មេរៀនទី ៤

ស្រាវជ្រាវបទគម្ពីរ ហើយពាក់គ្រឿងសឹករបស់ព្រះ

ប្រកាសដំណឹងល្អរបស់យើង ជំពូកទី ២

ការសិក្សា និងការអនុវត្តសេចក្តីពិតដែលមាននៅក្នុងព្រះបន្ទូលរបស់ព្រះ គឺជាចំណុចសំខាន់ចំពោះការប្រែចិត្តជឿ និងការជួយមនុស្សឲ្យមករកព្រះយេស៊ូវគ្រីស្ទ ។ ការប្រើប្រាស់បច្ចេកវិទ្យាដោយសុចរិតអាចបង្កើនការសិក្សារបស់យើង និងជួយយើងស្វែងរកចម្លើយចំពោះសំណួរខាងដំណឹងល្អរបស់យើង ។ ការធ្វើតាមវិធីបង្ការខណៈពេលកំពុងប្រើបច្ចេកវិទ្យា គឺជាវិធីដ៏សំខាន់មួយដើម្បី « ពាក់គ្រឿងសឹករបស់ព្រះ » ( អេភេសូរ ៦:១១ ) ។

ពិនិត្យមើល និង តាមដាន

អ្នកដឹកនាំការពិភាក្សា ៖ អញ្ជើញសិស្សឲ្យគិតអំពីកិច្ចខិតខំប្រឹងប្រែងថ្មីៗរបស់ពួកគេ ដើម្បីអនុវត្តអ្វីដែលពួកគេកំពុងរៀននៅក្នុងថ្នាក់នេះ ។ អ្នកអាចអញ្ជើញពួកគេឲ្យចែកចាយកិច្ចខិតខំប្រឹងប្រែងមួយចំនួនរបស់ពួកគេជាមួយដៃគូ ឬរួមគ្នាជាថ្នាក់ ។

ជម្រើសសកម្មភាពសិក្សា

អ្នកដឹកនាំការពិភាក្សា ៖ ដោយការអធិស្ឋាន សូមជ្រើសរើសជម្រើសសិក្សា ឬជម្រើសដែលនឹងផ្តល់អត្ថប្រយោជន៍ច្រើនបំផុតដល់ថ្នាក់របស់អ្នក ។ សូមប្រាកដថាទុកពេលវេលាឲ្យបានច្រើនសម្រាប់ការហាត់ និងការអនុវត្ត ។

ជម្រើស ក ៖ តើខ្ញុំអាចមានបទពិសោធន៍ដ៏មានអត្ថន័យជាងនេះក្នុងការសិក្សាព្រះគម្ពីរដោយរបៀបណា ?

សិក្សា

ការវាយតម្លៃការសិក្សាព្រះគម្ពីរផ្ទាល់ខ្លួនរបស់ខ្ញុំ

ដាក់ពិន្ទុបទពិសោធន៍របស់អ្នកជាមួយព្រះគម្ពីរដោយឆ្លើយចំពោះសេចក្តីថ្លែងការណ៍ខាងក្រោម នៅលើរង្វាស់ពី ១ ( មិនធ្លាប់ ) ដល់ ៥ ( ស្ទើរតែរាល់ពេល ) ។

ខ្ញុំខិតខំប្រឹងប្រែងជាប្រចាំដើម្បីសិក្សាព្រះគម្ពីរ ។ ____

នៅពេលខ្ញុំសិក្សាព្រះគម្ពីរ ៖
ខ្ញុំផ្តោតលើព្រះវរបិតាសួគ៌ និងព្រះយេស៊ូវគ្រីស្ទ ។
ខ្ញុំចំណាយពេលដើម្បីពិចារណាអ្វីដែលខ្ញុំកំពុងអាន ។ ____
ខ្ញុំស្វែងរកការណែនាំ និងការយល់ដឹងមកពីព្រះវិញ្ញាណបរិសុទ្ធ ។ ____
ខ្ញុំស្វែងរកចម្លើយចំពោះសំណួររបស់ខ្ញុំ ។ ____
ខ្ញុំខិតខំរស់នៅតាមអ្វីដែលខ្ញុំបានរៀន ។ ____

អ្នកដឹកនាំការពិភាក្សា ៖ លើកទឹកចិត្តសមាជិកក្នុងថ្នាក់ឲ្យយកចិត្តទុកដាក់ក្នុងអំឡុងពេលសកម្មភាពរៀនសូត្រ ចំពោះចំណាប់អារម្មណ៍ខាងវិញ្ញាណដែលពួកគេអាចមានអំពីរបៀបកែលម្អបទពិសោធន៍ការសិក្សាព្រះគម្ពីររបស់ពួកគេ ។

សូមបង្ហាញសេចក្តីណែនាំខាងក្រោម ហើយសូមទុកពេលឲ្យសិស្សដើម្បីបំពេញសកម្មភាពនេះ ៖

សូមជ្រើសរើសផ្នែកមួយ ឬពីរដែលអ្នកចង់ធ្វើចេញពីការវាយតម្លៃខ្លួនឯងរបស់អ្នក ។ ធនធានដែលមានលេខខាងក្រោមត្រូវគ្នាទៅនឹងលេខដែលបានមកពីការវាយតម្លៃខ្លួនឯង ។ លេខទាំងនោះនឹងនាំអ្នកទៅកាន់ធនធានដែលជាប់ពាក់ព័ន្ធនៅក្នុងជំពូកទី ២ នៃ ប្រកាសដំណឹងល្អរបស់យើង ។

១. សិក្សាផ្នែកសេចក្តីផ្តើមនៃ « ស្រាវជ្រាវបទគម្ពីរ » ( ទំព័រ ១៧–១៨ ) ។
២ក. សិក្សាផ្នែកសេចក្តីផ្តើមនៃ « ស្រាវជ្រាវបទគម្ពីរ » ( ទំព័រ ១៧–១៨ ) ។
២ខ. បំពេញសកម្មភាពនៅក្នុងប្រអប់ « ការសិក្សាផ្ទាល់ខ្លួន » នៅទំព័រ ១៨ ។
២គ. សិក្សា « ស្វែងរកព្រះវិញ្ញាណ » ( ទំព័រ ១៨ ) ហើយបំពេញសកម្មភាពនៅក្នុងប្រអប់ « ការសិក្សាព្រះគម្ពីរ » នៅទំព័រ ១៨–១៩ ។
២ឃ. សិក្សា « ស្វែងរកចម្លើយចំពោះសំណួរ » ( ទំព័រ ១៩ ) ។
២ង. សិក្សា « រស់នៅតាមអ្វីដែលអ្នកបានរៀន » ( ទំព័រ ១៩ ) ហើយបំពេញសកម្មភាពនៅក្នុងប្រអប់ « ការសិក្សាផ្ទាល់ខ្លួន » នៅទំព័រ ១៩ ។

អនុវត្ត

អ្នកដឹកនាំការពិភាក្សា ៖ សូមផ្តល់ឱកាសដល់សិស្សដើម្បីចែកចាយអ្វីដែលពួកគេបានរៀនមកពីសកម្មភាពសិក្សា ។ ដើម្បីធ្វើដូច្នេះ អ្នកអាចបង្ហាញសំណួរទាំងឡាយដូចខាងក្រោម ។ សូមទុកពេលឲ្យសមាជិកក្នុងថ្នាក់ពិភាក្សាសំណួរមួយ ឬច្រើនក្នុងចំណោមសំណួរទាំងឡាយជាមួយដៃគូ ឬក្រុមតូចៗ ។

ដោយផ្អែកលើអ្វីដែលអ្នកបានសិក្សា តើអ្នកអាចធ្វើឲ្យការសិក្សាព្រះគម្ពីររបស់អ្នកមានលក្ខណៈប្រសើរជាងដោយរបៀបណា ?
តើអ្វីជាវគ្គបទគម្ពីរ ឬសេចក្តីថ្លែងការណ៍មកពី ប្រកាសដំណឹងល្អរបស់យើង ដែលអ្នកបានរកឃើញថា មានប្រយោជន៍ជាពិសេស ? ហេតុអ្វីបានជាអ្នកមានអារម្មណ៍ថាវាសំខាន់ ?
តើបទពិសោធន៍វិជ្ជមានអ្វីដែលអ្នកធ្លាប់មានក្នុងការសិក្សាបទគម្ពីរ ?

អ្នកដឹកនាំការពិភាក្សា ៖ សូមពិចារណាបញ្ចប់ផ្នែកនេះនៃសកម្មភាពសិក្សា ដោយការអានសេចក្តីថ្លែងការណ៍មកពីអែលឌើរ ឌី ថត គ្រីស្តូហ្វឺសិន នៅក្រោម « ការស្រាវជ្រាវបទគម្ពីរ » ( ប្រកាសដំណឹងល្អរបស់យើង, ១៨ ) ។ អញ្ជើញសិស្សមួយចំនួនឲ្យចែកចាយពីរបៀប ដែលការសិក្សាព្រះគម្ពីររបស់ពួកគេបានពង្រឹងសេចក្តីជំនឿ និងទីបន្ទាល់របស់ពួកគេទៅលើព្រះវរបិតាសួគ៌ និងព្រះយេស៊ូវគ្រីស្ទ ។

សម្រាប់ការអនុវត្តបន្ថែម អ្នកអាចប្រើ ការអនុវត្តជំនាញទី ២ ៖ « ប្រើប្រាស់ព្រះគម្ពីរក្នុងការបង្រៀនរបស់អ្នក » ។

ដាក់គោលដៅមួយ

អ្នកដឹកនាំការពិភាក្សា ៖សូមទុកពេលឲ្យសមាជិកក្នុងថ្នាក់ជញ្ជឹងគិតពីអ្វីដែលពួកគេបានរៀននៅថ្ងៃនេះ និងដាក់គោលដៅ ។ វិធីមួយដែលអ្នកអាចធ្វើកិច្ចការនេះ គឺដោយការអញ្ជើញពួកគេឲ្យដាក់ផែនការសាមញ្ញមួយ ដើម្បីកែលម្អការសិក្សាព្រះគម្ពីរផ្ទាល់ខ្លួនរបស់ពួកគេ ។ សូមពិចារណាបង្ហាញចំណុចខាងក្រោមនេះដើម្បីណែនាំពួកគេ ។ ទុកពេលវេលាឲ្យពួកគេនៅក្នុងថ្នាក់ដើម្បីកត់ត្រាផែនការរបស់ពួកគេ ។

ផែនការការសិក្សាព្រះគម្ពីររបស់ខ្ញុំ

តើខ្ញុំនឹងសិក្សានៅពេលណា ?
តើខ្ញុំនឹងចំណាយពេលប៉ុន្មានដើម្បីសិក្សា ?
តើអ្នកនឹងសិក្សានៅកន្លែងណា ?
តើខ្ញុំនឹងសិក្សាអ្វីខ្លះ ?
តើខ្ញុំនឹងធ្វើអ្វីខ្លះដើម្បីមានបទពិសោធន៍កាន់តែប្រសើរ ?

ជម្រើស ខ៖ តើការប្រើប្រាស់បណ្ណាល័យដំណឹងល្អអាចជួយខ្ញុំស្វែងរកចម្លើយចំពោះសំណួររបស់ខ្ញុំដោយរបៀបណា ?

សិក្សា

អ្នកដឹកនាំការពិភាក្សា ៖ សូមពិភាក្សាអំពីសំណួរខាងក្រោម និងសរសេរចម្លើយរបស់សមាជិកក្នុងថ្នាក់នៅលើក្តារខៀន ។

តើសំណួរអ្វីខ្លះដែលអ្នកត្រូវបានសួរអំពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ?
តើមានប្រភពទូទៅអ្វីខ្លះ ដែលមនុស្សប្រើដើម្បីឆ្លើយសំណួររបស់ពួកគេអំពីសាសនាចក្រ ?

អ្នកដឹកនាំការពិភាក្សា ៖ អញ្ជើញសិស្សឲ្យពិចារណាសំណួរដែលពួកគេផ្ទាល់មាន ។ សូមលើកទឹកចិត្តពួកគេឲ្យចងចាំសំណួរទាំងនេះក្នុងចិត្តអំឡុងសកម្មភាពសិក្សានេះ ។ ពន្យល់ថាព្រះវិញ្ញាណបរិសុទ្ធអាចណែនាំពួកគេក្នុងការស្វែងរកចម្លើយចំពោះសំណួររបស់ពួកគេ ។

សូមអាន « ស្វែងរកចម្លើយចំពោះសំណួរ » នៅក្នុងជំពូកទី ២ នៃ ប្រកាសដំណឹងល្អរបស់យើង ( ទំព័រ ១៩ ) ។ រកមើលដំបូន្មានដែលអាចជួយយើង នៅពេលដែលយើងមានសំណួរអំពីដំណឹងល្អ ។

តើអ្នកចាប់អារម្មណ៍អ្វីខ្លះ ?
តើអ្វីគួរជាប្រភពចម្បងរបស់យើងក្នុងការស្វែងរកចម្លើយចំពោះសំណួរដំណឹងល្អ ? ហេតុអ្វី ?

អ្នកដឹកនាំការពិភាក្សា ៖ សូមពិចារណាអញ្ជើញសិស្សឲ្យចែកចាយបទពិសោធន៍ នៅពេលដែលព្រះវរបិតាសួគ៌ឆ្លើយសំណួររបស់ពួកគេតាមរយៈបទគម្ពីរ ឬប្រភពដែលអាចទុកចិត្តបានផ្សេងទៀត ។ អ្នកក៏អាចបង្ហាញវីដេអូ « How I #HearHim: Elder Ronald A. Rasband » ( នាទី ២:៥៥ នៅក្នុងបណ្ណាល័យដំណឹងល្អ ) ផងដែរ ។

អនុវត្ត

អ្នកដឹកនាំការពិភាក្សា ៖ ដើម្បីជួយសិស្សអនុវត្តការប្រើប្រាស់បណ្ណាល័យដំណឹងល្អក្នុងការស្វែងរកចម្លើយ សូមបង្ហាញសាច់រឿង និងការណែនាំដូចខាងក្រោម ។ សូមពន្យល់ថា គោលបំណងនៃសកម្មភាពនេះគឺដើម្បីស្វែងរកធនធានដែលមាននៅក្នុងបណ្ណាល័យដំណឹងល្អ មិនមែនដើម្បីមានការពិភាក្សាវែងអំពីប្រធានបទដែលបានបង្ហាញនោះទេ ។

មាននរណាម្នាក់សួរថា « តើសាសនាចក្ររបស់អ្នកជឿថា មនុស្សត្រូវការព្រះគុណដើម្បីឲ្យបានសង្គ្រោះមែនទេ ? » ចូលទៅកាន់សេចក្ដីណែនាំដល់បទគម្ពីរទាំងឡាយ ហើយស្វែងរកពាក្យ « ព្រះគុណ » ។ ( បណ្ណាល័យដំណឹងល្អ > ព្រះគម្ពីរ > ជំនួយការសិក្សា > សេចក្ដីណែនាំដល់បទគម្ពីរទាំងឡាយ > ព្រះគុណ )
នៅថ្ងៃមួយ អ្នកបានឮនរណាម្នាក់បាននិយាយអំពីព្រះវរមាតានៅស្ថានសួគ៌ ហើយឥឡូវនេះ អ្នកឆ្ងល់ថា តើសាសនាចក្របង្រៀនអ្វីខ្លះអំពីទ្រង់ ។ សូមចូលទៅកាន់ Topics and Questions, ហើយស្វែងរកពាក្យ « Mother in Heaven » ។ ( បណ្ណាល័យដំណឹងល្អ > Topics and Questions > Mother in Heaven )
អ្នកចង់បានជំនួយមួយចំនួនដើម្បីការពារខ្លួនអ្នកឲ្យបានល្អប្រសើរឡើងប្រឆាំងនឹងការណ៍អាសគ្រាម ។ ចូលទៅកាន់ ជំនួយដល់ជីវិត ។ សូមមើលអ្វីដែលអ្នកអាចរៀនបាននៅក្នុង « Help for Me » នៅក្រោម « Pornography » ហើយពិនិត្យមើលសំណួរដែលបានបង្ហាញ ។ ( បណ្ណាល័យដំណឹងល្អ > ជំនួយដល់ជីវិត > រូបអាសគ្រាម > Help for Me )
ប្អូនស្រីរបស់អ្នកសួរថា « តើខ្ញុំអាចរៀបចំខ្លួនដើម្បីទទួលបានពរជ័យអយ្យកោដោយរបៀបណា ? » សូមប្រើមុខងារស្វែងរកនៅក្នុងបណ្ណាល័យដំណឹងល្អ សូមមើលអ្វីដែលអ្នកអាចរកឃើញ ។
អ្នកចង់បានគំនិតអំពីរបៀបដែលអ្នកអាចចែកចាយដំណឹងល្អជាមួយអ្នកដទៃ ។ សូមចូលទៅកាន់ បណ្ណាល័យដំណឹងល្អ > ការចែកចាយដំណឹងល្អ ហើយរកមើលធនធានដែលមានប្រយោជន៍ ។

អ្នកដឹកនាំការពិភាក្សា ៖ ប្រសិនបើសមាជិកក្នុងថ្នាក់ចង់អនុវត្តបន្ថែមទៀត អ្នកអាចប្រាប់ពួកគេពីសំណួរនៅក្នុងប្រអប់ « មនុស្សអាចងឿងឆ្ងល់ » នៅផ្នែកខាងលើនៃមេរៀនទី ១, ២ ឬ ៣ ក្នុងជំពូកទី ៣ នៃ ប្រកាសដំណឹងល្អរបស់យើង ( ទំព័រ ៣០, ៤៦, ៦១ ) ។ ពួកគេអាចជ្រើសរើសសំណួរមួយ ហើយអនុវត្តការស្វែងរកធនធានដើម្បីបកស្រាយវាចេញពីក្នុងបណ្ណាល័យដំណឹងល្អ ។

បន្ទាប់ពីអ្នកចូលរួមអនុវត្ត សូមពិចារណាអញ្ជើញពួកគេឲ្យចែកចាយអ្វីដែលពួកគេបានរៀន ។

ដាក់គោលដៅមួយ

អ្នកដឹកនាំការពិភាក្សា ៖ សូមទុកពេលឲ្យសមាជិកក្នុងថ្នាក់ជញ្ជឹងគិតពីអ្វីដែលពួកគេបានរៀននៅថ្ងៃនេះ និងដាក់គោលដៅ ។ អ្នកអាចបង្ហាញសេចក្តីណែនាំខាងក្រោមនេះដើម្បីជួយពួកគេ ៖

ដាក់គោលដៅទាក់ទងនឹងអ្វីដែលអ្នកបានសិក្សារួចហើយ ។ សូមប្រើប្រាស់គំនិតខាងក្រោមនេះ ឬគិតអំពីគំនិតរបស់អ្នកផ្ទាល់ ។

សូមចំណាយពេលស្វែងយល់ពីពាក្យមួយចំនួនដែលមាននៅក្នុងសេចក្ដីណែនាំដល់បទគម្ពីរទាំងឡាយ ឬ Topics and Questions នៅក្នុងបណ្ណាល័យដំណឹងល្អ ។
សូមអញ្ជើញមិត្តភក្តិ និងសមាជិកគ្រួសារឲ្យសួរសំណួរអ្នក ដូច្នេះអ្នកអាចអនុវត្តការស្វែងរកចម្លើយនៅក្នុងបណ្ណាល័យដំណឹងល្អ ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

ជម្រើស គ ៖ តើខ្ញុំអាចប្រើប្រាស់បច្ចេកវិទ្យាប្រកបដោយសេចក្តីសុចរិតដោយរបៀបណា ?

សិក្សា

អ្នកដឹកនាំការពិភាក្សា ៖ សូមលើកទូរសព្ទដៃឡើង ឬបង្ហាញរូបភាពទូរសព្ទមួយ បន្ទាប់មកអញ្ជើញសមាជិកថ្នាក់ពិភាក្សាសំណួរដូចខាងក្រោមនេះ ៖

តើឧបករណ៍អេឡិចត្រូនិចដូចជាទូរសព្ទដៃ និងកុំព្យូទ័រដើរតួនាទីអ្វីខ្លះក្នុងការបន្តកិច្ចការរបស់ព្រះអម្ចាស់ ?

អ្នកដឹកនាំការពិភាក្សា ៖ សូមពន្យល់ថា ជំពូកទី ២ នៃ ប្រកាសដំណឹងល្អរបស់យើង មាននូវគោលការណ៍ណែនាំអំពីការប្រើប្រាស់បច្ចេកវិទ្យាប្រកបដោយសេចក្តីសុចរិត ។ អ្នកអាចអានរួមគ្នា « ការប្រើប្រាស់បច្ចេកវិទ្យាប្រកបដោយសេចក្តីសុចរិត » ( ទំព័រ ២០ ) ដើម្បីណែនាំអំពីប្រធានបទនេះ ។

តើបញ្ហាប្រឈមមុខ ឬការល្បួងអ្វីខ្លះ ដែលទាក់ទងនឹងការប្រើប្រាស់បច្ចេកវិទ្យា ?

អ្នកដឹកនាំការពិភាក្សា ៖ ជាផ្នែកមួយនៃការពិភាក្សារបស់អ្នក សូមពិចារណាមើល « Taking Charge of Technology: The Challenge » ( នាទី ៣:១៨ នៅក្នុងបណ្ណាល័យដំណឹងល្អ ) ។
សូមពន្យល់ថា ប្រកាសដំណឹងល្អរបស់យើង ពិពណ៌នាអំពីវិធីបង្ការចំនួនបួនក្នុងការប្រើប្រាស់បច្ចេកវិទ្យា ។ ដើម្បីជួយសមាជិកក្នុងថ្នាក់រៀនអំពីវិធីបង្ការទាំងនេះ សូមបង្ហាញការណែនាំដូចខាងក្រោម ។ អ្នកអាចចាត់តាំងឲ្យសិស្សម្នាក់ៗសិក្សាអំពីវិធីបង្ការមួយ និងរៀបចំដើម្បីរាយការណ៍ពីអ្វីដែលពួកគេរៀនជាក្រុមតូចៗ ។ ( សមាជិកម្នាក់នៃក្រុមអាចសិក្សាវិធីបង្ការ ១-២ ដូច្នេះសមាជិកក្រុមនីមួយៗកំពុងអានចំនួនស្មើគ្នា ) ។

ស្វែងយល់អំពីវិធីបង្ការចំនួនបួនសម្រាប់ការប្រើប្រាស់បច្ចេកវិទ្យាប្រកបដោយសេចក្តីសុចរិត ដោយសិក្សាចំណងជើងខាងក្រោមនៅក្នុងជំពូកទី ២ នៃ ប្រកាសដំណឹងល្អរបស់យើង ៖

វិធីបង្ការទី ១ ៖ « ធ្វើតាមការបំផុសគំនិតខាងវិញ្ញាណ » ( ទំព័រ ២០ )

វិធីបង្ការទី ២ ៖ « ផ្ដោតទៅលើគោលបំណងជាអ្នកផ្សព្វផ្សាយសាសនារបស់អ្នក » ( ទំព័រ ២០ )

វិធីបង្ការទី ៣ ៖ « ត្រូវមានវិន័យ » ( ទំព័រ ២១ )

វិធីបង្ការទី ៤ ៖ « រួមគ្នាតែមួយ » ( ទំព័រ ២១ )

សូមត្រៀមចែកចាយដូចខាងក្រោម ៖

សេចក្តីសង្ខេបខ្លីនៃអ្វីដែលអ្នកបានសិក្សា រួមទាំងអ្វីដែលផ្នែករបស់អ្នក បង្រៀនអំពីព្រះអម្ចាស់
របៀបដែលអ្នកគិតថា ការបង្រៀនទាំងនេះអាចអនុវត្តចំពោះនរណាក៏បាន មិនត្រឹមតែជាមួយអ្នកផ្សព្វផ្សាយសាសនាពេញម៉ោងប៉ុណ្ណោះទេ
អ្វីដែលបានជួយអ្នកឲ្យប្រើបច្ចេកវិទ្យាតាមវិធីដ៏សុចរិត

អនុវត្ត

អ្នកដឹកនាំការពិភាក្សា ៖ សូមអញ្ជើញសិស្សប្ដូរវេនគ្នាចែកចាយជាមួយក្រុមរបស់ពួកគេ នូវអ្វីដែលពួកគេបានរៀនមកពីសកម្មភាពសិក្សា ។

សម្រាប់ការអនុវត្តបន្ថែម អ្នកអាចប្រើ ការអនុវត្តជំនាញទី ៩ ៖ « ប្រើប្រាស់បច្ចេកវិទ្យាប្រកបដោយសេចក្តីសុចរិត » ។

ដាក់គោលដៅមួយ

អនុវត្តតាមវិធីបង្ការនៅពេលប្រើប្រាស់បច្ចេកវិទ្យា

គិតអំពីបញ្ហាប្រឈមបច្ចុប្បន្នដែលអ្នកជួបប្រទះទាក់ទងនឹងការប្រើប្រាស់បច្ចេកវិទ្យា ។ សូមពិចារណាពីរបៀបដែលវិធីបង្ការមកពី ប្រកាសដំណឹងល្អរបស់យើង អាចជួយអ្នកក្នុងកាលៈទេសៈរបស់អ្នក ។

វិធីបង្ការទី ១ ៖ ធ្វើតាមការបំផុសគំនិតខាងវិញ្ញាណ

យោបល់មួយចំនួន ៖

អធិស្ឋានសុំការណែនាំអំពីការប្រើប្រាស់បច្ចេកវិទ្យាដោយសុចរិត ។
កត់ត្រាចំណាប់អារម្មណ៍ដែលអ្នកទទួលបាននៅក្នុងកំណត់ហេតុរបស់អ្នក អំពីឧបករណ៍ឌីជីថលរបស់អ្នក ។
ផ្តល់អាទិភាពដល់ទម្លាប់ដែលអញ្ជើញព្រះវិញ្ញាណដូចជា ការសិក្សាព្រះគម្ពីរ ការអធិស្ឋាន និងកិច្ចការព្រះវិហារបរិសុទ្ធ ។

វិធីបង្ការទី ២ ៖ ផ្ដោតទៅលើគោលបំណងរបស់អ្នក

យោបល់មួយចំនួន ៖

ចៀសវាងការប្រើឧបករណ៍របស់អ្នកនៅពេលដែលអ្នកមិនមានគោលបំណងជាក់លាក់នៅក្នុងចិត្ត ។
មុនពេលប្រើបច្ចេកវិទ្យា សូមសួរខ្លួនឯងថា តើការប្រើប្រាស់វានឹងអញ្ជើញ ឬរារាំងភាពជាដៃគូនៃព្រះវិញ្ញាណបរិសុទ្ធដែរឬទេ ។
ប្រសិនបើអ្នកប្រើប្រព័ន្ធផ្សព្វផ្សាយសង្គម សូមតាមដានតែមនុស្សដែលជួយអ្នកឲ្យនៅជិតព្រះអម្ចាស់ប៉ុណ្ណោះ ។

វិធីបង្ការទី ៣ ៖ ត្រូវមានវិន័យ

យោបល់មួយចំនួន ៖

នៅពេលអ្នកនៅជាមួយមនុស្សដទៃ សូមដាក់ឧបករណ៍របស់អ្នកទៅឲ្យឆ្ងាយ និងចូលរួមជាមួយមនុស្សនៅជុំវិញអ្នក ។
សូមដាក់ដែនកំណត់ប្រចាំថ្ងៃដល់ខ្លួនឯងសម្រាប់ការប្រើប្រាស់ឧបករណ៍ចល័ត ។
បង្កើតកន្លែងដែលគ្មានឧបករណ៍ចូល ដូចជាបន្ទប់គេង និងបន្ទប់ទឹករបស់អ្នក ។
នៅពេលអ្នកមានអារម្មណ៍ទន់ខ្សោយ និងត្រូវបានល្បួង សូមបិទឧបករណ៍របស់អ្នក ហើយដើរទៅខាងក្រៅ ។

វិធីបង្ការទី ៤ ៖ រួមគ្នាតែមួយ

យោបល់មួយចំនួន ៖

សូមជំនួយពីមនុស្សជាទីស្រឡាញ់ នៅពេលដែលអ្នកមានអារម្មណ៍ទន់ខ្សោយ ឬត្រូវបានល្បួង ។
ចែកចាយផែនការរបស់អ្នកក្នុងការប្រើប្រាស់បច្ចេកវិទ្យា ដោយសុចរិតជាមួយនរណាម្នាក់ដែលអ្នកទុកចិត្ត ។
សូមគិតអំពីរបៀបដែលអ្នកអាចក្លាយជាមិត្តដែលអាចទុកចិត្តបានដល់អ្នកដទៃ ។

សូមសរសេរផែនការរបស់អ្នកនៅខាងក្រោម ។

អ្នកដឹកនាំការពិភាក្សា ៖ ប្រសិនបើសិស្សមានក្រុមដើម្បីចែកចាយគោលដៅរបស់ពួកគេ សូមទុកពេលវេលាឲ្យពួកគេចែកចាយពីរបៀបដែលពួកគេនឹងគាំទ្រ ឬរំឭកគ្នាទៅវិញទៅមកពីមុនថ្នាក់បន្ទាប់ ។ អ្នកអាចបង្ហាញវីដេអូ « Texting Truth » ( នាទី ២:២២ នៅលើគេហទំព័រ ChurchofJesusChrist.org ) ដើម្បីជួយសមាជិកក្នុងថ្នាក់មើលឃើញពីគំរូនៃក្មេងជំទង់ដែលប្រើបច្ចេកវិទ្យាដើម្បីជួយ និងលើកស្ទួយគ្នាទៅវិញទៅមក ។

ពេលក្រោយ

អ្នកដឹកនាំការពិភាក្សា ៖ ប្រសិនបើអ្នកត្រៀមខ្លួនរួចរាល់ដើម្បីបង្រៀន មេរៀនទី ៥ នៅពេលក្រោយ សូមពិចារណាអញ្ជើញសិស្សឲ្យអានទំព័របីដំបូងនៃ « សិក្សា និងបង្រៀនអំពីដំណឹងល្អនៃព្រះយេស៊ូវគ្រីស្ទ » មកពីជំពូកទី ៣ នៃ ប្រកាសដំណឹងល្អរបស់យើង ( ទំព័រ ២៥–២៧ ) ក្នុងការរៀបចំ ។ អ្នកក៏អាចផ្ញើការរំឭកឲ្យពួកគេផងដែរ ។

ការវាយតម្លៃការសិក្សាព្រះគម្ពីរផ្ទាល់ខ្លួនរបស់ខ្ញុំ

អនុវត្តតាមវិធីបង្ការនៅពេលប្រើប្រាស់បច្ចេកវិទ្យា