លូកា ២:១–១៤
« នៅថ្ងៃនេះ មានព្រះអង្គសង្គ្រោះ១អង្គ ប្រសូតដល់អ្នករាល់គ្នា … »
យ៉ូសែប និងម៉ារាបានធ្វើដំណើរទៅកាន់ភូមិបេថ្លេហិម ជាកន្លែងដែលព្រះយេស៊ូវបានប្រសូត ។ ទេវតាមួយអង្គបានប្រកាសពីការប្រសូតរបស់ព្រះអង្គសង្គ្រោះដល់ពួកអ្នកគង្វាលនៅជិតភូមិបេថ្លេហិម ( សូមមើល លូកា ២:៩–១២ ) « ហើយ … នោះស្រាប់តែមានពួកពលបរិវារកកកុញពីស្ថានសួគ៌ មកនៅជាមួយនឹងទេវតានោះ ក៏ពោលសរសើរដល់ព្រះថា សួស្តីដល់ព្រះនៅស្ថានដ៏ខ្ពស់បំផុត ហើយសេចក្តីសុខសាន្តនៅផែនដី នៅកណ្តាលមនុស្ស » ( លូកា ២:១៣–១៤ ) ។ មេរៀននេះមានគោលបំណងជួយអ្នកឲ្យពិនិត្យមើលព្រឹត្តិការណ៍នៃការប្រសូតរបស់ព្រះអង្គសង្រ្គោះ ហើយណែនាំអ្នកអំពីគោលលទ្ធិដែលបានបង្រៀននៅក្នុងវគ្គបទគម្ពីរចំណេះចំណានខាងគោលលទ្ធិ លូកា ២:១០–១២ ។ អ្នកនឹងសិក្សាពីតួនាទីរបស់ព្រះយេស៊ូវគ្រីស្ទជាព្រះអង្គសង្រ្គោះរបស់អ្នក ហើយរៀនពីអ្វីដែលទ្រង់បានជួយសង្រ្គោះអ្នក ដើម្បីអ្នកក៏អាចបានតម្កើងឡើង និងសរសើរដល់ព្រះចំពោះអំណោយទាននៃព្រះរាជបុត្រារបស់ទ្រង់ ដូចជាពួកទេវតាបានធ្វើដែរ ។
ប្រសូតិកម្ម
-
តើព័ត៌មានលម្អិតអ្វីខ្លះដែលអ្នកចូលចិត្តអំពីប្រសូតិកម្ម ?
-
ហេតុអ្វីបានជាព័ត៌មានលម្អិតទាំងនេះសំខាន់ចំពោះអ្នក ?
សូមអាន លូកា ២:១–១៤ ដោយស្វែងរកព័ត៌មានលម្អិតទាំងនោះដែលសំខាន់ចំពោះអ្នក ឬព័ត៌មានលម្អិតថ្មីៗដែលអ្នកប្រហែលជាមិនបានកត់សម្គាល់ពីមុនមកនៅក្នុងប្រសូតិកម្ម ។
-
តើមានព័ត៌មានលម្អិតអ្វីខ្លះនៅក្នុងប្រសូតិកម្ម ដែលអ្នកបានកត់សម្គាល់ឃើញថាមានសារៈសំខាន់ចំពោះអ្នក ?
ព្រះអង្គសង្គ្រោះ ១ អង្គប្រសូត
សូមអាន លូកា ២:១០–១២ ម្ដងទៀត ដោយរកមើលពីរបៀបដែលទេវតាបានប្រកាសពីការប្រសូតរបស់ព្រះយេស៊ូវ ។
លូកា ២:១០–១២ គឺជាវគ្គបទគម្ពីរចំណេះចំណានខាងគោលលទ្ធិ ។ សូមពិចារណាគូសចំណាំវគ្គបទគម្ពីរចំណេះចំណានខាងគោលលទ្ធិតាមវិធីដែលងាយសម្គាល់ ដូច្នេះអ្នកអាចរកឃើញវាដោយងាយស្រួល ។ អ្នកនឹងរៀនបន្ថែមអំពីវគ្គចំណេះចំណានខាងគោលលទ្ធិនេះនៅក្នុងមេរៀនក្រោយ ។
-
តើព្រះបរមងារទីមួយ ដែលទេវតាបានប្រើសម្រាប់ព្រះយេស៊ូវគ្រីស្ទ ពេលដែលទេវតាប្រកាសពីការប្រសូតរបស់ព្រះយេស៊ូវដល់ពួកអ្នកគង្វាលគឺជាអ្វី ?
-
ហេតុអ្វីបានជាវាសំខាន់ថា ក្នុងចំណោមព្រះបរមងារទាំងអស់ដែលព្រះយេស៊ូវគ្រីស្ទមាន នេះគឺជាព្រះបរមងារដែលទេវតាបានប្រើដើម្បីប្រកាសពីការប្រសូតរបស់ទ្រង់ ?
វាអាចមានអត្ថប្រយោជន៍ក្នុងការដឹងថា នៅក្នុងការបកប្រែពីភាសាព្រះគម្ពីរប៊ីបដើមជាភាសាក្រិក ពាក្យដែលត្រូវបានប្រើសម្រាប់ ព្រះអង្គសង្រ្គោះ ក៏មានន័យផងដែរថាជា អ្នករំដោះ ឬ អ្នកសង្គ្រោះ ។
សេចក្តីពិតមួយដែលវគ្គបទគម្ពីរនេះបង្រៀនគឺថា ព្រះយេស៊ូវគ្រីស្ទគឺជាព្រះអង្គសង្គ្រោះនៃពិភពលោកនេះ ។
យើងត្រូវការព្រះអង្គសង្រ្គោះ
អែលឌើរ ឌី ថត គ្រីស្តូហ្វឺសិន នៃកូរ៉ុមនៃពួកសាវកដប់ពីរនាក់ បានចែករំលែកបទពិសោធន៍ដូចខាងក្រោមនេះ ៖
ជាច្រើនឆ្នំាកន្លងទៅ មានមនុស្សម្នាក់ដែលជាសមាជិកនៃសាសនាចក្រជាច្រើនឆ្នាំមកហើយនោះបានសួរខ្ញុំថា « ហេតុអ្វីខ្ញុំត្រូវការព្រះយេស៊ូវគ្រីស្ទ ? ខ្ញុំកាន់តាមព្រះបញ្ញត្តិ ហើយខ្ញុំគឺជាមនុស្សល្អ ។ ហេតុអ្វីខ្ញុំត្រូវការព្រះអង្គសង្គ្រោះ ? » ខ្ញុំអាចនិយាយបានថា ការដែលសមាជិករូបនេះខកខានមិនយល់ពីផ្នែកដ៏សំខាន់បំផុតនៃគោលលទ្ធិរបស់យើង ដែលជាធាតុផ្សំនៃមូលដ្ឋានគ្រឹះនៃផែនការនៃសេចក្តីសង្គ្រោះ បានធ្វើឲ្យខ្ញុំមានការភ្ញាក់ផ្អើលយ៉ាងខ្លាំង ។
( ឌី ថត គ្រីស្តូហ្វឺសិន « Why We Need Jesus Christ » Ensign ខែ ធ្នូ ឆ្នាំ ២០២០ ទំព័រ ១៩–២០ )
សូមចំណាយពេលបន្តិចដើម្បីពិចារណាពីរបៀបដែលអ្នកនឹងឆ្លើយតប ដោយផ្អែកលើគំនិត និងអារម្មណ៍ផ្ទាល់ខ្លួនរបស់អ្នក ប្រសិនបើអ្នកជាអែលឌើរ គ្រីស្តូហ្វឺសិននោះ ។
យើងអាចរៀនអំពីតម្រូវការរបស់យើងដើម្បីមានព្រះអង្គសង្រ្គោះ តាមរយៈការសិក្សាបទគម្ពីរ និងពាក្យសម្ដីរបស់ពួកព្យាការី ( សូមមើល យ៉ាកុប ៧:១១ ) ។
ជំនាញសិក្សាព្រះគម្ពីរដែលអាចជួយបង្កើនការយល់ដឹងរបស់អ្នកអំពីគោលលទ្ធិ និងគោលការណ៍ គឺការបង្កើតសេចក្តីយោងឆ្លងខគម្ពីរនៅក្នុងព្រះគម្ពីររបស់អ្នក ។ ដើម្បីធ្វើសេចក្ដីយោងបទគម្ពីរ សូមបង្កើតតំណមួយនៅក្នុងកម្មវិធីបណ្ណាល័យដំណឹងល្អ ឬភ្ជាប់ខគម្ពីរដែលទាក់ទងគ្នានោះ តាមរយៈការកត់ត្រាសេចក្តីយោងបទគម្ពីរមួយនៅជិតនឹងវគ្គបទគម្ពីរមួយទៀត ។
សូមសិក្សាវគ្គបទគម្ពីរខាងក្រោមបីទៅបួនវគ្គបទគម្ពីរ ដើម្បីជួយឆ្លើយសំណួរ « ហេតុអ្វីបានជាខ្ញុំត្រូវការព្រះអង្គសង្គ្រោះ ? » ហើយ « តើទ្រង់សង្គ្រោះខ្ញុំពីអ្វី ? » សូមពិចារណាធ្វើសេចក្តីយោងបទគម្ពីរទាំងនេះដោយការភ្ជាប់វាទៅ លូកា ២:១០–១២ នៅក្នុងកម្មវិធីបណ្ណាល័យដំណឹងល្អ ឬដោយការកត់ត្រាសេចក្ដីយោង លូកា ២:១០–១២ នៅក្បែរខគម្ពីរដែលអ្នកសិក្សា ។
១. សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកជ្រើសយកបទគម្ពីរអ្វីខ្លះ ?
-
តើបទគម្ពីរទាំងនេះជួយអ្នកឲ្យឆ្លើយសំណួរ « ហេតុអ្វីបានជាខ្ញុំត្រូវការព្រះអង្គសង្គ្រោះ ? » និង « តើទ្រង់សង្គ្រោះខ្ញុំពីអ្វី ? » យ៉ាងដូចម្តេច ?
អ្វីដែលព្រះអង្គសង្គ្រោះប្រទានឲ្យអ្នក
សូមមើលវីដេអូ « Why We Need a Savior—A Christmas Message about Our Savior Jesus Christ » ( ២:១៥ ) រកមើលមូលហេតុដែលយើងត្រូវការព្រះអង្គសង្គ្រោះ ។ វីដេអូនេះមាននៅលើគេហទំព័រ ChurchofJesusChrist.org ។
អែលឌើរ គ្រីស្តូហ្វឺសិន បានថ្លែងទីបន្ទាល់អំពីពរជ័យមួយចំនួនដែលយើងទទួលបានតាមរយៈព្រះយេស៊ូវគ្រីស្ទ ៖
ដោយសារតែដង្វាយធួនរបស់ព្រះយេស៊ូវគ្រីស្ទ នោះយើងអាចបានជាសះស្បើយពីការជ្រើសរើសមិនល្អ ។ ដោយសារតែដង្វាយធួនរបស់ព្រះយេស៊ូវគ្រីស្ទ នោះឥទ្ធិពលនៃអំពើបាប និងកំហុសរបស់អ្នកដទៃមកលើយើង ព្រមទាំងរាល់សេចក្តីយុត្តិធម៌ទាំងឡាយនឹងត្រូវកែតម្រូវឡើងវិញ ។ យើងត្រូវការព្រះអង្គសង្គ្រោះដើម្បីបានជាសះស្បើយទាំងស្រុង និងបានក្លាយជាបរិសុទ្ធទាំងស្រុង ។
( ឌី ថត គ្រីស្តូហ្វឺសិន « Why We Need Jesus Christ » Ensign ខែ ធ្នូ ឆ្នាំ ២០២០ ទំព័រ ២២ )
នៅក្នុង លូកា ២:១០ ទេវតាបានប្រកាសថា « ខ្ញុំមកប្រាប់ដំណឹងល្អដល់អ្នករាល់គ្នាពីសេចក្តីអំណរយ៉ាងអស្ចារ្យ » ។
២. សូមឆ្លើយសំណួរខាងក្រោមនេះយ៉ាងហោចណាស់មួយ នៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកបានរកឃើញ « សេចក្តីអំណរយ៉ាងអស្ចារ្យ » នៅក្នុងព្រះអង្គសង្គ្រោះរបស់អ្នក ដែលជាព្រះយេស៊ូវគ្រីស្ទដោយរបៀបណា ?
-
តើយើងអាចធ្វើអ្វីខ្លះដើម្បីបង្កើនសេចក្តីអំណររបស់យើងនៅក្នុងព្រះអង្គសង្គ្រោះ ?
ជម្រើស ៖ តើចង់រៀនសូត្របន្ថែមទៀតដែរឬទេ ?
ហេតុអ្វីម៉ារា និងយ៉ូសែប ទៅភូមិបេថ្លេហិមដើម្បីបង់ពន្ធ ?
សេសារ-អូគូស្ទ គឺជាមេដឹកនាំរ៉ូម៉ាំងដែលមានសមត្ថភាព និងស្វាហាប់ដែលបានសោយរាជ្យ—ពីឆ្នាំ ៣១ មុន គ.ស. ដល់ ឆ្នាំ ១៤ នៃ គ.ស. —ត្រូវបានចារទុកដោយការមានសណ្តាប់ធ្នាប់ និងការអនុវត្តច្បាប់ ។ « បញ្ជី » ដែលបានលើកឡើងនៅក្នុង លូកា ២:២ តាមពិតគឺជាការចុះឈ្មោះ [ ឬជំរឿន ] មនុស្សសម្រាប់គោលបំណងបង់ពន្ធនាពេលអនាគត ជាការចុះឈ្មោះដែលតម្រូវឲ្យអ្នកជាប់ពន្ធចុះនូវព័ត៌មានចាំបាច់ ។ ដោយសារទាំងយ៉ូសែប និងម៉ារាជាកូនចៅរបស់ស្តេចដាវីឌ នោះពួកលោកត្រូវធ្វើដំណើរទៅភូមិបេថ្លេហិមដែលជាស្រុកកំណើតរបស់ស្តេចដាវីឌ ។ … ព្យាការីពីបុរាណបានធ្វើជាសាក្សីថា ព្រះមេស៊ីនឹងកើតនៅភូមិបេថ្លេហិម ក្នុងដែនដីយេរូសាឡិម ( សូមមើល មីកា ៥:២; អាលម៉ា ៧:១០ ) ។ ភូមិបេថ្លេហិមមានចម្ងាយប្រមាណ ៨៥–៩០ ម៉ៃល៍ ( ១៣៧–១៤៥ គីឡូម៉ែត្រ ) នៅភាគខាងត្បូងក្រុងណាសារ៉ែត ដែលដើរយ៉ាងហោចណាស់បួនទៅប្រាំថ្ងៃ ហើយសម្រាប់ស្ថានភាពរបស់ ម៉ារា ប្រហែលជាត្រូវចំណាយពេលយូរជាងនេះ ។
( សៀវភៅសិក្សាព្រះគម្ពីរសញ្ញាថ្មីសម្រាប់សិស្ស [ ឆ្នាំ ២០១៤ ] ទំព័រ ១៤៣ )