Praktika e Zotësisë 5

Përpiquni të Mësoni Përmendsh Shkrime të Shenjta

“Fuqi e madhe mund të vijë nga [mësimi përmendsh i] shkrimeve të shenjta” (Predikoni Ungjillin Tim [2023], f. 27). Mësimi përmendsh i fragmenteve të shkrimeve të shenjta, mund ta thellojë kuptueshmërinë tonë për ungjillin e Shpëtimtarit dhe të na e rritë aftësinë për t’ua mësuar atë të tjerëve.

Udhëheqësi i diskutimeve: Përpiquni fort t’i bëni shkurt pjesët “Përcakto” dhe “Trego në Praktikë” që nxënësit të kenë mjaft kohë për praktikën.

Përcakto

Udhëheqësi i diskutimeve: Ndihmojini anëtarët e klasës të gjejnë kutinë e titulluar “Roli i të Mësuarit Përmendsh” në kapitullin 3 të manualit Predikoni Ungjillin Tim (faqet 26–27). Më pas, jepni udhëzimet vijuese:

Lexoje paragrafin e tretë te kutia “Roli i të Mësuarit Përmendsh” (Predikoni Ungjillin Tim, f. 27). Kërko mënyrat se si të mësuarit përmendsh i fragmenteve të shkrimeve të shenjta mund të të bekojë ty dhe të tjerët.

Si mund të të ndihmojë ty si misionar/e të mësuarit përmendsh?
Çfarë dobie ke pasur nga të mësuarit përmendsh të një fragmenti të shkrimit të shenjtë?

Udhëheqësi i diskutimeve: Shpjegoni se ka metoda të shumta që mund t’i përdorim për të na ndihmuar t’i mësojmë përmendsh shkrimet e shenjta. Si shembuj, mund të jepni disa nga vijueset. Mund t’i ftoni nxënësit të japin edhe ide të tjera.

Lexoji fjalët disa herë rresht. Më pas, fshihi fjalët dhe përsëriti pa i parë.
Ndaje fragmentin e shkrimit të shenjtë në disa fraza më të shkurtra. Mësoji përmendsh një e nga një frazat, duke e përsëritur atë që e ke mësuar përmendsh tashmë, ndërsa vijon më tej.
Shkruaji fjalët më shumë se një herë ndërsa e lexon vargun. Më pas, hidhe në letër fragmentin pa e parë vargun.
Shkruaji shkronjat e para të çdo fjale nga vargu dhe më pas përdori ato shkronja që të të udhërrëfejnë ndërsa e thua vargun.
Krijo figura të thjeshta që të të ndihmojnë ta mësosh përmendsh fragmentin.

Trego në Praktikë

Udhëheqësi i diskutimeve: Shpjegoni se një fragment i rëndësishëm i shkrimit të shenjtë që duhet ta mësojnë përmendsh misionarët, është rrëfimi i Vegimit të Parë të Jozef Smithit, i shënuar te Joseph Smith – Historia 1:16–17.

Më poshtë është një mënyrë se si mund ta përdorni idenë e dytë nga lista në pjesën e mëparshme për t’i ndihmuar nxënësit ta mësojnë përmendsh rrëfimin e Jozef Smithit. Ndihmojini nxënësit t’i mësojnë përmendsh frazat vijuese, një e nga një, duke i përsëritur me zë të lartë si klasë.

“Unë pashë një shtyllë drite tamam mbi kokën time, më e shkëlqyeshme se dielli, e cila zbriti gradualisht derisa ra mbi mua. …

Kur drita pushoi mbi mua, unë pashë dy Personazhe, shkëlqimi dhe lavdia e të cilëve i kapërcejnë të gjitha përshkrimet, duke qëndruar mbi mua në ajër.

Një prej tyre më foli, duke më thirrur në emër dhe tha, duke treguar tjetrin: ‘Ky është Biri Im i Dashur. Dëgjoje Atë!’” (Joseph Smith – Historia 1:16–17.)

Ushtrohu

Udhëheqësi i diskutimeve: Ftojini nxënësit ta ushtrojnë thënien përmendsh të kësaj pjese të rrëfimit të Vegimit të Parë të Jozef Smithit me një partner. Ata mund të përdorin të njëjtën metodë që e praktikuat si klasë, ose mund të zgjedhin një metodë të ndryshme.

Zbato

Udhëheqësi i diskutimeve: Jepni udhëzimet vijuese për t’i ndihmuar nxënësit ta vënë në zbatim zotësinë e të mësuarit përmendsh të shkrimeve të shenjta në jetën e tyre:

Përcakto se si do të vazhdosh ta përdorësh zotësinë e të mësuarit përmendsh të shkrimeve të shenjta. Ja disa ide:

Vazhdo ta mësosh përmendsh Vegimin e Parë të Jozef Smithit. Ushtrohu duke ia thënë përmendsh një njeriu të dashur.
Zgjidh një ose më shumë shkrime të tjera të shenjta që dëshiron t’i mësosh përmendsh, dhe bëj përpjekje për t’i mësuar përmendsh.