មេរៀនទី ១១

ជួយមនុស្សឲ្យធ្វើ និងរក្សាការតាំងចិត្ត

ប្រកាសដំណឹងល្អរបស់យើង ជំពូកទី ១១

« ការជួយមនុស្សឲ្យប្រែចិត្តជឿលើព្រះយេស៊ូវគ្រីស្ទ គឺជាចំណុចសំខាន់ [ នៃ ] គោលបំណងរបស់អ្នកផ្សព្វផ្សាយសាសនា ។ » ( ប្រកាសដំណឹងល្អរបស់យើង ៖ មគ្គុទេសក៍ចែកចាយដំណឹងល្អនៃព្រះយេស៊ូវគ្រីស្ទ [ ឆ្នាំ២០២៣ ] ទំព័រ ២០២ ) ។ របៀបដ៏សំខាន់មួយដើម្បីជួយមនុស្សដទៃក្នុងការប្រែចិត្តជឿរបស់ពួកគេ គឺតាមរយៈការអញ្ជើញពួកគេឲ្យធ្វើ និងរក្សាការតាំងចិត្ត ។ ការផ្តល់នូវការអញ្ជើញដ៏ប្រកបដោយប្រសិទ្ធភាពបង្កើននូវលទ្ធភាពដែលមនុស្សនឹងធ្វើ និងរក្សាការតាំងចិត្ត ។

ពិនិត្យមើល និង តាមដាន

អ្នកដឹកនាំការពិភាក្សា ៖ អញ្ជើញសិស្សឲ្យគិតអំពីកិច្ចខិតខំប្រឹងប្រែងថ្មីៗរបស់ពួកគេ ដើម្បីអនុវត្តអ្វីដែលពួកគេកំពុងរៀននៅក្នុងថ្នាក់នេះ ។ អ្នកអាចអញ្ជើញពួកគេឲ្យចែកចាយកិច្ចខិតខំប្រឹងប្រែងមួយចំនួនរបស់ពួកគេជាមួយដៃគូ ឬរួមគ្នាជាថ្នាក់ ។

ជម្រើសសកម្មភាពសិក្សា

អ្នកដឹកនាំការពិភាក្សា ៖ សូមជ្រើសរើសជម្រើស ការរៀនសូត្រ( នានា )ប្រកបដោយការអធិស្ឋាន ដែលនឹងមានអត្ថប្រយោជន៍បំផុតសម្រាប់ថ្នាក់របស់អ្នក ។ សូមប្រាកដថាទុកពេលវេលាឲ្យបានច្រើនសម្រាប់ការហាត់ និងការអនុវត្ត ។

ជម្រើស ក ៖ តើខ្ញុំអាចជួយមនុស្សដទៃឲ្យប្រែចិត្តជឿទៅលើព្រះអម្ចាស់ដោយរបៀបណា ?

សិក្សា

អ្នកដឹកនាំការពិភាក្សា ៖ សូមពិភាក្សាអំពីសេចក្ដីថ្លែងការណ៍ដូចខាងក្រោមនេះ ដោយអែលឌើរ ដេវីឌ អេ បែដណា ។

អ្នកបម្រើដែលមានសិទ្ធិអំណាចរបស់ព្រះអម្ចាស់បង្រៀនម្តងហើយម្តងទៀតថា គោលបំណងដ៏សំខាន់មួយនៃជីវិតរមែងស្លាប់របស់យើង គឺការផ្លាស់ប្តូរ និងការប្រែរូបខាងវិញ្ញាណតាមរយៈដង្វាយធួនរបស់ព្រះយេស៊ូវគ្រីស្ទ ។ ( « Ye Must Be Born Again » Ensign ឬ Liahona ខែឧសភា ឆ្នាំ២០០៧ ទំព័រ ១៩–២០ )

តើអ្នកគិតថា ហេតុអ្វីបានជាការផ្លាស់ប្តូរខាងវិញ្ញាណ ឬបានប្រែចិត្តជឿ គឺជាគោលបំណងចម្បងមួយនៃពេលវេលារបស់យើងនៅលើផែនដីនេះ ?

អ្នកដឹកនាំការពិភាក្សា ៖ សូមពិចារណាបង្ហាញប្រយោគដែលមិនពេញលេញដូចខាងក្រោមធ្វើជាចំណងជើងនៅលើក្តារខៀន ៖

ការប្រែចិត្តជឿទៅលើព្រះអម្ចាស់មានន័យថា …

យើងអាចកាន់តែប្រែចិត្តជឿទៅលើព្រះយេស៊ូវគ្រីស្ទបានតាមរយៈ …

សូមអញ្ជើញសមាជិកក្នុងថ្នាក់គិត ឬចែកចាយពីរបៀបដែលពួកគេនឹងបញ្ចប់ប្រយោគទាំងពីរនេះ ។ សូមពន្យល់ថា សកម្មភាពរៀនសូត្រនេះអាចជួយពួកគេយល់កាន់តែច្បាស់ អំពីអ្វីទៅជាការប្រែចិត្តជឿ និងរបៀបដែលយើងកាន់តែប្រែចិត្តជឿ ។ សូមដាក់បង្ហាញសេចក្តីណែនាំដូចខាងក្រោម ៖

សូមបំពេញសកម្មភាពសិក្សាដូចខាងក្រោមនេះ ។ សូមគូសបញ្ជាក់ពីអ្វីដែលអ្នករៀនអំពី ( ១ ) ការប្រែចិត្តជឿទៅលើព្រះអម្ចាស់មានន័យយ៉ាងណា និង ( ២ ) តើការប្រែចិត្តជឿកើតឡើងដោយរបៀបណា ។

សូមអានផ្នែកដែលមានចំណងជើងថា « ការប្រែចិត្ត ការតាំងចិត្ត និងការប្រែចិត្តជឿ » នៅក្នុងជំពូកទី ១១ នៃ ប្រកាសដំណឹងល្អរបស់យើង ( ទំព័រ ២០១–២០២ ) ។
សូមសិក្សាយ៉ាងហោចណាស់វគ្គបទគម្ពីរពីរខាងក្រោម ៖ យ៉ូហាន ៣:៣–៥; ម៉ូសាយ ៥:២; ម៉ូសាយ ២៧:២៥–២៦; អាលម៉ា ៥:១២–១៤ ។

អ្នកដឹកនាំការពិភាក្សា ៖ បន្ទាប់ពីមានពេលវេលាគ្រប់គ្រាន់សម្រាប់ការសិក្សា សូមអញ្ជើញសមាជិកក្នុងថ្នាក់ចែកចាយអ្វីដែលពួកគេបានរៀន ។ អ្នកអាចអញ្ជើញសិស្សឲ្យសរសេរចម្លើយរបស់ពួកគេនៅក្រោមចំណងជើងដែលសមរម្យនៅលើក្ដារខៀន ។

អ្នកក៏អាចពិភាក្សារួមគ្នានូវសំណួរខាងក្រោមផងដែរ ៖

តើការប្រែចិត្ត ការតាំងចិត្ត និងសេចក្តីសញ្ញាទាក់ទងទៅនឹងការប្រែចិត្តជឿយ៉ាងដូចម្តេច ?
តើអ្នកគិតថា ហេតុអ្វីបានជាការប្រែចិត្តជឿគឺអាចធ្វើទៅបានតែតាមរយៈព្រះយេស៊ូវគ្រីស្ទ និងដង្វាយធួនរបស់ទ្រង់ប៉ុណ្ណោះ ?
តើអ្វីខ្លះបានជួយអ្នកឲ្យពង្រឹងការប្រែចិត្តជឿរបស់អ្នកផ្ទាល់ទៅលើព្រះយេស៊ូវគ្រីស្ទ ?

អនុវត្ត

អ្នកដឹកនាំការពិភាក្សា ៖ សកម្មភាពខាងក្រោមអាចជួយសិស្សអនុវត្តការពន្យល់ពីសេចក្តីពិត ដែលពួកគេបានសិក្សានៅក្នុងសកម្មភាពរៀនសូត្រលើកមុន ។ សូមបង្ហាញការណែនាំខាងក្រោម និងទុកពេលឲ្យសមាជិកក្នុងថ្នាក់រៀនដើម្បីឆ្លើយតប ។ អ្នកអាចផ្ដល់ឲ្យសិស្ស ឬដៃគូនូវសាច់រឿងជាក់លាក់មួយដើម្បីសិក្សា និងឲ្យពួកគេបង្រៀនសិស្សដទៃដែលមានសាច់រឿងផ្សេងគ្នា ។

សូមជ្រើសរើសសាច់រឿងមួយក្នុងចំណោមសាច់រឿងខាងក្រោម ។ សូមរៀបចំការឆ្លើយតបសម្រាប់មនុស្សនៅក្នុងសាច់រឿងដោយការឆ្លើយសំណួរខាងក្រោម ។

គ្រីស្ទីណាមិនដែលចូលរួមព្រះវិហារទេ ។ ថ្មីៗនេះនាងទើបតែមានអារម្មណ៍ថា មានបំណងចង់ខិតចូលទៅជិតព្រះ ។ នាងឆ្ងល់ថា តើនាងគួរចាប់ផ្តើមនៅត្រង់ណា ។
អ៊ីសាកកំពុងរៀនជាមួយនឹងពួកអ្នកផ្សព្វផ្សាយសាសនា ។ ក្នុងអំឡុងពេលមួយនៃការបង្រៀន ពួកអ្នកផ្សព្វផ្សាយសាសនាបង្រៀនអ៊ីសាកថា ការប្រែចិត្តពាក់ព័ន្ធនឹងការងាកទៅរកព្រះ និងចេញឆ្ងាយពីអំពើបាបរបស់យើង ។ អ៊ីសាកបានឆ្លើយតបដោយនិយាយថា « ខ្ញុំមិនប្រាកដថា ខ្ញុំអាចធ្វើវាបានឬអត់នោះទេ ។ នេះជាធម្មជាតិរបស់ខ្ញុំ » ។
ចាស្មីនកត់សម្គាល់ឃើញមនុស្សដទៃទៀតហាក់ដូចជាមានភាពងាយស្រួលក្នុងការរក្សាបទបញ្ញត្តិ និងមានទីបន្ទាល់រឹងមាំជាងនាង ។ នាងមានអារម្មណ៍បាក់ទឹកចិត្ត នៅពេលដែលនាងប្រៀបធៀបខ្លួនឯងទៅនឹងមនុស្សដទៃ ។

តើអ្នកអាចចែកចាយអ្វីខ្លះមកពីបទគម្ពីរ ឬ ប្រកាសដំណឹងល្អរបស់យើង ដែលអាចជួយបាន ?
តើអ្នកអាចបង្រៀនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ?
តើអ្នកអាចផ្តល់ការអញ្ញើញអ្វីខ្លះ ?

អ្នកដឹកនាំការពិភាក្សា ៖ បន្ទាប់ពីមានពេលគ្រប់គ្រាន់ សូមអញ្ជើញសិស្សឲ្យចែកចាយការឆ្លើយតបរបស់ពួកគេជាមួយដៃគូ ឬក្រុមតូចមួយ ។

ដាក់គោលដៅមួយ

អ្នកដឹកនាំការពិភាក្សា ៖ ផ្តល់ពេលវេលាឲ្យសមាជិកក្នុងថ្នាក់ជញ្ជឹងគិតពីអ្វីដែលពួកគេបានរៀន និងដាក់គោលដៅ ។ អ្នកអាចបង្ហាញសេចក្តីណែនាំខាងក្រោមនេះដើម្បីជួយពួកគេ ៖

ដាក់គោលដៅទាក់ទងនឹងអ្វីដែលអ្នកបានសិក្សារួចហើយ ។ សូមប្រើប្រាស់គំនិតខាងក្រោមនេះ ឬគិតអំពីគំនិតរបស់អ្នកផ្ទាល់ ។

សូមសរសេររឿងផ្ទាល់ខ្លួនរបស់អ្នកអំពីការប្រែចិត្តជឿដែលកំពុងកើតឡើង ។ រួមបញ្ចូលនូវរបៀបជាក់លាក់មួយចំនួនដែលព្រះមានឥទ្ធិពលលើការផ្លាស់ប្តូរនៅក្នុងជីវិតរបស់អ្នក ។
សូមសួរមិត្តភក្តិ ឬសមាជិកគ្រួសារអំពីដំណើរការនៃការប្រែចិត្តជឿរបស់ពួកគេទៅលើព្រះយេស៊ូវគ្រីស្ទ ។
សរសេររបៀបបីយ៉ាងដែលអ្នកអាចស្វែងរកជំនួយមកពីព្រះយេស៊ូវគ្រីស្ទ ដើម្បីពង្រឹងការប្រែចិត្តជឿផ្ទាល់ខ្លួនរបស់អ្នក ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

អ្នកដឹកនាំការពិភាក្សា ៖ ប្រសិនបើសិស្សមានក្រុមមិត្តភក្តិដើម្បីចែកចាយគោលដៅរបស់ពួកគេពេញមួយវគ្គសិក្សា សូមទុកពេលឲ្យពួកគេដើម្បីចែកចាយពីរបៀបដែលពួកគេនឹងគាំទ្រ ឬរំឭកគ្នាទៅវិញទៅមកពីមុនថ្នាក់បន្ទាប់ ។

ជម្រើស ខ ៖ តើការអញ្ជើញប្រកបដោយប្រសិទ្ធភាព អាចជួយមនុស្សមករកព្រះយេស៊ូវគ្រីស្ទដោយរបៀបណា ?

សិក្សា

អ្នកដឹកនាំការពិភាក្សា ៖ សូមបង្ហាញសំណួរខាងក្រោម និងអញ្ជើញសិស្សឲ្យពិភាក្សាជាមួយដៃគូ ។ អ្នកក៏អាចចាប់ផ្ដើមដោយការចែកចាយគំរូមួយចេញពីជីវិតរបស់អ្នកផ្ទាល់បានផងដែរ ។

តើអ្វីជាការអញ្ជើញដែលអ្នកបានទទួល និងធ្វើតាមដែលបានជួយអ្នកឲ្យខិតកាន់តែជិតព្រះយេស៊ូវគ្រីស្ទ ?
តើអ្វីៗអាចមានភាពខុសគ្នាយ៉ាងណាសម្រាប់អ្នក ប្រសិនបើអ្នកមិនត្រូវបានផ្ដល់នូវការអញ្ជើញនេះ ?

អ្នកដឹកនាំការពិភាក្សា ៖ ដើម្បីជួយសិស្សចាប់ផ្តើមសិក្សាអំពីការអញ្ជើញប្រកបដោយប្រសិទ្ធភាព សូមពិចារណាចែកចាយការណែនាំដែលបានរាយបញ្ជីដូចខាងក្រោម ។ អ្នកអាចបែងចែកសិស្សជាគូៗ ហើយចាត់តាំងដៃគូនីមួយៗនូវជម្រើសសិក្សាមួយ ។ អ្នកក៏អាចអញ្ជើញសិស្សម្នាក់ៗឲ្យអានខគម្ពីរមួយ ឬច្រើន ដែលមាននៅក្នុងប្រអប់ « ការសិក្សាព្រះគម្ពីរ » នៅលើ ទំព័រ ២០៣ នៅក្រោម « គោលការណ៍ដើម្បីធ្វើការអញ្ជើញ » ។

ស្វែងយល់អំពីការធ្វើការអញ្ជើញ ដោយសិក្សាដូចខាងក្រោម នៅក្នុង ជំពូកទី ១១ នៃ ប្រកាសដំណឹងល្អរបស់យើង ៖

កថាខណ្ឌពីរ និងចំណុចទាំងឡាយដែលនៅក្រោមចំណងជើង « ធ្វើការអញ្ជើញ » ( ទំព័រ ២០២ )
« គោលការណ៍ដើម្បីធ្វើការអញ្ជើញ » ( ទំព័រ ២០៣ )

អ្នកដឹកនាំការពិភាក្សា ៖ នៅពេលដែលពួកគេបានបញ្ចប់ការសិក្សារួចរាល់ហើយ សូមអញ្ជើញឲ្យសមាជិកក្នុងថ្នាក់សង្ខេបពីអ្វីដែលពួកគេបានរៀនជាមួយដៃគូរបស់ពួកគេ ។ សូមពិចារណាពិភាក្សាសំណួរដូចតទៅនេះរួមគ្នា ៖

តើអ្នកបានរៀនអ្វីខ្លះអំពីសារៈសំខាន់នៃការធ្វើការអញ្ជើញ នៅពេលដែលយើងចែកចាយដំណឹងល្អរបស់ព្រះយេស៊ូវគ្រីស្ទ ?
តើមានគំរូនៃការអញ្ជើញអ្វីខ្លះ ដែលយើងអាចអញ្ជើញដើម្បីជួយមនុស្សដទៃមករកព្រះគ្រីស្ទ ?

អ្នកដឹកនាំការពិភាក្សា ៖ ជាផ្នែកមួយនៃការពិភាក្សារបស់អ្នក អ្នកអាចបង្ហាញវីដេអូ « Inviting Others to ‘Come and See’ [ ការអញ្ជើញមនុស្សដទៃឲ្យ‹ មក ហើយមើល › ] » ( នៅនាទី ១:១៧ ) ឬ « Inviting Others to ‘Come and Help’ [ ការអញ្ជើញមនុស្សដទៃឲ្យ ‹ មក ហើយជួយ › ] » ( នៅនាទី ១:០៣ ) ។ វីដេអូទាំងពីរនេះមាននៅលើគេហទំព័រ ChurchofJesusChrist.org ៖

អ្នកក៏អាចចែកចាយសេចក្តីថ្លែងការណ៍ដូចខាងក្រោមដោយអែលឌើរ ហ្គែរី អ៊ី ស្ទីវ៉ែនសុន ផងដែរ ៖

មានការអញ្ជើញរាប់រយ ដែលយើងអាចអញ្ជើញទៅអ្នកដទៃទៀតបាន ។ យើងអាចអញ្ជើញមនុស្សផ្សេងទៀតឲ្យ « មក ហើយមើល » ពិធីសាក្រាម៉ង់ សកម្មភាពវួដ វីដេអូតាមអនឡាញ ដែលពន្យល់ពីដំណឹងល្អរបស់ព្រះយេស៊ូវគ្រីស្ទ ។ « មក ហើយមើល » អាចជាការអញ្ជើញឲ្យអានព្រះគម្ពីរមរមន ឬមកមើលព្រះវិហារបរិសុទ្ធ អំឡុងពេលពិធីសម្ពោធពីមុនពិធីឧទ្ទិសឆ្លង ។ ( ស្រឡាញ់ ចែកចាយ អញ្ជើញ » លីអាហូណា ខែឧសភា ឆ្នាំ២០២២ ទំព័រ៨៦ )

អនុវត្ត

ការធ្វើការអញ្ជើញ

គោលការណ៍ខាងក្រោមអាចជួយអ្នកធ្វើការអញ្ជើញប្រកបដោយប្រសិទ្ធភាព ៖

សូមមានលក្ខណៈទន់ភ្លន់ ជាក់លាក់ និងច្បាស់លាស់ ។ បង្កើតឃ្លានៃការអញ្ជើញរបស់អ្នកដែលមានទម្រង់ជាសំណួរ « តើអ្នកនឹង » ។ ឧទាហរណ៍ សូមមើល « សូមអញ្ជើញដោយប្រើភាសាទន់ភ្លន់ និងច្បាស់លាស់ » នៅក្នុងជំពូកទី ១១ នៃ ប្រកាសដំណឹងល្អរបស់យើង ( ទំព័រ ២០៣ ) ។

ថ្លែងទីបន្ទាល់អំពីពរជ័យទាំងឡាយ ។ ចែកចាយទីបន្ទាល់របស់អ្នកថា ព្រះនឹងប្រទានពរដល់អ្នកទាំងឡាយណាដែលធ្វើតាមការអញ្ជើញដែលអ្នកផ្ដល់ឲ្យ ។ អ្នកអាចពន្យល់ពីរបៀបដែលអ្នកផ្ទាល់ទទួលបានពរជ័យ ។ សម្រាប់ព័ត៌មានបន្ថែម សូមមើល « សូមសន្យាពរជ័យដល់មនុស្សទាំងឡាយ » និង « ចែកចាយទីបន្ទាល់របស់អ្នក » នៅក្នុង ជំពូកទី ១១ នៃ ប្រកាសដំណឹងល្អរបស់យើង ( ទំព័រ ២០៤–២០៥ ) ។

នេះគឺជាឧទាហរណ៍នៃការអញ្ជើញដែលធ្វើតាមគោលការណ៍ណែនាំទាំងនេះ ៖

ព្រះអម្ចាស់បានសន្យានូវពរជ័យដ៏មហិមាដល់អស់អ្នកដែលគោរពតាមក្រឹត្យវិន័យនៃដង្វាយមួយភាគក្នុងដប់ ។ ទ្រង់បានប្រទានពរដល់ខ្ញុំផ្ទាល់ និងក្រុមគ្រួសាររបស់ខ្ញុំ នៅពេលយើងបានគោរពតាមក្រឹត្យវិន័យនេះ ។ ខ្ញុំសន្យាថា ព្រះនឹងប្រទានពរដល់អ្នកនៅពេលអ្នកអនុវត្តសេចក្តីជំនឿលើព្រះយេស៊ូវគ្រីស្ទ និងបង់ដង្វាយមួយភាគក្នុងដប់ ។ តើអ្នកនឹងគោរពតាមក្រឹត្យវិន័យនៃដង្វាយមួយភាគក្នុងដប់បន្ទាប់ពីអ្នកទទួលបុណ្យជ្រមុជទឹកដែរឬទេ ?

សូមប្រើជំហានទាំងនេះដើម្បីជួយអ្នកអនុវត្តការបង្កើត និងធ្វើការអញ្ជើញ ។

សូមកំណត់ពីអ្វីដែលអ្នកអាចធ្វើបាន ដើម្បីអញ្ជើញនរណាម្នាក់ឲ្យខិតមកជិតព្រះយេស៊ូវគ្រីស្ទ ។ ម្នាក់នេះអាចជាមនុស្សដែលអ្នកស្គាល់ ឬនរណាម្នាក់ដែលអ្នកស្រមៃថា នឹងបង្រៀនក្នុងនាមជាអ្នកផ្សព្វផ្សាយសាសនា ។
ឧទាហរណ៍នៃសកម្មភាពដែលពួកគេអាចធ្វើបាន រួមមានការជួបជាមួយពួកអ្នកផ្សព្វផ្សាយសាសនា ការអានព្រះគម្ពីរមរមនជារៀងរាល់ថ្ងៃ ការចូលរួមនៅព្រះវិហារជាមួយអ្នក ឬការអធិស្ឋានទៅកាន់ព្រះវរបិតាសួគ៌ ។ ឧទាហរណ៍បន្ថែមទៀត សូមមើល « ការអញ្ជើញដែលអ្នកអាចធ្វើ » នៅក្នុងមេរៀនទី ១–៣ នៃ ជំពូកទី ៣ នៃ ប្រកាសដំណឹងល្អរបស់យើង ( ទំព័រ ៣២–៣៣, ៤៩, ៦៤ ) ។
សូមកត់ត្រាអ្វីដែលអ្នកនឹងនិយាយដើម្បីធ្វើការអញ្ជើញ ។ សូមចាំថា មានលក្ខណៈទន់ភ្លន់ ជាក់លាក់ និងច្បាស់លាស់ នៅក្នុងវិធីសាស្រ្តរបស់អ្នក ។ សូមប្រាកដថា ត្រូវរួមបញ្ចូលទីបន្ទាល់របស់អ្នក អំពីពរជ័យដែលយើងអាចទទួលបាននៅពេលដែលយើងរស់នៅតាមគោលការណ៍នេះ ។

អ្នកដឹកនាំការពិភាក្សា ៖ បន្ទាប់ពីសិស្សបានបញ្ចប់សំណៅចែក សូមទុកពេលឲ្យពួកគេដើម្បីអនុវត្តធ្វើការអញ្ជើញរបស់ពួកគេជាមួយដៃគូ ។ អ្នកអាចនឹងធ្វើជាគំរូមុនពេលសមាជិកក្នុងថ្នាក់អនុវត្តដោយខ្លួនឯង ។ ប្រសិនបើមានពេលគ្រប់គ្រាន់ អ្នកអាចអញ្ជើញសិស្សឲ្យអនុវត្តជាមួយសមាជិកក្នុងថ្នាក់ជាច្រើននាក់ ។

ដាក់គោលដៅមួយ

សូមអនុវត្តធ្វើការអញ្ជើញរបស់អ្នកទៅកាន់សមាជិកគ្រួសារ ឬមិត្តភក្តិនៅខាងក្រៅថ្នាក់រៀន ។
ស្វែងយល់អំពីផ្នែក « ការចែកចាយដំណឹងល្អ » នៅលើបណ្ណាល័យដំណឹងល្អ ហើយរកមើលគំរូនៃការអញ្ជើញដែលអ្នកអាចធ្វើការអញ្ជើញដល់ក្រុមគ្រួសារ ឬមិត្តភក្តិ ។ សូមធ្វើតាមអារម្មណ៍នៃការបំផុសគំនិតរបស់អ្នកឲ្យធ្វើអ្វីមួយ ។
អញ្ជើញមិត្តភក្តិម្នាក់ឲ្យចូលរួមព្រះវិហារ ឬសកម្មភាពសាសនាចក្រជាមួយអ្នក ។ សូមប្រើគោលការណ៍ណែនាំដែលអ្នកបានអនុវត្តនៅពេលអ្នកអញ្ជើញពួកគេ ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

ពេលក្រោយ

អ្នកដឹកនាំការពិភាក្សា ៖ ប្រសិនបើអ្នកត្រៀមខ្លួនរួចរាល់ដើម្បីសិក្សា មេរៀនទី ១២ នៅថ្នាក់បន្ទាប់ សូមពិចារណាអញ្ជើញសិស្សឲ្យរៀបចំដោយមើលត្រួសៗនៅក្នុង ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ( ឆ្នាំ២០១៣ ) ។ អ្នកអាចផ្ញើឲ្យពួកគេនូវតំណភ្ជាប់ទៅកាន់ធនធាននេះ ឬបង្ហាញពួកគេពីរបៀបស្វែងរកវានៅក្នុងបណ្ណាល័យដំណឹងល្អ ( បណ្ណាល័យ > ក្បួនខ្នាត និងការហៅ > ការហៅក្នុងបេសកកម្ម > ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ) ។