“Leksyon 3 Materyal alang sa Pagpangandam sa Klase: Pag-angkon og Espirituhanong Kahibalo,” Materyal sa Pagpangandam sa Klase alang sa Mga Pundasyon sa Pagpahiuli (2019)
“Leksyon 3 Materyal sa Pagpangandam sa Klase,” Materyal sa Pagpangandam sa Klase alang sa Mga Pundasyon sa Pagpahiuli
Leksyon 3 Materyal sa Pagpangandam sa Klase
Pag-angkon og Espirituhanong Kahibalo
Usahay atong madiskubrihan ang bag-ong impormasyon nga makasurpresa nato o makapaaghat og mga pangutana kabahin sa doktrina, mga praktis, o kasaysayan sa Simbahan. Kon giunsa ninyo sa paglaraw ang inyong mga pangutana ug asa kamo modangop alang sa mga tubag maoy makapalig-on o makapahuyang sa inyong pagtuo. Samtang kamo magtuon unsaon sa pag-angkon og espirituhanong kahibalo, pangitaa ang mga baruganan nga makatabang samtang kamo mangita og mga tubag pinasubay sa pamaagi sa Ginoo.
Seksyon 1
OK ra ba nga dunay mga pangutana mahitungod sa Simbahan?
Ang mga kasulatan balik-balik nga miawhag nato sa pagpangutana sa Dios (tan-awa sa Santiago 1:5; Doktrina ug mga Pakigsaad 88:63). Samtang nagserbisyo sa Unang Kapangulohan, si Presidente Dieter F. Utchdorf mitudlo:
Akong minahal nga batan-ong mga higala, kita ang tigpangutana nga katawhan. Ingon niini kita sa kanunay, tungod kay nasayud kita nga ang pagpangutana motultol sa kamatuoran. Mao kana ang paagi nga nakapasugod sa Simbahan, gikan sa usa ka batan-ong lalaki kinsa adunay mga pangutana. Sa pagkatinuod, dili ko sigurado kon unsaon sa usa ka tawo pagdiskubre sa kamatuoran kon dili mangutana. … Ang pagpangutana mao ang sinugdanan sa pagpamatuod. … Ang pagpangutana dili sinyales sa kahuyang. Butang kini nga mag-una sa paglambo. (“The Reflection in the Water,” debosyonal sa Church Educational System [Nob. 1, 2009], broadcasts.ChurchofJesusChrist.org)
Ang Langitnong Amahan ug si Jesukristo malipay nga mohatag nato og kahibalo ug pagsabut. Motubo kita sa espirituhanon kon kita mangutana ug magtinguha og mga tubag uban ang sinseridad ug pagtuo. Hinumdumi nga samtang ang Ginoo motabang nato nga makat-on nga magbaton og pagtuo diha Kaniya, Siya posibling dili mohatag sa matag tubag sa atong matag pangutana niini nga kinabuhi. Gani, dili kinahanglan nga kita mangita sa mga tubag sa matag pangutana aron makadawat og pagpamatuod ug mobarug nga usa ka saksi sa kamatuoran. Apan ang sinserong pagpangutana makatabang nato sa pagpadayon nga makat-on ug motubo.
Irekord ang Inyong mga Hunahuna
Sa luna nga giandam, isulat ang pipila ka pangutana nga inyong nadunggan o inyong ipangutana mahitungod sa relihiyon, pagkaespirituhanon, sa ebanghelyo, o sa Simbahan.
Mga estudyante: Ipadala ang usa o duha niini nga mga pangutana pinaagi sa text o email ngadto sa inyong magtutudlo sa institute. Siya dili mosulti kang kinsa kini nga mga pangutana apan mahimong mogamit niini sa klase aron sa pagpraktis sa pagpangita og mga tubag pinasubay sa pamaagi sa Ginoo. Kini nga mga pangutana makatabang usab sa inyong magtutudlo nga mas makasabut sa inyong mga kabalaka ug unsaon kini sa pagtubag atol sa kurso. Samtang kamo magpadayon sa pagtuon, pangitaa ang mga baruganan nga makatudlo ninyo unsaon sa pagpangita og mga tubag sa mahagitong mga pangutana.
Seksyon 2
Sa unsa nga paagi nga ang Ginoo gusto nga ako mangita sa mga tubag sa mga pangutana ug makaangkon og espirituhanong kahibalo?
Ang mosunod nga mga baruganan makatabang ninyo sa pagpangita og mga tubag sa mga pangutana ug makasulbad sa mga kabalaka pinasubay sa pamaagi sa Ginoo:
-
Molihok inubanan sa pagtuo.
-
Susihon ang mga konsepto ug mga pangutana inubanan sa mahangturong panglantaw.
-
Tinguhaon ang dugang nga panabut pinaagi sa balaanong gitudlo nga mga tinubdan.
Samtang kamo magtuon niini nga mga baruganan sa pag-angkon og espirituhanong kahibalo sa ubos, ikonsiderar ang pagmarka sa importante nga mga pamahayag o mga punto nga importante kaninyo aron inyong ipakigbahin kini sa klase ug gamiton kini unya.
Molihok inubanan sa Pagtuo
Ang pagtuo magsugod sa tinuohan nga ang Dios buhi, nasayud sa tanang mga butang, ug mao ang tinubdan sa tanang kamatuoran. Molihok kita inubanan sa pagtuo kon kita mopili sa pagsalig sa Dios ug moduol ngadto Kaniya pinaagi sa sinserong pag-ampo, pagtuon sa Iyang mga pagtulun-an, ug pagsunod sa Iyang mga sugo. Ang Ginoo midapit kanato nga “dili magduha-duha, apan pagmatinuohon” (Mormon 9:27). Samtang kita moestablisar og sundanan sa paglihok inubanan sa pagtuo diha sa atong inadlaw-adlaw nga kinabuhi, motukod kita og lig-on nga pundasyon diha kang Jesukristo nga nagsiguro nga kita magpabilin nga lig-on, bisan kon kita mag-atubang sa malisud nga mga pangutana o mga hagit (tan-awa sa Helaman 5:12).
Kon kamo makasugat og impormasyon o mga pangangkon nga wala ninyo hisabti o nga naghagit sa inyong mga pagtuo, dili kinahanglan nga kamo magduha-duha sa inyong pagpamatuod o sa miaging espirituhanong mga kasinatian. Atol sa maong mga gutlo, si Elder Jeffrey R. Holland mitambag, “Ayaw kahadlok ug ayaw pag-atras. Ayaw wad-a ang inyong pagsalig. Ayaw kalimti unsay inyong gibati kaniadto. Ayaw ibaliwala ang [espirituhanong] [mga] kasinatian [nga] inyong nasinati” (“Remember How You Felt,” New Era, Ago. 2004, 6). Apan hinoon, “panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo” (Jeffrey R. Holland, “Nagatuo Ako,” Liahona, Mayo 2013, 94).
Samtang kamo “naggunit unsay inyo nang nahibaloan,” hinumdumi nga ang inyong kinaiya ug tuyo sa pagpangutana ug pagpangita og mga tubag makaapekto pag-ayo sa inyong abilidad nga makat-on gikan sa Espiritu Santo. Kini nga proseso nagkinahanglan og pagpaubos, sinseridad, ug tinuod nga tumong sa paglihok sa kamatuoran nga atong nadawat gikan sa Ginoo.
Sa dihang si Joseph Smith nakasugat og relihiyoso nga kahimtang nga puno sa “kalibug ug kagubot taliwala sa nagkalain-lain nga mga tinuohan” (Joseph Smith—Kasaysayan 1:8), dali ra unta siyang mawad-an og paglaum, motugot sa pagduha-duha nga mosulod sa iyang kasingkasing, ug “[mag]pabilin diha sa kangitngit ug kalibug” (bersikulo 13). Hinoon, gisiksik niya ang mga kasulatan ug nadani pag-ayo sa mensahe nga nakita sa Santiago 1:5 sa “pagpangayo sa Dios.” Inubanan sa pagtuo, siya miadto sa kakahoyan ug “[miluhod] ug nagsugod sa pagtugyan sa mga tinguha sa [iyang] kasingkasing ngadto sa Dios” (Joseph Smith—Kasaysayan 1:15). Ang iyang sinsero nga pag-ampo gitubag sa usa ka langitnong panan-awon. Mibiya siya sa kakahoyan nga “nakahibalo sa [iyang kaugalingon]” sa mga tubag sa iyang mga pangutana (bersikulo 20).
Pamalandong agi og Pagpangandam alang sa Klase
Hunahunaa ang usa sa mga pangutana nga inyong narekord nang daan. Sa unsa kaha nga paagi nga kamo o ang laing tawo nga duna niini nga pangutana molihok inubanan sa pagtuo samtang mangita sa mga tubag ug dugang nga giya?
Susihon ang mga Konsepto ug mga Pangutana inubanan sa Mahangturong Panglantaw
Sa pagsusi sa doktrinal nga mga konsepto, mga pangutana, ug sosyal nga mga isyu inubanan sa mahangturong panglantaw, atong ikonsiderar ang kinatibuk-ang kahulugan niini sa plano sa kaluwasan ug sa mga pagtulun-an sa Manluluwas. Tinguhaon nato ang tabang sa Espiritu Santo aron makita ang mga butang sama sa pagkakita niini sa Ginoo (tan-awa sa 1 Mga Taga-Corinto 2:5, 9–11). Kini nga paagi makatabang nato nga makakita sa mga butang gikan sa panan-aw sa Ginoo kay sa gikan sa kalibutanong panglantaw. Mahimo nato kini pinaagi sa pagpangutana og sama sa “Unsa man gayud ang akong nahibaloan mahitungod sa Langitnong Amahan, sa Iyang plano, ug sa unsang paagi Niya gidumala ang Iyang mga anak?” ug “Unsa nga pagtulun-an sa ebanghelyo ang may kalabutan o naghatag og katin-awan niining konsepto o isyu?”
Ang mga pangutana nga may kalabutan sa makasaysayanong mga panghitabo kinahanglan susihon usab uban sa mahangturong panglantaw. Makatabang usab ang pagsusi sa mga pangutana sa kasaysayan sa tukmang makasaysayanon nga kahulugan pinaagi sa pagkonsiderar sa kultura ug mga kinaiya sa maong panahon kay sa pagtan-aw niini pinaagi sa kasamtangang mga panglantaw ug mga kinaiya. Pananglitan, kon kamo nakadiskobre og katigulangan gikan sa tuig nga mga 1800 nga naminyo sa edad nga 14 o 15, tingali makita ninyo nga kini sayo ra kaayo nga kaminyoon gawas kon kamo nakasabut nga nianang panahona, nga kini komon ra.
Importante ang paghinumdom nga ang historikal nga mga detalye wala magdala sa makaluwas nga gahum sa mga ordinansa, mga pakigsaad, ug doktrina. Kon mabalda ka sa wala kaayoy kahulugan nga mga detalye nga maoy hinungdan nga dili na nimo makita ang nagkadayag nga mga milagro sa Pagpahiuli sama ra kini sa paggahin og panahon sa pag-analisar sa sudlanan sa regalo ug gibaliwala ang kanindot sa regalo mismo.
Irekord ang Inyong mga Hunahuna
Tinguhaon ang Dugang nga Panabut pinaagi sa Balaanong Gitudlo nga mga Tinubdan
Hunahunaa ang usa ka estranghero nga miakusar sa usa sa imong mga minahal sa pagbuhat og butang nga sayop. Unsaon ninyo sa pagkahibalo kon sila nagsulti ba sa kamatuoran o kon sila nasayop lang? Unsa kaha ang kakuyaw nga motuo lang sa estranghero nga walay pag-imbestigar niini og dugang?
Pinaagi sa internet, kita adunay talagsaong access sa maayo nga impormasyon. Sa samang higayon, ang internet nakapabantang nato sa paghasmag sa dili kasaligan nga impormasyon. Tungod kay ang internet dili awtomatik nga mohashas sa makalibug, makailad, o bakak nga impormasyon alang nato, kita kinahanglan nga mosala niini sa atong kaugalingon. Si Presidente Dallin H. Oaks sa Unang Kapangulohan mipasidaan, “Kinahanglang magmatngon kita samtang mangita kita sa kamatuoran ug magpili og mga tinubdan niana nga pagsiksik” (“Kamatuoran ug Plano,” Liahona, Nob. 2018, 25).
Isip kabahin sa gipili sa Ginoo nga proseso sa pag-angkon og espirituhanong kahibalo, miestablisar Siya og mga tinubdan nga pinaagi niini Iyang ikapadayag ang kamatuoran ug giya sa Iyang mga anak. Kining balaanong gipili nga mga tinubdan naglakip sa kahayag ni Kristo, sa Espiritu Santo, sa mga kasulatan, mga lider sa Simbahan, ug matinud-anong mga sakop sa pamilya. Ang Unang Kapangulohan ug ang Korum sa Napulog Duha ka mga Apostoles—mga propeta sa Ginoo dinhi sa kalibutan karon—mao ang importante kaayong tinubdan sa kamatuoran. Gipili ug giorden sa Ginoo kining mga tawhana nga mamulong alang Kaniya.
Makat-unan usab nato ang kamatuoran pinaagi sa ubang kasaligan nga mga tinubdan. Bisan pa, ang sinserong mga tigpangita sa kamatuoran kinahanglang magmabinantayon sa dili kasaligang mga tinubdan sa impormasyon. Ang pagkat-on sa pag-ila ug paglikay sa dili kasaligang mga tinubdan makapanalipud nato gikan sa sayop nga impormasyon ug niadtong mga nagtinguha sa pagdaot sa atong tinuohan. Ang mosunod nga mga pangutana ug mga sumbanan makatabang ninyo samtang kamo motino sa mga tinubdan nga kasaligan:
Mga Pangutana alang sa Pagtimbang-timbang sa mga Tinubdan
-
Unsa ang mga kwalipikasyon, mga intensyon, ug posibling mga pagpihig sa tagsulat?
Si Presidente Dallin H. Oaks sa Unang Kapangulohan mitudlo nga “kinahanglang magmatngon usab kita mahitungod sa katuyoan sa tawo nga naghatag sa impormasyon. … Ang personal natong mga desisyon kinahanglang ibase sa impormasyon gikan sa mga tinubdan nga haum diha sa gihisgutan ug dili sa hinakog nga mga katuyoan” (Dallin H. Oaks, “Kamatuoran ug ang Plano,” Liahona, Nob. 2018, 25).
-
Unsa ka pamilyar ang tagsulat ngadto sa mga kalihokan nga gihulagway?
Kon ang usa ka tinubdan naghisgot og butang gikan sa kasaysayan sa Simbahan, pangutan-a ang inyong kaugalingon unsa ka layo ang tinubdan gikan sa kalihokan nga gihisgutan niini. Ang mga istorya nga gibase sa mga tawo nga nakadungog lang niini nga mga istorya sa kasagaran dili kasaligan.
-
Gituyo ba sa tagsulat ang pagbaliwala sa anaa nga ebidensya aron sa pagpahisalaag?
Ang pipila ka tagsulat motuyo nga dili iapil ang mahinungdanon nga mga kamatuoran ug ibaliwala ang importante nga ebidensya sa pagsuporta sa ilang piho nga punto sa panglantaw.
-
Ang mga pagtulun-an ug mga kalihokan ba nga gihisgutan niini nga tinubdan gipresentar sa tukma nga konteksto sa ilang panahon, dapit, ug sirkumstansya?
Ang pipila ka mga pagtulun-an ug makasaysayanong mga panghitabo mogawas nga makalibug kon kini kuhaon gikan sa konteksto sa ilang panahon ug dapit. Ang makasaysayanong konteksto naglakip usab sa ubang mga panghitabo nga nahitabo nianang panahona (sama sa mga gubat, krisis sa ekonomiya, ug sosyal ug politikanhong mga kalihokan) ug sa kultura ug sa mga klase sa katawhan sa nahisgutang panahon ug sitwasyon.
-
Ang mga pagtulun-an ug mga panghitabo suportado ba sa dugang nga kasaligang mga tinubdan?
Ang suporta gikan sa ubang kasaligang mga tinubdan makatabang sa pag-establisar sa katukma sa doktrina ug makasaysayanong mga panghitabo.
Mga Pangutana alang sa Pagtimbang-timbang sa mga Tinubdan
Pamalandong agi og Pagpangandam alang sa Klase
Paggahin og pipila ka minuto sa pagsiksik sa website sa Simbahan, sa Gospel Library, o sa mga kasulatan alang sa mga tinubdan nga makatabang ninyo o sa usa ka tawo nga inyong nailhan nga nangita og dugang nga pagsabut mahitungod sa mga pangutana nga inyong narekord nang daan. Pamalandongi ang tahas sa Espiritu Santo sa inyong kinabuhi samtang kamo magtimbang-timbang sa mga tinubdan ug nangita sa kamatuoran.