Leksyon 20 Materyal sa Pagpangandam sa Klase: Mga Ordinansa ug Pagsimba sa Templo
“Leksyon 20 Materyal sa Pagpangandam sa Klase: Mga Ordinansa ug Pagsimba sa Templo,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 20 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Imahe
babaye anaa sa atubangan sa templo
Leksyon 20 Materyal sa Pagpangandam sa Klase
Mga Ordinansa ug Pagsimba sa Templo
Si Presidente Thomas S. Monson mitudlo, “Mga katawhan kita nga tigtukod ug tigtambungan og templo” (“Welcome sa Komperensya,” Liahona, Mayo 2014, 5). Samtang kamo magtuon niini nga materyal, hunahunaa kon ngano ang mga ordinansa sa templo mga importante kaayo nga bahin sa Pagpahiuli sa ebanghelyo ni Jesukristo sa ulahing mga adlaw. Tinoa kon unsay imong mabuhat aron sa paghimo sa pagsimba diha sa templo nga mas importante nga bahin sa imong kinabuhi.
Seksyon 1
Sa unsang paagi nga ang pagsimba diha sa templo nagpanalangin sa akong kinabuhi?
Niadtong 2019, ang Unang Kapangulohan mipakigbahin:
Bisan kanus-a ang Ginoo adunay mga katawhan dinhi sa yuta kinsa mosunod sa Iyang mga pulong, sila gimandoan sa pagtukod og mga templo. Ang mga kasulatan nagdokumento sa mga sundanan sa pagsimba sa templo gikan sa mga panahon ni Adan ug Eva, Moises, Salomon, Nephi, ug uban pa.
Sa pagpahiuli sa ebanghelyo niining ulahing mga adlaw, ang pagsimba sa templo gipahiuli usab aron sa pagpanalangin sa mga kinabuhi sa mga tawo sa tibuok kalibutan ug ingon man sa pikas bahin sa tabil. … Ang usa ka gipahinungod nga templo mao ang labing balaan sa bisan asa nga dapit sa pag-ampo ibabaw sa kalibutan. (“Unang Kapangulohan nga Pamahayag kabahin sa mga Templo,” Ene. 2, 2019, newsroom.ChurchofJesusChrist.org)
Ang unang templo nga pagatukuron sa atong dispensasyon mao ang Templo sa Kirtland sa 1836. Ang pagpahinungod niana nga templo misugod ang usa ka mahinungdanong yugto sa espiritwal nga mga pagpakita. Gibati sa mga matinud-anon ang Espiritu Santo, ug ang pipila namulong og nagkalainlaing mga pinulongan, dihay mga panan-awon, o nakakita og mga anghel. Ang katapusang panghitabo niini nga panahon mao ang pagpakita sa Manluluwas ngadto ni Joseph Smith ug Oliver Cowdery didto sa Templo sa Kirtland wala madugay human sa pagpahinungod niini. Niana nga panahon miingon ang Manluluwas, “Ako midawat niini nga balay” (Doktrina ug mga Pakigsaad 110:7).
Hunahunaa ang pipila ka mga pagbati nga ikaw aduna o gusto nga aduna samtang mosulod ka sa templo sa Ginoo.
Sa Marso 27, 1836, si Joseph Smith mihalad sa pagpahinungod nga pag-ampo (ang mga pulong diin iyang nadawat pinaagi sa pagpadayag gikan sa Ginoo) alang sa Templo sa Kirtland. Kining pagpadayag nga pag-ampo narekord isip ang Doktrina ug mga Pakigsaad 109. Niini nga pag-ampo, gihangyo ni Joseph ang Ginoo sa paghatag og mga panalangin ngadto niadtong kinsa nagsimba diha sa templo.
Si Sister Jean A. Stevens, kanhi Unang Magtatambag sa Kinatibuk-ang Kapangulohan sa Primary, misulti niini mahitungod sa mga panalangin nga atong madawat diha sa templo:
Imahe
Sister Jean A. Stevens
Kon gusto nato nga madawat ang tanang panalangin sa Dios nga abundang gitanyag, ang atong dalan kinahanglan paingon ngadto sa templo. Ang mga templo usa ka pagpahayag sa gugma sa Dios. Siya midapit natong tanan nga moadto, magkat-on bahin Niya, mobati sa Iyang gugma, ug modawat sa mga ordinansa sa pagkapari nga gikinahanglan sa kinabuhing dayon uban Niya. Matag pakigsaad gihimo sa tinagsa-tagsa. Matag dakong kausaban sa kasingkasing mahinungdanon sa Ginoo. Ug ang inyoha makahimo og dakong kalainan alang kaninyo. Kay kon kita moadto sa Iyang balaan nga balay, kita “sinangkapan sa [Iyang] gahum, … [Iyang] ngalan … diha [kanato], … [Iyang] himaya … maglibut [kanato], ug ang [Iyang] mga anghel mobantay [kanato]” [Doktrina ug mga Pakigsaad 109:22].
… Pinaagi kini sa Iyang Pinalanggang Anak, si Jesukristo, nga matag paglaum, matag saad, ug matag panalangin sa templo matuman. (Jean A. Stevens, “Anak nga mga Babaye sa Pakigsaad sa Dios,” Liahona, Nob. 2014, 114)
Imahe
icon, paghisgot
Pakighisgot ngadto sa uban
Pangutana sa usa ka sakop sa pamilya o sa usa ka higala kon unsa nga pihong mga panalangin iyang gibati diha sa iyang kinabuhi pinaagi sa pagdawat og mga ordinansa sa templo ug sa pag-apil diha sa pagsimba sa templo. Sa unsa nga mga paagi kini nga tawo mibati sa gugma sa Dios pinaagi sa pagtambong sa templo?
Seksyon 2
Ngano nga ang Ginoo mimando sa Iyang mga katawhan sa pagtukod og mga templo?
Bisan sa wala pa ang Ginoo mimando sa mga Santos sa pagtukod og usa ka templo sa Kirtland, ang mga Santos sa Missouri mipahinungod og usa ka dapit nga tukuran og usa ka templo didto sa Independence, Missouri. Sa wala madugay, mipahimutang sila og mga tukurang bato alang sa templo sa Far West, Missouri. Ang duha nagpabiling wala mahuman tungod kay ang mga Santos gipugos sa pagpapahawa gikan sa ilang mga panimalay ug mga kabtangnan. Sa Oktubre 1840 nga komperensya, gidawat sa mga Santos ang tawag sa Propeta sa pagtukod og usa ka templo sa Nauvoo. Usab, uban sa kinaiya nga magsakripisyo, misugod ang mga Santos sa paghatag og trabaho, salapi, ug ubang mga kapanguhaan aron sa pagtabang sa pagtukod. Sa Enero 1841, nadawat ni Joseph Smith ang usa ka pagpadayag nga mihatag og dugang nga mga rason kon nganong gikinahanglan sa Ginoo kini nga templo pagatukuron. Kini nga tambag natala sa Doktrina ug mga Pakigsaad 124. Samtang imong tun-an ang mosunod nga mga bersikulo, hunahunaa ang pipila sa mga rason nga ang Ginoo nagmando kanato sa pagtukod og mga templo sa ulahing mga adlaw.
Diha sa templo, gidawat sa mga Santos ang importanting mga ordinansa nga gipadayag sa Ginoo ngadto sa Propeta, lakip ang tulumanon sa pagtuga.
Uban niining mga ordinansa sa [templo] mao ang usa ka tulumanon nga gitawag og pagtuga, nga gipalambo diha sa tulumanon sa paghugas ug pagdihog nga gipaila ni Joseph didto sa Templo sa Kirtland kaniadtong 1836. Nahadlok nga siya patyon sa dili pa mahuman ang templo, mitawag si Joseph Smith og pipila ka mga lalaki kaniadtong Mayo 3, 1842, aron sa paghusay sa lawak sa taas sa iyang Red Brick Store aron sa pagrepresentar “sa sulod sa templo kutob nga itugot sa mga kahimtang.” Sa pagkasunod adlaw, gidumala ni Joseph ang pagtuga sa unang higayon ngadto sa usa ka pundok sa siyam ka mga lalaki. (“Pagtuga diha sa Templo,” Church History Topics, ChurchofJesusChrist.org/study/church-history)
Kining tulumanon sa pagtuga “nagtudlo og makapabayaw nga mga kamatuoran. Migamit kini sa mga asoy sa kasulatan kabahin sa Paglalang ug sa Tanaman sa Eden … aron sa paggiya sa mga katawhan sa hinay-hinay ngadto sa plano sa kaluwasan. Sama ni Abraham ug sa ubang karaan nga mga propeta, nakadawat sila og kahibalo nga makapahimo kanila sa pagbalik ngadto sa presensya sa Dios. Sa panahon sa ordinansa, ang mga tawo mihimo og mga pakigsaad nga magpuyo nga matarung, putli nga kinabuhi ug mopahinungod sa kaugalingon sa pagserbisyo sa Ginoo” (Mga Santos: Ang Istorya sa ang Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 517).
Nianang [o wala pa ang] Septyembre 28, 1843, si Emma Smith nahimong unang babaye nga nakadawat sa pagtuga. Ang saad ni Joseph nga ang mga miyembro sa Relief Society makakita “sa mga panalangin sa pagtuga nga magpadayon” napamatud-an samtang si Emma misugod sa pagtabang sa pagdumala sa ordinansa ngadto sa ubang mga babaye. (Jill Mulvay Derr ug uban pa, eds., The First Fifty Years of Relief Society: Key Documents in Latter-day Saint Women’s History [2016], 10)
Bisan og si Joseph sa pagsugod midapit og pipila lamang ka mga tawo sa pag-apil diha sa pagtuga, tataw niyang gituyo ang pag-abli sa mga tulumanon sa templo nga maanaa sa tanang takus nga mga Santos sa Ulahing mga Adlaw. … Gipasabut ni Willard Richards, “Walay gihimong pagpahibalo ngari [kanato], apan unsa ang ipahibalo ngadto sa tanang mga Santos sa katapusang mga adlaw, sa labing madali nga sila andam sa pagdawat, ug usa ka [templo] andam sa pagpahibalo kanila.” (“Anointed Quorum (‘Holy Older’),” Church History Topics, ChurchofJesusChrist.org/study/church-history)
Imahe
icon, pamalandong
Pamalandong agi og Pagpangandam alang sa Klase
Unsa ang atong makat-unan mahitungod sa Ginoo gikan sa Iyang mga mando ngadto sa mga Santos sa pagtukod og mga templo? Ngano nga ang Ginoo gusto sa Iyang mga katawhan nga pagatugahan diha sa templo?
Seksyon 3
Unsaon nako ug kadtong akong gihigugma nga mapanalingan pinaagi sa pagtuga sa templo?
Kaniadtong Abril 2019 nga kinatibuk-ang komperensya, si Elder David A. Bednar sa Korum sa Napulog duha ka mga Apostoles midapit sa tanang mga miyembro sa Simbahan nga mahimong pamilyar sa mga kapanguhaan nga anaa sa temples.ChurchofJesusChrist.org (tan-awa sa “Andam nga Makaangkon sa Matag Gikinahanglan nga Butang,” Liahona, Mayo 2019, 101–4). Gikan niini nga website, atong makat-unan ang mosunod mahitungod sa pagtuga sa templo:
Ang pulong nga pagtuga nagpasabut nga “gasa.” Niini nga pagsabut, ang pagtuga sa templo sa tinuod usa ka gasa gikan sa Dios diin Siya naghatag og sagradong mga panalangin diha kaninyo [pinaagi sa Pag-ula ni Jesukristo]. Ang pagtuga madawat lamang sa Iyang paagi ug diha sa Iyang balaang templo. Pipila sa mga gasa nga imong madawat pinaagi sa pagtuga sa templo naglakip sa:
Mas dako nga kahibalo sa mga katuyoan ug mga pagtulun-an sa Ginoo.
Gahum sa pagbuhat sa tanan nga gusto sa Dios kanato nga buhaton.
Balaang paggiya ug panalipud samtang kita nagserbisyo sa Ginoo, sa atong pamilya, ug sa uban.
Dugang nga paglaum, kahupayan, ug kalinaw.
Gisaad nga mga panalangin karon ug sa kahangturan. …
Agig sumpay niini nga mga ordinansa, kamo dapiton sa paghimo og piho nga mga pakigsaad uban sa Dios. Kini nga mga pakigsaad naglakip sa:
Balaod sa Pagkamasulundon
Balaod sa Pagsakripisyo
Balaod sa Ebanghelyo
Balaod sa Kaputli
Balaod sa Pagpahinungod
Agig balos, ang Dios nagsaad og talagsaong mga panalangin niini nga kinabuhi ug sa oportunidad sa pagbalik og puyo uban Kaniya sa kahangturan. (“About the Temple Endowment,” temples.ChurchofJesusChrist.org)
Si Presidente Russell M. Nelson mitudlo mahitungod sa espiritwal nga importansya sa pagtuga:
Imahe
Presidente Russell M. Nelson
Ang pagtuga sa templo gihatag pinaagi sa pagpadayag. Busa, kini labing masabtan pinaagi sa pinadayag, madasigong gipangita uban sa putli nga kasingkasing. Si Presidente Brigham Young mipasabut nga “ang inyong pagtuga mao, ang pagdawat sa tanan nianang mga ordinansa sa balay sa Ginoo, nga inyong gikinahanglan, human kamo mobiya niini nga kinabuhi, aron kamo makabalik ngadto sa presensya sa Amahan, molabay sa mga anghel kinsa nagbarug isip mga bantay, … ug maangkon ang inyong mahangturong kahimayaan” [Discourses of Brigham Young, sel. John A. Widtsoe (1954), 416]. (Russell M. Nelson, “Pangandam alang sa mga Panalangin sa Templo,” Liahona, Okt. 2010, 49)
Imahe
icon, rekord
Irekord ang Inyong mga Hunahuna
Unsa ang imong isugyot nga buhaton sa usa ka tawo sa pagpangandam sa pagdawat sa iyang pagtuga? Ngano nga ang templo ug ang mga ordinansa niini personal nga importante nganha kanimo? I-rekord ang imong tubag diha sa imong journal o sa luna nga gigahin sa ubos.
