មេរៀនទី ៧

ការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់

ប្រកាសដំណឹងល្អរបស់យើង ជំពូកទី ៣

ព្រះអង្គសង្គ្រោះបានបញ្ជាឲ្យមនុស្សទាំងអស់ ដែលមានការទទួលខុសត្រូវឲ្យប្រែចិត្ត ទទួលបុណ្យជ្រមុជទឹក និងទទួលអំណោយនៃព្រះវិញ្ញាណបរិសុទ្ធ ។ « ការរក្សាសេចក្ដីសញ្ញានៃពិធីបុណ្យជ្រមុជទឹកគឺជាជំហានដំបូងក្នុងការចងភ្ជាប់ខ្លួនយើងទៅនឹងព្រះ ដើម្បីឲ្យព្រះវិញ្ញាណបរិសុទ្ធអាចលាងសម្អាត ពង្រឹង ហើយផ្លាស់ប្ដូរនិស្ស័យរបស់យើងឲ្យកាន់តែប្រសើរឡើង ។ » ( ប្រកាសដំណឹងល្អរបស់យើង ៖ មគ្គុទេសក៍ចែកចាយដំណឹងល្អនៃព្រះយេស៊ូវគ្រីស្ទ [ ឆ្នាំ២០២៣ ] ទំព័រ ២៨ ) ។ ការផ្តល់ការអញ្ជើញឲ្យទទួលពិធីបុណ្យជ្រមុជទឹក និងពីធីបញ្ជាក់ គឺជាវិធីដ៏សំខាន់មួយដែលពួកអ្នកផ្សព្វផ្សាយសាសនាបំពេញគោលបំណងរបស់ពួកគេក្នុងការជួយមនុស្សដទៃឲ្យមករកព្រះយេស៊ូវគ្រីស្ទ ។

ពិនិត្យមើល និង តាមដាន

អ្នកដឹកនាំការពិភាក្សា ៖ អញ្ជើញសិស្សឲ្យគិតអំពីកិច្ចខិតខំប្រឹងប្រែងថ្មីៗរបស់ពួកគេ ដើម្បីអនុវត្តអ្វីដែលពួកគេកំពុងរៀននៅក្នុងថ្នាក់នេះ ។ អ្នកអាចអញ្ជើញពួកគេឲ្យចែកចាយកិច្ចខិតខំប្រឹងប្រែងមួយចំនួនរបស់ពួកគេជាមួយដៃគូ ឬរួមគ្នាជាថ្នាក់ ។

ជម្រើសសកម្មភាពសិក្សា

អ្នកដឹកនាំការពិភាក្សា ៖ សូមជ្រើសរើសជម្រើស ការរៀនសូត្រ( នានា )ប្រកបដោយការអធិស្ឋាន ដែលនឹងមានអត្ថប្រយោជន៍បំផុតសម្រាប់ថ្នាក់របស់អ្នក ។ សូមប្រាកដថាទុកពេលវេលាឲ្យបានច្រើនសម្រាប់ការហាត់ និងការអនុវត្ត ។

ជម្រើស ក ៖ហេតុអ្វីបានជាពិធីបុណ្យជ្រមុជទឹក និងពិធីបញ្ជាក់មានសារៈសំខាន់ ?

សិក្សា

អ្នកដឹកនាំការពិភាក្សា ៖ សូមពិចារណាបង្ហាញរូបភាពរបស់នរណាម្នាក់ដែលទទួលពិធីបុណ្យជ្រមុជទឹក ។ សូមអញ្ជើញសិស្សឲ្យពិភាក្សាសំណួរខាងក្រោមជាមួយនឹងដៃគូ ៖

តើអ្នកចាំអ្វីខ្លះអំពីពិធីបុណ្យជ្រមុជទឹក និងពិធីបញ្ជាក់របស់អ្នកផ្ទាល់ ?
តើមានវិធីអ្វីខ្លះដែលព្រះអម្ចាស់បានប្រទានពរដល់អ្នក ដោយសារការសម្រេចចិត្តរបស់អ្នក ដើម្បីទទួលពិធីបុណ្យជ្រមុជទឹក និងពិធីបញ្ជាក់ ?

អ្នកដឹកនាំការពិភាក្សា ៖ រំឭកសិស្សថា ការអញ្ជើញមនុស្សដទៃឲ្យមករកព្រះគ្រីស្ទ តាមរយៈពិធីបុណ្យជ្រមុជទឹក និងពិធីបញ្ជាក់ គឺជាវិធីដ៏សំខាន់មួយ ដែលពួកអ្នកផ្សព្វផ្សាយសាសនាបំពេញគោលបំណងរបស់ពួកគេ ។ សូមពិចារណារំឭកឡើងវិញនូវគោលបំណងជាអ្នកផ្សព្វផ្សាយសាសនាដោយការសូត្រវាជាមួយគ្នាជាថ្នាក់ ( សូមមើល « បំពេញគោលបំណងជាអ្នកផ្សព្វផ្សាយសាសនារបស់អ្នក » ប្រកាសដំណឹងល្អរបស់យើង [ ឆ្នាំ២០២៣ ] ទំព័រ ១ ) ។

សកម្មភាពសិក្សាខាងក្រោមអាចជួយសិស្សឲ្យយល់កាន់តែច្បាស់ពីរបៀបដែលព្រះអង្គសង្គ្រោះអាចប្រទានពរដល់អ្នកដែលជ្រើសរើសទទួលពិធីបុណ្យជ្រមុជទឹក និងពិធីបញ្ជាក់ ។ សូមជួយសមាជិកក្នុងថ្នាក់រៀនស្វែងរក « ការអញ្ជើញឲ្យទទួលពិធីបុណ្យជ្រមុជទឹក និង ពិធីបញ្ជាក់ » នៅក្នុងជំពូកទី ៣ នៃ ប្រកាសដំណឹងល្អរបស់យើង ( ទំព័រ ២៨–២៩ ) ។ បន្ទាប់មកចែកចាយការណែនាំទាំងនេះ ៖

សិក្សាកថាខណ្ឌនៅក្រោមចំណងជើង « មូលដ្ឋានគ្រឹះនៃគោលលទ្ធិ » ( ប្រកាសដំណឹងល្អរបស់យើង ទំព័រ ២៨ ) រួមជាមួយនឹងខគម្ពីរយ៉ាងហោចណាស់ពីរដែលយោងគ្នា ។ សូមពិចារណាស្វែងរក និងកំណត់សម្គាល់ការបង្រៀនដែលធ្វើឲ្យការយល់ដឹងរបស់អ្នកកាន់តែស៊ីជម្រៅ អំពីសារៈសំខាន់នៃពិធីបុណ្យជ្រមុជទឹក និងពិធីបញ្ជាក់ ។

អ្នកដឹកនាំការពិភាក្សា ៖ បន្ទាប់ពីសិស្សបានបញ្ចប់ការសិក្សារួចហើយ សូមពិភាក្សាអំពីសំណួរដូចខាងក្រោម ៖

តើអ្នកបានរកឃើញអ្វីខ្លះដែលអាចជួយនរណាម្នាក់មានអារម្មណ៍ចង់ទទួលពិធីបុណ្យជ្រមុជទឹក និងពិធីបញ្ជាក់ ?
តើអ្នកបានរៀនអ្វីខ្លះអំពីរបៀបដែលព្រះប្រទានពរដល់អ្នកដែលជ្រើសរើស ទទួលពិធីបុណ្យជ្រមុជទឹក និងពិធីបញ្ជាក់ ?

អ្នកដឹកនាំការពិភាក្សា ៖ នៅពេលដែលអ្នកពិភាក្សាអំពីសំណួរមុន សូមពិចារណាចែកចាយសេចក្តីថ្លែងការណ៍ខាងក្រោម ដោយប្រធាន រ័សុល អិម ណិលសុន ។ អញ្ជើញសមាជិកក្នុងថ្នាក់ឲ្យចែកចាយការយល់ដឹងបន្ថែម ដែលពួកគេទទួលបានពីការបង្រៀនរបស់ប្រធាន ណិលសុន ។

កាលបងប្អូន និងខ្ញុំបានចុះសេចក្ដីសញ្ញាជាមួយព្រះ នោះទំនាក់ទំនងរបស់យើងជាមួយទ្រង់ ប្រែកាន់តែជិតស្និទ្ធជាងពីមុនសេចក្ដីសញ្ញារបស់យើងទៅទៀត ។ ឥឡូវយើងបានចងភ្ជាប់ជាមួយគ្នា ។ ដោយសារតែសេចក្តីសញ្ញារបស់យើងជាមួយព្រះ ទ្រង់ពុំដែលនឿយហត់ក្នុងកិច្ចខិតខំរបស់ទ្រង់ដើម្បីជួយយើងឡើយ ហើយយើងនឹងមិនដែលប្រើអស់ការអត់ធ្មត់ដ៏មេត្តារបស់ទ្រង់ជាមួយយើងដែរ ។ យើងម្នាក់ៗមានកន្លែងពិសេសនៅក្នុងព្រះទ័យរបស់ព្រះ ។ ទ្រង់មានក្តីសង្ឃឹមដ៏ធំសម្រាប់យើង ។ ( « សេចក្ដីសញ្ញាដ៏នៅអស់កល្បអស់កាលជានិច្ច » លីអាហូណា ខែតុលា ឆ្នាំ២០២២ ទំព័រ ២៨ )

អ្នកដឹកនាំការពិភាក្សា ៖ ដើម្បីជួយអ្នកសិក្សាមើលឃើញឧទាហរណ៍នៃពរជ័យនៃពិធីបុណ្យជ្រមុជទឹក និងពិធីបញ្ជាក់ សូមពិចារណាបង្ហាញវីដេអូ « How Sarah Found Happiness » (នៅនាទី ៣:៤២ នៅលើគេហទំព័រ ChurchofJesusChrist.org ) ។ បន្ទាប់ពីវីដេអូ អ្នកអាចពិភាក្សាអំពីរបៀបដែលជីវិតរបស់សារ៉ា ត្រូវបានប្រទានពរដោយការសម្រេចចិត្តរបស់នាង ដើម្បីទទួលពិធីបុណ្យជ្រមុជទឹក និងពិធីបញ្ជាក់ ។

អនុវត្ត

អ្នកដឹកនាំការពិភាក្សា ៖ ផ្តល់ឱកាសឲ្យសមាជិកក្នុងថ្នាក់អនុវត្តពន្យល់ពីអ្វីដែលពួកគេបានរៀនអំពីពិធីបុណ្យជ្រមុជទឹក និងពិធីបញ្ជាក់ ។ របៀបមួយដែលអ្នកអាចធ្វើការណ៍នេះបាន តាមរយៈការអញ្ជើញពួកគេឲ្យឆ្លើយតបនឹងសាច់រឿងដូចខាងក្រោមនេះ ។ ដំបូងពួកគេអាចកត់ត្រាការឆ្លើយតបរបស់ពួកគេ មុនពេលចែកចាយវាជាមួយដៃគូ ឬក្រុមតូចមួយ ។

ស្រមៃថា អ្នកកំពុងនិយាយជាមួយមិត្តភក្តិម្នាក់ដែលមិនស្គាល់អំពីពិធីបរិសុទ្ធនៃពិធីបុណ្យជ្រមុជទឹក និងពិធីបញ្ជាក់ឡើយ ។ មិត្តភក្តិរបស់អ្នកសួរថា « ហេតុអ្វីបានជាមនុស្សម្នាក់ត្រូវធ្វើពិធីបុណ្យជ្រមុជទឹក និងពិធីបញ្ជាក់ ? » តើអ្នកនឹងនិយាយអ្វី ?

ដាក់គោលដៅមួយ

អ្នកដឹកនាំការពិភាក្សា ៖ ផ្តល់ពេលវេលាឲ្យសមាជិកក្នុងថ្នាក់ជញ្ជឹងគិតពីអ្វីដែលពួកគេបានរៀន និងដាក់គោលដៅ ។ អ្នកអាចបង្ហាញសេចក្តីណែនាំខាងក្រោមនេះដើម្បីជួយពួកគេ ៖

ដាក់គោលដៅទាក់ទងនឹងអ្វីដែលអ្នកបានសិក្សារួចហើយ ។ សូមប្រើប្រាស់គំនិតខាងក្រោមនេះ ឬគិតអំពីគំនិតរបស់អ្នកផ្ទាល់ ។

សរសេរពីរបៀបដែលអ្នកទទួលបានពរ ដោយសារតែអ្នកបានទទួលបុណ្យជ្រមុជទឹក និងបានបញ្ជាក់ជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ចែកចាយអ្វីដែលអ្នកបានសរសេរជាមួយមនុស្សជាទីស្រឡាញ់ នៅក្នុងការប្រជុំតមអាហារ និងថ្លែងទីបន្ទាល់ ឬនៅលើប្រព័ន្ធផ្សព្វផ្សាយសង្គម ។
ជញ្ជឹងគិតអំពីសេចក្តីសញ្ញាដែលអ្នកបានធ្វើ នៅពេលដែលអ្នកបានទទួលពិធីបុណ្យជ្រមុជទឹក ។ បញ្ជាក់ពីរបៀបដែលអ្នកអាចរក្សាសេចក្តីសញ្ញានៃពិធីបុណ្យជ្រមុជទឹករបស់អ្នកបានពេញលេញ ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

អ្នកដឹកនាំការពិភាក្សា ៖ ប្រសិនបើសិស្សមានក្រុមមិត្តភក្តិដើម្បីចែកចាយគោលដៅរបស់ពួកគេពេញមួយវគ្គសិក្សា សូមទុកពេលឲ្យពួកគេដើម្បីចែកចាយពីរបៀបដែលពួកគេនឹងគាំទ្រ ឬរំឭកគ្នាទៅវិញទៅមកពីមុនថ្នាក់បន្ទាប់ ។

ជម្រើស ខ ៖ តើខ្ញុំអាចអញ្ជើញមនុស្សដទៃឲ្យទទួលពិធីបុណ្យជ្រមុជទឹក និងពីធីបញ្ជាក់ដោយរបៀបណា ?

សិក្សា

អ្នកដឹកនាំការពិភាក្សា ៖ សូមពិចារណាចាប់ផ្តើមសកម្មភាពសិក្សានេះដោយចែកចាយសាច់រឿងដូចខាងក្រោម ៖

ស្រមៃថា អ្នកជាអ្នកផ្សព្វផ្សាយសាសនាដែលទើបហៅថ្មី ។ អ្នក និងដៃគូរបស់អ្នកកំពុងរៀបចំផែនការកាលវិភាគរបស់អ្នកសម្រាប់ថ្ងៃខាងមុខ ។ ដៃគូរបស់អ្នកពន្យល់ថា ពួកគេមានអារម្មណ៍នៃការបំផុសគំនិតឲ្យអញ្ជើញមនុស្សម្នាក់ក្នុងចំណោមមនុស្សដែលអ្នកកំពុងបង្រៀនឲ្យទទួលបុណ្យជ្រមុជទឹក និងពិធីបញ្ជាក់ ។ ដៃគូរបស់អ្នកសួរថា តើអ្នកនឹងផ្តល់ការអញ្ជើញនេះក្នុងអំឡុងពេលការណាត់ជួបបង្រៀនរបស់អ្នកនៅរសៀលនេះបានទេ ។ នេះជាលើកដំបូងរបស់អ្នក ក្នុងការអញ្ជើញនរណាម្នាក់ឲ្យទទួលពិធីបុណ្យជ្រមុជទឹក និងពិធីបញ្ជាក់ ។

តើអ្នកមានអារម្មណ៍ជឿជាក់ប៉ុនណាចំពោះការផ្តល់ការអញ្ជើញនេះ ?
តើអ្នកអាចមានសំណួរអ្វីខ្លះ ?

អ្នកដឹកនាំការពិភាក្សា ៖ សកម្មភាពសិក្សាខាងក្រោមអាចជួយសិស្សរៀបចំ ដើម្បីធ្វើការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់ ។ ជួយពួកគេស្វែងរក « ការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់ » នៅក្នុងជំពូកទី ៣ នៃ ប្រកាសដំណឹងល្អរបស់យើង ( ទំព័រ ២៨–២៩ ) ។ បន្ទាប់មកចែកចាយការណែនាំទាំងនេះ ៖

សិក្សា « ការផ្ដល់ការអញ្ជើញ » និង « គំនិតសម្រាប់ការអញ្ជើញឲ្យទទួលពិធីបុណ្យជ្រមុជទឹក » ( ប្រកាសដំណឹងល្អរបស់យើង ទំព័រ ២៨–២៩ ) ។ រកមើលគោលការណ៍ណែនាំដែលអាចជួយអ្នកអញ្ជើញនរណាម្នាក់ឲ្យទទួលពិធីបុណ្យជ្រមុជទឹក និងពិធីបញ្ជាក់ ។ អ្នកអាចគូសចំណាំឃ្លាទាំងឡាយដែលអ្នកចាប់អារម្មណ៍ ។

អ្នកដឹកនាំការពិភាក្សា ៖ សូមអញ្ជើញសមាជិកក្នុងថ្នាក់ឲ្យពិភាក្សាអំពីអ្វីដែលពួកគេបានរៀនដោយការសួរសំណួរដូចខាងក្រោម ៖

តើគោលការណ៍ណែនាំ ឬយោបល់មួយណាដែលអ្នកយល់ថាមានប្រយោជន៍បំផុត ? ហេតុអ្វី ?
តើអ្នកគិតថា ហេតុអ្វីបានជាវានឹងមានប្រយោជន៍ក្នុងការផ្តោតលើគំរូរបស់ព្រះអង្គសង្គ្រោះ នៅពេលអញ្ជើញមនុស្សដទៃឲ្យទទួលពិធីបុណ្យជ្រមុជទឹក ?

អនុវត្ត

អ្នកដឹកនាំការពិភាក្សា ៖ ផ្តល់ឱកាសឲ្យសិស្សដើម្បីអនុវត្តការអញ្ជើញនរណាម្នាក់ឲ្យទទួលពិធីបុណ្យជ្រមុជទឹក និងពិធីបញ្ជាក់ ។ ដើម្បីជួយពួកគេមើលគំរូអំពីរបៀបធ្វើដូចនេះ អ្នកអាច ៖

ប្រើវីដេអូមួយ ដូចជា « Invitation to Be Baptized: German » ( នៅនាទី ២:៤២ ) ឬ « Invitation to Be Baptized: Jynx » ( នៅនាទី ២:៣៤ ) ។ វីដេអូទាំងពីរនេះមាននៅលើគេហទំព័រ ChurchofJesusChrist.org ។
អញ្ជើញសមាជិកក្នុងថ្នាក់ឲ្យសម្តែងធ្វើជា អញ្ជើញនរណាម្នាក់ឲ្យទទួលពិធីបុណ្យជ្រមុជទឹក និងពិធីបញ្ជាក់ ។ ពួកគេអាចប្រើអត្ថបទទ្រេតនៅខាងក្រោម « ការផ្ដល់ការអញ្ជើញ » ( ប្រកាសដំណឹងល្អរបស់យើង ទំព័រ ២៩ ) ឬសាច់រឿងសម្តែងណាមួយនៅចុងបញ្ចប់នៃមេរៀននេះ ។

ពិភាក្សាជាមួយសមាជិកក្នុងថ្នាក់រៀនពីអ្វីដែលពួកគេបានរៀនមកពីវីដេអូ ឬការសម្តែង រួមទាំងអ្វីដែលពួកគេចូលចិត្ត និងអ្វីដែលពួកគេអាចធ្វើខុសពីនោះ ។ បន្ទាប់មក សូមចែកចាយសេចក្តីណែនាំដូចខាងក្រោម ៖

អនុវត្តការរៀបចំ និងផ្តល់ការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់ដោយធ្វើដូចខាងក្រោម ៖

សូមសរសេរផែនការសាមញ្ញមួយ ពីរបៀបដែលអ្នកនឹងអញ្ជើញនរណាម្នាក់ឲ្យទទួលពិធីបុណ្យជ្រមុជទឹក និងពិធីបញ្ជាក់ ។ ព្យាយាមធ្វើតាមគោលការណ៍ណែនាំទាំងនេះនៅក្នុងផែនការរបស់អ្នក ៖ ( ១ ) ជាក់លាក់ និងចំៗ ( ២ ) សន្យាពរជ័យ និង ( ៣ ) ចែកចាយទីបន្ទាល់របស់អ្នក ។
សូមប្តូរវេនផ្តល់ការអញ្ជើញដែលអ្នកបានរៀបចំជាមួយដៃគូ ។
បន្ទាប់ពីអនុវត្តជាមួយដៃគូរបស់អ្នកហើយ កំណត់ពីរបៀបដែលអ្នកអាចកែតម្រូវការអញ្ជើញរបស់អ្នក ។
អនុវត្តម្តងទៀតជាមួយដៃគូផ្សេង ។

ដាក់គោលដៅមួយ

សិក្សាវគ្គបទគម្ពីរបន្ថែមអំពីពិធីបុណ្យជ្រមុជទឹក និងពិធីបញ្ជាក់ ។ បន្ទាប់មកចែកចាយអ្វីដែលអ្នកបានរៀនជាមួយសមាជិកគ្រួសារ ឬមិត្តភក្តិ ។
គិតពីនរណាម្នាក់ដែលអ្នកចង់ជួយឲ្យចូលមកជិតព្រះយេស៊ូវគ្រីស្ទ ។ កំណត់ការអញ្ជើញដែលអ្នកអាចផ្តល់ដល់ពួកគេ ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

ពេលក្រោយ

អ្នកដឹកនាំការពិភាក្សា ៖ ប្រសិនបើអ្នកត្រៀមខ្លួនរួចរាល់ដើម្បីបង្រៀន មេរៀនទី ៨ នៅថ្នាក់បន្ទាប់ សូមពិចារណាអញ្ជើញសមាជិកក្នុងថ្នាក់ឲ្យសិក្សាជំពូកទី ៤ នៃ ប្រកាសដំណឹងល្អរបស់យើង ក្នុងការរៀបចំ ។ អ្នកក៏អាចផ្ញើការរំឭកឲ្យពួកគេផងដែរ ។

ការផ្តល់នូវការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់

ការសម្តែងទី ១—ដោយប្រើគំរូរបស់ព្រះយេស៊ូវគ្រីស្ទ

អ្នកអធិប្បាយ ៖ សារ៉ាមានអារម្មណ៍ថា ចង់មានទំនាក់ទំនងជាមួយនឹងព្រះ តាំងពីនាងចាប់ផ្តើមរៀននៅមហាវិទ្យាល័យកាលពីពីរខែមុន ។ ថ្មីៗនេះ នាងបានជួបជាមួយពួកអ្នកផ្សព្វផ្សាយសាសនា ។ នៅក្នុងការជួបលើកដំបូងរបស់ពួកគេ ស៊ីស្ទើរ ហឺណានដែស និងស៊ីស្ទើរ វិល្លាម បានបង្រៀនសារ៉ា អំពីការស្តារឡើងវិញនៃដំណឹងល្អនៃព្រះយេស៊ូវគ្រីស្ទ ហើយបានអញ្ជើញនាងឲ្យអាន និងអធិស្ឋានអំពីព្រះគម្ពីរមរមន ។ ឥឡូវនេះពួកអ្នកផ្សព្វផ្សាយសាសនាកំពុងជួបជាមួយសារ៉ាម្តងទៀត ។ ពួកគេមានអារម្មណ៍នៃការបំផុសគំនិតដើម្បីអញ្ជើញសារ៉ា ឲ្យទទួលពិធីបុណ្យជ្រមុជទឹក ។

ស៊ីស្ទើរ ហឺណានដែស ៖ សារ៉ាអ្នកបានប្រាប់យើងថា អ្នកចង់ធ្វើតាមព្រះ និងធ្វើឲ្យទំនាក់ទំនងរបស់អ្នកកាន់តែរឹងមាំជាមួយនឹងទ្រង់ ។ សូមអានក្នុងព្រះគម្ពីរប៊ីបជាមួយគ្នាអំពីរបៀបដែលព្រះយេស៊ូវគ្រីស្ទបានបង្ហាញយើងអំពីវិធីដើម្បីធ្វើតាមព្រះ ។

ស៊ីស្ទើរ វិល្លាម ៖ នៅក្នុងគម្ពីរម៉ាថាយជំពូកទី ៣ យើងអានអំពីព្រះយេស៊ូវយាងទៅកាន់ យ៉ូហាន បាទីស្ទ ។ សារ៉ា សូមអ្នកអាន ម៉ាថាយ ៣:១៣–១៧ បានទេ ?

សារ៉ា ៖ [ អាន ម៉ាថាយ ៣:១៣–១៧ ឮៗ ] ។

ស៊ីស្ទើរ ហឺណានដែស ៖ សារ៉ា ព្រះយេស៊ូវបានទទួលបុណ្យជ្រមុជទឹកដើម្បីសម្រេចតាមគ្រប់អស់ទាំងសេចក្តីសុចរិត ។ នោះមានន័យថា ទ្រង់បានគោរពតាមបទបញ្ញត្តិដើម្បីទទួលពិធីបុណ្យជ្រមុជទឹក ។ តើអ្នកដឹងអ្វីខ្លះអំពីពិធីបុណ្យជ្រមុជទឹក ?

សារ៉ា ៖ ខ្ញុំដឹងថា វាជាអ្វីដែលជាញឹកញាប់មនុស្សតែងតែធ្វើ ។ នៅក្នុងព្រះវិហារដែលខ្ញុំបានធំឡើង ខ្ញុំចងចាំថា បានឃើញមនុស្សពីរបីនាក់ទទួលបុណ្យជ្រមុជទឹក ។ នៅក្នុងគ្រួសាររបស់ខ្ញុំគ្មាននរណាម្នាក់បានទទួលពិធីបុណ្យជ្រមុជទឹកនោះទេ ។ ខ្ញុំមិនដឹងច្រើនលើសពីនេះនោះទេ ។

ស៊ីស្ទើរ ហឺណានដែស ៖ សូមអរគុណសារ៉ា សម្រាប់ការចែកចាយនេះ ។ យើងសូមពន្យល់បន្ថែមទៀតអំពីអ្វីទៅជាពិធីបុណ្យជ្រមុជទឹកនោះ ។ ព្រះមានព្រះទ័យចង់ឲ្យយើងត្រឡប់ទៅរស់នៅជាមួយនឹងទ្រង់វិញ ។ យើងចាប់ផ្តើមនៅលើផ្លូវដើម្បីត្រឡប់ទៅរកព្រះវិញ តាមរយៈការអនុវត្តសេចក្តីជំនឿលើព្រះយេស៊ូវគ្រីស្ទ ។ ការជឿលើព្រះយេស៊ូវគ្រីស្ទនាំឲ្យយើងផ្លាស់ប្តូរជីវិតរបស់យើង និងប្រែចិត្តពីអំពើបាបរបស់យើង ។ ពិធីបុណ្យជ្រមុជទឹកគឺជាសេចក្តីសញ្ញាទីមួយដែលយើងធ្វើនៅលើផ្លូវនេះ ។ វានាំយើងឲ្យខិតកាន់តែជិតនឹងព្រះអង្គសង្រ្គោះ ហើយយើងមានអារម្មណ៍រីករាយ ការអភ័យទោស និងសេចក្តីសង្ឃឹម ។ ពិធីបុណ្យជ្រមុជទឹកក៏ជាពិធីបរិសុទ្ធមួយផងដែរ ។ នោះមានន័យថា វាជាពិធីមួយដែលត្រូវបានធ្វើឡើងដោយសិទ្ធិអំណាចបព្វជិតភាព ។

ស៊ីស្ទើរ វិល្លាម ៖ នៅពេលដែលយើងបានទទួលពិធីបុណ្យជ្រមុជទឹក យើងកំពុងធ្វើសេចក្តីសញ្ញា ឬការសន្យាមួយជាមួយនឹងព្រះ ។ យើងសន្យាដើម្បីបម្រើទ្រង់ និងរក្សាព្រះបញ្ញត្តិរបស់ទ្រង់ ។ ជាផ្នែកមួយនៃសេចក្តីសញ្ញានេះ ព្រះសន្យាថា ទ្រង់នឹងអភ័យទោសអំពើបាបរបស់យើង ហើយប្រទានពរឲ្យយើងនូវព្រះវិញ្ញាណរបស់ទ្រង់ ដូច្នេះយើងត្រូវបានសម្អាត ដឹកនាំ និង លួងលោម ។

ស៊ីស្ទើរ ហឺណានដែស ៖ សារ៉ា តើអ្នកនឹងធ្វើតាមគំរូរបស់ព្រះយេស៊ូវគ្រីស្ទ ដោយទទួលពិធីបុណ្យជ្រមុជទឹកដោយនរណាម្នាក់ដែលត្រូវបានតែងតាំងដើម្បីធ្វើពិធីបរិសុទ្ធនេះដែរឬទេ ? ពួកយើងនឹងជួយអ្នកដើម្បីរៀបចំខ្លួនទទួលពិធីបុណ្យជ្រមុជទឹក ។ ពួកយើងជឿថា អ្នកអាចត្រៀមខ្លួនរួចរាល់នៅថ្ងៃទី២៩ ខែកក្កដា ។ តើអ្នកនឹងរៀបចំខ្លួនដើម្បីទទួលពិធីបុណ្យជ្រមុជទឹកតាមកាលបរិច្ឆេទនោះដែរឬទេ ?

សារ៉ា ៖ យល់ព្រម ។ នេះជាអ្វីដែលខ្ញុំមានអារម្មណ៍ថាខ្ញុំកំពុងស្វែងរក ។

ស៊ីស្ទើរ វិល្លាម ៖ សារ៉ា យើងមានសេចក្តីរំភើបចំពោះពរជ័យដែលនឹងកើតមានដល់អ្នក នៅពេលអ្នកធ្វើការជ្រើសរើសនេះ ។ ការទទួលពិធីបុណ្យជ្រមុជទឹកនឹងនាំមកនូវសេចក្តីសុខសាន្ត និងព្រះចេស្តាចូលមកក្នុងជីវិតរបស់អ្នក ។ យើងមានអ្វីជាច្រើនដើម្បីបង្រៀនអ្នក ដែលនឹងជួយអ្នករៀបចំ ។

ការផ្តល់នូវការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់

ការសម្តែងទី ២—បង្រៀនគោលលទ្ធិនៃព្រះគ្រីស្ទ

អ្នកអធិប្បាយ ៖ អ៊ីសាកកំពុងជួបជាមួយពួកអ្នកផ្សព្វផ្សាយសាសនាជាលើកដំបូង ។ គាត់មានសំណួរជាច្រើនអំពីគោលបំណងនៃជីវិតនេះ និងរបៀបដែលគាត់អាចស្វែងរកសុភមង្គលបន្ថែមទៀត ។ ពួកអ្នកផ្សព្វផ្សាយសាសនាបានបង្រៀនអ៊ីសាក អំពីផែនការនៃសេចក្តីសង្គ្រោះរបស់ព្រះវរបិតាសួគ៌ ។ ក្នុងអំឡុងពេលបង្រៀន អែលឌើរ ប្រោនីង និងអែលឌើរ ស៊ីង មានអារម្មណ៍នៃការបំផុសគំនិតដើម្បីអញ្ជើញអ៊ីសាក ឲ្យទទួលពិធីបុណ្យជ្រមុជទឹក ។

អែលឌើរ ប្រោនីង ៖ អ៊ីសាក យើងចង់និយាយអំពីផ្លូវត្រឡប់ទៅកាន់ព្រះវរបិតាសួគ៌របស់យើងវិញ ។ ទ្រង់ចង់ឲ្យយើងត្រឡប់ទៅរស់នៅជាមួយនឹងទ្រង់វិញ ហើយព្រះយេស៊ូវគ្រីស្ទបានធ្វើឲ្យការណ៍នេះអាចកើតឡើងបាន ។

អែលឌើរ ស៊ីង ៖ យើងចាប់ផ្តើមនៅលើផ្លូវត្រឡប់ទៅកាន់ព្រះវិញ ដោយការជឿលើព្រះយេស៊ូវគ្រីស្ទ ។ នៅពេលដែលយើងមានសេចក្តីជំនឿលើព្រះយេស៊ូវគ្រីស្ទ យើងចង់ផ្លាស់ប្តូរជីវិតរបស់យើងដោយឯកឯង និងប្រែក្លាយកាន់តែដូចជាទ្រង់ ។ យើងគោរពតាមការបង្រៀនរបស់ទ្រង់ ហើយប្រែចិត្ត នៅពេលដែលយើងធ្វើអំពីបាប ។ សេចក្តីជំនឿ និងការប្រែចិត្តនាំយើងទៅរកពិធីបុណ្យជ្រមុជទឹក និងពិធីបញ្ជាក់ ។ តើអ្នកអាចប្រាប់ពួកយើងពីអ្វីដែលអ្នកដឹងអំពីពិធីបុណ្យជ្រមុជទឹកបានទេ ?

អ៊ីសាក ៖ ខ្ញុំបានឃើញពិធីបុណ្យជ្រមុជទឹកម្តង ឬពីរដងនៅព្រះវិហារផ្សេងគ្នា ប៉ុន្តែលើសពីហ្នឹង ខ្ញុំមិនដឹងច្រើនអំពីវាឡើយ ។ ខ្ញុំគិតថា វាជាអ្វីមួយអំពីអំពើបាប ។

អែលឌើរ ប្រោនីង ៖ អ្នកនិយាយត្រូវហើយ ។ ពិធីបុណ្យជ្រមុជទឹកគឺជាជំហានដំបូងក្នុងការចងភ្ជាប់ខ្លួនយើងទៅនឹងព្រះ ដើម្បីឲ្យព្រះវិញ្ញាណបរិសុទ្ធអាចលាងសម្អាត ពង្រឹង ហើយផ្លាស់ប្ដូរនិស្ស័យរបស់យើងឲ្យកាន់តែប្រសើរឡើង ។ វាក៏ជារបៀបដែលយើងបង្ហាញពីការប្តេជ្ញាចិត្តរបស់យើងចំពោះព្រះផងដែរ ។ នៅពេលយើងទទួលពិធីបុណ្យជ្រមុជទឹក នោះយើងកំពុងធ្វើសេចក្តីសញ្ញា ឬកិច្ចសន្យាជាមួយនឹងទ្រង់ថា យើងនឹងបម្រើទ្រង់ ហើយរក្សាព្រះបញ្ញត្តិទាំងឡាយរបស់ទ្រង់ ។ នៅពេលយើងធ្វើបែបនេះ ព្រះធ្វើសេចក្តីសញ្ញាថា ទ្រង់នឹងចាក់ព្រះវិញ្ញាណរបស់ទ្រង់មកលើយើង និងអភ័យទោសចំពោះអំពើបាបរបស់យើង ។

អែលឌើរ ស៊ីង ៖ យើងក៏សន្យាផងដែរថា នៅពេលយើងទទួលពិធីបុណ្យជ្រមុជទឹក យើងនឹងលើកដាក់មកលើខ្លួនរបស់យើងនូវព្រះនាមនៃព្រះយេស៊ូវគ្រីស្ទ កាន់តាមព្រះបញ្ញត្តិទាំងឡាយរបស់ព្រះ បម្រើព្រះ និងមនុស្សដទៃទៀត និងប្រកាន់ខ្ជាប់ដល់ទីបញ្ចប់ ។ នោះមានន័យថា ពិធីបុណ្យជ្រមុជទឹកគឺជាការចាប់ផ្តើមជីវិតថ្មីសម្រាប់យើង ។ ពិតប្រាកដណាស់ថាយើងនឹងនៅតែមានបញ្ហាប្រឈមមុខ និងធ្វើខុស ។ ប៉ុន្តែយើងនឹងមិនឈប់ព្យាយាមដើម្បីរក្សាការសន្យារបស់យើង និងពឹងផ្អែកលើព្រះយេស៊ូវគ្រីស្ទពេញមួយជីវិតរបស់យើងឡើយ ។

អែលឌើរ ប្រោនីង ៖ អ៊ីសាក តើអ្នកនឹងធ្វើតាមគំរូរបស់ព្រះយេស៊ូវគ្រីស្ទដោយការទទួលពិធីបុណ្យជ្រមុជទឹកដោយនរណាម្នាក់ ដែលត្រូវបានតែងតាំងដើម្បីធ្វើពិធីបរិសុទ្ធនេះដែរឬទេ ? ពួកយើងនឹងជួយអ្នកដើម្បីរៀបចំខ្លួនទទួលពិធីបុណ្យជ្រមុជទឹក ។ ពួកយើងជឿថា អ្នកអាចត្រៀមខ្លួនរួចរាល់នៅថ្ងៃទី២៩ ខែកក្កដា ។ តើអ្នកនឹងរៀបចំខ្លួនដើម្បីទទួលពិធីបុណ្យជ្រមុជទឹកតាមកាលបរិច្ឆេទនោះដែរឬទេ ?

អ៊ីសាក ៖ យល់ព្រម ។ ស្តាប់ទៅហាក់ដូចជាមានអារម្មណ៍ថា នេះជាអ្វីដែលខ្ញុំកំពុងស្វែងរក ។

អែលឌើរ ស៊ីង ៖ អ៊ីសាក យើងមានសេចក្តីរំភើបចំពោះពរជ័យដែលនឹងកើតមានដល់អ្នក នៅពេលអ្នកធ្វើការជ្រើសរើសនេះ ។ ការទទួលពិធីបុណ្យជ្រមុជទឹកនឹងនាំមកនូវសេចក្តីសុខសាន្ត និងព្រះចេស្តាចូលមកក្នុងជីវិតរបស់អ្នក ។ យើងមានអ្វីជាច្រើនដើម្បីបង្រៀនអ្នក ដែលនឹងជួយអ្នករៀបចំសម្រាប់ពិធីបុណ្យជ្រមុជទឹក ។

ការផ្តល់នូវការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់