« បុព្វកថានៃព្រះគម្ពីរសញ្ញាចាស់ ៖ ព្រះគម្ពីរសញ្ញាចាស់ថ្លែងទីបន្ទាល់អំពីព្រះវរបិតាសួគ៌ដែលតែងមានព្រះទ័យយកចិត្តទុកដាក់ និងអំពីព្រះយេស៊ូវគ្រីស្ទ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« បុព្វកថានៃព្រះគម្ពីរសញ្ញាចាស់ ៖ ព្រះគម្ពីរសញ្ញាចាស់ថ្លែងទីបន្ទាល់អំពីព្រះវរបិតាសួគ៌ដែលតែងមានព្រះទ័យយកចិត្តទុកដាក់ និងអំពីព្រះយេស៊ូវគ្រីស្ទ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សូមស្វាគមន៍មកកាន់ព្រះគម្ពីរសញ្ញាចាស់ ៖ មេរៀនទី ១
បុព្វកថានៃព្រះគម្ពីរសញ្ញាចាស់
ព្រះគម្ពីរសញ្ញាចាស់ថ្លែងទីបន្ទាល់អំពីព្រះវរបិតាសួគ៌ដែលតែងមានព្រះទ័យយកចិត្តទុកដាក់ និងអំពីព្រះយេស៊ូវគ្រីស្ទ
ព្រះគម្ពីរសញ្ញាចាស់មាននូវការបង្រៀន និងទីសម្គាល់ជាច្រើនអំពីព្រះអម្ចាស់យេស៊ូវគ្រីស្ទ និងតួនាទីរបស់ទ្រង់ក្នុងនាមជាព្រះអង្គសង្គ្រោះនៃពិភពលោកនេះ ។ ដំណើររឿងមកពីព្រះគម្ពីរសញ្ញាចាស់អាចជួយសិស្សរៀនអំពីទ្រង់ និងមើលឃើញពីរបៀបដែលទ្រង់មានចំណែកនៅក្នុងជីវិតរបស់យើង ។ មេរៀននេះមានគោលបំណងជួយសិស្សឲ្យបង្កើនបំណងប្រាថ្នារបស់ពួកគេ ដើម្បីខិតកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ តាមរយៈការសិក្សាព្រះគម្ពីរសញ្ញាចាស់របស់ពួកគេ ។
ការរៀបចំរបស់សិស្ស ៖ សូមពិចារណាអញ្ជើញសិស្សឲ្យរំឮកឡើងវិញនូវដំណើររឿងដែលពួកគេចូលចិត្តក្នុងព្រះគម្ពីរសញ្ញាចាស់ ហើយជញ្ជឹងគិតអំពីអ្វីដែលដំណើររឿងនោះអាចបង្រៀនអំពីព្រះវរបិតាសួគ៌ ឬព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
ចំណុចផ្ដោតរបស់យើង
ជាការចាប់ផ្ដើមមេរៀននេះ សូមគិតពីរបៀបដែលអ្នកអាចជួយសិស្សយកចិត្តទុកដាក់បន្ថែមលើការស្វែងរកព្រះអង្គសង្គ្រោះនៅក្នុងព្រះគម្ពីរសញ្ញាចាស់ ។ របៀបមួយដើម្បីធ្វើបែបនេះ គឺត្រូវដាក់រូបព្រះអង្គសង្គ្រោះជាច្រើនសន្លឹកជុំវិញបន្ទប់ មុនចាប់ផ្ដើមរៀន ។ បន្ទាប់ពីថ្នាក់រៀនចាប់ផ្តើម អ្នកអាចសួរសិស្សថាតើពួកគេសង្កេតឃើញមានរូបភាពព្រះអង្គសង្គ្រោះប៉ុន្មានសន្លឹក ហើយពិភាក្សាអំពីមូលហេតុដែលពួកគេបាន ឬមិនបានសង្កេតឃើញរូបភាពនោះ ។
របៀបមួយទៀតដើម្បីធ្វើបែបនេះ គឺពន្យល់សិស្សថា បន្តិចទៀត ពួកគេនឹងបានមើលវីដេអូមួយដែលបង្ហាញពីមនុស្សពីរក្រុមគឺ មួយពណ៌ស និងមួយពណ៌ខ្មៅ ។ ទាំងពីរក្រុមនឹងត្រូវបោះបាល់បោះមួយ ។ សូមអញ្ជើញសិស្សឲ្យព្យាយាមរាប់ឲ្យបានត្រឹមត្រូវនូវចំនួននៃការបោះបាល់ដែលក្រុមពណ៌សបានធ្វើ ។
បង្ហាញវីដេអូ « Focus Test » ដែលមានលើគេហទំព័រ ChurchofJesusChrist.org ចាប់ពីនាទីទី ០:០០ ដល់ ០:២២ ។ បន្ទាប់មកផ្អាកវីដេអូនោះ ។
-
តើអ្នកបានរាប់ឃើញបាល់បោះបានប៉ុន្មានដង ?
-
តើអ្នកបានសង្កេតឃើញមានអ្វីផ្សេងទៀតកើតឡើងនៅក្នុងវីដេអូនេះដែរឬទេ ? បើឃើញ តើជាអ្វី ?
សូមចាក់វីដេអូដែលនៅសល់ ( វីដេអូនេះជាការហ្វឹកហាត់ការបោះបាល់ដដែលៗ ) ហើយអញ្ជើញសិស្សឲ្យរកមើលអ្វីមួយដែលពួកគេអាចមិនបានឃើញកាលពីលើកដំបូង ។
-
តើអ្នកបានសង្កេតឃើញអ្វីដែលអ្នកមិនបានឃើញកាលពីលើកដំបូងដែរឬទេ ?
បើចាំបាច់ អ្នកអាចលើកឡើងថា ស្ត្រីចំណាស់ម្នាក់បានដើរកាត់កន្លែងលេង អ្នកចម្បាំងនិនចាពាក់ពណ៌ខ្មៅបានជំនួសអ្នកលេងម្នាក់ កំលោះៗខ្លះពាក់មួក ហើយខ្លះទៀតបានបោះបាល់ឱបជំនួសឲ្យបាល់បោះ ។
-
ហេតុអ្វីបានជាអ្នកមិនបានមើលឃើញទង្វើទាំងនោះពេលមើលនៅលើកដំបូង ?
-
តើការណ៍នេះអាចស្រដៀងគ្នានឹងអ្វីដែលនរណាម្នាក់អាចនឹងដកពិសោធន៍ពេលអានដំណើររឿងនៃព្រះគម្ពីរសញ្ញាចាស់យ៉ាងដូចម្ដេច ?
មិនថាចាប់ផ្តើមមេរៀនដោយប្រើវិធីសាស្រ្តណានោះទេ សូមប្រាកដថា វិធីសាស្រ្តនោះច្បាស់ចំពោះសិស្ស ព្រោះបើយើងមិនយកចិត្តទុកដាក់ទេ យើងអាចនឹងផ្តោតលើរឿងផ្សេងទៀត ហើយមើលរំលងអ្វីដែលព្រះគម្ពីរសញ្ញាចាស់មាន ដើម្បីបង្រៀនយើងអំពីព្រះវរបិតាសួគ៌ និងព្រះយេស៊ូវគ្រីស្ទ ។
សូមអានសេចក្ដីថ្លែងការណ៍ខាងក្រោមដោយអែលឌើរ ម៉ៃឃើល ធី រីងវូដ នៃពួកចិតសិបនាក់ ដោយរកមើលអ្វីដែលយើងអាចរៀនអំពីព្រះវរបិតាសួគ៌ និងព្រះយេស៊ូវគ្រីស្ទ នៅពេលយើងអានព្រះគម្ពីរសញ្ញាចាស់ ។
យើងសំខាន់នៅក្នុងផែនការរបស់ព្រះវរបិតាសួគ៌ ហើយក៏ជាហេតុនាំឲ្យមានបេសកកម្មរបស់ព្រះអង្គសង្គ្រោះដែរ ។
ពីមួយជំពូកទៅមួយជំពូក [ នៃព្រះគម្ពីរសញ្ញាចាស់ ] យើងរកឃើញឧទាហរណ៍អំពីរបៀបដែលព្រះវរបិតាសួគ៌ និង [ ព្រះយេស៊ូវគ្រីស្ទ ] ចូលរួមចំណែកយ៉ាងសំខាន់នៅក្នុងជីវិតយើង ។ ( « ដ្បិតព្រះទ្រង់ស្រឡាញ់យើងដល់ម៉្លេះ » លីអាហូណា ខែ ឧសភា ឆ្នាំ ២០២២ ទំព័រ ៨៨–៨៩ )
-
យោងតាមអែលឌើរ រីងវូដ តើព្រះគម្ពីរសញ្ញាចាស់បង្ហាញយើងអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ?
សិស្សអាចគិតឃើញនូវសេចក្ដីពិតស្រដៀងទៅនឹង ៖
យើងគឺជាចំណុចផ្ដោតនៃផែនការរបស់ព្រះវរបិតាសួគ៌ និងជាហេតុផលដែលមានបេសកកម្មរបស់ព្រះអង្គសង្គ្រោះ ។
ព្រះវរបិតាសួគ៌ និងព្រះយេស៊ូវគ្រីស្ទ ចូលរួមចំណែកយ៉ាងសំខាន់នៅក្នុងជីវិតរបស់យើង ។
សូមឲ្យសិស្សចែកចាយនូវអ្វីដែលពួកគេគិត និងយល់អំពីសេចក្ដីពិតទាំងនេះ និងមូលហេតុដែលសេចក្តីពិតអាចមានអត្ថន័យចំពោះពួកគេ ។ សូមអញ្ជើញសិស្សឲ្យបំពេញឯកសារស្វ័យវាយតម្លៃខាងក្រោមដោយខ្លួនឯង ។ ពួកគេអាចកត់ត្រាចម្លើយរបស់ពួកគេនៅក្នុងសៀវភៅកំណត់ហេតុការសិក្សាមួយបាន ។
សូមគិតអំពីបទពិសោធន៍ណាមួយដែលអ្នកធ្លាប់មានអំពីព្រះគម្ពីរសញ្ញាចាស់ ។
-
តើបទពិសោធន៍របស់អ្នកអំពីព្រះគម្ពីរសញ្ញាចាស់មានលក្ខណៈដូចម្ដេច ?
-
ប្រសិនបើអ្នកធ្លាប់មានបទពិសោធន៍អំពីព្រះគម្ពីរសញ្ញាចាស់ តើបទពិសោធន៍ទាំងនោះបានជួយអ្នកឲ្យមានអារម្មណ៍កាន់តែជិតស្និទ្ធជាមួយព្រះវរបិតាសួគ៌ និងព្រះយេស៊ូវគ្រីស្ទដែរឬទេ ?
ខណៈពេលអ្នកកំពុងសិក្សាមេរៀននេះ សូមស្វែងរកជំនួយតាមរយៈព្រះវិញ្ញាណបរិសុទ្ធ ដើម្បីដឹងពីរបៀបចូលទៅកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ តាមរយៈការសិក្សាព្រះគម្ពីរសញ្ញាចាស់របស់អ្នក ។
ព្រះវរបិតាសួគ៌ និងព្រះយេស៊ូវគ្រីស្ទ នៅក្នុងព្រះគម្ពីរសញ្ញាចាស់
សូមពិចារណាសុំឲ្យសិស្សចែកចាយរឿងដែលពួកគេបានដឹងរួចហើយអំពីព្រះគម្ពីរសញ្ញាចាស់ ។ បើចាំបាច់ អ្នកអាចចែកចាយថា ព្រះគម្ពីរសញ្ញាចាស់ចាប់ផ្តើមជាមួយដំណើររឿងអំពីការបង្កើតពិភពលោក និងអំពីលោកអ័ដាម និងនាងអេវ៉ា ។ វាទាក់ទងអំពីដំណើររឿងរបស់ព្យាការី និងមនុស្សជាច្រើន ដែលភាគច្រើនរស់នៅក្នុង និងជុំវិញប្រទេសអ៊ីស្រាអែល ហើយបញ្ចប់នៅប្រហែលឆ្នាំ ៤០០ មុនម.គ. ។ បន្ទាប់មក សូមពន្យល់អ្វីខាងក្រោមនេះដោយប្រើពាក្យសម្ដីរបស់អ្នកផ្ទាល់ ។
ខណៈពេលអ្នកសិក្សាព្រះគម្ពីរសញ្ញាចាស់ វានឹងសំដៅទៅលើព្រះអម្ចាស់ ឬព្រះយេហូវ៉ា ។ វាមានប្រយោជន៍ក្នុងការដឹងថា ព្រះយេហូវ៉ាជាព្រះយេស៊ូវគ្រីស្ទ ។ ព្រះយេហូវ៉ាបានធ្វើតាមព្រះហឫទ័យរបស់ព្រះវរបិតាសួគ៌ក្នុងគ្រប់ការណ៍ទាំងអស់ ។ ខណៈពេលអ្នករៀនអំពីព្រះយេហូវ៉ា អ្នកក៏រៀនអំពីព្រះវរបិតាសួគ៌ ដែលបានដឹកនាំ និងប្រទានអំណាចដល់ទ្រង់ផងដែរ ។
សូមបង្ហាញរូបភាពបីបួននៅក្នុងលំនាំរាងជារង្វង់ដែលពិពណ៌នាដំណើររឿងក្នុងព្រះគម្ពីរសញ្ញាចាស់ ។ ( វាអាចនឹងមានប្រយោជន៍ក្នុងការរៀបចំខ្លួនអ្នកមុនចូលរៀន ដោយរំឭកសង្ខេបៗឡើងវិញនូវដំណើររឿងដែលបានបង្ហាញ ) ។ នៅចំកណ្ដាលរូបភាពទាំងនេះ សូមដាក់រូបភាពព្រះយេស៊ូវគ្រីស្ទ ។ អ្នកអាចជ្រើសរើសប្រើរូបភាពដូចខាងក្រោម ។
ម្យ៉ាងវិញទៀត អ្នកអាចបង្ហាញរូបភាពព្រះយេស៊ូវគ្រីស្ទ ហើយអញ្ជើញសិស្សឲ្យគិតដោយខ្លួនឯងដល់ដំណើររឿងទាំងឡាយដែលបង្ហាញពីការទាក់ទង និងក្តីស្រឡាញ់របស់ទ្រង់នៅក្នុងព្រះគម្ពីរសញ្ញាចាស់ ។ សិស្សអាចសរសេរចំណងជើងសាមញ្ញៗសម្រាប់ដំណើររឿងទាំងនោះដែលនិយាយអំពីព្រះអង្គសង្គ្រោះ ។
ដំណើររឿងទាំងឡាយត្រូវបានរាយបញ្ចីខាងក្រោម ដោយចាប់ផ្តើមពីកំពូល ហើយដំណើរការតាមទិសទ្រនិចនាឡិកា ។
-
យ៉ូសែបនៅអេស៊ីព្ទ ( លោកប្បត្តិ ៣៧:២៣–២៨; ៣៩:១–៥ ) ។ បន្ទាប់ពីយ៉ូសែបបានចែកចាយក្ដីសុបិនរបស់លោកជាមួយគ្រួសារលោក បងប្អូនរបស់យ៉ូសែប បានឃុបឃិតប្រឆាំងនឹងលោក ។
-
ម៉ូសេញែកសមុទ្រក្រហម ( និក្ខមនំ ១៤:១០, ១៣–១៦, ២១–២២ ) ។ កូនចៅនៃអ៊ីស្រាអែលបានភៀសខ្លួនចេញពីអេស៊ីព្ទ នៅពេលកងទ័ពរបស់ផារ៉ោន ចូលមកវាយប្រហារ និងចាប់ពួកគេធ្វើជាទាសករម្ដងទៀត ។
-
ពស់ភ្លើងនៅលើបង្គោល ( ជនគណនា ២១:៤–៩ ) ។ បន្ទាប់ពីព្រះអម្ចាស់បានរំដោះពួកអ៊ីស្រាអែលពីអេស៊ីព្ទ ហើយបានប្រទាននំបុ័ងមកពីស្ថានសួគ៌ដោយអព្ភូតហេតុ ពួកអ៊ីស្រាអែលបានត្អួញត្អែរទាស់នឹងព្រះ ។
-
ដាវីឌ និងកូលីយ៉ាត ( សាំយ៉ូអែល ទី១ ១៧:៤៣–៤៩ ) ។ កូលីយ៉ាតដែលជាអ្នកចម្បាំងភីលីស្ទីនបានដាក់សំណើឲ្យពួកអ៊ីស្រាអែលបញ្ជូនអ្នកប្រយុទ្ធដ៏ពូកែបំផុតរបស់ខ្លួនមកប្រយុទ្ធនឹងគាត់ ។ ដាវីឌស្ម័គ្រចិត្តប្រកួតជាមួយគាត់ ។
-
ឡភ្លើង ( ដានីយ៉ែល ៣:៤–៦, ១២–១៣, ១៦–២៥ ) ។ ស្ដេចនេប៊ូក្នេសាដំឡើងរូបមាសមួយ ហើយហៅពួកអ្នកត្រួតត្រាប្រចាំទឹកដីរបស់ទ្រង់មកជុំគ្នាដើម្បីឧទ្ទិសដល់រូបនោះ ។
-
រូងសិង្ហ ( ដានីយ៉ែល ៦:៧, ១០, ១៦–២៣ ) ។ ដារីយុសបានតាំងដានីយ៉ែល ជាអ្នកត្រួតត្រានៅបាប៊ីឡូន ។ ពួកអ្នកត្រួតត្រាឯទៀតបានឃុបឃិតប្រឆាំងនឹងគាត់ ដើម្បីឲ្យស្តេចលែងសព្វព្រះទ័យនឹងគាត់ទៀត ។
សូមពិចារណារៀបចំសិស្សជាគូៗ ឬក្រុមតូចៗ ។ សិស្សអាចជ្រើសរើសដំណើររឿងមួយ ឬច្រើន អានខគម្ពីរដែលទាក់ទង និងពិភាក្សាសំណួរខាងក្រោម ។
-
តើដំណើររឿងនេះបង្ហាញពីក្តីស្រឡាញ់ ឬការចូលរួមចំណែករបស់ព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្ដេច ?
-
តើការយល់ដឹងអំពីដំណើររឿងតាមរបៀបនេះអាចមានប្រយោជន៍យ៉ាងណាចំពោះអ្នក ?
អ្នកអាចអញ្ជើញសិស្សឲ្យចែកចាយជាមួយមិត្តរួមថ្នាក់នូវការយល់ដឹងដែលបានទទួលពីការពិភាក្សារបស់ពួកគេ ។
ប្រសិនបើសិស្សមិនរៀបរាប់អំពីវាទេ សូមពន្យល់ថា ការសិក្សាអំពីរបៀបដែលព្រះអម្ចាស់បានចូលរួមចំណែកនៅក្នុងជីវិតរបស់បុគ្គលម្នាក់ៗនៅក្នុងព្រះគម្ពីរសញ្ញាចាស់ អាចជួយយើងឲ្យជញ្ជឹងគិតពីរបៀបដែលទ្រង់បានចូលរួមចំំណែកក្នុងជីវិតរបស់យើង ។ សូមអញ្ជើញសិស្សឲ្យជញ្ជឹងគិតពីរបៀបដែលព្រះអម្ចាស់បានប្រទានពរ និងជួយពួកគេ ។ សូមឲ្យសិស្សពីរបីនាក់ចែកចាយគំនិត និងបទពិសោធន៍របស់ពួកគេ ប្រសិនបើបទពិសោធន៍នោះមិនមានលក្ខណៈផ្ទាល់ខ្លួនពេកទេ ។
ការសិក្សាព្រះគម្ពីរសញ្ញាចាស់
ការណ៍នេះអាចជាឱកាសល្អមួយដើម្បីរំឭកសិស្សអំពីគោលដៅនៃការសិក្សាព្រះគម្ពីរប្រចាំថ្ងៃរបស់ពួកគេ ។ អ្នកអាចអញ្ជើញសិស្សឲ្យស្វែងរកការណែនាំពីព្រះវិញ្ញាណបរិសុទ្ធ នៅពេលពួកគេពិនិត្យ កែសម្រួល ឬបង្កើតគោលដៅសិក្សាព្រះគម្ពីរ ។ អ្នកអាចសួរសិស្ស បើមានពួកគេណាម្នាក់ចង់ចែកចាយគោលដៅរបស់ពួកគេជាមួយមិត្តរួមថ្នាក់ ដើម្បីជួយបង្កើតគំនិតសម្រាប់អ្នកដទៃ ។
សូមពិចារណាអញ្ជើញសិស្សឲ្យពិភាក្សាជាថ្នាក់ ឬសរសេរនៅក្នុងសៀវភៅកំណត់ហេតុការសិក្សារបស់ពួកគេនូវចម្លើយរបស់ពួកគេចំពោះសំណួរខាងក្រោម ។
-
តើអ្វីខ្លះដែលអ្នកបានរៀននៅថ្ងៃនេះដែលអ្នកគិតថា អាចជួយអ្នកក្នុងការសិក្សាព្រះគម្ពីរសញ្ញាចាស់របស់អ្នក ?
-
ហេតុអ្វីបានជាការទទួលបានបទពិសោធន៍ និងការស្គាល់នូវក្ដីស្រឡាញ់ និងការទំនាក់ទំនងរបស់ព្រះវរបិតាសួគ៌ និងព្រះយេស៊ូវគ្រីស្ទ ក្នុងជីវិតរបស់អ្នក គឺជាពរជ័យដល់អ្នក ?
ដើម្បីជួយសិស្សក្នុងការសិក្សាព្រះគម្ពីរសញ្ញាចាស់នៅឆ្នាំនេះ អ្នកអាចអញ្ជើញពួកគេឲ្យគូសចំណាំនៅក្នុងព្រះគម្ពីររបស់ពួកគេ ឬកត់ចំណាំនៅក្នុងសៀវភៅកំណត់ហេតុការសិក្សារបស់ពួកគេ រាល់ពេលពួកគេឃើញភស្តុតាងនៃក្តីស្រឡាញ់ ឬការទាក់ទងរបស់ព្រះនៅក្នុងជីវិតរបស់បុត្រាបុត្រីរបស់ទ្រង់ ។ សូមពិចារណាបញ្ចប់ដោយការថ្លែងទីបន្ទាល់របស់អ្នកអំពីរបៀបដែលការសិក្សាព្រះគម្ពីរសញ្ញាចាស់អាចជួយយើងឲ្យខិតកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ហើយទទួលបានសេចក្តីជំនឿលើការមានទំនាក់ទំនងរបស់ទ្រង់ទាំងទ្វេនៅក្នុងជីវិតរបស់យើង ។
អ្នកអាចអញ្ជើញសិស្សឲ្យចែកចាយជាមួយក្រុមគ្រួសាររបស់ពួកគេនូវអ្វីដែលពួកគេបានរៀននៅថ្ងៃនេះ ។ ការណ៍នេះអាចជួយគ្រួសាររបស់ពួកគេបាន នៅពេលពួកគេសិក្សាព្រះគម្ពីរសញ្ញាចាស់ ។