“2: O Lo’u Faavae: O Lo Tatou Faasinomaga Paia ma le Faamoemoega,” Mauaina o le Malosi i le Alii: Faafoisia Faalelagona (2020)
“2: O Lo’u Faavae: O Lo Tatou Faasinomaga Paia ma le Faamoemoega,” Mauaina o le Malosi i le Alii: Faafoisia Faalelagona
O Lo’u Faavae: O Lo Tatou Faasinomaga Paia ma le Faamoemoega—Taimi Aofai: 20 Minute
Mafaufau loloto:
O le a le tāua o lo’u agaga i le Atua?
Faitau:
“Ia manatua ua tele lava le taua o agaga i le silafaga a le Atua; Aua, faauta, na mafatia le Alii lo oulua Togiola i le oti i la le tino; o le mea lea na mafatia ai o ia i le tiga o tagata uma, ina ia mafai e tagata uma ona salamo ma o mai ia te ia” (Mataupu Faavae ma Feagaiga 18:10–11).
Maimoa:
“O Lo Tatou Faasinomaga Moni,” o loo maua https://churchofjesuschrist.org/study/video/self-reliance-videos [3:39]. (E lē maua le vitiō? Faitau le tusiga mo le “O Lo Tatou Faasinomaga Moni.”)
O Lo Tatou Faasinomaga Moni
Afai e lē mafai ona e matamata i le vitiō, faitau le tusiga lenei.
Peresitene Dieter F. Uchtdorf:
O le tele o le lē mautonu tatou te oo i ai i lenei olaga, e sau mai lo tatou lē malamalama po o ai i tatou.
O se tasi o tusitala iloga ou te fiafia lava i ai o se tusitala Tenimaka e igoa ia Hans Christian Andersen. I se tasi o ana tala, “O Le Tama’i Pato Auleaga,” na iloa e le pato fafine e i ai se tasi o lana toloa’i e telē ese ai lava ma e ese le auleaga. O isi tama’i pato, sa lē mafai lava ona latou tuua filemu le tama’i pato auleaga. Latou te faasalaina o ia ma le lē alofa.
Mulimuli ane, na tonu ai i le tama’i pato auleaga e sili ai pe a alu ese mai lona aiga, ma sa ia sola ese loa. Ona oo lea i se tasi aso, ua ia vaaia le lele i luga ae o se lafu manulele mamalu. Ua ia lele atu ma mulimuli atu ia i latou i se vaituloto matagofie. Ua tilotilo le tamai pato auleaga i totonu o le vai ma vaaia ai se ata o se pato aulelei. Ua iloa e le tamai pato auleaga o lea ata lafoia o lona lava ata! Ua iloa e ia lona lava faasinomaga moni.
Mafaufau po o fea e te sau ai. O outou o atalii ma afafine o le tamālii aupito silisili, ma aupito mamalu i le atulaulau. E alofa o Ia ia te oe i se alofa e lē iu. E finagalo o Ia mo le mea sili mo oe. O lenei malamalama e suia ai mea uma. E suia ai lou tulaga o i ai nei. E mafai ona suia ai lou lumanai. Ma e mafai ona suia ai le lalolagi.
Maimau pe ana tatou malamalama po o ai i tatou ae o a foi mea ua faapolopolo mai mo i tatou, o le a taumasuasua o tatou loto i le agaga faafetai ma le fiafia, e faamalamalamaina ai o tatou faanoanoaga aupito pogisa i le malamalama ma le alofa o le Atua.
O le a i ai pea lava ni leo o le a fai mai ia i tatou ua tatou valea ma lē talitonu o i tatou o ni pato, ma finau mai o outou o ni tama’i pato auleaga, ma e lē mafai ona avea outou ma nisi lava ituaiga. Ae, ua sili atu lou iloa. E lē o outou o ni tagata masani. E mamalu ma faavavau outou.
Ou te augani atu ia te outou— tau lava o lou tepa ifo i le vai ma vaai ai i lou ata moni! O la’u tatalo ma faamanuiaga pe a e vaavaai atu i lou ata, ia mafai ona e vaai i tua atu o le lē atoatoa ma masalosaloga faaletagata ma ia iloa ai lou tagata moni: o outou o ni atalii ma ni afafine mamalu o le Atua Silisili Ese.” I le suafa paia o Iesu Keriso, amene.
Faitau:
O faamatalaga nei mai i taitai o le Ekalesia:
“O oe o se atalii/afafine o le Atua. O Ia o le Tamā o lou agaga. I le faaleagaga, na e fanau mai i se [gafa] tautupu, o se atalii [afafine] o le Tupu o le Lagi. Ia faamau lena upumoni i lou mafaufau ma taofimau i ai” (Boyd K. Packer, “I Tamaitai ma Alii Talavou,” Ensign, Me 1989, 54).
“Ia faaeteete i le ala e te faafoliga i ai oe lava. Aua e te faafoligaina pe faamatalaina oe lava i ni uiga auaumamā e lē tumau. Na pau lava le uiga auaumamā e tasi e tatau ona faamatalaina ai i tatou o le, o i tatou o se atalii po o se afafine o le Atua. O lena mea moni e silisili atu i lo isi lava uiga, e aofia ai le lanu, galuega, vaaiga faaletino, mamalu, e oo lava i sootaga faalelotu” (Dallin H. Oaks, “How to Define Yourself,” New Era, June 2013, 48).
“E tulagaese oe. O se ituaiga e tasi, ua foafoa i le atamai e faavavau lea ua e maua ai le tofi i le ola e faavavau.
“Ia leai lava se fesiligiaina e lou mafaufau o lou tāua o se tagata patino. O le faamoemoega atoa lava o le fuafuaga o le talalelei o le mauaina lea o se avanoa mo outou taitoatasi ia ausia ai o outou gafatia atoa, o lona uiga o le alualu i luma e faavavau ma le avanoa i le tulaga atua.” (Spencer W. Kimball, “Privileges and Responsibilities of Sisters,” Ensign, Nov. 1978, 105].
Talanoa:
Aisea e tāua tele ai le manatuaina o lo tatou faasinomaga moni ma le gafatia?
Faitau:
“E tutusa lava le lē mafai ona tatou fuaina o le tāua o se isi agaga ma le lē mafai ona tatou fuaina o le lautele o le lalolagi. O tagata uma tatou te feiloai i ai o se TAT (Tagata Aupito Tāua) i lo tatou Tama Faalelagi. O le taimi lava tatou te malamalama ai i lena mea, ona mafai lea ona tatou amata malamalama i le auala e tatau ona tatou faia ai o tatou uso a tagata” (Dieter F. Uchtdorf, “O Outou o O’u Lima,” Liahona Me 2010, 69).
Talanoa:
Aisea e tāua ai le vaai atu i isi e pei ona silasila le Atua ia i latou? E mafai faapefea ona tatou atiina ae lenei meaalofa faaleagaga?
Tautino:
O le a ou faailoa atu se auala se tasi e manatua ai lo’u faasinomaga paia i lenei vaiaso.