Leksyon 2

Ang Plano sa Kaluwasan

Pasiuna

Si Presidente Boyd K. Packer, sa Korum sa Napulog Duha ka mga Apostoles, misugo sa mga religious educator sa pagpresentar og mubo nga kinatibuk-ang pagpasabut sa plano sa kaluwasan sa sinugdanan sa matag tuig ting-eskwela:

“Ang mubo nga kinatibuk-ang pagpasabut sa ‘plano sa kalipay’ … , kon ihatag sa sinugdanan ug balikan panagsa, adunay dako kaayo nga bili sa inyong mga estudyante” (“The Great Plan of Happiness” [address to CES religious educators, Ago. 10, 1993], si.lds.org; tan-awa usab sa Teaching Seminary: Preservice Readings [Church Educational System manual, 2004], 68–74).

Kini nga leksyon naghatag og mubo nga kinatibuk-ang pagpasabut sa plano sa kaluwasan ug nagtutok sa importanting tahas ni Jesukristo ug sa Iyang Pag-ula niana nga plano.

Mga Sugyot alang sa Pagtudlo

Dapita ang Espiritu pinaagi sa epektibo nga mga debosyonal

Usa ka mubo nga debosyonal sa sinugdanan sa klase makatabang sa mga magtutudlo ug mga estudyante nga mobati sa Espiritu ug makaandam sa pagkat-on. Ang usa ka debosyonal kasagaran maglakip sa usa ka himno, pag-ampo, ug hunahuna gikan sa kasulatan. Ang mga debosyonal mas labing epektibo kon ang mga estudyante mopamatuod ug mopakigbahin sa mga pagbati ug mga pagsabut nga ilang nasinati atol sa ilang personal nga pagtuon sa kasulatan. Hunahunaa unsaon ninyo sa pag-organisar ang mga debosyonal aron nga ang tanang mga estudyante dunay mga oportunidad sa pag-apil sa tibuok tuig.

Ang tahas ni Jesukristo sa kinabuhi nga wala pa dinhi sa yuta

Isip kabahin sa debosyonal, mahimo nimong dapiton ang klase sa pagkanta sa mga bersikulo 1 ug 4 sa “I Believe in Christ” (Hymns, no. 134) o laing himno mahitungod sa Manluluwas. Sugdi ang leksyon pinaagi sa pagpangutana:

• Unsaon ninyo pagtubag kon dunay mangutana nganong importante man si Jesukristo ninyo?

Ipasabut sa mga estudyante nga sa leksyon karon ilang makat-unan ang mahitungod sa tahas ni Jesukristo sa plano sa Langitnong Amahan sa kaluwasan. Dapita sila sa pagpangita sa mga kamatuoran samtang sila magtuon karon nga makatabang nila sa pagpalig-on sa ilang pagtuo diha ni Jesukristo.

Kopyaha ang mosunod nga tsart diha sa pisara. Mahimo usab nga inyo kining iapud-apod isip handout alang sa mga estudyante. (Kon inyong iapud-apod ang mga handout, hangyoa ang mga estudyante sa pagkompleto sa ilang mga tsart samtang inyong kompletuhon ang tsart sa pisara.)

handout, tsart ni Jesukristo

Si Jesukristo Mao ang sentro sa plano sa Langitnong Amahan sa kaluwasan

Manwal sa Magtutudlo sa Seminary sa Bag-ong Tugon—Leksyon 2

Kinabuhi nga Wala pa dinhi sa Yuta	Mortal nga Kinabuhi	Kinabuhi Human dinhi sa Yuta

© 2015 pinaagi sa Intellectual Reserve, Inc. Tanang mga katungod gigahin.

Itudlo nga ang plano sa Langitnong Amahan adunay tulo ka importanting mga bahin: (1) ang atong kinabuhi nga wala pa dinhi sa yuta, nga nag-una sa atong pisikal nga pagkatawo; (2) ang atong mortal nga kinabuhi dinhi sa yuta; ug (3) ang atong kinabuhi human dinhi sa yuta, nga mosunod sa atong pisikal nga kamatayon.

Dapita ang usa ka estudyante sa pagbasa og kusog sa mosunod nga pahayag, ug hangyoa ang klase sa pagpaminaw sa mga limitasyon nga atong nasinati sa atong kinabuhi nga wala pa dinhi sa yuta:

“Nagpuyo kita isip espiritu nga mga anak sa atong Amahan sa Langit sa wala pa kita matawo dinhi sa yuta. Hinoon, kita dili sama sa atong Langitnong Amahan, ni kita mahimong sama Kaniya ug makatagamtam sa tanang mga panalangin nga Iyang natagamtaman nga dili makasinati sa pagpuyo sa pagka-mortal uban sa usa ka pisikal nga lawas.

“Ang tibuok katuyoan sa Dios—ang Iyang buhat ug ang Iyang himaya—mao ang paghimo sa kada usa kanato nga makatagamtam sa tanan Niyang mga panalangin. Naghatag Siya og perpekto nga plano sa paghimo sa Iyang katuyoan. Kita nakasabut ug midawat niini nga plano sa wala pa kita moanhi sa yuta. …

“Aron mouswag ug mamahimong sama sa Dios, ang kada usa kanato kinahanglan makaangkon og lawas ug masulayan atol sa usa ka panahon sa pagsulay dinhi sa yuta” (Isangyaw ang Akong Ebanghelyo: Usa ka Giya sa Misyonaryo nga Pangalagad (2004), 48, 49).

• Unsa nga mga limitasyon ang atong nasinati sa atong kinabuhi nga wala pa dinhi sa yuta?

Ipasabut nga sa dihang gipresentar sa Langitnong Amahan ang Iyang plano sa kalipay, atong nahibaloan nga usa ka manluluwas ang gikinahanglan sa pagpatuman niini nga plano. Si Lucifer, usa sa espiritu nga anak sa Langitnong Amahan, mirebelde batok sa plano sa Langitnong Amahan. Nailhan siya nga Satanas, usa ka termino nga Hebreohanon nga nagpasabut nga “kaaway.”

Dapita ang usa ka estudyante sa pagbasa og kusog sa Moises 4:1–3. Hangyoa ang klase sa pagsunod, mangita kon unsay gidemanda ni Satanas sa Langitnong Amahan.

• Unsay gidemanda ni Satanas sa Langitnong Amahan?

• Sumala sa bersikulo 2, unsay gisulti sa Langitnong Amahan mahitungod ni Jesukristo?

• Unsa man ang napilian nga buhaton ni Jesukristo? (Human makatubag ang mga estudyante, isulat ang mosunod nga kamatuoran diha sa pisara ubos sa Kinabuhi nga wala pa dinhi sa yuta: Napilian si Jesukristo didto sa kinabuhi nga wala pa dinhi sa yuta nga mahimong Manunubos sa katawhan.)

Ipasabut nga human si Jesukristo mipili sa pagpatuman sa plano sa Langitnong Amahan sa kaluwasan, Siya milalang niini nga yuta diin kita makabaton og pisikal nga lawas ug makaangkon og kasinatian.

Dapita ang usa ka estudyante sa pagbasa og kusog sa Mga Hebreohanon 1:1-2. Dapita ang klase sa pagsunod, mangita sa tahas ni Jesukristo sa paglalang sa yuta.

• Unsa ang tahas ni Jesukristo sa paglalang sa yuta? (Isulat ang mosunod nga doktrina diha sa pisara ubos sa Kinabuhi nga wala pa dinhi sa yuta: Ubos sa direksyon sa atong Langitnong Amahan, si Jesukristo milalang sa kalibutan.)

Dapita ang mga estudyante sa paghunahuna mahitungod sa katahum sa yuta. Mahimo ninyong ipakita ang usa o daghang mga litrato nga nagpakita sa katahum sa yuta.

• Sa unsang paagi nga ang pagkahibalo nga si Jesukristo milalang niini nga yuta, ug minilyon pa nga sama niini, makaapekto sa inyong pagbati mahitungod Kaniya?

Ang tahas ni Jesukristo sa mortal nga kinabuhi

Ipasabut nga sa pagka-mortal masinati nato ang dugang nga mga limitasyon o mga babag nga makapugong nato nga mahimong sama sa Langitnong Amahan ug makabalik ngadto sa Iyang presensya. Dapita ang usa ka estudyante sa pagbasa og kusog sa mosunod nga pahayag, ug hangyoa ang klase sa pagpaminaw sa duha ka mga babag nga atong masinati panahon sa pagka-mortal:

“Sa pagka-mortal kita nagpuyo sa usa ka kahimtang diin kita mapaubos sa pisikal ug espirituhanon nga kamatayon. Ang Dios adunay perpekto, nahimaya, imortal nga unod ug mga bukog. Aron mamahimong sama sa Dios ug makabalik sa Iyang presensya, kita usab kinahanglang adunay perpekto, imortal nga lawas nga unod ug mga bukog. Apan hinoon, tungod sa Pagkapukan ni Adan ug ni Eva, ang matag tawo sa yuta adunay dili perpekto, motal nga lawas ug sa ngadto-ngadto mamatay. Kon dili pa tungod sa Manluluwas nga si Jesukristo, ang kamatayon motapos unta sa tanang paglaum alang sa umaabut nga pagpakabuhi uban sa Langitnong Amahan.

“Uban sa pisikal nga kamatayon, ang sala usa ka dakong babag nga magpugong nato nga mamahimong sama sa atong Langitnong Amahan ug makabalik ngadto sa Iyang presensya. Sa atong mortal nga kahimtang sa kasagaran monunut kita sa tintasyon, mosupak sa mga kasugoan sa Dios, ug magpakasala. … Bisan tuod og morag dili ingon niini ang makita, ang sala kanunay mosangput ngadto sa pagkadili malipayon. Ang sala maoy makabati og dili maayo [guilt] ug kaulaw. Tungod sa atong mga sala, dili na kita makabalik sa pagpuyo uban sa Langitnong Amahan gawas kon kita napasaylo ug nalimpyohan.

“… Sama sa pisikal nga kamatayon, dili kita makabuntog sa mga epekto sa sala nga kita-kita ra lang” (Isangyaw ang Akong Ebanghelyo, 59).

Ipasabut nga sa wala pa matawo si Jesus sa yuta, usa ka anghel ang nagpakita ni Jose sa usa ka damgo sa dihang iyang nahibaloan nga si Maria nagmabdos. Hangyoa ang usa ka estudyante sa pagbasa og kusog sa Mateo 1:21. Dapita ang klase sa pagsunod, mangita kon unsay gipahayag sa anghel ngadto ni Jose.

• Unsa ang gisulti sa anghel nga buhaton ni Jesus? (Human makatubag ang mga estudyante, isulat ang mosunod nga doktrina diha sa pisara ubos sa Mortal nga kinabuhi: Si Jesukristo miabut aron sa pagluwas nato gikan sa atong mga sala.)

• Unsa ang gibuhat ni Jesukristo aron kita maluwas gikan sa atong mga sala?

Si Jesus Nag-ampo sa Getsemani

Ang Paglansang

Maria ug ang Nabanhaw nga si Jesus

“Nganong Nagahilak Ikaw? © 2015 by Simon Dewey. Gigamit nga may pagtugot sa Altus Fine Art, altusfineart.com.

Ipakita ang mga litrato Jesus Nag-ampo sa Gethsemani, Ang Paglansang, ug Maria ug ang Nabanhaw nga si Jesus (Libro sa mga Hulagway sa Ebanghelyo [2009], nos. 56, 57, 59; tan-awa usab sa LDS.org). Pahinumdumi ang mga estudyante nga ang pag-antus ni Jesukristo, kamatayon, ug Pagkabanhaw ang tanang nagpasabut nga Pag-ula.

• Unsay kinahanglan natong buhaton aron maluwas gikan sa atong mga sala pinaagi sa Pag-ula ni Jesukristo? (Tan-awa sa Mga Buhat 2:38).

Ang tahas ni Jesukristo sa kinabuhi nga human dinhi sa yuta

Hangyoa ang mga estudyante sa paghunahuna og usa ka tawo nga namatay. Paglabay sa pipila ka gutlo, pangutana:

• Sumala sa inyong pagsabut sa plano sa kaluwasan, hain kadtong nangamatay? (Sa kamatayon ang mga espiritu sa tanang mga tawo misulod sa kalibutan sa espiritu. Sa pagdugang sa pagsabut sa mga estudyante, mahimo kamong modapit og usa ka estudyante sa pagbasa og kusog sa Alma 40:11–14.

Ipakita ang litrato sa Paglubong ni Jesus (Libro sa mga Hulagway sa Ebanghelyo, no. 58; tan-awa usab sa LDS.org). Dapita ang usa ka estudyante sa pagbasa og kusog sa 1 Pedro 3:18–20; 4:6. Dayon pangutana:

• Unsay gibuhat ni Jesukristo human dayon sa Iyang kamatayon?

Ang Paglubong ni Kristo.

Ang Paglubong ni Kristo, ni Carl Heinrich Bloch. Sa maayong kabubut-on sa National History Museum at Frederiksborg Castle in Hillerød, Denmark. Ayaw pakopyahi.

Dapita ang usa ka estudyante sa pagbasa og kusog sa Doktrina ug mga Pakigsaad 138:18–19, 30–32. Hangyoa ang klase sa pagsunod, mangita unsay gibuhat ni Jesukristo aron masangyaw ang ebanghelyo ngadto sa tanan didto sa kalibutan sa espiritu.

• Unsay gibuhat ni Jesukristo aron masangyaw ang ebanghelyo ngadto sa tanan didto sa kalibutan sa espiritu?

• Sa unsang paagi nga kini nga mga paningkamot nagpakita sa gugma sa Langitnong Amahan ug ni Jesukristo alang sa tanang mga tawo?

Gamita ang litrato ni Maria ug ang Nabanhaw nga si Jesus (Libro sa mga Hulagway sa Ebanghelyo, no. 59; tan-awa usab sa LDS.org), ug pangutan-a ang klase:

• Unsay nahitabo sa ikatulong adlaw human sa kamatayon ni Jesus? (Siya nabanhaw.)

• Unsay buot ipasabut nga mabanhaw? (Ang espiritu ug pisikal nga lawas sa usa ka tawo mahiusa, dili na gayud mabulag pa pag-usab [tan-awa sa D&P 138:17].)

Dapita ang usa ka estudyante sa pagbasa og kusog sa 1 Mga Taga-Corinto 15:20–22. Hangyoa ang klase sa pagsunod, mangita kon sa unsa nga paagi nga ang Pagkabanhaw ni Jesukristo makaapekto sa matag usa kanato.

• Sa unsang paagi kita maapektuhan sa Pagkabanhaw ni Jesukristo? (Human makatubag ang mga estudyante, isulat ang mosunod nga doktrina diha sa pisara ubos sa Kinabuhi human dinhi sa yuta: Tungod sa Pagkabanhaw ni Jesukristo, ang tanang mga tawo mabanhaw.)

Dapita ang usa ka estudyante sa pagbasa og kusog sa Pinadayag 20:12. Dayon pangutana:

• Unsay mahitabo sa matag usa nato human kita mabanhaw?

Ipasabut nga ang basahon sa kinabuhi magrepresentar sa mga hunahuna ug mga aksyon sa tawo niini nga kinabuhi, ingon man usab rekord kini nga gitipigan sa langit sa mga matarung (tan-awa sa Giya ngadto sa Kasultana, “Basahon sa kinabuhi”). Ipasabut nga kita pagahukman dili lamang sa atong mga buhat apan usab sa atong mga hunahuna, mga pulong, ug mga tinguha (tan-awa sa Mosiah 4:30; Alma 12:14; 41:3; D&P 137:9).

Mahimo kamong mosugyot nga ang mga estudyante mosulat sa Juan 5:22 sa margin sa ilang kasulatan duol sa Pinadayag 20:12. Hangyoa ang mga estudyante sa pagbasa sa Juan 5:22 sa hilom ug mangita kon kinsa ang mohukom nato.

• Kinsa ang mohukom kanato? (Human makatubag ang mga estudyante, isulat ang mosunod nga doktrina diha sa pisara ubos sa Kinabuhi human dinhi sa yuta: Si Jesukristo mohukom sa tanang mga tawo.)

Pahinumdumi ang mga estudyante nga ang katuyoan gayud sa plano sa Langitnong Amahan mao ang paghatag kanato og oportunidad nga makaangkon og kinabuhing dayon, o kahimayaan, nga nagpasabut nga mahimong sama sa Langitnong Amahan ug magpuyo uban Kaniya sa kahangturan sa mahangturong mga pamilya. Mahimo ninyong ipakita ang litrato sa inyong pamilya ug ipasabut ngano nga importante ninyo nga makapuyo uban sa Langitnong Amahan ug sa mga sakop sa pamilya sa kahangturan.

Dapita ang usa ka estudyante sa pagbasa og kusog sa Juan 3:16–17. Hangyoa ang klase sa pagsunod, mangita kon unsay angay nnatong buhaton aron makadawat og kinabuhing dayon.

• Unsa ang kinahanglan natong buhaton aron makaangkon og kinabuhing dayon? (Ipasabut nga ang pagtuo sa Bugtong Anak nagpasabut sa paggamit sa hugot nga pagtuo diha kang Jesukristo ug magpuyo sumala sa Iyang ebanghelyo, nga naglakip sa pagdawat sa mga ordinansa sa templo.)

• Unsaon ninyo sa pag-summarize ang Juan 3:16 isip usa ka baruganan? (Human makatubag ang mga estudyante, isulat ang mosunod nga baruganan diha sa pisara ubos sa Kinabuhi human dinhi sa yuta: Kon atong gamiton ang hugot nga pagtuo diha ni Jesukristo ug magpuyo sumala sa Iyang ebanghelyo, nan kita makadawat og kinabuhing dayon.)

Pahinumdumi ang mga estudyante sa pangutana nga imong gipangutana sa sinugdanan sa klase: “Unsaon ninyo sa pagtubag kon dunay mangutana ninyo nganong si Jesukristo importante diha ninyo?” Hangyoa ang mga estudyante sa pagpasabut kon unsaon nila sa pagpalambo sa ilang mga tubag niini nga pangutana base sa unsay ilang nakat-una karon. Mahimo usab nga inyong dapiton ang pipila ka mga estudyante sa pagpakigbahin sa ilang mga pagpamatuod bahin ni Jesukristo ug sa Iyang tahas sa plano sa Langitnong Amahan. Mahimo ninyong tapuson pinaagi sa pagpakigbahin usab sa inyong kaugalingon pagpamatuod.

Komentaryo ug Background nga Impormasyon

Si Jesukristo mipakigsaad nga mahimong Manunubos

Samtang nagserbisyo sa Kapangulohan sa Seventy, si Elder Tad R. Callister mitudlo nga si Jesukristo napili sa Langitnong Amahan ug misulod sa usa ka pakigsaad sa paghimo sa Pag-ula diha sa plano sa Amahan sa kaluwasan.

“Sa konseho didto sa kinabuhi nga wala pa dinhi sa yuta ang Manluluwas mipakigsaad sa Amahan sa pagpahigayon sa Pag-ula. Si John Taylor misulat, ‘Ang usa ka pakigsaad nga gisudlan Niya ug sa Iyang Amahan, diin Siya miuyon sa pag-ula sa mga sala sa kalibutan’ [The Mediation and Atonement (1882), 97], ug sa ingon siya nailhan ‘ang Kordero nga gipatay gikan sa pagkatukod sa kalibutan’ (Pinadayag 13:8; tan-awa usab sa Moises 7:47)” (The Infinite Atonement [2000], 74).

Sa Abraham 3:27 mabasa nato nga si Jesukristo nagpakita sa Iyang pagkaandam sa pagtuman sa iyang tahas sa pagka-Manunubos sa dihang Siya miingon, “Ania Ako, ipadala ako.” Nagkomentaryo sa pamahayag ni Jesukristo, si Elder Neal A. Maxwell sa Korum sa Napulog Duha ka mga Apostoles mitudlo:

“Mao kadto ang usa sa espesyal nga mga higayon nga ang pipila ka mga pulong maoy gusto sa kadaghanan. Walay usa ka indibidwal sukad nga mitanyag, sa pipila lang ka pulong, sa pagbuhat og hilabihan alang sa daghang mga tawo sama sa gibuhat ni Jesus sa dihang Siya mitanyag sa Iyang Kaugalingon isip lukat alang natong tanan” (Plain and Precious Things [1983], 53).

Ang Pag-ula ni Jesukristo nagtabang nato sa pagbuntog sa sala ug kamatayon

Si Elder M. Russell Ballard sa Korum sa Napulog Duha ka mga Apostoles mipasabut nga ang Pag-ula ni Jesukristo nagtugot nato sa pagbuntog sa mga epekto sa Pagkapukan ni Adan ug Eva, ingon man usan sa mga epekto sa atong kaugalingong mga sala:

“Isip resulta sa kalapasan ni Adan, ang mga mortal gibulag gikan sa Dios (tan-awa sa Mga Taga-Roma 6:23) ug mohangtud unta sa kahangturan gawas adunay paagi nga makit-an sa pagbugto sa mga higot sa kamatayon. Dili kini sayon, kay nagkinahanglan kini og puli nga sakripisyo sa usa kinsa walay sala ug kinsa makadala diha sa Iyang Kaugalingon sa mga sala sa tanang mga tawo.

“Salamat na lang, si Jesukristo walay kahadlok nga mituman niini nga sakripisyo didto sa karaang Jerusalem. … Giantus ni Jesus uban sa pag-uyon aron lamang kita adunay kahigayunan nga mamahimong limpyo—pinaagi sa atong pagtuo ngadto Kaniya, maghinulsol sa atong mga sala, mabunyagan sa tawo nga adunay tukmang katungod sa priesthood, magdawat sa makalimpyo nga gasa sa Espiritu Santo pinaagi sa pagkumpirma ug sa pagdawat sa tanan pang mahinungdanong mga ordinansa” (“Ang Pag-ula ug ang Bili sa Usa ka Kalag,” Ensign or Liahona, May 2004, 84–85).

Si Jesukristo mao ang pinakamahinungdanong tawo sa plano sa kaluwasan

Si Jesukristo mao ang pinakamahinungdanong tawo sa plano sa kaluwasan.

“Ang Pag-ula ni [Jesukristo] mao ang labing importante nga hitabo sa kasaysayan sa tawo. Walay butang nga ikatandi niini. Mao kini ang labing mahinungdanong bahin sa plano sa atong Amahan alang sa kalipay sa Iyang mga anak. Kon wala kini, ang mortal nga kinabuhi walay kapuslanan uban sa kawalay paglaum o kawalay mapaabut.” (“Inspirational Thoughts,” Ensign, Sept. 2007, 8; tan-awa usab sa Juan 3:16).

Si Jesukristo mao ang “mibuhat sa mga kalibutan”

Ang kalibutan nga atong gipuy-an dili lamang ang bugtong planeta nga gibuhat ni Jesukristo. Ang Mga Hebreohanon 1:1–2 makatabang nato nga makasabut nga si Jesukristo, ubos sa direksyon sa Dios nga Amahan, “mibuhat sa mga kalibutan.” Ang basahon ni Moises nagpadayag nga ang mga kalibutan nga Iyang gibuhat “dili maihap” (Moises 1:32–33).