Librarya
Paglaom

“Paglaom,” Mga Hilisgotan ug mga Pangutana (2023)

batan-ong babaye

Giya sa Pagtuon sa Ebanghelyo

Paglaom

Salig nga ang mahangtoron nga mga saad matuman pinaagi ni Jesukristo

Ang kinabuhi sa kasagaran magdala og wala damha, lisod nga mga sirkumstansiya nga makapahimo nato nga mobati nga nahigawad, nabug-atan, ug napilde. Atol sa maong mga panahon, ang Langitnong Amahan dili mobiya nato nga mabutang sa kakuyaw ug mag-inusara. Nagtanyag siya og daghang espirituwal nga mga kapanguhaan—lakip sa gasa sa paglaom—nga makatabang nato nga makakita og kalig-on, kaisog, ug sa pagpaabot sa malipayong umaabot (tan-awa sa Moroni 9:25).

Ngadto niadtong nagsunod sa ebanghelyo ni Jesukristo, ang paglaom magdala sa kaseguroan nga ang Dios nakahibalo kanato ug motuman sa Iyang gisaad nga mga panalangin sumala sa Iyang kabubut-on ug tayming. Ang gasa sa Dios sa paglaom nagtabang nato sa pagtan-aw sa mga kasinatian sa mortal nga kinabuhi gikan sa usa ka mahangtorong panglantaw, ilabi na sa mga gutlo sa dihang gisulayan ang atong hugot nga pagtuo (tan-awa sa Jeremias 17:7). Si Jesukristo mao ang Dios sa paglaom, ug Siya mihimo niini nga posible alang nato nga modawat og kaabunda sa paglaom (tan-awa sa Mga Taga-Roma 15:13). Ang paglaom moabot gikan sa pagbaton og hugot nga pagtuo sa gugma sa atong Manluluwas ug sa Iyang gahom sa pagluwas ug niadtong kinsa moduol ngadto Kaniya.

Unsa ang Paglaom?

Ang paglaom usa ka balaan nga gasa nga moabot kon ang usa ka tawo mogamit sa hugot nga pagtuo diha ni Jesukristo (tan-awa sa Moroni 7:40–41). Nagdala kini og pagbati sa pagsalig nga ang mahangtorong mga saad matuman pinaagi Kaniya. Siya ang tinubdan sa paglaom ug kalig-on alang sa tanang mga anak sa Dios (tan-awa sa Joel 3:16). Ang paglaom naghatag nato og pagsalig sa pagpadayon atol sa mga kalisod sa mortal nga kinabuhi. Kini mao ang malipayon nga pagpaabot sa Pagkabanhaw ug sa gisaad nga mga panalangin sa kaluwasan ug kahimayaan. Ang paglaom mogiya sa usa ka tawo sa pagtutok sa mga panginahanglan sa uban ug sa pagserbisyo kanila uban sa gugma nga putli.

Kinatibuk-ang pagpasabot sa hilisgotan: Paglaom

May kalabotan nga mga giya sa pagkat-on sa ebanghelyo: Hugot nga Pagtuo diha ni Jesukristo, Pag-ula ni Jesukristo, Gugma nga Putli, Mga Gasa sa Espiritu, Pagkabanhaw

Seksiyon 1

Si Jesukristo Naghatag og Paglaom kon Kamo Magtinguha sa Pagsunod Kaniya

pamilya nga nagbutang og mga bulak sa lubnganan

Daghan sa mga kalisod nga atong giatubang niini nga kinabuhi mao ang mga sangpotanan sa Pagkapukan ni Adan ug Eva (tan-awa sa Doktrina ug mga Pakigsaad 29:40). Ang sakit, pag-antos, sala, ug kamatayon kabahin sa mortal nga kasinatian. Kon walay Pag-ula ug ang Pagkabanhaw pinaagi ni Jesukristo, dili gayod kita makakita og pagkaayo, pagpasaylo, hingpit nga kalipay, o kinabuhing dayon (tan-awa sa 2 Nephi 9:7–9). Kita mahimong miserable ug walay paglaom sa kahangtoran (tan-awa sa Mosiah 16:3–4).

Apan si Jesukristo mianhi sa yuta ug nag-antos alang sa matag dili maayong kapalaran sa atong mga kinabuhi (tan-awa sa Alma 7:11). Gibuntog Niya ang silot sa sala alang sa tanan nga magpakita og hugot nga pagtuo diha Kaniya ug maghinulsol sa ilang mga sala (tan-awa sa Moises 5:9). Gibugto Niya ang mga higot sa kamatayon ug nabanhaw, miabli sa agianan alang nato aron mabuhi pag-usab (tan-awa sa 2 Nephi 2:6–8). Misaad Siya sa paglaom sa kinabuhing dayon ngadto sa tanan nga mosunod Kaniya (tan-awa sa Ether 12:32).

Mga butang nga angayang hunahunaon

  • Ang pagtuo sa Dios makahatag og paglaom ug pagsalig sa katinuod sa Pagkabanhaw ug kinabuhing dayon. Basaha ang Ether 12:4. Sa unsa nga paagi nga ang paglaom nga moabot pinaagi sa inyong hugot nga pagtuo diha ni Jesukristo magsilbi nga usa ka angkla sa inyong kalag sa inyong inadlaw nga kinabuhi?

  • Sa Basahon ni Mormon, ang katawhan sa Anti-Nephi-Lehi nakasinati og gamhanan nga kausaban sa dihang sila nakadungog sa mensahe sa ebanghelyo ug nakabig. Basaha ang Alma 27:28. Sa unsa nga paagi nga ang gasa sa paglaom ug sa ilang pagsabot ni Jesukristo nakaimpluwensya sa ilang panglantaw mahitungod niini nga kinabuhi ug sa sunod? Sa unsang paagi kini nga baroganan magamit sa inyong kinabuhi?

Kalihokan alang sa pagkat-on uban sa laing mga tawo

  • Ang kamatayon sa usa ka sakop sa pamilya o higala makahatag og kasubo. Tungod kay si Jesukristo nag-antos sa mga balatian ug mga kasakit sa tanang tawo, makaampo kita ngadto sa Langitnong Amahan pinaagi sa Iyang ngalan ug magtinguha sa Iyang makapahupay nga tabang. Ang panalangin sa paglaom gisaad niadtong kinsa motuo sa plano sa Dios alang sa atong pagkabanhaw ug kinabuhing dayon. Aron mas makasabot sa kaimportante sa paglaom atol sa panahon sa pagkawala, dapita ang mga sakop sa grupo sa pagpili ug pagbasa og usa sa mosunod: 1 Pedro 1:3–5; Jacob 4:11; Alma 13:27–29; Ether 12:32. Mahimo usab nga motan-aw kamo sa “Finding Hope through the Resurrection of Christ [Pagkaplag og Paglaom pinaagi sa Pagkabanhaw ni Kristo]” (4:41). Sa unsa nga paagi nga ang gasa sa paglaom maghatag og kahupayan niadtong kinsa nawad-an og mga higala ug mga minahal? Unsaon ninyo sa paghulagway sa paglaom nga si Jesukristo mihimo niini nga posible alang ninyo ug sa inyong mga minahal nga mabanhaw ug mabuhi sa kahangtoran?

Pagkat-on pa og dugang

Seksiyon 2

Ang Inyong Hugot nga Pagtuo diha ni Jesukristo Mohatag Ninyo og Paglaom

batan-ong lalaki nga nakigsulti sa amahan

Ang mga kasulatan sa kasagaran namulong sa paglaom uban sa mga hiyas sa hugot nga pagtuo ug gugma nga putli (tan-awa sa Moroni 7:40–44). Ang atong mga paningkamot nga madugangan ang atong hugot nga pagtuo diha ni Jesukristo ug sa paglihok inubanan sa gugma nga putli ngadto sa uban direkta nga konektado sa atong kapasidad sa pagbaton og paglaom (tan-awa sa Moroni 10:20–21). Sa pagpamulong sa kaimportante sa hugot nga pagtuo, paglaom, ug gugma nga putli, si Presidente Russell M. Nelson mipasabot: “Kining tulo ka mga kinaiya hugot kaayo nga pagkahigot sama sa mga wire sa kable sa kuryente ug tingali dili kanunayng hingpit nga mailhan. Kon manag-uban mahimo kining atong koneksyon ngadto sa celestial nga gingharian.”

Ang paglaom mao ang usa sa mga panalangin nga atong madawat pinaagi sa Espiritu Santo kon kita maghinulsol ug nabunyagan (tan-awa sa Moroni 8:25–26). Gisaaran kita nga kon kita adunay “dili matarog nga pagtuo” diha ni Jesukristo, ang Langitnong Amahan motabang nato nga makaangkon og “hingpit nga kahayag sa paglaom” (2 Nephi 31:19–20). Makadawat usab kita og mas dakong paglaom kon kita mobasa mosiksik sa mga kasulatan (tan-awa sa Mga Taga-Roma 15:4; Jacob 4:6).

Mga butang nga angayang hunahunaon

  • Sa pagpamulong ngadto sa mga young adult, si Sister Patricia Holland mitudlo, “Ang hugot nga pagtuo mao ang lig-on nga pagsalig nga adunay Dios, ang paglaom mao ang pagsalig nga Siya motabang kanato, ug ang gugmang putli mao ang Iyang gugma ug katakos nga mapakita pinaagi kanato aron sa pagpanalangin sa uban.” Sa unsa nga paagi nga ang pagkat-on mahitungod sa hugot nga pagtuo ug gugma nga putli makatabang nato nga mas makasabot sa paglaom?

Kalihokan alang sa pagkat-on uban sa laing mga tawo

  • Uban sa mga sakop sa grupo, basaha ang mosunod nga pamahayag ni Presidente Dieter F. Uchtdorf:

    “Ang kaaway mogamit sa pagkawalay paglaom nga mogapos sa atong mga kasingkasing ug mga hunahuna diha sa makatuok nga kangitngit. Ang pagkawalay paglaom motangtang gikan kanato sa tanan nga kadasig ug kalipay ug mobilin og walay hinungdan kon unsa gayud ang kahulogan sa kinabuhi. …

    “Ang paglaom, sa laing bahin, sama sa bidlisiw sa nagsubang nga kahayag sa adlaw ug sa ibabaw sa kinutoban sa atong mga kahimtang karon. Kini mogilis sa kangitngit aron may mahayag nga kaadlawon. Kini makapaawhag ug makapadasig kanato sa pagtugyan sa atong pagsalig diha sa mahigugmaong pagmahal sa usa ka mahangturon nga Langitnong Amahan nga nag-andam og usa ka dalan alang niadtong kinsa nagtinguha sa mahangturon nga kamatuoran diha sa kalibotan sa pangagpas, kalibog, ug kahadlok.”

    Unsa ang pipila ka pamaagi nga ang pag-angkon og hiyas sa paglaom makatabang nato nga makakita agi sa kangitngit niini nga kalibotan?

Pagkat-on pa og dugang

Uban pang mga Kapanguhaan mahitungod sa Paglaom