Ko e kau atu ʻa e kau talavoú mo e kau finemuí ki ha kalasi semineli pongipongia ʻi ʻĀsenitina.
ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú pea mo e ako mo e tupulaki fakataautaha kuó ke aʻusia lolotonga hoʻo ako ʻa e Fuakava Foʻoú.
ʻOfa ki he ʻOtuá ʻaki ho lotó kotoa
Tā ʻi hoʻo tohinoa akó ha fuo ʻo ha foʻi haati. Hiki ʻi loto pe takatakai ʻi he foʻi hātí ha ngaahi meʻa kuó ke ako pe ongoʻi fekauʻaki mo e Fakamoʻuí kuó ne fakatupulaki hoʻo ʻofa kiate Iá. Kapau ʻe lava, ʻeke ki haʻo kaungāmeʻa pe mēmipa ʻo e fāmilí ʻa e meʻa ʻoku nau ʻofa ai ʻi he Fakamoʻuí, pea tānaki atu ia ki hoʻo lisí. Tali ʻa e ngaahi fehuʻi ko ʻení ʻi lalo ʻi he foʻi haati naʻá ke taá.
Kuo fakaʻaiʻai fēfē nai koe ʻe hoʻo ako lahi ange fekauʻaki mo e ʻofa ʻa e Tamai Hēvaní mo Sīsū Kalaisi ʻiate koé ke ke feinga ke ʻofa lahi ange ʻiate Kinauá?
Kuo tokoni fēfē nai ʻa e mahino ʻokú ke maʻu ki Heʻena ʻofa ʻiate koé ke fakatupulaki ai hoʻo ʻofa ki he kakai kehé?
Manatuʻi naʻe akoʻi ʻe he Fakamoʻuí ʻoku tau fakahaaʻi ʻetau ʻofa kiate Iá ʻaki ʻetau tauhi ʻa e ngaahi fekaú (vakai, Sione 14:15). Naʻe ʻomi ʻe Sīsū Kalaisi ʻa e sīpinga haohaoa ʻo e fakahaaʻi ʻo e ʻofa ki he Tamai Hēvaní ʻaki ʻa e talangofua ki he ngaahi fekau kotoa pē (vakai, Sione 14:31).
ʻI hoʻo ako ʻa e Sione 14:15, mahalo naʻá ke mei hiki ʻi hoʻo tohinoá fekauʻaki mo hoʻo ngaahi holi ke tauhi ʻa e ngaahi fekaú mo hoʻo ngaahi taumuʻá, pe ko hoʻo ngaahi ʻuhinga, ki hono fai iá. Kapau ko ia, toe vakaiʻi ʻa e meʻa naʻá ke tohí.
1. Tali ʻa e ngaahi fehuʻi ko ʻení ʻi hoʻo tohinoa akó:
Ko e hā hoʻo ongoʻi fekauʻaki mo hoʻo ngaahi holi mo e taumuʻa lolotongá ke tauhi ʻa e ngaahi fekaú kae lava ke fakahaaʻi hoʻo ʻofa ki he Tamai Hēvaní mo Sīsū Kalaisí? Fakafehoanaki hoʻo ngaahi holí mo hoʻo ngaahi taumuʻa ʻi he taimi ní mo e feituʻu naʻá ke ʻi ai ʻi he konga kimuʻa ʻo e taʻú.
Ko e hā ha ngaahi liliu kuó ke fakatokangaʻi ʻi hoʻo ʻofa ki he Tamai Hēvaní mo Sīsū Kalaisi ʻi hoʻo ako ʻa e Fuakava Foʻoú? Kapau kuó ke fakatokangaʻi ha ngaahi liliu, ʻokú ke pehē ko e hā ʻa e meʻa kuó ne tākiekina ʻa e ngaahi liliu ko ʻení?
ʻOku ʻi ai mo ha toe ngaahi liliu ʻokú ke ongoʻi ʻoku fiemaʻu ke ke fai kae lava ke fakahaaʻi pe fakatupulaki hoʻo ʻofa ki he Tamai Hēvaní mo Sīsū Kalaisí?
Ko e Fakalelei ‘a Sīsū Kalaisí: Ne mei fēfē nai hoʻo moʻuí ka ne ʻikai ia?
Fakakaukau ki he meʻa kuó ke ako fekauʻaki mo e feilaulau fakalelei ʻa Sīsū Kalaisí mei he Fuakava Foʻoú. Fakalaulauloto ʻi ha kiʻi taimi ki he ʻuhinga fakataautaha kiate koe ʻa Sīsū Kalaisi mo ʻEne feilaulau fakaleleí. Fakakaukau pe naʻe mei fēfē nai hoʻo moʻuí taʻe kau ai ha taha.
ʻĪmisi
Tā fakatātā ʻo e lotu ʻa Sīsū ʻi he Ngoue ko Ketisemaní ʻi heʻene fakahoko ʻa e Fakaleleí.
Ko ʻeni kuó ke tuku ha taimi ke fakalaulauloto ai, lekooti ha niʻihi ʻo hoʻo ngaahi fakakaukaú ʻaki haʻo tali ʻa e ngaahi fehuʻi ko ʻení. Fakakau ha ngaahi fakaikiiki mahuʻingamālie ʻi hoʻo ngaahi talí, pea fakakau ha ngaahi potufolofola kuo nau tokoniʻi koe fekauʻaki mo e feilaulau ʻa Sīsū Kalaisí.
2. Tali ʻa e ngaahi fehuʻi ko ʻení ʻi hoʻo tohinoa akó:
Naʻe mei kehe fēfē hoʻo moʻuí kapau naʻe ʻikai mamahi ʻa e Fakamoʻuí maʻau ʻi Ketisemani pea pekia maʻau ʻi he kolosi ʻi Kalevalé?
Naʻe mei kehe fēfē hoʻo moʻuí kapau naʻe ʻikai ke ikunaʻi ʻe Sīsū Kalaisi ʻa e maté ʻo fakafou ʻi Heʻene Toetuʻu nāunauʻiá?
Ko e hā ʻe hoko ki he palani ʻo e fakamoʻui ʻa e Tamai Hēvaní taʻekau ai ʻa e feilaulau fakalelei ʻa Sīsū Kalaisí?
Naʻe akoʻi ʻe Palesiteni M. Lāsolo Pālati, Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
Laʻitā fakaʻofisiale ʻo ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, 2004.
Meʻamālié, naʻe loto-toʻa ʻa Sīsū Kalaisi ke Ne fakahoko ʻa e feilaulau ko ʻení ʻi Selusalema ʻo e kuonga muʻá. … Ka naʻe kei hōifua pē ʻa Sīsū ke ne mamahi ka tau ala maʻu kotoa ʻa e faingamālie ke fufulu ke tau maʻa—ʻo fakafou ʻi heʻetau tui kiate Iá, fakatomala mei heʻetau ngaahi angahalá, papitaiso ʻi he mafai totonu ʻo e lakanga fakataulaʻeikí, maʻu ʻa e meʻa-foaki fakahaohaoa ʻo e Laumālie Māʻoniʻoní ʻi he hilifakinimá, mo tali ʻa e kotoa ʻo e ngaahi ouau mahuʻinga kehé. Ka ʻikai ʻa e Fakalelei ʻa e ʻEikí, he ʻikai lava ke tau maʻu ʻa e ngaahi tāpuakí ni pea ʻikai lava ke tau taau mo mateuteu ke foki ke nofo ʻi he ʻao ʻo e ʻOtuá.
(M. Russell Ballard, “The Atonement and the Value of One Soul,” Liahona, May 2004, 85)
Ko hono vahevahe ʻo e ongoongo lelei ʻo Sīsū Kalaisí
Ko ʻeni kuó ke fakalaulauloto ki he mahuʻinga ‘o e feilaulau fakalelei ‘a Sīsū Kalaisí, lau ʻa e lea ko ʻeni ʻa Palesiteni Lāsolo M. Nalesoní.
ʻĪmisi
Tā fakaʻofisiale ʻo Palesiteni Lāsolo M. Nalesoni naʻe fai ʻi Sānuali 2018
ʻOku ʻuhinga ʻa e foʻi lea ongoongoleleí ki he “ongoongo fakafiefia.” Ko e ongoongo leleí ko e ʻEiki ia ko Sīsū Kalaisí mo ʻEne pōpoaki ʻo e fakamoʻuí. Naʻe fakatatau ʻe Sīsū ʻa e ongoongoleleí ki Hono misioná mo ʻEne ngāue ʻi he matelié.
(Russell M. Nelson, “Senior Missionaries and the Gospel,” Liahona, Nov. 2004, 81)
3. Fakakakato ʻa e ʻekitivitī ko ení ʻi hoʻo tohinoa akó:
Ko e hā ha ongoongo lelei te ke fie vahevahe mo e niʻihi kehé fekauʻaki mo Sīsū Kalaisi mo Hono misiona fakalangí? Fakakaukauloto ʻoku kamata ʻe he Siasí ha kemipeini ʻi he mītia fakasōsialé ke fakamafola ʻa e ʻilo fekauʻaki mo e moʻui mo e ngaahi akonaki ʻa Sīsū Kalaisi naʻe lekooti ʻi he faaʻi Kosipelí. ʻOku kole ʻe he Siasí ha ngaahi fakamatala ʻi he mītia fakasōsialé ki he kemipeiní.
Hiki ha kiʻi tohi nounou ʻokú ne fakamatalaʻi hoʻo ongoongo lelei fekauʻaki mo Sīsū Kalaisí. Fakakaukau ki ha meʻa naʻá ke ako mei he Ngaahi Kosipelí (Mātiu, Maʻake, Luke, mo Sione) ʻoku makehe kiate koe pea kuó ne tokoniʻi koe ke ke ongoʻi ofi ange ai kia Sīsū Kalaisi. Hangē ko ʻení, te ke lava ʻo fili ha meʻa naʻe akoʻi ʻe Sīsū, ko ha mana naʻá Ne fai, ko ha talanoa fakatātā, ko ha talanoa ki he founga ʻo ʻEne fengāueʻaki mo e niʻihi kehé, ko ha ʻulungaanga naʻá Ne fakahaaʻi, pe ko ha konga ʻo ʻEne feilaulau fakaleleí, pekiá, mo e Toetuʻú. Kapau ʻokú ke ongoʻi fiemālie, mahalo te ke fie tuku hake hoʻo ongoongo leleí ʻi he mītia fakasōsialé pe vahevahe ia mo ha taha kehe. Fakakau ʻa e ngaahi fakaikiiki ko ʻení ʻi hoʻo tohí:
Faʻu ha ʻuluʻi tohi pe hingoa ki hoʻo tohí.
Fakamatalaʻi angé ʻa e founga ʻoku mahuʻingamālie ai kiate koe ʻa e ongoongo lelei ʻo e Fakamoʻuí mo tokoniʻi koe ke ke ongoʻi ofi ange kiate Iá.
Fakakau ha potufolofola pau mei he Ngaahi Kosipelí (Mātiu, Maʻake, Luke, pe Sione).
Fakakau ai hoʻo fakamoʻoní mo e founga ʻe lava ke ʻaonga ai ʻa e ongoongo lelei ko ʻení ki he niʻihi kehé.