« ជំពូកទី ៣ ៖ សិក្សា និងបង្រៀនអំពីដំណឹងល្អនៃព្រះយេស៊ូវគ្រីស្ទ » ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣ )
« សិក្សា និងបង្រៀនអំពីដំណឹងល្អនៃព្រះយេស៊ូវគ្រីស្ទ » ប្រកាសដំណឹងល្អរបស់យើង
ជំពូកទី ៣
សិក្សា និងបង្រៀនអំពីដំណឹងល្អនៃព្រះយេស៊ូវគ្រីស្ទ
មេរៀននៅក្នុងជំពូកនេះមាននូវគោលលទ្ធិ គោលការណ៍ និងបទបញ្ញត្តិដ៏ចាំបាច់នៅក្នុងដំណឹងល្អនៃព្រះយេស៊ូវគ្រីស្ទ ។ មេរៀនទាំងនេះគឺជាអ្វីដែលពួកព្យាការី និងពួកសាវកនៅរស់បានបង្រៀនអ្នកឲ្យរៀនសូត្រ ហើយបង្រៀន ។ វាត្រូវបានផ្ដល់ឲ្យនៅត្រង់នេះ ដើម្បីអ្នកអាចជួយមនុស្សដទៃឲ្យយល់កាន់តែច្បាស់អំពីគោលលទ្ធិនៃព្រះគ្រីស្ទ ។
ផ្នែកទីមួយនៅក្នុងជំពូកនេះគឺជាការអញ្ជើញឲ្យទទួលបុណ្យជ្រមុជទឹក ។ ផ្នែកដែលនៅសេសសល់នៃជំពូកនេះមាននូវមេរៀនចំនួនបួនដូចតទៅ ៖
សូមសិក្សាបទគម្ពីរ ហើយរក្សាទុក នូវគោលលទ្ធិនៅក្នុងមេរៀននីមួយៗ ។ នៅពេលអ្នកធ្វើដូច្នេះ ព្រះវិញ្ញាណនឹងថ្លែងជាសាក្សីអំពីសេចក្ដីពិតទាំងឡាយដែលអ្នកសិក្សា ។ ទ្រង់នឹងជួយអ្នកឲ្យដឹងអ្វីដែលត្រូវនិយាយ និងធ្វើ ដើម្បីជួយមនុស្សដទៃទទួលបានសាក្សីមួយអំពីសេចក្ដីពិតនោះ ។ ( សូមមើល គោលលទ្ធិ និង សេចក្ដីសញ្ញា ៨៤:៨៥ ) ។
មនុស្សគ្រប់គ្នានឹងបានស្គាល់ព្រះអង្គសង្គ្រោះកាន់តែពេញលេញ នៅពេលពួកគេធ្វើអ្វីដែលទ្រង់បានអញ្ជើញពួកគេឲ្យធ្វើ ។ សូមធ្វើការអញ្ជើញនៅក្នុងមេរៀននីមួយៗ ហើយជួយពួកគេឲ្យរក្សាការតាំងចិត្តរបស់ពួកគេ ។ នៅពេលមនុស្សគ្រប់គ្នារក្សាការតាំងចិត្ត នោះពួកគេចាប់ផ្ដើមរស់នៅតាមដំណឹងល្អនៃព្រះយេស៊ូវគ្រីស្ទ ហើយរៀបចំខ្លួនធ្វើសេចក្ដីសញ្ញាជាមួយនឹងព្រះ ។
សូមបង្រៀនមេរៀនទាំងអស់ពីមុន និងបន្ទាប់ពីពិធីបុណ្យជ្រមុជទឹក ។ ពួកអ្នកផ្សព្វផ្សាយសាសនាពេញម៉ោងដឹកនាំនៅក្នុងការបង្រៀនមេរៀននានាទាំងពីរលើកនេះ ។ ពួកអ្នកផ្សព្វផ្សាយសាសនាវួដ ឬសមាជិកផ្សេងទៀតចូលរួម បើអាចធ្វើទៅបាន ។ សូមមើល ជំពូកទី ១០ និង ១៣ សម្រាប់ព័ត៌មានអំពីការអញ្ជើញសមាជិកឲ្យចូលរួមនៅក្នុងការបង្រៀន ។
រៀបចំខ្លួនដើម្បីបង្រៀន
នៅពេលអ្នករៀបចំខ្លួនបង្រៀន សូមរំឭកព័ត៌មានសម្រាប់បុគ្គលម្នាក់ៗនៅក្នុងកម្មវិធីប្រកាសដំណឹងល្អរបស់យើង ។ ធ្វើផែនការមេរៀនមួយដោយផ្អែកលើសេចក្ដីត្រូវការរបស់បុគ្គលនោះ ។ សូមពិចារណាអ្វីដែលគាត់ ឬនាងគួរដឹង ហើយទទួលអារម្មណ៍អំឡុងការបង្រៀនរបស់អ្នក ។ ព្រះវិញ្ញាណនឹងលើកតម្កើងការខិតខំរបស់អ្នក ពេលអ្នកចំណាយពេលរៀបចំខ្លួន និងធ្វើផែនការ ។
ទាំងនេះគឺជាសំណួរមួយចំនួនសម្រាប់អ្នក និងដៃគូរបស់អ្នក ដើម្បីពិចារណាប្រកបដោយការអធិស្ឋាន ពេលអ្នករៀបចំខ្លួនបង្រៀន ។
-
តើយើងនឹងធ្វើការអញ្ជើញអ្វីខ្លះដើម្បីជួយបុគ្គលនេះស្ថាបនាសេចក្ដីជំនឿលើព្រះគ្រីស្ទ ហើយមានការរីកចម្រើន ? ការអញ្ជើញគឺជារបៀបដែលអ្នកជួយមនុស្សឲ្យប្រែចិត្ត ហើយដកពិសោធន៍នូវ« ព្រះចេស្ដានៃព្រះដ៏ប្រោសលោះ » ( ហេលេមិន ៥:១១ ) ។ សូមពិចារណាពីការរីកចម្រើន ស្ថានភាព និងសេចក្ដីត្រូវការរបស់បុគ្គលនោះ ។ បន្ទាប់មក សូមដាក់បញ្ចូលនូវការអញ្ជើញមួយឬច្រើនទៅក្នុងផែនការមេរៀនរបស់អ្នក ។
-
តើគោលលទ្ធិ និងគោលការណ៍អ្វីខ្លះដែលនឹងជួយបុគ្គលនេះឲ្យរក្សាការតាំងចិត្តដែលយើងបានអញ្ជើញគាត់ ឬនាងឲ្យធ្វើ ? សូមធ្វើការកំណត់ប្រកបដោយការអធិស្ឋានថាតើគោលលទ្ធិ និងគោលការណ៍អ្វីខ្លះដែលនឹងជួយមនុស្សគ្រប់គ្នាឲ្យយល់ដឹងពីហេតុផលដែលការរក្សាការតាំងចិត្តរបស់ពួកគេមានសារៈសំខាន់ចំពោះពួកគេ និងចំពោះព្រះអម្ចាស់ ។
-
តើយើងនឹងជួយបុគ្គលនេះឲ្យរៀនពីគោលលទ្ធិនេះដោយរបៀបណា ? ដើម្បីរៀបចំខ្លួនបង្រៀនគោលលទ្ធិនេះ សូមរៀបចំ និងសង្ខេបអ្វីដែលអ្នកនឹងបង្រៀនដោយប្រើ មេរៀនទី ១–៤ ។ សូមកំណត់ពីសំណួរ បទគម្ពីរ ឧទាហរណ៍ និងប្រព័ន្ធផ្សព្វផ្សាយសមរម្យដែលនឹងជួយបុគ្គលនោះយល់ដឹងពីអ្វីដែលអ្នកបង្រៀន ។ សូមមើល ជំពូកទី ១០ សម្រាប់ព័ត៌មានអំពីរបៀបកែលម្អការបង្រៀនរបស់អ្នក ។
-
តើព្រះបានសន្យាពរជ័យអ្វីខ្លះចំពោះការទទួលយក និងការរក្សាការតាំងចិត្ត ? នៅពេលអ្នកសិក្សាគោលលទ្ធិនោះ សូមកត់សម្គាល់ពីពរជ័យរបស់ព្រះដែលបានសន្យា ។ នៅពេលអ្នកបង្រៀន សូមសន្យានូវពរជ័យ និងថ្លែងទីបន្ទាល់អំពីពរជ័យទាំងនោះ ។
-
តើសមាជិកម្នាក់ណាដែលអាចចូលរួម ? នៅក្នុងការប្រជុំសម្របសម្រួលប្រចាំសប្ដាហ៍ សូមកំណត់ថាតើសមាជិកម្នាក់ណាដែលអាចជួយអ្នកពេលបង្រៀន ហើយគាំទ្រដល់បុគ្គលនោះ ។ ពីមុនបង្រៀនមេរៀននោះ សូមពិភាក្សាគ្នាពីការចូលរួមរបស់ពួកគេ ។ សូមមើល ជំពូកទី ១០ ។
-
តើយើងអាចធ្វើអ្វីខ្លះដើម្បីជួយមនុស្សឲ្យរក្សាការតាំងចិត្តរបស់ពួកគេបន្ទាប់ពីយើងចាកចេញទៅ ? សូមតាមដានដោយធ្វើការទាក់ទងប្រចាំថ្ងៃរយៈពេលខ្លីៗ ដើម្បីជួយមនុស្សឲ្យរក្សាការតាំងចិត្តរបស់ពួកគេ ។ សូមរកមើលរបៀបដើម្បីអញ្ជើញសមាជិកឲ្យចូលរួមជួយដល់មនុស្សដែលអ្នកបង្រៀនឲ្យរក្សាការតាំងចិត្តរបស់ពួកគេ ។ ការទាក់ទងនេះអាចរួមមាន ការអានជំពូកមួយនៅក្នុងព្រះគម្ពីរមរមន ឬបទគម្ពីរផ្សេងទៀត ។ ប្រសិនបើមនុស្សម្នាក់ពុំរក្សាការតាំងចិត្តកាលពីលើកមុនទេ វាអាចនឹងជារឿងដ៏ប្រសើរដើម្បីជួយបុគ្គលនោះធ្វើបាននូវការតាំងចិត្តចាស់ពីមុនផ្ដល់ការតាំងចិត្តថ្មីមួយទៀត ។ សូមមើលជំពូកទី ១១ ។
-
តើយើងអាចជួយពួកគេលើកក្រោយឲ្យបានល្អប្រសើរដោយរបៀបណា ? បន្ទាប់ពីស្ថានភាពបង្រៀនទាំងអស់ សូមវាយតម្លៃពីបទពិសោធន៍របស់មនុស្សដែលអ្នកកំពុងបង្រៀន ។ តើសេចក្ដីជំនឿលើព្រះយេស៊ូវគ្រីស្ទរបស់ពួកគេ កំពុងរីកចម្រើនដែរឬទេ ? តើពួកគេទទួលអារម្មណ៍ពីព្រះវិញ្ញាណដែរឬទេ ? តើពួកគេកំពុងប្រែចិត្ត ព្រមទាំងធ្វើ និងរក្សាការតាំងចិត្តដែរឬទេ ? តើពួកគេកំពុងអធិស្ឋាន សិក្សាព្រះគម្ពីរមរមន និងចូលរួមព្រះវិហារដែរឬទេ ? សូមដាក់ផែនការដើម្បីជួយពួកគេ ។
សូមបង្រៀនចេញពីដួងចិត្តរបស់អ្នកស្របតាមការដឹកនាំពីព្រះវិញ្ញាណ
គណៈប្រធានទីមួយ និងកូរ៉ុមនៃពួកសាវកដប់ពីរនាក់បានមានប្រសាសន៍ទៅកាន់ពួកអែលឌើរ និងស៊ីស្ទើរគ្រប់រូប ៖
« គោលបំណងរបស់យើងគឺដើម្បីបង្រៀនសារលិខិតនៃដំណឹងល្អដែលបានស្ដារឡើងវិញតាមរបៀបមួយដែលអនុញ្ញាតឲ្យព្រះវិញ្ញាណដឹកនាំទាំងពួកអ្នកផ្សព្វផ្សាយសាសនា និងមនុស្សដែលពួកគេកំពុងបង្រៀន ។ វាគឺជារឿងដ៏ចាំបាច់ដើម្បីរៀនសូត្រពីគោលគំនិតនៃ [ មេរៀន ] ទាំងនោះ ប៉ុន្តែវាមិនគួរត្រូវបានបង្រៀនដោយការទន្ទេញចាំនោះទេ ។ អ្នកផ្សព្វផ្សាយសាសនាគួរប្រើប្រាស់ពាក្យសម្ដីផ្ទាល់ខ្លួនដោយសេរី ដូចដែលបានបំផុសគំនិតដោយព្រះវិញ្ញាណ ។ គាត់មិនគួរសូត្រចាំនោះទេ ប៉ុន្តែគួរនិយាយចេញពីចិត្តតាមពាក្យសម្ដីរបស់គាត់ផ្ទាល់ ។ គាត់អាចនឹងបែកចេញពីលំដាប់លំដោយនៃមេរៀន ដោយធ្វើតាមអ្វីដែលគាត់ត្រូវបានបំផុសគំនិតឲ្យធ្វើ ស្របតាមចំណាប់អារម្មណ៍ និងសេចក្ដីត្រូវការរបស់[ បុគ្គល ] នោះ ។ គាត់គួរថ្លែងទីបន្ទាល់អំពីសេចក្ដីពិតនៃការបង្រៀនរបស់គាត់ ដោយការនិយាយដោយភាពជឿជាក់ និងជាពាក្យសម្ដីរបស់គាត់ផ្ទាល់ » ។
បង្រៀន ហើយអញ្ជើញស្របតាមសេចក្ដីត្រូវការបុគ្គលម្នាក់ៗ
អ្នកមានភាពបត់បែនដើម្បីបង្រៀនមេរៀនតាមរបៀបណាមួយដែលជួយមនុស្សឲ្យរៀបចំខ្លួនពេញលេញសម្រាប់ពិធីបុណ្យជ្រមុជទឹក និងពិធីបញ្ជាក់ ។ មិនថាអ្នកបង្រៀនមេរៀនណា នៅពេលណាអ្នកបង្រៀន ហើយអ្នកត្រូវចំណាយពេលប៉ុន្មានដើម្បីបង្រៀនវានោះទេ ការណ៍នោះត្រូវបានកំណត់យ៉ាងល្អបំផុតតាមសេចក្ដីត្រូវការរបស់បុគ្គលដែលអ្នកកំពុងបង្រៀន និងការដឹកនាំមកពីព្រះវិញ្ញាណ ។ ឧទាហរណ៍ ពេលបង្រៀនមនុស្សដែលពុំមានប្រវត្តិជាពួកគ្រីស្ទាន នោះអ្នកអាចនឹងចាប់ផ្ដើមដោយជួយពួកគេអភិវឌ្ឍទំនាក់ទំនងល្អមួយជាមួយនឹងព្រះវរបិតាសួគ៌ ហើយយល់ដឹងអំពីផែនការរបស់ទ្រង់ ( សូមមើល « ការបង្រៀនមនុស្សដែលពុំមានប្រវត្តិជាគ្រឹស្ដសាសនិក »នៅជំពូកទី ១០ ) ។
ចូរឲ្យព្រះវិញ្ញាណដឹកនាំអ្នកថាតើត្រូវធ្វើការអញ្ជើញអ្វីខ្លះ និងធ្វើការអញ្ជើញនៅពេលណា ។ ការអញ្ជើញដ៏ត្រឹមត្រូវនៅចំពេលត្រឹមត្រូវអាចបំផុសគំនិតមនុស្សឲ្យធ្វើរឿងដែលនឹងស្ថាបនាសេចក្ដីជំនឿរបស់ពួកគេ ។ សកម្មភាពទាំងនេះអាចដឹកនាំទៅរកការផ្លាស់ប្ដូរដ៏ធំក្នុងដួងចិត្ត ( សូមមើល ម៉ូសាយ ៥:២, អាលម៉ា ៥:១២–១៤ ) ។
សូមបង្រៀនមេរៀនដោយសាមញ្ញ ច្បាស់ៗ ហើយខ្លី ។ ជាពិសេស ការជួបបង្រៀនមួយមិនគួរជួបលើសពី ៣០ នាទីឡើយ ហើយអ្នកអាចបង្រៀនបុគ្គលម្នាក់ត្រឹមតែ ៥ នាទីប៉ុណ្ណោះ ។
ជាទូទៅ អ្នកនឹងត្រូវការជួបច្រើនដងដើម្បីបង្រៀនគោលការណ៍នៅក្នុងមេរៀនមួយ ។ ជារឿយៗ មនុស្សគ្រប់គ្នាយល់សារលិខិតរបស់អ្នកបានល្អប្រសើរជាង ប្រសិនបើអ្នកបង្រៀនមេរៀនខ្លីៗ បង្រៀនជាទៀងទាត់ ហើយបង្រៀនជាផ្នែកតូចៗ ។
ការសិក្សាព្រះគម្ពីរ
តើអ្នកត្រូវបានដឹកនាំឲ្យបង្រៀនអ្វីខ្លះ ?
ហេតុអ្វីការសិក្សាគោលលទ្ធិនៅក្នុងមេរៀនទាំងឡាយមានសារៈសំខាន់ ?