“7: Aoao,” Mauaina o le Malosi i le Alii: Faafoisia Faalelagona (2020)

“7: Aoao,” Mauaina o le Malosi i le Alii: Faafoisia Faalelagona

Aoao—Taimi Aofai: 60 Minute

1. Tulaga o Vaisu

Faitau:

O le faitalia o se meaalofa faalelagi mai le Tama Faalelagi. E manao le fili e faalavelave ia i tatou ma faatapulaa lo tatou tomai e faia ai filifiliga lelei. O se tasi auala na te faia ai lenei mea e ala mai lea i vaisu. E mafai ona fai ma vaisu i se tasi le tele o ituaiga o amioga po o vailaau faasaina. E aofia ai ae e lē faatapulaaina i le ava malosi, fualaau faasaina, ponokalafi, feusuaiga, tapaa, meaai, tekinolosi, ma taaloga fai tupe.

Talanoa:

E faapefea ona e faauigaina le upu vaisu?

Gaoioiga (10 minute)

Laasaga 1: Atonu e manatu nisi tagata ua latou fai ni vaisu ae e leai moni lava. Atonu e lagona e isi e leai se mea o sesē e ui ina saisaitia i latou i se amioga ua fai ma vaisu. I le avea ai o se vaega, faitau i tulaga e tolu o amioga ua fai ma vaisu ma le malosi o loo i lalo (sii mai le Dallin H. Oaks, “Faamaloloina mai Mailei o Ponokalafi,” Liahona, Oke. 2015, 32–37). Ia manatua o nei tulaga e faatatau i le faafia ona auai ai o se tasi i le mamanu o le vaisu po o le tuinanau. O lona uiga, mo se faataitaiga, o nei tulaga e lē o faatatau i se mea e pei o se mamanu masani pe maloloina o le taumafa, ae e faatatau i se mamanu o le soona taumafa.

Faailoaina O lenei tulaga e faia ai e se tasi se amioga pe faaaoga se vailaau ma le lē mafaufauina po o le na o le faataitai i ai. E tāua le mātau o amioga e tutupu faafuasei po o le faaaogaina o vailaau o se mea sesē, lea e manaomia ai le faasaoga nai lo le salamo.
Faaaoga i Nisi Taimi. E ui atonu e lē tupu i aso taitasi, po o le lē tupu soo foi, o le tulaga matautia i soo se faaaogaaga faamoemoeina, o le a valaaulia mai ai ma isi mea e sili atu. Po o le a lava le faasamasamanoa po o le lē faia sooa o le faatinoga, o le a mautinoa lava le faateleina o le manao e faaaoga ia mea po o le faia pea o lenei amioga.
Faateleina le Faaaogaina. O le faaaogaina soo ma le loto i ai e mafai ona taitai atu ai i se mausa, o se mamanu o le amio lea e faigata ona pulea ma toetoe lava a otometi. O le masani ona faaaoga, ua iloa ai e tagata le manaomia o ni auala sili atu ia maua lea lava tali e tasi ina ia faamalieina ai le manao po o le tuinanau.

Laasaga 2: I le avea ai o se vaega, faitau le upusii lenei mai ia Peresitene Oaks ona talanoaina lea o fesili o loo mulimuli mai.

“Afai o loo sesē ona faatulagaina amioga o se vaisu, o le tagata e faaaogaina atonu e manatu ua leai sana faitalia ma le malosi e faatoilalo ai le faafitauli. O lenei mea e mafai ona faavaivaia ai le faaiuga e toe faaleleia ma salamo. I le isi itu, o le mauaina o se malamalama manino atu i le loloto o se faafitauli—e faapea atonu e le o loloto tele e pei ona manatu i ai pe ua ogaoga e pei ona fefe i ai—e mafai ona tuuina atu le faamoemoe ma se malosi faateleina e faaaoga ai le faitalia e faamuta ai ma salamo (“Recovering from the Trap of Pornography,” 34–35).

E mafai faapefea ona leaga le faaigoa o se amioga o se vaisu pe a le o se vaisu?

E mafai faapefea ona afaina pe afai e te manatu e le o i ai sou vaisu ae o loo i ai?

2. O Le Tagofia o Mea ua Fai ma Vaisu o se Luitau Faaleagaga ma le Faaletino

Faitau:

O amioga ua fai ma vaisu ma tuinanau e le gata o se luitau faaleagaga ae o se amioga faaletino. Na aoao mai Elder M. Russell Ballard: “E tau mai e tagata sailiili ia i tatou o loo i ai se polokalama i lo tatou faiai e taua o le nofoaga autu o mea faafiafia [tagai National Institute on Drug Abuse, Drugs, Brains, and Behavior—The Science of Addiction (2010), 18, drugabuse.gov/scienceofaddiction/sciofaddiction.pdf]. Pe a faagaoioia e ni fualaau po o ni amioga faapitoa, o le a na puleaina le vaega o o tatou mafaufau lea e faafoe ai o tatou loto, o tatou faamasinoga, faautautaga, ma le tauleleia. O lenei mea e taitai atu ai le tagata ua fai ma vaisu e lafoai mea ua ia iloa e sao” (“E, O Le Fuafuaga Faatogafiti a Lē Ua Leaga,” Liahona, Nov. 2010, 108). E ui atonu o loo tatou faia mea uma e manaomia e faamalolo ai faaleagaga mai se vaisu, ae o le faamalologa atonu e manaomia pea mo o tatou tino, aemaise lava o o tatou faiai. A o tatou galulue i a tatou amioga ua fai ma vaisu, e mafai e o tatou faiai ona suia ma faamaloloina.

Ua tuuina mai e leTala’i La’u Talalelei se faataitaiga o lenei mea e ala i le faamatalaina o luitau mo tagata fou liliu mai, ae o lenei fautuaga e faatatau i soo se tasi e aafia i se vaisu: “O le salamo e ono aofia ai se faagasologa faalelagona ma faaletino. … O le mea lea, o le salamo ma le toe faaleleia e ono telē se taimi e faia ai. O le papatisoga ma le faamauga atonu e lē mafai ona faapea o le a matuā aveesea ai uunaiga faalelagona ma faaletino lea e o faatasi ma nei amioga. E ui lava atonu sa i ai sina manuia muamua o se tagata, ae o nisi faamalologa faalelagona sili atu e ono manaomia e salamo atoatoa ai ma toe faaleleia” (Tala’i La’u Talalelei: O Se Taiala mo le Galuega Faafaifeautalai [2018],189).

Talanoa:

Aisea e tāua ai le malamalama o le vaisu o se luitau faaletino ma faalelagona?

3. Faia o Lau Vaega

Faitau:

E ui e mafai ona faigata le faagasologa o le toe faaleleia, ae ua aumaia e tusitusiga paia le faamoemoe e faapea “ou te mafaia mea uma lava i le faamalosi mai o Keriso ia te au” (Filipi 4:13). O loo i lalo nisi o mataupu faavae lautele e mafai ona fesoasoani ia te oe, faatasi ai ma le fesoasoani a le Alii, ina ia toe faaleleia mai se amioga po o se mausa ua fai ma vaisu.

Tatalo mo le fesoasoani. E mafai ona e ole atu i le Atua mo Lana fesoasoani. O loo i ai o Ia iina ma o le a tali mai i lau tatalo.
Saili le faamoemoe. Ia iloa e mafai e le Faaola ona faamalolo oe a o e faia lau vaega.
Ia faamaoni. O le vaisu e maua ai le mana faalilolilo, ae ua faavaivaia i le faamaoni.
Fesootai ma isi. O fesootaiga e mafai ona faatumu ai manaoga e masani ona lē faatauaina e vaisu.
Fai se fuafuaga. Mafaufau ma le agaga tatalo i suiga e tatau ona e faia, aloese mai tulaga faigata, ma aoao mai au mea sese. Mafaufau ia Moronae ma le tele o vaega o le puipuiga e faasaga ia sa Lamana sa ia tuuina atu i ona tagata e fausiaina (tagai Alema 49).
Ia tali atu mo ia lava. Fesili atu mo se fesoasoani mai se tasi e te faatuatuaina, fai se fuafuaga tulitatao faatasi ma lou tagata faatuatuaina, ma iloilo soo lou alualu i luma.
Ia Maua se Lagolago. E te lē tau faia nao oe lenei mea. Talanoa ma lou aiga, epikopo, taitai, po o uo.
Manatua o oe o se tasi o fanau a le Atua. Aua lava nei faamatalaina oe i lou vaisu. Ia maua le agaalofa mo oe lava ma isi.
Aua le fiu gofie. E tusa lava pe e te toe sese, e leai se taumafaiga e maimau. E alu le taimi i le faamalologa. Ia onosai ia te oe lava ia.

Tagai i le mataupu 2, “Mamanu o Mafaufauga Maloloina,” mo ni manatu faaopoopo.

Faitau:

O nisi tagata atonu e manaomia ona faia ni laasaga tāua e sili atu e faamalolo ai. E aofia ai le fesili atu i se fomai mo se fesoasoani, auai i se fonotaga e 12-laasaga o le toe faaleleia o vaisu, galulue faatasi ma se fomai po o se polokalama o togafitiga, po o se tuufaatasiga o na auala.

Motugaafa:

Mo nisi faamatalaga, iloilo punaoa faaopoopo a le Ekalesia, e pei o na o loo mulimuli mai.

AddressingPornography.ChurchofJesusChrist.org
AddictionRecovery.ChurchofJesusChrist.org
“Vaisu” i lalo o le vaega “Fesoasoani mo le Olaga” o le polokalama o le Gospel Library

4. Lagolagoina o i Latou o loo Tauivi ma Vaisu

Faitau:

O tagata o loo tauivi ma se amioga ua fai ma vaisu po o se mausa e manaomia le lagolago ma le fesoasoani mai ia i latou o siomia i latou. Afai e aapa atu se tasi ia te oe mo se fesoasoani, faafetai atu ia te ia mo le mauaina o le lototele e faamaoni ai ia te oe ma faalogo ma le totoa i mea ua ia fai mai ai. Tatalo mo se fesoasoani i le tausisia o ou lagona, e pei o le ita, tiga, po o le inoino, i le toafimalie. Tau atu i le tagata e te alofa ia te ia ma e te manao e fesoasoani atu. Uunaia le tagata e galulue faatasi ma taitai o le Ekalesia ma isi e mafai ona fesoasoani atu.

Afai e te talitonu e manaomia e se tasi e te alofa i ai se fesoasoani ae e lei talanoa atu ia te oe, tau atu i le tagata lou popolega. Faailoa atu lou alofa, faasoa atu ou atugaluga, ma faamatala atu lou manao e fesoasoani. E tusa lava pe teena e le tagata lau ofo e fesoasoani atu, ia faaauau pea ona faaali atu lou alofa ma aua le fiu.

A o taumafai lē e pele ia te oe e faamalolo, atonu o le a ia lagonaina le lotovaivai ma le leai o se faamoemoe. E mafai ona e tuuina atu le faamalosiauga ma le lagolago e ala i le faailoaina o le alualu i luma o loo faia e lē e pele ia te oe faapea foi ma le molimau atu o loo i ai pea le faamoemoe ma e alofa le Alii ia te ia.

Faitau:

E mafai ona e lagolagoina lē e pele ia te oe e ala i le faamalosia o ana taumafaiga e sau ia Keriso ma faamaloloina. I nisi tulaga, o lau fesoasoani e mafai ona aogā tele ma e oo lava i le laveaiina o le ola. Peitai, e tatau ona e faaeteete ia aua nei lagolagoina se tasi e pele ia te oe i le faia o filifiliga lē lelei pe mafai ai e ia ona faia le agasala. Afai e te paū atu i se mailei o le laveaiina faifaipea o lē e pele ia te oe, e mafai ona e taofia lona toe faaleleia ma faatuai ai le liliu atu o lē e pele ia te oe i le Alii mo se fesoasoani. E eseese tulaga o tagata uma taitoatasi ma e ono manaomia ai se tali e ese. Tatalo mo le Agaga e taialaina oe, ma mafaufau e fesili atu i isi e i ai se poto masani po o se tomai faapitoa mo se fesoasoani.

O le fausaga ma tulafono e mafai ona fesoasoani i se tasi o loo taulimaina le vaisu ia manuia le faagasologa o le toe faaleleia. O se tagata e aofia ai—o se matua po o se toalua, mo se faataitaiga—e mafai ona faatuina ma fesootai manino atu tuaoi, faia tulafono, ma tuu atu i lē pele ia te oe e tali atu mo ana filifiliga, auā o le mauaina o taunuuga e mafai ona maua ai e lē e pele ia te oe se uunaiga faateleina e faamalolo ai. O nei faatinoga e lē faia ina ia pulea ai se tasi e pele ia te oe po o se uo ae ia faaitiitia ai aafiaga le lelei o ana filifiliga i lou olaga ma olaga o isi e pele o siomia ai o ia.

Gaoioiga (10 minute)

Laasaga 1: I le avea ai o se vaega, faitau le ata lenei:

Ua 18 tausaga talu ona faaipoipo Jorge ma Juanita ma o ni tagata liliu mai i le Ekalesia. A o lei auai i le Ekalesia, sa inu pia Jorge mai i lea taimi i lea taimi, ma ni nai vaitaimi o le mamafa tele o lana inu pia, ae sa lē toe faia e ia mo le tele o tausaga. I se tasi aso, na maua ai e Juanita ia Jorge o inu se pia. Ua ia faafitia o loo i ai sona faafitauli, tuumāmāina le tulaga, ma ua folafola mai e tuu. Ua lagona e Juanita e lē o faamaoni o ia ia te ia, ae ua faagalo le mataupu ma lagona le lē toafimalie e talanoa atu ia te ia e uiga i ai. Mo le tele o tausaga, sa avea Jorge ma se tamā ma se tane toaga, ae ua ia taumamao ese mai ma lona aiga a o faateteleina lana inu. E faalilolilo lava, ua manao Jorge e taofi, ae e ui lava i ana taumafaiga silisili, ua faasolo ina sili atu le leaga o le tulaga ua i ai. Ua fefe o ia e tau atu ia Juanita le mea moni ma e lei talanoaina se mea ma lona epikopo.

Laasaga 2: Talanoa ma le vaega po o a tali sa tatau ona maua e Juanita. O a tali e aogā? O a tali e itiiti le aogā?

5. Toalua, Tagata o le Aiga, ma Uo

Faitau:

E mafai ona faataumaoia pe a iloa e se tasi o loo tauivi se e pele ma se amioga tau mausa pe ua fai ma vaisu. Atonu e tuuaia sese e lenei tagata i latou lava, ita, pe popole ona e leai se faamoemoe. E manaomia e se toalua, tagata o le aiga, po o se uo le mana faamalolo o le Faaola e faapei foi o lē e pele ia te ia, o lē ua maua i se amioga faavaisu po o se mausa.

O loo i lalo nisi o fautuaga mo le toalua, tagata o le aiga, ma uo a se tasi o loo tauivi ma vaisu:

E lē na o se faafitauli a se tasi e pele ia te oe. E lē fetaui, ae e aafia ai foi oe. Liliu atu au avega i le Alii ma saili le faamalologa mo oe lava.
Tatalo mo se fesoasoani ma le taitaiga Saili atu i le Alii Ia i ai faatasi ma tagata e alolofa ia te oe.
E lei mafua ia oe le vaisu, e lē mafai ona e puleaina, ma e lē mafai ona e faaleleia. O le luitau lenei a se tasi e pele ia te oe.
Ia maua se lagolago. Talanoa ma isi e te faatuatuaina ma lagona ai le saogalemu. E lē tatau ona e puapuagatia i lou lē talanoa.

Motugaafa:

Mo nisi faamatalaga, tagai i le Taiala Lagolago mo Toalua ma Aiga pe auai i se vaega lagolago a le toalua ma le aiga (AddictionRecovery.ChurchofJesusChrist.org/spouses-and-families).

Faufautua

Filifili se tasi o vitiō o loo i lalo e matamata ai o se vaega.

Mafaufau loloto:

O a mea na e aoaoina mai le vitiō e mafai ona fesoasoani ia te oe?

6. Puipuia o Mea ua Fai ma Vaisu

Faitau:

O le tele o vaisu e mafai ona taofia pe afai e i ai sou malamalamaaga lelei ia te oe lava ma mea e mafai ona faatosina ai oe i amioga ua fai ma vaisu. Mo le toatele o tagata, o mamanu o vaisu e masani ona amata i le faaiuga o tausaga o le talavou. O mataupu faavae o loo i le siata lenei e mafai ona fesoasoani e taofia ai le aafia i vaisu.

Mataupu Faavae	Faamatalaga
Mataupu Faavae 1. Aoga	Faamatalaga Aoao oe lava ia e uiga i mea ua fai ma vaisu ma po o a mea ua fai e le vaisu i se tagata. O le iloaina o le auala e mafai ai e vaisu ona aafia ai lou tino, mafaufau, ma le agaga e mafai ona avea ma se puipuiga aogā.
Mataupu Faavae 2. Lotopulea	Faamatalaga Ua aoao mai e perofeta i le gasologa o taimi le tāua o le lotopulea. O le faatutuina o tapulaa i au amioga ma filifili po o le a le mea o le a e faia ma o le a le faia e mafai ona puipuia ai oe mai le pa’ū atu i le vaisu.
Mataupu Faavae 3. Fesootaiga	Faamatalaga O le i ai o se sootaga malosi ma le Faaola ma isi tagata e mafai ona avea ma se vaega tele o le puipuiga i le aloese mai amioga ua fai ma vaisu. O tagata lelei i lou olaga e mafai ona fesoasoani ia te oe e lagona le alofa o le Atua ma ia faateleina le faafoisia.
Mataupu Faavae 4. Manino	Faamatalaga O le faamaoni i se tasi e uiga i au amioga e mafai ona fesoasoani ia te oe e aloese ai mai amioga e masani ona fesootai ma vaisu, e aofia ai le pepelo, faaseseina, ma le fiatauamiotonuina. O le faailoa e faigata ai mo amioga ua fai ma vaisu ona mauaa.
Mataupu Faavae 5. Mataituina	Faamatalaga Mo mātua, o le iloaina po o ai uo a lau fanau, i le iloaina po o a gaoioiga latou te auai ai, ma le setiina o tulafono manino e mafai ona puipuia ai mai vaisu. Fai ni talanoaga masani ma lau fanau e uiga i nei autu.

Mafaufau loloto:

Mafaufau ia te oe lava po o se tasi e te alofa i ai. O lē fea o mataupu faavae o i le vitiō ma le siata e te manao e faaaoga i lenei sootaga? Mafaufau e faasoa atu lau fuafuaga i lau soa galue.