« ថ្ងៃទី ១១–១៧ ខែ មេសា ។ បុណ្យអ៊ីស្ទើរ ៖ ‹ ទ្រង់នឹងបំផ្លាញសេចក្តីស្លាប់ឲ្យសូន្យបាត់ទៅជាដរាប › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ១១–១៧ ខែ មេសា ។ បុណ្យអ៊ីស្ទើរ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២២
រូបគំនូរផ្នូរទទេ ដោយ ម៉ារីណា គ្រីឆេងកូ
ថ្ងៃទី ១១–១៧ ខែ មេសា
បុណ្យអ៊ីស្ទើរ
« ទ្រង់នឹងបំផ្លាញសេចក្តីស្លាប់ឲ្យសូន្យបាត់ទៅជាដរាប »
កាលបងប្អូនរៀបចំខ្លួនបង្រៀននៅថ្ងៃអាទិត្យបុណ្យអ៊ីស្ទើរ សូមពិចារណាពីរបៀបដែលបងប្អូនអាចជួយសមាជិកក្នុងថ្នាក់ឲ្យមានអំណរគុណកាន់តែខ្លាំងឡើង និងមានទីបន្ទាល់កាន់តែជ្រាលជ្រៅអំពីពលិកម្មដ៏ធួន និងការរស់ឡើងវិញរបស់ព្រះយេស៊ូវគ្រីស្ទ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
ប្រហែលបងប្អូនអាចអញ្ជើញសមាជិកក្នុងថ្នាក់ឲ្យចែកចាយអ្វីដែលពួកគេ ឬគ្រួសាររបស់ពួកគេបានធ្វើដើម្បីពង្រឹងសេចក្ដីជំនឿរបស់ពួកគេទៅលើព្រះយេស៊ូវគ្រីស្ទ និងដង្វាយធួនរបស់ទ្រង់អំឡុងរដូវកាលបុណ្យអ៊ីស្ទើរនេះ ។
បង្រៀនគោលលទ្ធិ
ដោយសារព្រះអង្គសង្គ្រោះបានយកឈ្នះលើសេចក្ដីស្លាប់ នោះយើងនឹងរស់ម្ដងទៀតផងដែរ ។
-
ដោយសារថ្ងៃនេះគឺជាថ្ងៃអាទិត្យបុណ្យអ៊ីស្ទើរ សូមពិចារណាដល់ការរំឭកដំណើររឿងក្នុងបទគម្ពីរអំពីបុណ្យអ៊ីស្ទើរដំបូង—ការរស់ឡើងវិញរបស់ព្រះយេស៊ូវគ្រីស្ទ ( សូមមើល យ៉ូហាន ២០:១–១៧ ) ។ បងប្អូនអាចអញ្ជើញសិស្សក្នុងថ្នាក់ម្នាក់ឲ្យប្រាប់ដំណើររឿងនោះជាពាក្យសម្ដីរបស់គាត់ផ្ទាល់ ។ បងប្អូនក៏អាចបង្ហាញវីដេអូ « He Is Risen » ( នៅលើគេហទំព័រ ChurchofJesusChrist.org ) បានដែរ ។ សមាជិកក្នុងថ្នាក់ក៏អាចរីករាយនឹងការច្រៀងបទចម្រៀងក្នុងទំនុកតម្កើងអំពីព្រះអង្គសង្គ្រោះ និងការអានបទគម្ពីរដែលទាក់ទងផងដែរ ( សេចក្ដីយោងមាននៅខាងក្រោមបទនីមួយៗនៅក្នុងទំនុកតម្កើង ) ។ រួចហើយសមាជិកក្នុងថ្នាក់អាចចែកចាយឃ្លាដែលពួកគេចូលចិត្តមកពីទំនុកតម្កើង និងអារម្មណ៍របស់ពួកគេអំពីព្រះអង្គសង្គ្រោះ ។
-
ដើម្បីជួយសិស្សរបស់បងប្អូនឲ្យមានអំណរគុណដល់របៀបដែលព្រះគម្ពីរសញ្ញាចាស់ថ្លែងទីបន្ទាល់អំពីព្រះយេស៊ូវគ្រីស្ទ បងប្អូនអាចអញ្ជើញពួកគេឲ្យរំឭកបទគម្ពីរនៅក្នុងតារាងក្នុង គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ក៏ដូចជាវគ្គព្រះគម្ពីរមរមនដែលអមមកជាមួយនឹងតារាងនេះផងដែរ ។ តើយើងរៀនអ្វីខ្លះអំពីព្រះអង្គសង្គ្រោះ និងបេសកកម្មរបស់ទ្រង់មកពីវគ្គបទគម្ពីរទាំងនេះ ? ហេតុអ្វីវាមានតម្លៃដើម្បីដឹងពីការព្យាករទាំងនេះ ?
យើងអាចរកឃើញសេចក្ដីសុខសាន្ដ និងសេចក្ដីអំណរតាមរយៈដង្វាយធួនរបស់ព្រះអង្គសង្គ្រោះ ។
-
គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ មាននូវបញ្ជីបទគម្ពីរមួយ ដែលពិពណ៌នាអំពីសេចក្ដីសុខសាន្ដ និងសេចក្ដីអំណរដែលកើតមានតាមរយៈព្រះយេស៊ូវគ្រីស្ទ ។ ប្រសិនបើសមាជិកក្នុងថ្នាក់បានអានបទគម្ពីរទាំងនេះនៅផ្ទះ សូមលើកទឹកចិត្តពួកគេឲ្យចែកចាយគំនិត និងអារម្មណ៍របស់ពួកគេអំពីបទគម្ពីរនេះ ។ ឬ បងប្អូនអាចអានបទគម្ពីរពីរបីរួមគ្នាក្នុងថ្នាក់ ហើយនិយាយអំពីសេចក្ដីសុខសាន្ដ និងសេចក្ដីអំណរដែលយើងមានដោយសារតែព្រះអង្គសង្គ្រោះ និងដង្វាយធួនរបស់ទ្រង់ ។ តើយើងអាចចែកចាយពរជ័យទាំងនេះជាមួយមនុស្សដែលអាចកំពុងពិបាករកឃើញសេចក្ដីសុខសាន្ដ និងសេចក្ដីអំណរនៅក្នុងជីវិតរបស់ពួកគេដោយរបៀបណា ? បងប្អូនក៏អាចអញ្ជើញឲ្យសិស្សក្នុងថ្នាក់ម្នាក់អានសារលិខិតរបស់ប្រធាន រ័សុល អិម ណិលសុន « អំណរ និង ការរស់រានខាងវិញ្ញាណ » ( Liahona ខែ វិច្ឆិកា ឆ្នាំ ២០១៦ ទំព័រ ៨១–៨៤ ) អំឡុងសប្ដាហ៍ពីមុនថ្ងៃបង្រៀន ហើយមកកាន់ថ្នាក់រៀនដោយបានរៀបចំខ្លួន ដើម្បីចែកចាយអ្វីដែលសារលិខិតនេះបង្រៀនអំពីការរកឃើញសេចក្ដីអំណរនៅក្នុងព្រះអង្គសង្គ្រោះ ។
-
បងប្អូនអាចមានអារម្មណ៍បំផុសគំនិតឲ្យដឹកនាំការពិភាក្សាមួយអំពីរបៀបជួយមនុស្សដទៃឲ្យរកឃើញសេចក្ដីសុខសាន្ដ និងសេចក្ដីអំណរនៅក្នុងព្រះគ្រីស្ទ ។ បងប្អូនអាចអញ្ជើញសមាជិកក្នុងថ្នាក់ឲ្យគិតអំពីនរណាម្នាក់ដែលពួកគេស្គាល់—ប្រហែលជានរណាម្នាក់ដែលពួកគេផ្ដល់ការងារបម្រើ—ដែលអាចត្រូវការការគាំទ្រ និងការបម្រើរបស់ពួកគេ ឬសូម្បីគ្រាន់តែជាការស្ដាប់ទីបន្ទាល់របស់ពួកគេអំពីព្រះគ្រីស្ទ និងដង្វាយធួនរបស់ទ្រង់ ។ សូមលើកទឹកចិត្តសិស្សក្នុងថ្នាក់ឲ្យយោងទៅបទគម្ពីរ ( ដូចជាបទគម្ពីរដែលមាននៅក្នុង « ធនធានបន្ថែមទាំងឡាយ » ) កាលពួកគេពិចារណាពីការបម្រើ ដែលពួកគេអាចផ្ដល់ ឬទីបន្ទាល់ដែលពួកគេអាចចែកចាយដើម្បីពង្រឹងដល់អស់អ្នកដែលនៅជុំវិញខ្លួនគេ ។ សូមអញ្ជើញឲ្យសិស្សក្នុងថ្នាក់ពីរបីនាក់ចែកចាយយោបល់របស់ពួកគេអំពីការបម្រើ ដូចដែលព្រះយេស៊ូវបានធ្វើ ។
ថ្ងៃដ៏អាប់អួរនៅគាល់កូថា ដោយ ជេ ឃើក រីឆាដ
តាមរយៈដង្វាយធួនរបស់ទ្រង់ ព្រះយេស៊ូវគ្រីស្ទមានព្រះចេស្ដាដើម្បីជួយយើងឲ្យយកឈ្នះលើអំពើបាប សេចក្ដីស្លាប់ ការសាកល្បង និងភាពទន់ខ្សោយទាំងឡាយ ។
-
របៀបមួយដើម្បីជួយសិស្សក្នុងថ្នាក់ឲ្យសញ្ជឹងគិតពីពរជ័យ ដែលកើតមានតាមរយៈដង្វាយធួនរបស់ព្រះអង្គសង្គ្រោះ អាចជាការសរសេរចំណងជើងដូចនេះនៅលើក្ដារខៀន ៖ អំពើបាប ការស្លាប់ ការសាកល្បង និង ភាពទន់ខ្សោយ ។ សិស្សម្នាក់ៗនៅក្នុងថ្នាក់អាចអានខគម្ពីរមួយពីក្នុង « ធនធានបន្ថែមទាំងឡាយ » ហើយពិចារណាអំពីរបៀបដែលព្រះអង្គសង្គ្រោះ ជួយយើងឲ្យយកឈ្នះលើរឿងដែលបានសរសេរនៅលើក្ដារខៀននេះ ។ សមាជិកក្នុងថ្នាក់អាចសរសេរសេចក្ដីយោងបទគម្ពីររបស់ពួកគេនៅក្រោមចំណងជើងមួយ ឬច្រើននៅលើក្ដារខៀន ហើយចែកចាយទីបន្ទាល់របស់ពួកគេអំពីព្រះអង្គសង្គ្រោះ និងដង្វាយធួនរបស់ទ្រង់ ។
-
ដំណើររឿង និងរឿងប្រៀបប្រដូចនានាអាចជួយយើងឲ្យយល់ដឹងអំពីដង្វាយធួនរបស់ព្រះយេស៊ូវគ្រីស្ទ ។ ឧទាហរណ៍ បងប្អូនអាចអញ្ជើញសិស្សក្នុងថ្នាក់ម្នាក់ឲ្យចែកចាយដំណើររឿង ឬរឿងប្រៀបធៀបមួយនៅក្នុងសារលិខិតរបស់អែលឌើរ វ៉លធើរ អែហ្វ ហ្គុងស្សាឡែស្ស « ការពាល់របស់ព្រះអង្គសង្គ្រោះ » ( Liahona ខែ វិច្ឆិកា ឆ្នាំ ២០១៩ ទំព័រ ៩០–៩២ ) ឬ សារលិខិតរបស់ស៊ិស្ទើរ នីល អែហ្វ ម៉ារ៉ត « ការចងភ្ជាប់នឹងព្រះ និងការជួសជុលការបាក់បែក » ( Liahona ខែ វិច្ឆិកា ឆ្នាំ ២០១៧ ទំព័រ ១០–១២ ) ។ តើដំណើររឿង ឬរឿងប្រៀបធៀបទាំងនេះបង្រៀនយើងអ្វីខ្លះអំពីដង្វាយធួនរបស់ព្រះគ្រីស្ទ ? សូមអញ្ជើញសមាជិកក្នុងថ្នាក់ឲ្យធ្វើការជាដៃគូដើម្បីគិតអំពីដំណើររឿង ឬរឿងប្រៀបធៀបផ្ទាល់ខ្លួនរបស់ពួកគេ ។
-
តើយើងរៀនអ្វីខ្លះមកពីខគម្ពីរដូចតទៅនេះអំពីតម្លៃដែលព្រះយេស៊ូវគ្រីស្ទបានបង់សម្រាប់សេចក្ដីសង្គ្រោះរបស់យើង ៖ អេសាយ ៥៣:៣–៥; ម៉ូសាយ ៣:៧; គោលលទ្ធិ និង សេចក្ដីសញ្ញា ១៩:១៦–១៩ ? តើព្រះវរបិតាសួគ៌របស់យើងបានបង់តម្លៃអ្វីខ្លះ ? ( សូមមើល យ៉ូហាន ៣:១៦ ) ។
ធនធានបន្ថែមទាំងឡាយ
បទគម្ពីរអំពីដង្វាយធួនរបស់ព្រះយេស៊ូវគ្រីស្ទ ។
ការកែលម្អការបង្រៀនរបស់យើង
សូមអរគុណដល់សិស្សរបស់បងប្អូន ។ « សូមកុំផ្តោតអារម្មណ៍តែលើមេរៀនខ្លាំងពេក រហូតដល់បងប្អូនភ្លេចអរគុណដល់អ្នករៀនចំពោះការចូលរួមចំណែករបស់ពួកគេ ។ ពួកគេចាំបាច់ត្រូវដឹងថា បងប្អូនមានអំណរគុណចំពោះការស្ម័គ្រចិត្តរបស់ពួកគេដើម្បីចែកចាយអំពីគំនិតយោបល់ និងទីបន្ទាល់របស់ពួកគេនោះ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣៣ ) ។