ធីម៉ូថេ ទី២ ៣
បទគម្ពីរទាំងប៉ុន្មាន
តើអ្នកធ្លាប់មានអារម្មណ៍លើសលុប ឬភ័យខ្លាចអំពីស្ថានភាពខាងវិញ្ញាណនៃពិភពលោកសព្វថ្ងៃនេះឬទេ ? នៅក្នុងសំបុត្រមួយទៅកាន់ធីម៉ូថេ ប៉ុលបានព្យាករថា ថ្ងៃចុងក្រោយនឹងរួមបញ្ចូល « គ្រាលំបាកណាស់ » ( ធីម៉ូថេ ទី២ ៣:១ ) ប៉ុន្តែ គាត់ក៏បានបង្រៀនថា ព្រះអម្ចាស់បានប្រទានអំណោយទាននៃព្រះគម្ពីរបរិសុទ្ធដល់អ្នកដើម្បីជួយអ្នក ក្នុងអំឡុងគ្រាលំបាកណាស់ ( សូមមើល ធីម៉ូថេ ទី២ ៣:១៤–១៧ ) ។ មេរៀននេះមានគោលបំណងជួយអ្នកឲ្យមានអារម្មណ៍ចង់សិក្សាព្រះគម្ពីរ ដែលអាចជួយការពារអ្នកពីអំពើអាក្រក់នៅសម័យរបស់យើង ។
ថ្ងៃចុងក្រោយ
សូមអានសេចក្ដីថ្លែងការណ៍របស់ អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ហើយសញ្ជឹងគិតពីមូលហេតុដែលការរស់នៅក្នុងគ្រានេះធ្វើឲ្យអ្នកមានអារម្មណ៍ដឹងគុណ ភ័យខ្លាច ឬទាំងពីរ ។
យើងរស់នៅក្នុងពេលវេលាដ៏គួរឲ្យចាប់អារម្មណ៍ ប៉ុន្តែជាពេលវេលាដ៏អស្ចារ្យ ។ …
យើងដឹងនៅពេលយើងខិតជិតការយាងមកជាលើកទីពីររបស់ព្រះអង្គសង្គ្រោះថាពិភពលោករបស់យើងនឹងពោរពេញដោយភាពរំជើបរំជួល និងច្របូកច្របល់ ។ មនុស្សជាច្រើនក្នុងសង្គមនឹងមិនគោរពបទបញ្ញត្តិរបស់ព្រះ ។ ខ្ញុំតែងតែលើកឡើងនូវសេចក្ដីថ្លែងការណ៍នេះរបស់ ប្រធាន ថូម៉ាស អេស ម៉នសុន ៖ « នៅពេលមួយដែលបទដ្ឋាននៃសាសនាចក្រ និងបទដ្ឋានក្នុងសង្គមស្ទើរតែដើរស្របគ្នា បែរទៅជាមានការបែងចែកដ៏ធំរវាងយើងទៅវិញ ហើយវាកំពុងតែរីកធំទៅៗឥឡូវនេះ » ។
( នែល អិល អាន់ឌើរសិន « speeches.byu.eduA Compensatory Spiritual Power for the Righteous » [ Brigham Young University Education Week devotional ថ្ងៃទី ១៨ ខែ សីហា ឆ្នាំ ២០១៥ ] » )
-
តើយើងអាចរស់នៅក្នុងសម័យកាលដ៏អស្ចារ្យតាមរបៀបណា ?
-
តើអ្វីដែលអាចធ្វើឲ្យអ្នកមានអារម្មណ៍ភ័យខ្លាចចំពោះការរស់នៅក្នុងពិភពលោកដែលអែលឌើរ អាន់ឌើរសិន បានពិពណ៌នា ?
នៅពេលអ្នកសិក្សាមេរៀននេះ សូមរកមើលរបៀបដែលព្រះបានប្រទានជំនួយដោយក្ដីស្រឡាញ់ចំពោះភាពច្របូកច្របល់ គ្រោះថ្នាក់ខាងវិញ្ញាណ ឬការថប់បារម្ភដែលអ្នកអាចមានអារម្មណ៍ពីស្ថានភាពនៃពិភពលោក ។
សូមអាន ធីម៉ូថេ ទី២ ៣:១–៧, ១២–១៣; ៤:៣–៤ ដោយរកមើលការពិពណ៌នារបស់ប៉ុលអំពីគ្រោះថ្នាក់នៅថ្ងៃចុងក្រោយ ។ អ្នកអាចចង់ប្រើលេខយោងដើម្បីជួយអ្នកឲ្យយល់ពាក្យពិបាកៗមួយចំនួន ។
-
តើឧទាហរណ៍អ្វីខ្លះនៃស្ថានភាពដែលប៉ុលបានពិពណ៌នា ដូចនឹងអ្វីដែលអ្នកបានឃើញក្នុងពិភពលោកនាសព្វថ្ងៃនេះ ?
អំណោយទានពីព្រះ
ព្រះវរបិតាសួគ៌មិនបានទុកឲ្យយើងប្រឈមមុខនឹងគ្រោះថ្នាក់នៃថ្ងៃចុងក្រោយដោយខ្លួនយើងនោះទេ ។ ដោយសេចក្ដីមេត្តាករុណា និងសេចក្ដីស្រឡាញ់របស់ទ្រង់ ទ្រង់បានប្រទានអំណោយដ៏អស្ចារ្យជាច្រើនដល់យើង ។
អែលឌើរ អាន់ឌើរសិន បានបន្ត ៖
នៅពេលយើងស្វែងរកផ្លូវរបស់យើងនៅក្នុងពិភពលោកដែលមិនសូវយកចិត្តទុកដាក់លើបទបញ្ញត្តិរបស់ព្រះ នោះយើងប្រាកដជាពោរពេញដោយការអធិស្ឋាន ប៉ុន្តែយើងមិនចាំបាច់ព្រួយបារម្ភខ្លាំងពេកនោះទេ ។ ព្រះអម្ចាស់នឹងប្រទានពរដល់ពួកបរិសុទ្ធរបស់ទ្រង់ជាមួយនឹងព្រះចេស្តាខាងវិញ្ញាណដែលចាំបាច់បន្ថែមដើម្បីបំពេញតាមតម្រូវការដែលត្រូវប្រឈមមុខនៅជំនាន់របស់យើង ។
( នែល អិល អាន់ឌើរសិន « speeches.byu.eduA Compensatory Spiritual Power for the Righteous » [ Brigham Young University Education Week devotional ថ្ងៃទី ១៨ ខែ សីហា ឆ្នាំ ២០១៥ ] » )
សូមអាន ធីម៉ូថេ ទី២ ៣:១៤–១៧ ដោយស្វែងរកអំណោយទានមួយក្នុងចំណោមអំណោយទានដែលព្រះបានប្រទានដល់យើង ដើម្បីជួយយើងឆ្លងផុតពីគ្រាលំបាកនៃជំនាន់របស់យើង ។
ធីម៉ូថេ ទី២ ៣:១៥–១៧ គឺជាវគ្គបទគម្ពីរចំណេះចំណានខាងគោលលទ្ធិ ។ សូមពិចារណាគូសចំណាំវគ្គចំណេះចំណានខាងគោលលទ្ធិតាមវិធីដែលងាយសម្គាល់ ដើម្បីអ្នកអាចរកឃើញវាដោយងាយស្រួល ។ អ្នកនឹងរៀនបន្ថែមអំពីវគ្គចំណេះចំណានខាងគោលលទ្ធិនេះនៅក្នុងមេរៀនក្រោយ ។
-
តើពរជ័យអ្វីខ្លះដែលយើងអាចទទួលបានពីការសិក្សាព្រះគម្ពីរ ដែលអ្នកបានកត់សម្គាល់នៅក្នុងខគម្ពីរទាំងនេះ ?
ការសិក្សាព្រះគម្ពីរអាចជួយអ្នក ៖
-
ឲ្យសេចក្ដីជំនឿរបស់អ្នកទៅលើព្រះយេស៊ូវគ្រីស្ទកាន់តែស៊ីជម្រៅ ។
-
ទទួលបានប្រាជ្ញា និងការណែនាំក្នុងស្ថានភាពដែលអ្នកប្រឈមមុខ ។
-
យល់ពីគោលលទ្ធិ ឬសេចក្តីពិតនៃដំណឹងល្អ ។
-
កែគំនិតខុសឆ្គងឬទម្លាប់មិនល្អ ។
-
ប្រែក្លាយកាន់តែដូចជាព្រះយេស៊ូវគ្រីស្ទ ។
-
តើអ្នកនឹងសង្ខេបអ្វីដែលប៉ុលបានបង្រៀនអំពីការសិក្សាព្រះគម្ពីរយ៉ាងដូចម្ដេច ?
នៅក្នុងសៀវភៅកំណត់ហេតុការសិក្សារបស់អ្នក សូមសរសេរអំពីគ្រាមួយដែលព្រះគម្ពីរបានជួយអ្នកតាមរបៀបមួយដែលប៉ុលបានពិពណ៌នា ។ ប្រសិនបើអ្នកមិនអាចគិតអំពីបទពិសោធន៍មួយ សូមសរសេរពីមូលហេតុដែលអ្នកគិតថាបទគម្ពីរអាចជួយអ្នកតាមរបៀបមួយដែលប៉ុលបានពិពណ៌នា ។
-
តើមានរបៀបអ្វីទៀតដែលព្រះអម្ចាស់អាចប្រទានពរដល់អ្នក នៅពេលអ្នកសិក្សាព្រះគម្ពីរ ?
-
ព្រះអម្ចាស់បានប្រទានព្រះគម្ពីរជាអំណោយដល់អ្នក ដើម្បីជួយអ្នកនៅថ្ងៃចុងក្រោយ ។ តើការណ៍នេះបង្រៀនអ្នកអំពីទ្រង់យ៉ាងដូចម្តេច ?
ការប្រើប្រាស់បទគម្ពីរ
ដើម្បីអនុវត្តការប្រើព្រះគម្ពីរដើម្បីពង្រឹងសេចក្តីជំនឿរបស់អ្នកទៅលើព្រះយេស៊ូវគ្រីស្ទ សូមជ្រើសរើសបញ្ហាប្រឈមនៅថ្ងៃចុងក្រោយពីរដែលប៉ុលបានព្យាករណ៍នៅក្នុង ធីម៉ូថេ ទី២ ៣:១–៧, ១២–១៣; ៤:៣–៤ ឬជ្រើសរើសបញ្ហាប្រឈមផ្សេងៗដែលពាក់ព័ន្ធនឹងជីវិតរបស់អ្នក ។ សូមស្វែងរកវគ្គបទគម្ពីរដែលអាចជួយនរណាម្នាក់ដែលកំពុងប្រឈមមុខនឹងបញ្ហាទាំងនេះ ។ វាអាចមានប្រយោជន៍ក្នុងការស្វែងរកពាក្យគន្លឹះនៅក្នុងសេចក្ដីណែនាំដល់បទគម្ពីរទាំងឡាយ ឬ the Topical Guide ដែលទាំងពីរនេះមាននៅលើគេហទំព័រ ChurchofJesusChrist.org ។ ឬដំបូងអ្នកអាចជ្រើសរើសបទគម្ពីរមួយចំនួនដែលអ្នកចូលចិត្តហើយបន្ទាប់មកសម្រេចចិត្តថាតើបញ្ហាប្រឈមនៅថ្ងៃចុងក្រោយមួយណាដែលពួកគេអាចជួយអ្នកបាន ។
១. សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើវគ្គបទគម្ពីរមួយណាដែលអ្នកបានរកឃើញដែលអាចជួយនរណាម្នាក់ដែលកំពុងប្រឈមមុខនឹងបញ្ហាជាក់លាក់ ? សូមពន្យល់ពីរបៀបដែលវគ្គបទគម្ពីទាំងនោះអាចជួយបាន ។
គោលដៅការសិក្សាព្រះគម្ពីររបស់អ្នក
ប៉ុលបានរំឭកធីម៉ូថេថា ធីម៉ូថេបានទទួលពរដែលបានស្គាល់បទគម្ពីរតាំងពីគាត់នៅក្មេង ( សូមមើល ធីម៉ូថេ ទី២ ៣:១៥ ) ។ ដូចគ្នានេះដែរ ព្រះវរបិតាសួគ៌នឹងប្រទានពរដល់អ្នកសម្រាប់ការសិក្សាព្រះគម្ពីរក្នុងភាពយុវវ័យរបស់អ្នក ។ សូមចំណាយពេលពីរបីនាទីក្នុងការដាក់គោលដៅដោយការអធិស្ឋាន ឬក្នុងការពិចារណាអំពីគោលដៅបច្ចុប្បន្នរបស់អ្នកសម្រាប់ការសិក្សាព្រះគម្ពីរប្រចាំថ្ងៃផ្ទាល់ខ្លួន ។ សូមពិចារណាអំពីសំណួរខាងក្រោមនេះ ៖
-
តើអ្នកបានសម្រេចគោលដៅរបស់អ្នកដោយរបៀបណា ?
-
តើគោលដៅរបស់អ្នកជួយអ្នកឲ្យអភិវឌ្ឍសេចក្តីជំនឿទៅលើព្រះយេស៊ូវគ្រីស្ទ និងយកឈ្នះលើឧបសគ្គនៅជំនាន់យើងដោយរបៀបណា ?
-
តើអ្នកមានអារម្មណ៍ថាគួរកែតម្រូវគោលដៅអ្វីខ្លះរបស់អ្នក ?
សូមពិចារណាប្រាប់គ្រូរបស់អ្នក ឪពុកម្តាយ ឬនរណាម្នាក់ផ្សេងទៀតដែលអ្នកទុកចិត្តអំពីគោលដៅការសិក្សាព្រះគម្ពីររបស់អ្នក ហើយអញ្ជើញពួកគេឲ្យតាមដានជាមួយអ្នក ។
ជម្រើស ៖ តើចង់រៀនសូត្របន្ថែមទៀតទេ ?
តើខ្ញុំអាចយល់ពីគ្រាលំបាកដែលមានសរសេរក្នុង ធីម៉ូថេ ទី២ ៣:១–៧ដោយរបៀបណា ?
និយមន័យខាងក្រោមអាចមានប្រយោជន៍ ៖
-
« មិនស្រឡាញ់តាមធម្មតាមនុស្ស » ( ធីម៉ូថេ ទី២ ៣:៣ ) អាចរួមបញ្ចូលទាំងអាកប្បកិរិយាដែលទាក់ទងនឹងការខ្វះអារម្មណ៍ ឬការយកចិត្តទុកដាក់ អារម្មណ៍ស្អប់ និងមើលងាយ ឬដោយចំណង់តណ្ហាដែលនាំទៅរកអំពើអសីលធម៌ខាងផ្លូវភេទ
-
« ការមិនចេះទប់ចិត្ត » ( ធីម៉ូថេ ទី២ ៣:៣ ) មានន័យថាគ្មានភាពម្ចាស់ការលើខ្លួនឯង
-
« ឥតបើគិត » ( ធីម៉ូថេ ទី២ ៣:៤ ) មានន័យថាប្រញាប់ប្រញាល់ មិនប្រុងប្រយ័ត្ន
-
« មានចិត្តធំ » ( ធីម៉ូថេ ទី២ ៣:៤ ) មានន័យថាមានចិត្តក្រអឺតក្រទម អំនួត
តើខ្ញុំអាចយល់កាន់តែច្បាស់អំពី ធីម៉ូថេ ទី២ ៣:១៦–១៧ ដោយរបៀបណា ?
សូមពិចារណាអានអត្ថបទ « Line upon Line: 2 Timothy 3:16–17 » ( New Era ខែ មេសា ឆ្នាំ ២០១២ ទំព័រ ១៩ ) ដែលមានពាក្យជំនួយ ការអត្ថាធិប្បាយព្យាករណ៍ និងការពន្យល់ដែលអាចជួយអ្នកឲ្យយល់បន្ថែមអំពីខគម្ពីរទាំងនេះ ។
តើការសិក្សាព្រះគម្ពីរអាចជួយខ្ញុំនៅក្នុងជីវិតខ្ញុំដោយរបៀបណា ?
អែលឌើរ រីឆាត ជី ស្កត ( ឆ្នាំ ១៩២៨–២០១៥ ) ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ ៖
យើងនិយាយទៅកាន់ព្រះដោយការអធិស្ឋាន ។ ជាទូទៅ ទ្រង់ទាក់ទងមកយើងវិញតាមរយៈបន្ទូលរបស់ទ្រង់ដែលបានសរសេរទុក ។ ដើម្បីបានដឹងថា តើព្រះសូរសៀងទ្រង់មានលក្ខណៈ និងអារម្មណ៍បែបណា សូមអានព្រះបន្ទូលទ្រង់ សូមសិក្សាព្រះគម្ពីរ ហើយពិចារណាព្រះបន្ទូលទាំងនោះ ។ សូមធ្វើឲ្យវាក្លាយជាផ្នែកមួយដ៏ចាំបាច់នៃជីវិតប្រចាំថ្ងៃ ។ …
តាមរយៈការសិក្សាព្រះគម្ពីរជាទៀងទាត់ប្រចាំថ្ងៃ នោះបងប្អូននឹងរកឃើញសេចក្តីសុខសាន្តក្នុងភាពច្របូកច្របល់នៅជុំវិញខ្លួន ហើយមានកម្លាំងដើម្បីតតាំងនឹងការល្បួង ។ បងប្អូននឹងបង្កើនសេចក្ដីជំនឿដ៏រឹងមាំលើព្រះគុណនៃព្រះ ហើយដឹងថា តាមរយៈដង្វាយធួននៃព្រះយេស៊ូវគ្រីស្ទ អ្វីៗនឹងត្រូវបានធ្វើឲ្យបានប្រសើរឡើងស្របតាមកាលវេលារបស់ព្រះ ។
( រីឆាដ ជី ស្កត « Make the Exercise of Faith Your First Priority » Liahona ខែ វិច្ឆិកា ឆ្នាំ ២០១៤ ទំព័រ ៩៣–៩៤ )
តើខ្ញុំអាចមានសុទិដ្ឋិនិយមយ៉ាងណាអំពីអនាគត ប្រសិនបើការដឹកនាំរបស់សង្គមហាក់ដូចជាផ្ទុយនឹងបទបញ្ញត្តិរបស់ព្រះ ?
ប្រធាន ប៊យដ៍ ខេ ផាកកឺ ( ឆ្នាំ ១៩២៤–២០១៥ ) ក្នុងកូរ៉ុមនៃពួកសាវកដប់ពីរនាក់បានជួយឆ្លើយសំណួរនេះនៅក្នុងវីដេអូ « On Zion’s Hill » ចាប់ពីនាទីទី ០:០០ ដល់នាទីទី ១:៤១ ដែលមាននៅគេហទំព័រ ChurchofJesusChrist.org ។
តើមានរបៀបអ្វីខ្លះដែលខ្ញុំអាចសិក្សាព្រះគម្ពីរប្រកបដោយប្រសិទ្ធភាព ?
អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ឆ្លើយសំណួរនេះនៅក្នុងវីដេអូ « Advice for Studying the Scriptures » ( ២:០៧ ) មាននៅគេហទំព័រ ChurchofJesusChrist.org ។