Materyal sa Pagpangandam alang sa Magtutudlo sa Home-Study
Summary sa mga Leksyon sa Daily Home-Study
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang nagtuon sila sa Mateo 1–5 (unit 2) wala gitumong nga itudlo isip kabahin sa imong leksyon. Ang leksyon nga imong gitudlo nakatutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang naghunahuna ka sa mga panginahanglan sa imong mga estudyante.
Samtang nagtuon ang mga estudyante mahitungod sa kasaysayan sa kagikanan sa Manluluwas, ilang nakat-unan nga si Jesukristo mao ang Balaang Anak sa Langitnong Amahan ug ni Maria. Gikan sa ehemplo sa mga Mago nga miadto aron mosimba ni Jesus, nakat-unan sa mga estudyante nga kon kita kinasingkasing ug makugihong mangita sa Manluluwas, magiyahan kita ngadto Kaniya. Sa pagbasa kalabut kon sa unsang paagi nga nadasig si Jose sa pagdala sa iyang pamilya ug moikyas paingon sa Ehipto aron maluwas, nadiskubrihan sa mga estudyante nga kon sensitibo kita sa Espiritu, makadawat kita og pagpadayag ug giya.
Samtang ang mga estudyante nagbasa mahitungod ni Juan Bautista ug sa pagbunyag ni Jesukristo, ilang nakat-unan ang mosunod nga mga kamatuoran: Atong gipakita ang tinuod nga paghinulsol ngadto sa Ginoo samtang giusab nato ang atong mga tinguha ug mga lihok sa pagsunod sa Iyang mga pagtulun-an. Ang bunyag pinaagi sa pagpaunlod pinaagi sa usa ka tawo nga naghupot og awtoridad mahinungdanon alang sa kaluwasan. Ang Amahan, ang Anak, ug ang Espiritu Santo tulo ka managlahi ug bulag nga mga Binuhat.
Samtang ang mga estudyante nagbasa mahitungod sa tubag sa Manluluwas ngadto sa mga pagtintal sa yawa, ilang nakat-unan nga kon hinumduman ug gamiton nato ang mga kamatuoran nga gitudlo diha sa mga kasulatan, makabuntog kita sa mga pagtintal sa yawa. Nakat-unan usab nila nga si Jesukristo nagdala og kahayag ngadto sa kinabuhi niadtong anaa sa kangitngit. Sa dihang nagbasa ang mga estudyante mahitungod nila ni Pedro, Andres, Santiago, ug Juan, ilang nadiskubrihan ang mosunod nga kamatuoran: Kon mosanong dayon kita sa mga pagdapit sa Manluluwas nga mosunod Kaniya, makahimo Siya og dugang pa diha sa atong kinabuhi kay sa atong mahimo nga kita ra.
Dinhi niini nga leksyon magbasa ang mga estudyante og bahin sa Wali Ibabaw sa Bungtod [Wali sa Bukid] sa Manluluwas. Gikan niini nga wali, ilang nakat-unan ang mosunod nga mga kamatuoran: Samtang nagpalambo kita sa mga kinaiya nga sama kang Kristo, makakaplag kita og dugang nga kalipay. Ang pagkahimong kontaminado tungod sa mga sala sa kalibutan makapugong kanato nga mahimong panalangin ngadto sa uban. Ang atong matarung nga ehemplo makapadasig sa uban nga mas maduol ngadto sa Langitnong Amahan. Nakat-unan usab sa mga estudyante ang mahitungod sa mas taas nga balaod nga gitudlo ni Jesukristo sa Iyang mga disipulo.
Pasiuna
Kini nga leksyon makatabang sa mga estudyante nga masabtan kon unsay kinahanglan natong buhaton aron mahimong hingpit sama sa atong Amahan sa Langit. Dugang pa, samtang nagribyu ang mga estudyante sa mas taas nga mga balaod sa Ginoo, makahunahuna sila og mga paagi nga mapalambo kon giunsa nila pagtuman ang mga sugo sa Ginoo.
Si Jesukristo nagtudlo sa Iyang mga disipulo kon unsaon sa pagkahimong hingpit sama sa Langitnong Amahan
Sa dili pa magklase, isulat sa pisara ang mosunod nga pangutana: Sa inyong hunahuna unsa nga sugo ang pinakalisud sundon sa mga tawo? Kon magsugod na ang klase, hangyoa ang mga estudyante sa pagtubag sa pangutana. Ilista sa pisara ang ilang mga tubag.
Dapita ang usa ka estudyante sa pagbasa og kusog sa Mateo 5:48. Hangyoa ang klase sa pagsunod, nga mangita sa usa ka sugo nga lisud sundon. Mahimo nimong basahon ang Joseph Smith Translation sa Mateo 5:48, nga nag-ingon “Busa kamo gimandoan nga magmahingpit, ingon nga ang inyong Amahan kinsa anaa sa langit hingpit.”
Unsay inyong gibati bahin sa sugo nga magmahimong hingpit?
Unsa man sa inyong hunahuna ang gipasabut sa mahimong hingpit?
Ipasabut nga ang pulong “hingpit” gihubad gikan sa Gresyanhon nga pulong nga nangahulugan og “kompleto,” “nahuman na,” o “napalambo og maayo.” Pangutan-a ang klase kon sa unsang paagi nga kini nakatabang kanila aron masabtan kini nga bersikulo Ipasabut nga ang mahimong kompleto o napalambo og maayo nangahulugan nga mahimong sama sa Langitnong Amahan.
Samtang ang mga estudyante magpadayon sa ilang pagtuon mahitungod sa Wali sa Bukid sa Manluluwas diha sa Mateo 5, ipapangita nila ang mga baruganan nga ilang gikinahanglang sundon aron mouswag ngadto sa pagkahimong hingpit sama sa atong Amahan sa Langit.
I-summarize ang Mateo 5:17–20 pinaagi sa pagpasabut nga ang Manluluwas nagtudlo nga mianhi Siya aron tumanon ang balaod ni Moises, dili aron gub-on, o tangtangon, ang bisan unsang mahangturong mga kamatuoran diha sa balaod ni Moises. Gipahiuli ni Jesukristo ang kahingpitan sa ebanghelyo nga nawala tungod sa kadautan ug sa apostasiya, gikorihian ang sayop nga mga pagtulun-an, ug gituman ang mga panagna nga gihimo sa mga propeta sa Daang Tugon. Sa katapusan, isip kabahin sa Pagpahiuli sa kahingpitan sa ebanghelyo, ang pipila ka aspeto sa balaod ni Moises gihunong, sama sa pagtuli ug pagsakripisyo sa hayop.
Ipasabut nga ang Mateo 5:21–48 naglakip sa mga pagtulun-an sa Manluluwas mahitungod sa nagkalain-laing mga balaod ug mga tradisyon nga napalambo o gidugang sa mga Judeo ubos sa balaod ni Moises. Samtang gipasabut ni Jesukristo ang tinuod nga kahulugan sa mga balaod, gitudlo Niya ang mas taas nga paagi sa pagkamatarung. Ang mga sakop sa Iyang gingharian kinahanglang motuman gayud niining mas taas nga balaod. Kining mas taas nga mga balaod naghatag og giya aron matabangan ang mga disipulo ni Jesukristo nga malikayan ang paglapas sa mga sugo sa Dios.
Aron matabangan ang mga estudyante nga makahinumdom sa pipila ka butang nga ilang nakat-unan mahitungod sa mas taas nga balaod diha sa ilang home-study lesson, mahimo nimong isulat ang mosunod nga mga sentence diha sa pisara: Kamo dili magpatay. Kamo dili manapaw.
Hangyoa ang mga estudyante nga ipasabut kon unsay gitudlo ni Jesukristo sa Iyang mga disipulo mahitungod niining mga balaod. (Kon ang mga estudyante dili makahinumdom, dapita sila sa pag-refer ngadto sa Mateo 5:21–26 ug Mateo 5:27–30.)
Unsa ang pipila ka kapeligro sa dili pagkontrolar sa atong kasuko?
Nganong importante man ang pagkontrolar sa atong mga hunahuna?
I-summarize ang Mateo 5:31–37 pinaagi sa pagpasabut nga ang Ginoo nagtudlo mahitungod sa pakigbulag, kaminyoon, ug pagpanumpa.
Dapita ang mga estudyante sa paghunahuna nga didto sa eskwelahan usa ka kaedad ang nag-istorya og ngil-ad ug dili maayong mga butang mahitungod nila. Pangutan-a ang mga estudyante kon unsaon nila sa pagtubag.
Dapita ang usa ka estudyante sa pagbasa og kusog sa Mateo 5:38. Hangyoa ang klase sa pagsunod, nga mangita kon unsay gitudlo sa balaod ni Moises mahitungod sa pagsilot sa mga indibidwal alang sa ilang mga sala o kalapasan. Hangyoa sila sa pagreport kon unsay ilang nakit-an. Ipasabut nga ang mga pulong nga “mata sa mata, ug ngipon sa ngipon” nangahulugan nga ubos sa balaod ni Moises, ang silot kinahanglang motukma sa gibug-aton sa kalapasan.
Ipares-pares ang mga estudyante. Dapita ang usa ka partner sa pagbasa sa Mateo 5:39–42 ug ang ikaduhang partner sa pagbasa sa Mateo 5:43–47. Hangyoa sila sa pagpangita sa mas taas nga balaod. Human sa igong panahon, hangyoa ang mga estudyante sa paghisgot sa mosunod nga mga pangutana kauban sa ilang mga partner (mahimo nimong i-display kini nga mga pangutana diha sa pisara o hatagan sila og handout):
Sumala sa Manluluwas, unsa man ang mas taas nga balaod?
Unsa may gitudlo kanato sa mas taas nga balaod mahitungod kon unsay angay natong buhaton niadtong nakasala kanato?
Human sa igong panahon, dapita ang pipila ka mga estudyante sa pagpakigbahin sa ilang mga tubag ngadto sa klase.
Dapita ang usa ka estudyante sa kusog nga pagbasa og balik sa Mateo 5:45. Hangyoa ang klase sa pagsunod, nga mangita kon unsay mahitabo kon atong higugmaon ang atong mga kaaway ug mobuhat og maayo niadtong nagdumot kanato.
Unsa may mahitabo kon atong higugmaon ang atong mga kaaway ug mobuhat og maayo niadtong nagdumot kanato?
Kay nasayud nga kitang tanan espiritu nga mga anak sa Dios, sa inyong hunahuna unsa may gipasabut niini nga bersikulo nga mahimong mga anak sa atong Amahan sa Langit? (Nagpasabut kini nga mahimong sama Kaniya ug mahimong manununod sa Iyang gingharian.)
Giunsa man sa pagpakita og ehemplo sa Manluluwas ang paghigugma sa Iyang mga kaaway ug pagbuhat og maayo ngadto sa uban panahon sa Iyang kinabuhi dinhi?
Dapita ang mga estudyante sa pagpamalandong sa unsay ilang nakat-unan diha sa Mateo 5 mahitungod kon unsay kinahanglan natong buhaton aron mahimong hingpit sama sa Langitnong Amahan.
Unsa man ang pipila ka mga butang nga kinahanglan natong buhaton aron mahimong hingpit sama sa atong Amahan sa Langit? (Ang mga estudyante mahimong mogamit og lain-laing mga pulong, apan kinahanglan silang mahibalo og usa ka baruganan nga susama sa mosunod: Samtang magsunod kita sa mga pagtulun-an ug mga sugo sa Manluluwas, mahimo kitang hingpit sama sa atong Amahan sa Langit.)
Pahinumdumi ang mga estudyante nga pinaagi lamang kang Jesukristo ug sa Iyang grasya nga mahimo kitang hingpit (tan-awa sa Moroni 10:32).
Aron matabangan ang mga estudyante nga makasabut sa proseso sa pagkahimong hingpit, dapita ang usa ka estudyante sa pagbasa og kusog sa mosunod nga pamahayag ni Elder Russell M. Nelson sa Korum sa Napulog Duha ka mga Apostoles:
Imahe
Elder Russell M. Nelson
“Dili kita angayang masagmuyo kon ang atong kinasingkasing nga mga paningkamot ngadto sa pagkahingpit karon daw makapaluya [lisud] ug walay katapusan. Ang pagkahingpit naghulat lang. Moabut kini sa kinatibuk-an human lamang sa Pagkabanhaw ug pinaagi lamang sa Ginoo. Naghulat kini sa tanang nahigugma kaniya ug nagtuman sa iyang mga sugo” (“Perfection Pending,” Ensign, Nob. 1995, 88).
Sumala ni Elder Nelson, kanus-a man nato makab-ot ang pagkahingpit?
Sa unsang paagi nga kining pamahayag makatabang sa tawo nga mibati nga nabug-atan ug nawad-an og paglaum tungod sa iyang pagkadili hingpit?
Awhaga ang mga estudyante sa pagpadayon sa pagsunod sa mga sugo sa Dios aron sa katapusan mahisama sila sa atong Langitnong Amahan.
Aron matabangan ang mga estudyante nga maandam alang sa sunod nga unit, ipahunahuna nila ang mosunod nga mga pangutana: Unsa man ang Bulawanong Lagda? Unsa ang gitudlo sa Ginoo mahitungod sa paghukom sa uban? Unsay mahitabo niadtong nagserbisyo og duha ka agalon? Unsa ang kinahanglang buhaton sa mga tawo aron ayuhon sa Manluluwas? Ipasabut nga sa sunod nga unit ang mga estudyante makabaton og oportunidad nga makakat-on sa mga tubag niini nga mga pangutana ug makakat-on mahitungod sa sugo sa Manluluwas ngadto sa Iyang mga Apostoles.