតាំង |
|---|---|
សូមអាន ម៉ូសេ ៤:១–៤ ដោយរកមើលអ្វីដែលអ្នកអាចរៀនអំពីការជំរុញចិត្ត និងអាកប្បកិរិយារបស់ព្រះយេស៊ូវគ្រីស្ទ និងរបស់សាតាំង ។
សូមអញ្ជើញសិស្សឲ្យសរសេរនូវការយល់ឃើញរបស់ពួកគេនៅលើក្ដារខៀន និងពិភាក្សាអំពីអ្វីដែលពួកគេបានរៀន ។ ( សិស្សអាចលើកឡើងពីចំនួនដងដែលសាតាំងប្រើពាក្យ « ទូលបង្គំ » និងបំណងប្រាថ្នារបស់វាដើម្បីទទួលបានកិត្តិយស ។ ផ្ទុយទៅវិញ ពួកគេអាចនឹងកត់សម្គាល់នូវការប្រើរបស់ព្រះអង្គសង្គ្រោះនូវពាក្យ « របស់ព្រះអង្គ » និងបំណងប្រាថ្នារបស់ទ្រង់ ដើម្បីឲ្យសិរីល្អបានជារបស់ផងព្រះវរបិតា ។ សិស្សអាចកត់សម្គាល់ពីរបៀបដែលសាតាំង « បានបះបោរទាស់នឹង » ព្រះវរបិតា និង « បានខំរកបំផ្លាញសិទ្ធិជ្រើសរើសរបស់មនុស្ស » ។ ផ្ទុយទៅវិញ ពួកគេអាចចង្អុលបង្ហាញពីបំណងប្រាថ្នារបស់ព្រះអង្គសង្គ្រោះក្នុងការគោរពប្រតិបត្តិតាមព្រះហឫទ័យរបស់ព្រះវរបិតា និងទទួលយកផែនការរបស់ព្រះវរបិតា ) ។
-
តើខគម្ពីរទាំងនេះបង្រៀនអ្នកអ្វីខ្លះអំពីទំនាក់ទំនងរវាងព្រះយេស៊ូវគ្រីស្ទ និងព្រះវរបិតារបស់ទ្រង់ ?
សេចក្ដីពិតមួយដែលសិស្សអាចស្វែងរកបានក្នុងអំឡុងការពិភាក្សានេះ គឺ ព្រះយេស៊ូវគ្រីស្ទ បានគោរពប្រតិបត្តិតាមព្រះវរបិតាសួគ៌យើងដោយព្រះទ័យរាបទាប ។
ដំណើររឿងខាងក្រោមអំពីព្រះអង្គសង្គ្រោះអាចជួយសិស្សរៀនពីគំរូរបស់ទ្រង់ ។ សូមជួយសិស្សឲ្យយល់ថា ការរៀនសូត្របន្ថែមទៀតអំពីការគោរពប្រតិបត្តិតាមរបស់ព្រះអង្គសង្គ្រោះចំពោះព្រះវរបិតា ទោះជាពេលមានការលំបាកក៏ដោយ អាចបង្កើនបំណងប្រាថ្នារបស់យើងដើម្បីធ្វើតាមគំរូរបស់ទ្រង់ ។
សូមអានដំណើររឿងខាងក្រោម ដោយរកមើលបំណងប្រាថ្នាឥតរេរារបស់ព្រះយេស៊ូវគ្រីស្ទ ក្នុងការគោរពប្រតិបត្តិតាមព្រះវរបិតាសួគ៌ សូម្បីតែនៅពេលដែលការគោរពប្រតិបត្តិពិបាកក៏ដោយ ។
-
លូកា ២:៤៩ ( ជាក្មេងអាយុ ១២ ឆ្នាំ )
-
យ៉ូហាន ៨:២៨–២៩ ( ជាមជ្ឈិមវ័យ )
-
ម៉ាថាយ ២៦:៣៦–៣៩ ( នៅក្នុងសួនច្បារគែតសេម៉ានី )
-
នីហ្វៃទី៣ ១១:១០–១១ ( ជាតួអង្គដែលបានរស់ឡើងវិញ )
សូមពិភាក្សាជាមួយសិស្សពីអ្វីដែលពួកគេកំពុងរៀនអំពីព្រះយេស៊ូវគ្រីស្ទចេញពីគំរូទាំងនេះ ។ បន្ទាប់មក សូមអញ្ជើញពួកគេឲ្យចែកចាយគំរូផ្សេងទៀតពីជីវិតរបស់ព្រះអង្គសង្គ្រោះ នៅពេលទ្រង់គោរពប្រតិបត្តិតាមព្រះហឫទ័យរបស់ព្រះវរបិតាដោយព្រះទ័យរាបទាប ។
សូមអញ្ជើញសិស្សឲ្យរំឭកពីរឿងលំបាកក្នុងជីវិតរបស់ពួកគេ ដែលពួកគេបានរកនឹកឃើញ នៅពេលចាប់ផ្តើមរៀន ។ ដើម្បីជួយពួកគេផ្សារភ្ជាប់អ្វីដែលពួកគេកំពុងរៀនអំពីព្រះយេស៊ូវគ្រីស្ទទៅនឹងជីវិតរបស់ពួកគេ សូមសួរសំណួរដូចខាងក្រោម ៖
-
តើព្រះយេស៊ូវគ្រីស្ទបានមានបន្ទូល ឬធ្វើអ្វី ដែលអាចបំផុសគំនិតនរណាម្នាក់ឲ្យជ្រើសរើសគោរពប្រតិបត្តិតាមព្រះវរបិតាសួគ៌ ទោះបីជាពេលមានការលំបាកក៏ដោយ ?
-
តើអ្នកដឹងថានរណាជាគំរូដ៏ល្អនៃការគោរពប្រតិបត្តិតាមព្រះទ័យរបស់ព្រះវរបិតាសួគ៌ដែរឬទេ ? តើអ្នកបានរៀនអ្វីខ្លះពីគំរូរបស់ពួកគេ ?
-
តើអ្វីជំរុញចិត្តអ្នកឲ្យគោរពប្រតិបត្តិតាមព្រះហឫទ័យរបស់ព្រះវរបិតាសួគ៌ ទោះបីជាវាលំបាកយ៉ាងណាក្តី ?
ការធ្វើតាមគំរូរបស់ព្រះយេស៊ូវគ្រីស្ទ
យុវនារីនៅក្នុងដំណើររឿងនៅដើមមេរៀននេះ គឺជាកូនស្រីរបស់បងប្រុស ប្រោហ្វ ។ ប្រសិនបើអ្នកបានចែកចាយដំណើររឿងរបស់កូនស្រីគាត់ សូមប្រាប់សិស្សថា នាងបានប្រឈមមុខយ៉ាងក្លាហានក្នុងរយៈពេលបីឆ្នាំដែលឪពុកម្ដាយរបស់នាងបានបម្រើការជាអ្នកដឹកនាំបេសកកម្មនៅក្វាតេម៉ាឡា ។
សូមចែកចាយសេចក្ដីបន្តបន្ទាប់នៃរឿងរបស់នាង ដោយអញ្ជើញសិស្សឲ្យរកមើលលក្ខណៈដូចជាព្រះគ្រីស្ទ ដែលពួកគេមើលឃើញក្នុងគំរូរបស់នាង ។ ប្រសិនបើអ្នកបានចែកចាយដំណើររឿងផ្សេងនៅដើមមេរៀន សូមពិចារណាចែកចាយសេចក្ដីបន្តបន្ទាប់ ដូចជាការសន្និដ្ឋានរបស់ដំណើររឿង ឬបទពិសោធន៍ផ្សេងទៀតនៅក្នុងជីវិតរបស់បុគ្គលដដែលនេះ ។ សូមអញ្ជើញសិស្សឲ្យរកមើលលក្ខណៈដូចជាព្រះគ្រីស្ទនៅក្នុងបុគ្គលនោះ ។
បងប្រុស ប្រោហ្វ បានបន្ត ៖
ពេលយើងបញ្ចប់បេសកកម្ម ខ្ញុំបានសួរកូនស្រីយើងថាតើគាត់នឹងបម្រើបេសកកម្មពេញម៉ោងឬទេ ។ នាងឆ្លើយថា « ទេប៉ា ខ្ញុំបានបម្រើរួចហើយ » ។
ខ្ញុំពេញចិត្តនឹងការសម្រេចចិត្តនេះ ! ប៉ុន្តែប្រហែលជាប្រាំមួយខែក្រោយមក ព្រះវិញ្ញាណបានដាស់ខ្ញុំកណ្ដាលយប់ជាមួយគំនិតបែបនេះថា « យើងបានហៅកូនស្រីរបស់អ្នកឲ្យបម្រើបេសកកម្ម » ។
ប្រតិកម្មរបស់ខ្ញុំគឺថា « ព្រះវរបិតាអើយ នាងបានលះបង់ច្រើនហើយ » ។ ព្រះវិញ្ញាណបានកែតម្រូវខ្ញុំមួយរំពេច ហើយខ្ញុំបានយល់ថា ការបម្រើជាអ្នកផ្សព្វផ្សាយសាសនារបស់នាងត្រូវបានតម្រូវពីព្រះអម្ចាស់ ។
មិនយូរប៉ុន្មាន ខ្ញុំបាននាំកូនស្រីខ្ញុំទៅញ៉ាំអាហារថ្ងៃត្រង់ ។ ខ្ញុំបាននិយាយទល់មុខនឹងនាងថា « ហ្គាន់ហ្ស៊ី តើកូនដឹងថា ហេតុអ្វីបានជាយើងមកញ៉ាំអាហារទីនេះទេ ? »
នាងឆ្លើយថា « ចាសប៉ា ។ ប៉ាដឹងហើយថា កូនត្រូវចេញបម្រើបេសកកម្ម ។ កូនមិនចង់ចេញទៅទេ ប៉ុន្តែកូននឹងទៅ » ។
ដោយសារតែនាងបានធ្វើតាមព្រះហឬទ័យព្រះវរបិតាសួគ៌ ទើបនាងបានបម្រើដោយអស់ពីចិត្ត អស់ពីពលំ អស់ពីគំនិត ហើយអស់ពីកម្លាំង ។ នាងបានបង្រៀនឪពុកនាងអំពីរបៀបធ្វើកិច្ចការលំបាកៗ ។ ( « Lift Up Your Head and Rejoice » Liahona ខែ វិច្ឆិកា ឆ្នាំ ២០១៨ ទំព័រ ១៤ )
-
សូមគិតអំពីខគម្ពីរដែលអ្នកបានអានអំពីព្រះយេស៊ូវគ្រីស្ទនៅសព្វថ្ងៃនេះ ។ តើយុវនារីរូបនេះបានធ្វើតាមគំរូរបស់ទ្រង់យ៉ាងដូចម្ដេច ?
ការសួរសំណួរបើកចំហអាចជួយសិស្សរបស់អ្នកឲ្យរកឃើញ និងប្រើប្រាស់នូវសេចក្ដីពិតនៃដំណឹងល្អចំពោះស្ថានភាពផ្ទាល់ខ្លួនរបស់ពួកគេ ។ សូមពិចារណាប្រើសំណួរដូចខាងក្រោម ដើម្បីអនុញ្ញាតឲ្យសិស្សបង្ហាញពីអ្វីដែលពួកគេបានរៀន និងរបៀបដែលពួកគេអាចប្រើប្រាស់វាក្នុងជីវិតរបស់ពួកគេ ។ ( សម្រាប់ការបំពាក់បំប៉នបន្ថែមលើចំណុចនេះ សូមមើល « រៀនគោលលទ្ធិរបស់ព្រះយេស៊ូវគ្រីស្ទសម្រាប់ខ្លួនឯង » នៅក្នុងផ្នែក ជំនាញការអភិវឌ្ឍគ្រូបង្រៀន ។ )
នៅក្នុងសៀវភៅកំណត់ហេតុការសិក្សារបស់អ្នក សូមសរសេរចម្លើយចំពោះសំណួរពីរខាងក្រោម ដោយយកចិត្តទុកដាក់លើគំនិត ឬចំណាប់អារម្មណ៍ពីព្រះវិញ្ញាណ ៖
-
នៅថ្ងៃនេះ តើអ្នកបានរៀនអ្វីខ្លះអំពីព្រះយេស៊ូវគ្រីស្ទ ដែលអាចជួយអ្នកគោរពប្រតិបត្តិតាមព្រះវរបិតាសួគ៌ សូម្បីតែនៅពេលទ្រង់បង្គាប់ឲ្យអ្នកធ្វើកិច្ចការលំបាកៗក៏ដោយនោះ ?
-
ដោយសារអ្វីដែលអ្នកបានរៀន ឬបានយល់នៅថ្ងៃនេះ តើអ្នកចាប់អារម្មណ៍ចង់ធ្វើអ្វីខ្លះ ?
សូមថ្លែងទីបន្ទាល់អំពីគំរូរបស់ព្រះយេស៊ូវគ្រីស្ទ និងសមត្ថភាពរបស់ទ្រង់ក្នុងការជួយយើងធ្វើអ្វីដែលព្រះបានបង្គាប់ ។