Pōpoaki mei he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá
Siʻi Faifekau Ngāue Tokoni:
ʻOku akoʻi ʻe he Tohi ʻa Molomoná “Vakai, ʻoku ou fakahā kiate kimoutolu ʻa e ngaahi meʻá ni koeʻuhí ke mou iloʻi ʻa e potó; koeʻuhí ke mou ʻiloʻi ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17). Kuo ui koe ʻe he ʻOtuá ke ke hoko ko ha faifekau ngāue tokoni ke ke fakahoko ha ngāue mahuʻinga ʻi he kuongá ni. ‘Oku mau houngaʻia moʻoni ʻi hoʻo loto fiemālie ke fakahoko iá.
ʻOku mau tapou atu ke ke “lotu ki he Tamaí ‘aki e ivi kotoa ʻo e lotó” koe‘uhí ke fakafonu ʻaki kimoutolu ʻa e ʻofa haohaoa ʻa Kalaisi ‘a ia ʻoku foaki kiate kinautolu “kotoa pē [ko e kau] muimui moʻoni” ‘o Sīsū Kalaisí (Molonai 7:47–48). ʻOku mau fakaafeʻi koe ke fakalahi ho ngaahi talēnití mo e ngaahi taukeí ki hono fakalāngilangiʻi ʻo e ʻOtuá. Te Ne tokoni‘i koe ke tāpuekina ʻEne fānaú ʻi hoʻo tokoniʻi kinautolu ko e faifekau ngāue tokoní.
ʻOku ʻoatu ʻa e Ngaahi Tuʻunga Moʻui Fakafaifekau maʻá e Kau Ākonga ʻa Sīsū Kalaisí—Ngāue Fakafaifekau Tokoní ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ke tataki hoʻo ngāué. ‘Oku mau poupou atu ke ke feangai mo ia pea mo moʻui ʻaki e ngaahi tuʻunga moʻui ʻoku fakamatalaʻi atú. ʻE tokoni ʻa e ngaahi tuʻunga moʻui ko ʻení ke maluʻi koe fakaetuʻasino, fakalaumālie, pea mo fakaeloto. Te nau tokoni‘i koe ke ke hoko ko ha ākonga moʻoni ‘a Sīsū Kalaisi mo tupulaki ke hoko ʻo hangē ko Iá. Ako maʻu pē ʻa e ngaahi tuʻunga moʻui ko ʻení mo feinga ke talangofua ki ai. Kapau ‘oku ʻi ai haʻo ngaahi fehuʻi, kole ʻi he faʻa lotu ki he ʻEikí ke tokoni atu, peá ke talanoa mo hoʻo palesiteni fakasiteikí mo ho kau taki ngāue fakafaifekau tokoní kapau ʻe fie maʻu.
ʻOku mau fakatauange te ke maʻu ʻa e nonga mo e fiefia moʻoní ʻi hoʻo hoko ko e faifekau ʻo tokoni ki he ʻEiki ko Sīsū Kalaisí pea mo e fānau ʻa e Tamai Hēvaní.
ʻI he ʻofa mo e loto houngaʻia.
Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá
Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní