“9: O Lo’u Faavae: Ia Tasi, Auauna Faatasi,” Mauaina o le Malosi i le Alii: Faafoisia Faalelagona (2020)
“9: O Lo’u Faavae: Ia Tasi, Auauna Faatasi,” Mauaina o le Malosi i le Alii: Faafoisia Faalelagona
O Lo’u Faavae: Ia Tasi, Galulue Faatasi—Taimi Atoa: 20 Minute
Talanoa:
E mafai faapefea e le auauna atu i isi ona tatalaina faamalama o le lagi i lou olaga?
Faitau:
O nisi e lagona e tatau ona latou maua mea o loo i ai i isi tagata, lea e mafua ai le ita. O isi e lagona lo latou agavaa i mea latou te lei mauaina. O nei papupuni e lua e noatia ai tagata mai le vaaia o se upumoni tāua: o mea uma e a le Atua ia. E mafai ona faatoilaloina le ita ma le agavaa e ala i le taulai atu i mea e manaomia e isi tagata.
Faitau:
O fuaitau o mau nei e fesootai ma le saunoaga a Peresitene Hinckley:
“Pe a outou auauna atu i o outou uso a tagata, ua nao lo outou auauna atu lava lea i lo outou Atua” (Mosaea 2:17).
“Ma o lenei, mo le … taofia pea o le faamagaloina o a outou agasala mai lea aso i lea aso, … ou te manao ia outou faasoa atu a outou mea i e matitiva, ia taitasi le tagata ma faia e tusa ma mea ua ia te ia, e pei o le fafagaina o e ua fia aai, faaoofuina o e ua lē lavalava, asiasi atu i e mamaʼi ma auauna atu mo lo latou mapusaga, faaleagaga ma faaletino, e tusa ma o latou manaoga” (Mosaea 4:26).
“Pe a outou lotogatasi, e lē faatapulaaina lo outou mana. E mafai ona e ausia soo se mea e te manao e ausia” (Gordon B. Hinckley, “O Lou Luitau Sili, Tina,” Liahona, Ian. 2001, 101).
Faitau:
O faamatalaga nei mai i taitai o le Ekalesia:
“O le faamoemoega o le faalagolago o le tagata ia te ia lava i le faaletino ma le faaleagaga o le mauaina lea o i tatou lava i nofoaga maualuluga atu ina ia mafai ai ona tatou siitia isi o loo manaomia le fesoasoani” (Robert D. Hales, “O Le Manatuaina Pe o Ai i Tatou: O Le Faamanatuga, o le Malumalu, ma le Ositaulaga e Ala i le Auauna Atu,” Liahona, Me 2012, 36).
“Pe a tatou galulue faatasi soosoo tauau, … e mafai ona tatou ausia soo se mea. A tatou faia lea mea, tatou te aveesea vaivaiga o se tagata e toatasi o loo tu na o ia ma suitulaga i le malosi o le toatele e auauna faatasi” (Thomas S. Monson, “Church Leaders Speak Out on Gospel Values,” Ensign, May 1999, 118).
Tautino:
O le a ou galue i le fuafuaga sa ou faia e auauna atu ai i se tasi.