ព្យាយាមទន្ទេញបទគម្ពីរ

« អំណាចដ៏មហិមាអាចកើតឡើងមកពីការទន្ទេញបទគម្ពីរ » ( ប្រកាសដំណឹងល្អរបស់យើង [ ឆ្នាំ២០២៣ ] ទំព័រ ២៧ ) ។ ការទន្ទេញវគ្គបទគម្ពីរអាចធ្វើឲ្យការយល់ដឹងរបស់យើងកាន់តែស៊ីជម្រៅអំពីដំណឹងល្អរបស់ព្រះអង្គសង្គ្រោះ និងបង្កើនសមត្ថភាពរបស់យើងក្នុងការបង្រៀនវាទៅដល់មនុស្សដទៃ ។

អ្នកដឹកនាំការពិភាក្សា ៖ សូមព្យាយាមនិយាយដោយសង្ខេបនៅក្នុងផ្នែក « កំណត់និយមន័យ » និង « បង្ហាញ » ដើម្បីសិស្សមានពេលច្រើនសម្រាប់ការអនុវត្ត ។

កំណត់និយមន័យ

អ្នកដឹកនាំការពិភាក្សា ៖ ជួយសមាជិកក្នុងថ្នាក់ស្វែងរកប្រអប់មួយដែលមានចំណងជើងថា « តួនាទីនៃការទន្ទេញ » នៅក្នុងជំពូកទី ៣ នៃ ប្រកាសដំណឹងល្អរបស់យើង ( ទំព័រ ២៦–២៧ ) ។ បន្ទាប់មក សូមចែកចាយសេចក្តីណែនាំដូចខាងក្រោម ៖

អានកថាខណ្ឌទីបីនៅក្នុង « តួនាទីនៃការទន្ទេញ » ( ប្រកាសដំណឹងល្អរបស់យើង ទំព័រ២៦ ) ។ សូមស្វែងរកពីរបៀបដែលការទន្ទេញវគ្គបទគម្ពីរអាចប្រទានពរដល់អ្នកនិងមនុស្សដទៃទៀត ។

តើការទន្ទេញចាំអាចជួយអ្នកក្នុងនាមជាអ្នកផ្សព្វផ្សាយសាសនាដោយរបៀបណា ?
តើអ្នកទទួលបានអត្ថប្រយោជន៍មកពីការទន្ទេញវគ្គបទគម្ពីរមួយដោយរបៀបណា ?

អ្នកដឹកនាំការពិភាក្សា ៖ សូមពន្យល់ថា មានវិធីសាស្រ្តជាច្រើនដែលយើងអាចប្រើដើម្បីជួយយើងទន្ទេញបទគម្ពីរ ។ អ្នកអាចចែកចាយឧទាហរណ៍មួយចំនួនដូចខាងក្រោម ។ អ្នកក៏អាចអញ្ជើញសិស្សឲ្យចែកចាយគំនិតបន្ថែមទៀតផងដែរ ។

អានពាក្យទាំងនោះច្រើនដងជាប់ៗគ្នា ។ បន្ទាប់មកលាក់ពាក្យទាំងនោះ ហើយធ្វើម្តងទៀតដោយមិនមើល ។
បែងចែកវគ្គបទគម្ពីរទៅជាឃ្លាខ្លីៗជាច្រើន ។ ទន្ទេញមួយឃ្លាម្តងៗ ដោយពិនិត្យមើលអ្វីដែលអ្នកបានទន្ទេញរួចហើយ នៅពេលអ្នកបន្តទៅទៀត ។
សរសេរពាក្យទាំងនោះច្រើនជាងម្តង ខណៈពេលអានខគម្ពីរ ។ បន្ទាប់មកសរសេរវគ្គបទគម្ពីរនោះដោយមិនមើលខគម្ពីរឡើយ ។
សូមសរសេរអក្សរដំបូងនៃរាល់ពាក្យនៅក្នុងខគម្ពីរ ហើយបន្ទាប់មកប្រើអក្សរទាំងនោះ ដើម្បីរំឭកអ្នកនៅពេលអ្នកសូត្រខគម្ពីរនោះ ។
បង្កើតរូបភាពសាមញ្ញៗដើម្បីជួយអ្នកទន្ទេញវគ្គបទគម្ពីរនោះ ។

ការបង្ហាញ

អ្នកដឹកនាំការពិភាក្សា ៖ សូមពន្យល់ថា វគ្គបទគម្ពីរដ៏សំខាន់មួយសម្រាប់ពួកអ្នកផ្សព្វផ្សាយសាសនាទន្ទេញចាំ គឺដំណើររឿងនៃការនិមិត្តដំបូងរបស់ យ៉ូសែប ស្ម៊ីធ ដែលបានកត់ត្រានៅក្នុង យ៉ូសែប ស្ម៊ីធ—ប្រវត្តិ ១:១៦–១៧ ។

ខាងក្រោមនេះ គឺជាវិធីមួយដែលអ្នកអាចប្រើគំនិតទីពីរ មកពីបញ្ជីនៅក្នុងផ្នែកមុន ដើម្បីជួយសិស្សទន្ទេញដំណើររឿងរបស់ យ៉ូសែប ស៊្មីធ ។ សូមជួយសិស្សទន្ទេញមួយឃ្លាម្តងៗនូវឃ្លាខាងក្រោម ដោយអានឲ្យឮៗរួមគ្នាជាថ្មាក់ ។

« ខ្ញុំបានឃើញបង្គោលពន្លឺមួយនៅចំលើក្បាលខ្ញុំ មានរស្មីចែងចាំងលើសជាងសុរិយាទៅទៀត ដែលចុះសន្សឹមៗមកចំលើរូបខ្ញុំ ។ …

« កាលពន្លឺនោះស្ថិតចំពីលើរូបខ្ញុំ ខ្ញុំបានឃើញតួអង្គពីរ ដែលមានរស្មី និងសិរីរុងរឿងដែលពុំអាចពណ៌នាបានឡើយ ឈរនៅលើអាកាសពីលើរូបខ្ញុំ ។

« តួអង្គមួយមានព្រះបន្ទូលមកខ្ញុំ ដោយហៅខ្ញុំតាមឈ្មោះ ហើយចង្អុលទៅតួអង្គមួយទៀត ដោយមានព្រះបន្ទូលថា—នេះជាព្រះរាជបុត្រាដ៏ស្ងួនភ្ងារបស់យើង ។ ចូរស្ដាប់តាមទ្រង់ចុះ ! » ( យ៉ូសែប ស៊្មីធ—ប្រវត្តិ ១:១៦–១៧ ) ។

អនុវត្ត

អ្នកដឹកនាំការពិភាក្សា ៖ សូមអញ្ជើញសិស្សឲ្យហាត់សូត្រផ្នែកនេះអំពីដំណើររឿងនៃការនិមិត្តដំបូងរបស់ យ៉ូសែប ស្ម៊ីធ ជាមួយដៃគូ ។ ពួកគេអាចប្រើវិធីសាស្រ្តដូចគ្នាដែលអ្នកបានអនុវត្តរួមគ្នាជាថ្នាក់ ឬពួកគេអាចជ្រើសរើសវិធីសាស្រ្តមួយផ្សេងទៀត ។

អនុវត្ត

អ្នកដឹកនាំការពិភាក្សា ៖ សូមចែកចាយសេចក្តីណែនាំខាងក្រោមដើម្បីជួយសិស្សអនុវត្តជំនាញនៃការទន្ទេញបទគម្ពីរទៅក្នុងជីវិតរបស់ពួកគេ ៖

កំណត់ពីរបៀបដែលអ្នកនឹងបន្តប្រើជំនាញនៃការទន្ទេញបទគម្ពីរ ។ ខាងក្រោមនេះគឺជាគំនិតមួយចំនួន ៖

សូមបន្តការទន្ទេញរបស់អ្នកអំពីការនិមិត្តដំបូងរបស់ យ៉ូសែប ស្ម៊ីធ ។ សូមហាត់សូត្រវាឲ្យមនុស្សជាទីស្រឡាញ់ស្ដាប់ ។
សូមជ្រើសយកបទគម្ពីរមួយ ឬច្រើនផ្សេងទៀតដែលអ្នកចង់ទន្ទេញ ហើយខិតខំប្រឹងប្រែងដើម្បីទន្ទេញវា ។