« ថ្ងៃទី ១–៧ ខែ មីនា ។ គោលលទ្ធិ និង សេចក្តីសញ្ញា ២០-២២ ៖ ‹ ការកើនឡើងនៃសាសនាចក្ររបស់ព្រះគ្រីស្ទ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ គោលលទ្ធិ និង សេចក្តីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ១–៧ ខែ មីនា ។ គោលលទ្ធិ និង សេចក្តីសញ្ញា ២០-២២ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២១

រូបភាព

ផ្ទះរបស់ពេត្រុស វិតមើរ

ផ្ទះរបស់ពេត្រុស វិតមើរ ដោយ អេអាយ រ៉ោន

ថ្ងៃទី ១–៧ ខែ មីនា

គោលលទ្ធិ និង សេចក្ដីសញ្ញា ២០-២២

« ការកើនឡើងនៃសាសនាចក្ររបស់ព្រះគ្រីស្ទ »

សូមកត់ត្រាចំណាប់អារម្មណ៍ខាងវិញ្ញាណរបស់អ្នក នៅពេលអ្នកសិក្សា គោលលទ្ធិ និង សេចក្ដីសញ្ញា ២០-២២ ។ ចំណាប់អារម្មណ៍ទាំងនេះមួយចំនួនអាចដឹកនាំទៅរកគំនិតដែលនឹងជួយអ្នក នៅពេលអ្នកបង្រៀន ។

កត់ត្រាចំណាប់អារម្មណ៍របស់អ្នក

រូបភាព

រូបតំណាងចែកចាយ

អញ្ជើញឲ្យចែកចាយ

អំឡុងពេលនៃការសិក្សានៅឯគេហដ្ឋានរបស់ពួកគេ សិស្សអាចទទួលបានការយល់ដឹងអំពីពរជ័យនៃការមានសាសនាចក្រពិតនៅលើផែនដី ។ សូមអញ្ជើញពួកគេឲ្យចែកចាយវគ្គបទគម្ពីរមួយមកពីកណ្ឌទាំងនេះដែលឆ្លុះបញ្ចាំងពីហេតុផលដែលពួកគេមានអំណរគុណចំពោះសាសនាចក្រដែលត្រូវបានស្ដារឡើងវិញ ។

រូបភាព

រូបតំណាងការបង្រៀន

បង្រៀនគោលលទ្ធិ

គោលលទ្ធិ និង សេចក្ដីសញ្ញា ២០-២១

សាសនាចក្រនៃព្រះយេស៊ូវគ្រីស្ទត្រូវបានស្ដារឡើងវិញ ។

សិស្សអាចទទួលបានប្រយោជន៍មកពីការសិក្សាពីភាពស្រដៀងគ្នារវាងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងសាសនាចក្រដែលព្រះគ្រីស្ទបានស្ថាបនាកាលពីបុរាណ ។ អ្នកអាចគូរតារាងមួយនៅលើក្ដារខៀនដោយមានជួរឈរបួន ដោយមានដាក់ចំណងជើងថា គោលលទ្ធិ, ពិធីបរិសុទ្ធ, សិទ្ធិអំណាចបព្វជិតភាព និងពួកព្យាការី ។ អ្នកអាចផ្ដល់សេចក្ដីយោងដូចតទៅនេះអំពីសាសនាចក្ររបស់ព្រះគ្រីស្ទ កាលពីបុរាណ ៖ ម៉ាថាយ ១៦:១៥-១៩, យ៉ូហាន ៧:១៦-១៧, អេភេសូរ ២:១៩-២២, នីហ្វៃទី ៣ ១១:២៣-២៦, មរ៉ូណៃ ៤-៥ ។ សិស្សអាចស្គាល់អ្វីដែលបទគម្ពីរនីមួយៗបង្រៀនអំពីសាសនាចក្ររបស់ព្រះគ្រីស្ទ ហើយសរសេរសេចក្ដីយោងទាំងនោះនៅក្នុងជួរឈរសមរម្យនៅលើក្ដារខៀន ។ ( សេចក្ដីយោងមួយចំនួនអាចអនុវត្តចំពោះជួរឈរលើសពីមួយ ) ។ ពួកគេអាចធ្វើដូចគ្នាសម្រាប់សេចក្ដីយោងដូចតទៅនេះអំពីសាសនាចក្រដែលបានស្ដារឡើងវិញរបស់ព្រះយេស៊ូវគ្រីស្ទ ៖ គោលលទ្ធិ និង សេចក្ដីសញ្ញា ២០:១៧-២៥, ៦០, ៧២-៧៩, ២១:១-២ ។ តើអ្នករៀនអ្វីខ្លះអំពីការស្ដារឡើងវិញនៃសាសនាចក្ររបស់ព្រះគ្រីស្ទចេញពីការប្រៀបធៀបនេះ ?

គោលលទ្ធិ និង សេចក្ដីសញ្ញា ២០:៣៧, ៧៥-៧៩, ២២

ពិធីបរិសុទ្ធដ៏ពិសិដ្ឋជួយយើងឲ្យប្រែក្លាយដូចជាព្រះអង្គសង្គ្រោះ ។

សូមទុកពេលឲ្យសិស្សសិក្សានូវគុណសម្បត្តិសម្រាប់ពិធីបុណ្យជ្រមុជទឹកដែលបានរៀបរាប់នៅក្នុង គោលលទ្ធិ និង សេចក្ដីសញ្ញា ២០:៣៧ ហើយសុំឲ្យពួកគេពិចារណាពីសំណួរដូចតទៅនេះ ៖ តើគុណសម្បត្តិទាំងនេះជួយយើងរៀបចំខ្លួនទទួលពិធីបុណ្យជ្រមុជទឹកចូលក្នុងសាសនាចក្ររបស់ព្រះអម្ចាស់តាមរបៀបណា ? តើការយកព្រះនាមរបស់ព្រះគ្រីស្ទមកដាក់លើខ្លួនយើងមានន័យដូចម្ដេច ? ( សូមមើល ម៉ាថាយ ៥:៥-១២ ) ។ តើអ្វីទៅដែលបានជួយអ្នកឲ្យថែរក្សាការ « ប្ដេជ្ញាថានឹងបម្រើ[ព្រះយេស៊ូវគ្រីស្ទ]ដល់ចុងបំផុត » ?
តើ កណ្ឌទី ២២ បង្រៀនអ្វីខ្លះអំពីពិធីបុណ្យជ្រមុជទឹក ? សុំឲ្យសិស្សនឹកស្រមៃថា ពួកគេមានមិត្តម្នាក់ដែលបានជ្រមុជទឹកចូលក្នុងព្រះវិហារមួយផ្សេងទៀត ។ ពួកគេអាចអានកណ្ឌនេះដើម្បីស្វែងរកការប្រឹក្សាដើម្បីជួយមិត្តរបស់ពួកគេឲ្យយល់ពីហេតុផលដែលពិធីបុណ្យជ្រមុជទឹកចូលទៅក្នុងសាសនាចក្រដែលបានស្ដារឡើងវិញរបស់ព្រះអង្គសង្គ្រោះគឺជារឿងដ៏ចាំបាច់ ។ សិស្សអាចសម្ដែងដំណើររឿងរួមគ្នា ឬជាគូ ។
សូមអាន គោលលទ្ធិ និង សេចក្ដីសញ្ញា ២០:៧៥-៧៩ រួមគ្នា ហើយអញ្ជើញសិស្សឲ្យពិចារណាពីអ្វីដែលខគម្ពីរទាំងនេះបង្រៀនអំពីព្រះអង្គសង្គ្រោះ និងព្រះចេស្ដារបស់ទ្រង់នៅក្នុងជីវិតរបស់ពួកគេ ។ តើពាក្យ ឬឃ្លាអ្វីទៅដែលធ្វើឲ្យយើងមានចំណាប់អារម្មណ៍ នៅពេលយើងអានពាក្យអធិស្ឋានសាក្រាម៉ង់តាមរបៀបនេះ ? តើហេតុអ្វីបានជាវាសំខាន់ក្នុងការទទួលទានសាក្រាម៉ង់ជារៀងរាល់សប្ដាហ៍ ?

រូបភាព
ឌីកុនកំពុងចែកសាក្រាម៉ង់

ពិធីសាក្រាម៉ង់គឺជាពិធីបរិសុទ្ធពិសិដ្ឋមួយ ។

គោលលទ្ធិ និង សេចក្តីសញ្ញា ២០:៣៨–៦០

ការបម្រើបព្វជិតភាពផ្ដល់ពរជ័យដល់សមាជិកសាសនាចក្រ និងក្រុមគ្រួសាររបស់ពួកគេ ។

ការរៀបរាប់អំពីកាតព្វកិច្ចបព្វជិតភាពនៅក្នុង គោលលទ្ធិ និង សេចក្ដីសញ្ញា ២០:៣៨-៦០ អាចជួយសិស្សរបស់អ្នកឲ្យពង្រីកការយល់ដឹងរបស់ពួកគេអំពីការបម្រើបព្វជិតភាព ។ ប្រហែលជាអ្នកអាចអញ្ជើញពួកគេឲ្យនឹកស្រមៃថា មិត្ត ឬសមាជិកគ្រួសារម្នាក់ដែលទើបជ្រមុជទឹកគឺជិតត្រូវបានតែងតាំងតំណែងមួយក្នុងបព្វជិតភាព ។ តើពួកគេនឹងប្រើខគម្ពីរទាំងនេះដើម្បីជួយគាត់ឲ្យយល់កាតព្វកិច្ចរបស់គាត់តាមរបៀបណា ? តើពួកគេនឹងចែកចាយគំរូអ្វីខ្លះដើម្បីជួយគាត់យល់ពីរបៀបបំពេញកាតព្វកិច្ចទាំងនោះអាចជួយគាត់ប្រែក្លាយកាន់តែដូចជាព្រះយេស៊ូវគ្រីស្ទ ? ប្រហែលជាពួកគេអាចសម្ដែងការសន្ទនានេះ ។

លើសពីនេះទៀត តើពួកគេអាចប្រើខគម្ពីរទាំងនេះដើម្បីជួយបងស្រីដែលទើបជ្រមុជទឹកហើយ ឲ្យមើលឃើញពីរបៀបដែលគាត់អាចចូលរួមនៅក្នុងកិច្ចការដែលបានរៀបរាប់នៅទីនេះដោយរបៀបណា ? ( សេចក្ដីថ្លែងការណ៍នៅក្នុង « ធនធានបន្ថែមទាំងឡាយ » អាចជួយ ) ។

គោលលទ្ធិ និង សេចក្តីសញ្ញា ២១:៤–៧

យើងត្រូវបានប្រទានពរឲ្យ នៅពេលយើងទទួលបន្ទូលរបស់ព្រះអម្ចាស់តាមរយៈព្យាការីរបស់ទ្រង់ ។

គោលលទ្ធិ និង សេចក្តីសញ្ញា ២១ មានសេចក្ដីថ្លែងការណ៍ដ៏មានអនុភាពអំពីការធ្វើតាមព្យាការីរបស់ព្រះអម្ចាស់ ។ ដើម្បីជួយសិស្សឲ្យពិចារណា ហើយពិភាក្សាពីសេចក្ដីថ្លែងការណ៍ទាំងនេះ សុំឲ្យពួកគេស្រាវជ្រាវ ខទី ៤-៧ រកឃ្លាមួយដែលពួកគេចង់យល់ដឹងកាន់តែប្រសើរ ហើយសរសេរឃ្លានោះនៅលើក្ដារខៀន ។ សូមជ្រើសរើសឃ្លាមួយចំនួន ហើយពិភាក្សាជាមួយសិស្សអំពីអត្ថន័យរបស់វា ។ តើឃ្លាទាំងនេះបង្រៀនយើងអ្វីខ្លះអំពីការធ្វើតាមព្យាការីរបស់ព្រះអម្ចាស់ ?

រូបភាព

រូបតំណាងធនធានបន្ថែមនានា

ធនធានបន្ថែមទាំងឡាយ

យើងគ្រប់គ្នាធ្វើការជាមួយនឹងអំណាចបព្វជិតភាព ។

« បុរសត្រូវបានតែងតាំងឲ្យកាន់តំណែងក្នុងបព្វជិតភាព ហើយទាំងបុរសទាំងស្ត្រីត្រូវបានអញ្ជើញឲ្យដកពិសោធន៍នូវអំណាច និង ពរជ័យនៃបព្វជិតភាពនៅក្នុងជីវិតរបស់ពួកគេ ។ …

« … [ស្ត្រី]បង្រៀន ហើយអធិស្ឋាននៅក្នុងក្រុមជំនុំ បំពេញតួនាទីជាច្រើននៃភាពជាអ្នកដឹកនាំ និងការបម្រើ ចូលរួមនៅក្នុងក្រុមប្រឹក្សាបព្វជិតភាពនៅកម្រិតមូលដ្ឋាន និងកម្រិតទូទៅ ហើយបម្រើបេសកកម្មជាផ្លូវការនៅជុំវិញពិភពលោក ។ នៅក្នុងវិធីទាំងនេះ និងវិធីផ្សេងទៀត ស្ត្រីអនុវត្តសិទ្ធិអំណាចបព្វជិតភាព ទោះជាពួកគេពុំត្រូវបានតែងតាំងដល់តំណែងមួយក្នុងបព្វជិតភាពក្ដី ។…

« … នៅក្នុងការហៅខាងសាសនា ពិធីបរិសុទ្ធនៅក្នុងព្រះវិហារបរិសុទ្ធ ទំនាក់ទំនងគ្រួសារ និងការងារបម្រើដោយស្ងប់ស្ងាត់ជាបុគ្គល ស្ត្រី និងបុរសពួកបរិសុទ្ធថ្ងៃចុងក្រោយឆ្ពោះទៅមុខជាមួយនឹងអំណាច និងសិទ្ធិអំណាចបព្វជិតភាព ។ ឯករាជ្យភាពនេះរបស់បុរស និងស្ត្រីនៅក្នុងការសម្រេចកិច្ចការរបស់ព្រះតាមរយៈព្រះចេស្ដារបស់ទ្រង់គឺជាស្នូលចំពោះដំណឹងល្អរបស់ព្រះយេស៊ូវគ្រីស្ទ » ( Gospel Topics « Joseph Smith’s Teachings about Priesthood, Temple, Women » topics.ChurchofJesusChrist.org ) ។

ការកែលម្អការបង្រៀនរបស់យើង

យើងរៀនជាមួយគ្នា ។ ក្នុងនាមជាគ្រូបង្រៀន អ្នកកំពុងរៀនជាមួយសិស្សរបស់អ្នក ។ សូមបង្ហាញពីឆន្ទៈរបស់អ្នកក្នុងការចង់រៀនសូត្រពីពួកគេតាមរយៈការស្ដាប់គំនិតយោបល់របស់ពួកគេ ។