Moisiu 1; Abraham 3: Mësimi 5

Moisiu 1:12–26

“Largohu Këtej, Satan”

Të gjithë ne i kemi ndier tundimet e Satanit. Megjithatë, si Moisiu, kur kujtohemi se kush jemi në të vërtetë, ne mund të marrim forcë nga Perëndia për ta mposhtur Satanin dhe tundimet e tij në jetën tonë. Qëllimi i këtij mësimi është t’i ndihmojë nxënësit të marrin forcë nga Perëndia për t’i mposhtur tundimet e tyre vetjake.

Përgatitja e nxënësve: Ftojini nxënësit të përsiatin një nga tundimet me të cilat përballen vetë, dhe të vijnë në orën mësimore të përgatitur për të mësuar se si ta mposhtin atë.

Veprimtari të Mundshme të të Mësuarit

Përballja me tundimin

Për t’i përgatitur nxënësit që të mësojnë rreth mposhtjes së tundimeve, merreni parasysh të tregoni thënien dhe pyetjet vijuese.

Presidenti Xhefri R. Holland, i Kuorumit të Dymbëdhjetë Apostujve, dha mësim:

“Ne flasim [me guxim] pasi Satani është një qenie e vërtetë, e vendosur t’ju shkatërrojë dhe ju përballeni me ndikimin e tij në një moshë gjithmonë e më të re”. (“Ne Jemi të Gjithë të Rekrutuar”, Liahona, nëntor 2011, f. 45)

• Si ndihesh rreth këtij citimi nga Presidenti Holland?

• Cilat janë disa nga tundimet me të cilat përballen adoleshentët shenjtorë të ditëve të mëvonshme?

Mund të jetë e dobishme t’i shkruani në tabelë tundimet që përmendin nxënësit. Do t’u kërkoni nxënësve të reflektojnë mbi këto më vonë në mësim.

Për pyetjet vijuese, mund të merrni parasysh t’i ftoni nxënësit t’i shkruajnë përgjigjet e tyre në një ditar studimi.

Përsiat një tundim me të cilin je përballur ose me të cilin lufton. Merre parasysh sa vijon:

• Çfarë e bën të vështirë t’i bësh ballë atij tundimi?

• Çfarë bën për të kërkuar ndihmë dhe forcë për t’i bërë ballë?

• Sa me efektshmëri ndien se po e mposht tundimin tënd?

Ndërsa studion te Moisiu 1:1–26 sot, kërko udhërrëfim nga Fryma e Shenjtë për të përcaktuar të vërteta që mund të të forcojnë teksa përballesh me tundimin.

Moisiu tundohet nga Satani

Ftojini nxënësit të tregojnë atë që kujtojnë nga mësimi i mëparshëm, ose mund të përsëritin shkurtimisht vargjet te Moisiu 1:1–10 dhe të reflektojnë mbi atë që mësuan. Nëse është e nevojshme, kujtojuni atyre se Moisiu e “pa Perëndinë ballë për ballë e foli me të” (Moisiu 1:2) dhe se Perëndia i mësoi Moisiut tri herë se ai është biri i Tij (shihni vargjet 4, 6 dhe 7).

Ndonëse Moisiu ishte një profet i fuqishëm, edhe ai u përball me tundim të madh. Pak pas përvojës së Moisiut me Perëndinë, ai pati një përvojë tej mase të vështirë ku “Satani erdhi ta tundonte” (Moisiu 1:12). Për shkak të asaj që Moisiu dinte dhe bëri, ai mundi të triumfonte. Lexo te Moisiu 1:12–22, duke kërkuar se çfarë e ndihmoi Moisiun t’i mposhtte tundimet e Satanit. Merre parasysh ta shenjosh atë që gjen.

Mund të merrni parasysh ta shfaqni materialin filmik “I Am a Son of God” [“Unë Jam një Bir i Perëndisë”] nga kodi kohor 2:50 deri në 6:30, ose të gjithë materialin filmik nëse nuk ua shfaqët nxënësve pjesën e parë në mësimin e mëparshëm. Pas materialit filmik, mund t’i ftoni nxënësit të lexojnë vargjet, duke kërkuar atë që e ndihmoi Moisiun t’i mposhtte tundimet e Satanit. Nxënësit më pas mund ta diskutojnë pyetjen vijuese në dyshe ose grupe të vogla:

• Çfarë mëson nga përvoja e Moisiut që mund të na ndihmojë t’i mposhtim tundimet tona?

Merreni parasysh ta shkruani parimin vijues të paplotë në tabelë: Ne mund të marrim ndihmën e Perëndisë për t’i mposhtur tundimet duke … Ftojini nxënësit të vijnë në tabelë dhe ta përfundojnë parimin me fjalët e tyre. Nëse nxënësit kanë nevojë për ndihmë, mund t’i udhërrëfeni ata duke u bërë pyetje si këto në vijim:

• Si e quajti Satani Moisiun te vargu 12 dhe si u përgjigj Moisiu te vargu 13?

• Çfarë solli ndër mend Moisiu nga përvoja e tij shpirtërore me Perëndinë që e ndihmoi atë kur u përball me tundimin?

Nxënësit mund ta përfundojnë parimin në mënyra të shumta, përfshirë disa nga vijueset:

… kujtuar se jemi fëmijë të Perëndisë

… sjellë ndër mend përvojat shpirtërore të së shkuarës

… i bërë thirrje Perëndisë për forcë

Pasi të jenë përcaktuar parime të shumta, merreni parasysh t’i përdorni citimin dhe pyetjet vijuese për të ndihmuar që të thellohet kuptueshmëria e nxënësve për të vërtetat që zbuluan.

Presidenti Rasëll M. Nelson tregoi sa vijon rreth fuqisë së të kujtuarit se jemi fëmijë të Perëndisë:

“Miqtë e mi të dashur, ju jeni në mënyrë të mirëfilltë fëmijë shpirtërorë të Perëndisë. Keni kënduar për këtë të vërtetë që kur mësuat fjalët e këngës ‘Fëmi’ i Per’ndis’ Jam’. Por a është skalitur ajo e vërtetë e përjetshme në zemrën tuaj? A ju ka shpëtuar kjo e vërtetë kur jeni përballur me tundimin?” (“Zgjedhjet për Përjetësinë” [takim shpirtëror mbarëbotëror për të rinjtë e të rejat në moshë madhore, 15 maj 2022])

• Çfarë mendon se do të thotë ta kesh të skalitur në zemrën tënde të vërtetën se je fëmijë i Perëndisë?

• Si mund të na forcojë të kujtuarit se jemi fëmijë të Perëndisë kur përballemi me tundimin?

• Pse mendon se kemi nevojë për ndihmën e Perëndisë që ta mposhtim tundimin?

Ftojini nxënësit të japin shembuj të rasteve kur Perëndia e ka forcuar dikë kundrejt tundimit. Kjo mund të jetë nga shkrimet e shenjta, nga njerëzit të afërm me ta ose nga vetë jeta e tyre. Duke qenë se tundimet janë vetjake, kujtojuni nxënësve të mos tregojnë asnjë tundim konkret.

Mposhtja e tundimeve vetjake

Për t’i ndihmuar nxënësit të kuptojnë se si mund t’i jetojnë parimet e diskutuara sot, ftojini ata të përzgjedhin një ose dy tundime që u shkruan në tabelë më herët në mësim. Si klasë ose në grupe të vogla, ftojini nxënësit të mendojnë mënyra praktike se si mundet një person që përballet me atë tundim, t’i përdorë këto parime për ta mposhtur atë tundim.

Merreni parasysh t’i ftoni nxënësit t’i shkruajnë idetë e tyre në tabelë, ose ju mund të paraqitni disa nga idetë vijuese.

Mënyrat për ta zbatuar atë që mësojmë te Moisiu 1:12–26:

• Shëno në ditarin tënd një rast kur e ndjeve dashurinë e Zotit dhe e kuptove se ishe fëmijë i Perëndisë. Mund ta rishikosh këtë gjatë kohëve të tundimit.

• Mëso përmendsh dhe risill në mendje shkrime të shenjta frymëzuese, himne apo lutje të sakramentit për tʼi përsëritur me vete kur të tundohesh. (Kjo ishte strategjia që përdori Shpëtimtari te Mateu 4:1–11.)

• Lutu përditë për forcën dhe fuqinë e Zotit që ta mposhtësh tundimin. Raportoji Atit Qiellor çdo mbrëmje për ta falënderuar Atë, për të pranuar ndonjë dobësi, për të kërkuar falje dhe jepi fjalën që do të vazhdosh të përpiqesh (shih tek 3 Nefi 18:15, 18).

• Sill ndër mend përvoja shpirtërore të së shkuarës që ke pasur dhe shkruaji ato në një ditar. Referoju këtyre kur të vijë tundimi.

• Diskuto me prindërit ose me të rritur apo shok/shoqe të mirëbesuar se si i kanë ndihmuar këto parime ata dhe mënyrat se si do të të rekomandonin që t’i zbatoje ato.

Ftojini nxënësit të bëjnë një plan që t’i ndihmojë ata t’i mposhtin tundimet me të cilat përballen. Mund ta bëni këtë duke u dhënë udhëzimet vijuese:

Sill ndër mend tundimin që përsiate në fillim të mësimit ose një tjetër me të cilin lufton.

Jepni dëshminë tuaj rreth fuqisë dhe forcës së Zotit që e keni përjetuar në jetën tuaj, dhe për dëshirën e Tij për t’i ndihmuar nxënësit tuaj që t’i mposhtin tundimet e tyre. Shprehni sigurinë tuaj tek ata dhe tek aftësia e tyre për t’i mposhtur tundimet e tyre me ndihmën e Perëndisë.

Duke i kërkuar udhërrëfim Atit Qiellor, plotësoje pohimin vijues në ditarin tënd të studimit ose në mendjen tënde: “Në mënyrë që të më ndihmojë të përgatitem kundër këtij tundimi, unë do të ”.

Burime Shtesë

Si mund të më ndihmojë të kujtuarit e dashurisë së Perëndisë për mua si fëmija i Tij kur tundohem?

Presidenti M. Rasëll Ballard (1928–2023), i Kuorumit të Dymbëdhjetë Apostujve, tha:

“Ju lutem kujtoni se, së pari, Ati juaj Qiellor ju do dhe së dyti, Shpëtimtari juaj, Zoti Jezu Krisht, ju do. Futini këto të vërteta drejt e në mendje dhe më pas lërini t’ju zhyten thellë në zemër. Ato do t’ju japin një busull për mënyrën se si duhet të veproni dhe si duhet t’i trajtoni të tjerët dhe do t’ju japin forcën për ta mposhtur tundimin dhe për të qëndruar në shtegun e besëlidhjeve të Kishës.” (“Children of Heavenly Father” [takim shpirtëror në Universitetin “Brigam Jang”, 3 mars 2020])

Si mund të na ndihmojë sjellja ndër mend e përvojave tona shpirtërore të së shkuarës për ta mposhtur tundimin?

Presidenti Xhefri R. Holland, i Kuorumit të Dymbëdhjetë Apostujve, këshilloi:

“Në çaste frike apo dyshimi, ose kohë shqetësimi, mos u largoni nga besimi që keni fituar tashmë, edhe pse ai mund të jetë i kufizuar. … Kur ato çaste vijnë dhe shfaqen shqetësimet, zgjidhja e të cilave nuk po afrohet menjëherë, mbahuni fort tek ajo që tashmë e dini dhe qëndroni të paepur derisa vjen dija e mëtejshme. … Problemi nuk është përmasa e besimit tuaj apo shkalla e njohurisë suaj – ai është integriteti që tregoni ndaj besimit që keni vërtet dhe ndaj së vërtetës që tashmë e dini.” (“Unë Besoj, o Zot”, Liahona, maj 2013, f. 94)

Pse tundimet shpesh vijnë kur po përpiqem të bëj përparim shpirtëror ose pasi kam pasur përvoja shpirtërore?

Profeti Jozef Smith (1805–1844), dha mësim:

“Sa më pranë t’i shkojë një njeri Zotit, aq më e madhe do të jetë fuqia që do të manifestohet nga kundërshtari për të parandaluar përmbushjen e qëllimeve të Tij” (në Orson F. Whitney, Life of Heber C. Kimball [Salt Lake City: Bookcraft, 1967], f. 132).

Presidenti Xhefri R. Holland, shpjegoi:

“Dua ta inkurajoj çdonjërin prej jush sot ndaj kundërshtimit që vjen kaq shpesh pasi janë marrë vendime të ndritshme, pasi çaste zbulese dhe bindjeje na kanë dhënë një paqe dhe siguri që mendonim se nuk do ta humbnim kurrë. …

Ne nuk mund të bëhemi pjesë e një çasti me një domethënie të tillë të përjetshme dhe pasojë të përhershme pa e ditur se do të jetë një betejë – një betejë e mirë dhe fitimtare, por sidoqoftë një betejë.” (“Cast Not Away Therefore Your Confidence” [takim shpirtëror në Universitetin “Brigam Jang”, mars 1999], f. 2–3)

Si mund t’i bëjmë ballë fuqisë së Satanit?

Plaku Ulises Soares, i Kuorumit të Dymbëdhjetë Apostujve, tregoi sa vijon rreth mposhtjes së tundimit:

“Lufta kundër tundimit kërkon një jetë të tërë zelli dhe besnikërie. Por ju lutem ta dini se Zoti është gati të na ndihmojë në përpjekjet vetjake dhe na premton bekime të mrekullueshme nëse durojmë deri në fund.” (“Kërkojeni Krishtin në Çdo Mendim”, Liahona, nëntor 2020, f. 83)

Veprimtari Plotësuese të të Mësuarit

Një shembull nga jeta reale për mposhtjen e tundimit

Për t’i ndihmuar nxënësit të cilët mund t’i jenë dorëzuar tashmë tundimit ose po luftojnë me varësinë, merreni parasysh të shfaqni materialin filmik “Let God Guide You: From Weakness to Strength” [“Lëreni Perëndinë t’ju Udhërrëfejë: Nga Dobësia në Forcë”] (6:07), historia e një burri që mori fuqinë dhe forcën e Zotit për t’i mposhtur tundimet dhe varësinë e tij nga pornografia. Ky material filmik mund të jetë veçanërisht i dobishëm për nxënësit të cilët mund t’i jenë dorëzuar tundimit tashmë. Pas materialit filmik, pyetini nxënësit se çfarë pikëpamjesh morën rreth mposhtjes së tundimeve dhe rolit që luan Perëndia në aftësinë tonë për t’i mposhtur ato. Merreni parasysh ta shfaqni materialin filmik përpara pjesës së mësimit “Mposhtja e tundimeve vetjake”.

Moisiu 1 te Perla me Vlerë të Madhe në vend të librit të Zanafillës

Nëse mendoni se nxënësit mund të kenë dobi nga diskutimi për arsyen pse Moisiu 1 nuk është në librin e Zanafillës, ftojini ata të lexojnë te Moisiu 1:23, duke kërkuar arsyen pse ai nuk është përfshirë aktualisht. Merreni parasysh të bëni pyetjet vijuese:

• Pse mendon se Satani mund të mos ketë dashur që ky rrëfim të ishte “mes fëmijëve të njerëzve” (Moisiu 1:23)?

• Për çfarë arsyesh je i/e kënaqur që Zoti e riktheu këtë kapitull nëpërmjet Jozef Smithit?

Krahasimi i përvojës së Moisiut me përvojën e Jozef Smithit

Për t’i ndihmuar nxënësit ta kuptojnë më mirë se si t’u bëjnë ballë tundimeve të Satanit dhe bekimeve që mund të vijnë nga bërja e kësaj, ftojini nxënësit të krahasojnë përvojën e Moisiut me të Jozef Smithit.

Në ditarin e tyre të studimit, nxënësit mund të vizatojnë një figurë njeriu të emërtuar Moisiu dhe një figurë tjetër njeriu të quajtur Jozef Smithi. Më pas ata mund t’i krahasojnë vargjet te Moisiu 1:12–22 me ato te Joseph Smith – Historia 1:13–16, duke kërkuar hollësi kyç në secilin takim me Satanin dhe atë që bënë Moisiu dhe Jozef Smithi për ta mposhtur atë. Ata mund t’i renditin këto hollësi poshtë secilit vizatim.

Nëse nxënësit kanë nevojë për ndihmë, merreni parasysh të paraqitni pyetje si:

• Çfarë përvoje shpirtërore mund të sillni ndër mend që pati profeti përpara takimit të tij me Satanin?

• Si e mposhti Profeti përfundimisht Satanin?

• Çfarë ndodhi si rezultat i mposhtjes së Satanit nga Profeti (shihni te Moisiu 1:24–25; Joseph Smith – Historia 1:17)?

Tundimi zbehet kur e kërkojmë Krishtin në çdo mendim

Për t’i ndihmuar nxënësit ta kuptojnë rëndësinë e përqendrimit te Krishti gjatë tundimit, ndihmojini ata të kuptojnë se Moisiu u përqendrua te Jezu Krishti gjatë takimit të tij me Satanin (shihni te Moisiu 1:13, 16–18). Shfaqni materialin filmik “Temptation Fades as We Seek Christ in Every Thought” [“Tundimi Zbehet kur Ne e Kërkojmë Krishtin në Çdo Mendim”] (2:57) dhe kërkojuni nxënësve të tregojnë ndonjë pikëpamje tjetër që marrin rreth mposhtjes së tundimit.