ឧបសម្ព័ន្ធទី ១

មគ្គុទ្ទេសក៍សម្រាប់ការបង្កើតសកម្មភាពរៀនសូត្របន្ថែម

នៅពេលអ្នកគិតអំពីសេចក្តីត្រូវការរបស់អ្នកទាំងឡាយនៅក្នុងថ្នាក់រៀនរបស់អ្នក អ្នកអាចនឹងកំណត់ផ្នែកមួយចេញមកពី ប្រកាសដំណឹងល្អរបស់យើង ដែលអ្នកមានអារម្មណ៍ថា សំខាន់ ប៉ុន្តែវាមិនបានលើកឡើងនៅក្នុងសម្ភារនៃវគ្គសិក្សាទាំងនេះទេ ។ មគ្គុទ្ទេសក៍នេះអាចជួយអ្នកបង្កើតបទពិសោធន៍សិក្សាតាមបំណងសម្រាប់ថ្នាក់របស់អ្នកបាន ។

សមាសធាតុសំខាន់ៗសម្រាប់សកម្មភាពរៀនសូត្រ

មានផ្នែកសំខាន់បី សម្រាប់សកម្មភាពរៀនសូត្រនីមួយៗនៅក្នុងវគ្គសិក្សានេះ ៖ ( ១ ) សិក្សា ( ២ ) អនុវត្ត និង ( ៣ ) ដាក់គោលដៅ ។ គោលការណ៍ណែនាំខាងក្រោមទាំងនេះអាចជួយអ្នកបញ្ចូលផ្នែកសំខាន់ៗទាំងនេះ ទៅក្នុងសកម្មភាពរៀនសូត្របន្ថែមដែលអ្នកបង្កើតសម្រាប់ថ្នាក់របស់អ្នកបាន ។

សិក្សា

កំណត់អំពី អ្វី ដែលសិស្សនឹងសិក្សា

តើកថាខណ្ឌណាខ្លះចេញមកពី ប្រកាសដំណឹងល្អរបស់យើង ដែលអ្នកនឹងអញ្ជើញសិស្សឲ្យសិក្សា ?
- សូមចាំថា ពេលវេលាមានកំណត់ ។ ជាទូទៅ វាជាការប្រសើរជាងក្នុងការផ្តោតលើផ្នែកតូចមួយ ហើយស៊ីជម្រៅ ជាជាងការព្យាយាមបង្រៀនមេរៀនជាច្រើន ។ សូមប្រាកដថាទុកពេលវេលាឲ្យបានច្រើនសម្រាប់ការហាត់ និងការអនុវត្ត ។
តើមានបទគម្ពីរ ឬសេចក្តីថ្លែងការណ៍មកពីថ្នាក់ដឹកនាំសាសនាចក្រដែលអាចប្រើដើម្បីគាំទ្រ ឬលើកកម្ពស់អ្វីដែលសិស្សកំពុងសិក្សាចេញពី ប្រកាសដំណឹងល្អរបស់យើង ដែរឬទេ ?

កំណត់អំពី របៀប ដែលសិស្សនឹងសិក្សា

តើអ្នកអាចជួយសិស្សមើលអំពីភាពពាក់ព័ន្ធគ្នានៃផ្នែកនេះនៃ ប្រកាសដំណឹងល្អរបស់យើង បានយ៉ាងដូចម្តេច ? តើមានឧទាហរណ៍ សាច់រឿង សំណួរ ដំណើររឿង រូបភាព បទពិសោធន៍ផ្ទាល់ខ្លួន ឬវីដេអូខ្លីៗណាមួយដែលនឹងជួយរៀបចំពួកគេសម្រាប់ការរៀនសូត្រនេះដែរឬទេ ?
តើអ្នកនឹងសួរសំណួរអ្វីខ្លះ ? ( កត់ត្រាសំណួរមួយចំនួនដែលអាចជួយសិស្សឲ្យស្វែងយល់ពីគំនិត និងអារម្មណ៍របស់ពួកគេ ) ។

តើសមាជិកក្នុងថ្នាក់នឹងធ្វើការតែម្នាក់ឯង ជាមួយដៃគូ ឬក្នុងក្រុមតូចមួយឬ ?

អនុវត្ត

តើសមាជិកក្នុងថ្នាក់អាចធ្វើបានអ្វីខ្លះ ដើម្បីអនុវត្តអ្វីដែលពួកគេបានរៀន ? ឧទាហរណ៍ អ្នកអាច ៖
- ទុកពេលវេលាឲ្យសិស្សដើម្បីពន្យល់ ឬបង្រៀនអ្វីដែលពួកគេបានសិក្សានៅក្នុងពាក្យរបស់ពួកគេផ្ទាល់ ។
- បង្ហាញសាច់រឿងមួយ ហើយសុំឲ្យសមាជិកក្នុងថ្នាក់ប្រើអ្វីដែលពួកគេបានរៀន ដើម្បីជួយមនុស្សនៅក្នុងសាច់រឿងនោះ ។

ដាក់គោលដៅមួយ

បញ្ចប់សកម្មភាពរៀនសូត្រដោយការអញ្ជើញសមាជិកក្នុងថ្នាក់ឲ្យកំណត់គោលដៅ ដែលទាក់ទងនឹងអ្វីដែលពួកគេបានរៀន ។ សូមពិចារណាផ្តល់ឧទាហរណ៍មួយចំនួនអំពីគោលដៅដែលអាចសម្រេចបាន ដែលពួកគេអាចដាក់ ។ បន្ទាប់មក សូមទុកពេលឲ្យសិស្សកត់ត្រាគោលដៅរបស់ពួកគេ ។